Kun Paano Maorganisar nin Teokratikong Libreriya

SI Sherezade, sarong matali na Kastilang sadit na aking babae, kuwatro anyos kan paisihon kan saiyang maestra an mga eskuwela na kokoloran ninda an mga retrato ni “Santa Claus.” Tolos-tolos na nakiolay si Sherezade na togotan siang dai magpartisipar. Saiyang ipinaliwanag na dai sia totogotan kan saiyang konsensia na gibohon iyan.

Nabigla kan pagkontrang ini, sinabihan sia kan maestra na arog man sana idto sa pagkolor nin sarong retrato nin munyeka asin na mayo nin maraot dian. Si Sherezade nagsimbag: “Kun munyeka po sana iyan, mas gusto ko pong magdrowing ako mismo nin sarong munyeka kun oyon kamo.”

Sa saro pang okasyon sinabihan an mga eskuwela na koloran an bandera kan nasyon. Sa giraray nakiolay si Sherezade kun puwedeng iba na sana an gibohon nia. Sa katuyohan nin pagpaliwanag, iinestorya nia sa maestra an dapit ki Sadrac, Mesac, asin Abednego.​—Daniel 3:​1-28.

Dai nahaloy pakatapos kaiyan inapodan kan maestra sa telepono an ina ni Sherezade tanganing ipahayag an saiyang pagngalas. “Sa nagkapirang okasyon an saimong aki nagtaram sako manongod sa saiyang konsensia,” an sabi nia. “Maiimahinar mo daw iyan? Sarong aki sa edad niang iyan nagpapaliwanag sako kun taano ta riniribok sia kan saiyang konsensia! Helinga, dai ako oyon sa itinotokdo mo saiya, pero sinisierto ko saimo na nagigin kang mapanggana. Asin gusto kong sabihon saimo na hinahangaan asin iginagalang ko an saimong aki.”

Paano an sarong kuwatro anyos na aki puwedeng magkaigwa nin konsensia na nasanay sa Biblia? An saiyang ina, si Marina, nagpaliwanag na si Sherezade igwa nin sadiri niang teokratikong libreriya sa saiyang kuwarto. Kabale sa libreriya an saiyang personal na mga kopya nin An Torrengbantayan, na saiyang lininyahan an mga simbag, an saiyang mga literatura para sa paghuhulit, asin an gabos na publikasyon kan Watchtower Society na ilinuwas poon kan sia mamundag. An paborito nia sa saiyang libreriya iyo an audiotape na My Book of Bible Stories, na hinihinanyog nia kada banggi mantang sinusundan nin pagbasa sa saiyang libro. An mga kasaysayan na ini sa Biblia an nagpangyari saiya na gumibo kan mga desisyon na nasambitan sa enotan.

Makatatabang daw saindo asin sa saindong mga aki an sarong organisadong marhay na libreriya? Taano ta kaipuhan an libreriya sa harong?

“An Sarong Libreriya Bakong Luho”

“An sarong libreriya bakong luho, kundi saro sa mga kinakaipuhan sa buhay,” an ipinahayag ni Henry Ward Beecher. Sierto nanggad, haros gabos kita igwa nin saro kaining “mga kinakaipuhan sa buhay,” minsan ngani dai tinutuyo. Paano iyan totoo? Huli ta dawa kun mayo kitang ibang sadiri kundi an Biblia, may sadiri kitang maaapod na libreriya.

An Biblia talagang sarong teokratikong libreriya na maaapod na pinakamarahay. Kan ikaapat na siglo, inimbento ni Jerome an Latin na fraseng Bibliotheca Divina (Banal na Libreriya) sa pagladawan kan kompletong koleksion nin ipinasabong na mga libro na inaapod tang Biblia. Tinawan kita ni Jehova kan sagradong libreriyang ini tanganing magtao sato nin praktikal na tabang, instruksion, asin paggiya. Iyan sarong bagay na maninigong nungka niatong pagmenuson. An pagkakaigwa sana kan bilog na Biblia nangangahulogan na igwa kita nin mas mahiwas na libreriya kisa kan kadaklan na lingkod nin Dios kan mga panahon na nakaagi.

Kan an mahal na isinurat nin kamot na mga manuskrito pa sana an makukua, an pipira, kun igwa man, na pribadong harong puwedeng ipag-orgolyo an kompletong Biblia. Kan boot ni Pablo na pag-adalan an Kasuratan durante kan saiyang ultimong pagkabilanggo sa Roma, kaipuhan niang pakiolayan si Timoteo na darahan sia nin nagkapirang balumbon hale sa Asia Minor​—posibleng mga kabtang kan Hebreong Kasuratan. (2 Timoteo 4:13) Alagad, an mga sinagoga talagang sarayan nin koleksion nin mga balumbon, asin si Jesu-Cristo pati an saiyang mga apostol pareho naggamit kan mga libreriyang ini sa saindang paghuhulit. (Lucas 4:​15-17; Gibo 17:​1-3) Makaoogma nanggad, an Kasuratan mas madali nang makua ngonyan kisa kaidtong enot na siglo.

Sa tabang kan pagkaimbento nin makina sa pag-imprenta, ngonyan an haros gabos na lingkod nin Dios​—magin ano man an saindang tataramon—​makakakua na nin bilog na Biblia sa rasonableng kantidad. Yaon man sato an pambihirang oportunidad na dugangan an sagradong “libreriyang” ini. Sa laog nin nakaaging sarong siglo, an “maimbod asin madonong na oripon” nagin sibot sa pagtagama nin espirituwal na kakanon sa igong panahon.​—Mateo 24:​45-47.

Pero posible na dai kita lubos na makikinabang sa mahalagang impormasyon na ini kun dai kita maorganisar nin personal na teokratikong libreriya. Paano iyan magigibo? An enot na tangga, siyempre, iyo na kumua kan mga libro na kaipuhan sa siring na libreriya. Sulit na marhay an paghihingoa, huli ta pangyayarihon kita kaiyan na makua tolos an eksaktong impormasyon na kaipuhan niato sa pagresolber nin mga problema asin sa pagsimbag sa mga hapot sa Biblia.

Anong mga Libro an Kaipuhan Ko?

Napaghorophorop na lamang daw nindo kun paano nindo mareresolberan an problema sa komunikasyon sa saindong pag-agoman o kun paano nindo matatabangan an saindong mga aki na magsabing habo sa droga? Paano nindo matatabangan an sarong katood na nagtitios nin depresyon? Ikakapaliwanag daw nindo nin malinaw kun ano an satong ebidensia na an Dios nag-eeksister asin kun taano ta tinotogotan nia an karatan? Ano an irinirepresentar kan mapulang hayop sa Kapahayagan kapitulo 17.

An mga ini asin kadakol na iba pang hapot masisimbag kun igwa kamo nin igong teokratikong libreriya. An Watchtower Society nagpublikar nin mga artikulo sa libro, brochure, asin magasin na nagpapaliwanag nin kompletong mga tema sa Kasuratan. Saro pa, an literaturang ini nagpapaliwanag nin mga bagay dapit sa pamilya, nagpapakosog kan satong pagtubod sa Dios asin sa Biblia, nagpapangyari sato na mapaoswag an satong kakayahan sa paghuhulit, asin nagtatabang sato na masabotan an mga hula sa Biblia.

An kadaklan kan mga publikasyon na inimprenta kan Sosyedad durante kan nakaaging 20 taon makukua pa ngonyan. Kun dai pa sana kamo nahahaloy na makalaog sa katotoohan, kapakipakinabang para sa saindo na kumua kan gabos na literaturang iyan na makukua sa saindong tataramon. Tibaad makukua sa saindong tataramon an mga bound na tomo kan An Torrengbantayan. An ekselenteng mga reperensia, arog baga kan Insight on the Scriptures asin an Comprehensive Concordance, ipinublikar man sa manlaenlaen na tataramon. Alagad, an pakakua kan mga librong ini enot sanang paagi.

Organisaron an Saindong Libreriya!

Mahalaga an pakaaram na igwa kamo kan libro sa sarong lugar, pero an paghanap sa saro na kaipuhan nindo orog na mahalaga. Kun masasayang an satong panahon sa paghanap kan reperensiang kaipuhan ta, posibleng mawawaran kita nin interes sa bagay. Sa ibong na kampi, kun aregladong marhay an satong mga libro, sa sarong kombenyenteng lugar, mas may tendensia kitang gumibo nin personal na pagsiyasat.

Kun posible, nakatatabang na ibugtak an kadaklan na teokratikong libro sa sarong lugar. Puwedeng gumibo nin estante nin mga libro, asin sa parate medyo barato, kun dai niato kayang bumakal kaiyan na haman na, asin dai iyan nangangaipo nin dakol na espasyo. Importante man na madaling kuanon an mga libro sa libreriya. An mga libro na nasasaray sa mga bintaas parateng daing gayo napapakinabangan kundi naaalpogan sana.

An sunod na tangga iyo na organisaron an mga libro. An halipot sanang oras na ginamit sa pag-areglar nin mga libro sa lohikong pagkasunodsunod nagtatao nin mga balos.

Kumusta kun an kadaklan sa saindong pamilya bakong mga Saksi ni Jehova? Minsan ngani tibaad dai kamo makakapag-organisar nin sarong libreriya siring sa gusto nindo, sa saindong sadiring kuwarto puwede kamong magkaigwa nin estante nin libro na igwa nin kisuerra nagkapirang Makakasuratan na publikasyon.

An Sarong Teokratikong Libreriya Makatatabang na Pakosogon an Espirituwalidad

Oras na maareglar niato an satong mga libro, kaipuhan niato nin sarong paagi na matabang sato sa paghanap kan impormasyon. An satong memorya tibaad maluya, asin tibaad bako kita personalmenteng pamilyar sa mga laog kan kada libro sa satong teokratikong libreriya. Minsan siring, an gabos na impormasyon sa libreriya madaling makua. Kun igwa kaiyan sa satong tataramon, an Watch Tower Publications Index makapagpapangyari sato na madaling mahanap an espisipikong impormasyon sa haros arin man na tema.

Si Julián, na naglingkod sa laog nin dakol na taon bilang espesyal payunir asin magurang, nagpaliwanag na an Index mahalaga sa pagtotokdo sa saiyang pinakanguhod na aking lalaki na gumibo nin personal na pag-adal. “Si Jairo, na siete anyos na, kan sarong aldaw nagpuli hale sa eskuwelahan asin naghapot sako: ‘Tatay, ano po an sinabi kan Sosyedad manongod sa mga dinosaur?’ Duminiretso kami sa Index asin hinanap an terminong ‘dinosaurs.’ Haros madalion niamong naheling an sarong serye sa tutob nin Awake! dapit sa tema. [Pebrero 8, 1990] Kan aldaw man sanang idto, pinonan ni Jairo na basahon iyan. Aram na nia na an samong teokratikong libreriya igwa nin nakatatabang na impormasyon dapit sa haros gabos na tema. Personalmente, kombensido ako na kan manodan kan samong mga aki na gamiton nin marhay an teokratikong libreriya, nakakatabang iyan sainda na tumalubo sa espirituwal. Nakakanood sindang mangatanosan, asin saro pa, nanonompongan ninda na an personal na pag-adal puwedeng magin nakaoogma.”

Si Fausto, an ama ni Sherezade na nasambitan sa enotan, naniniwala na maninigo kamong pumoon sa pinakaamay na mahihimo sa pagsasanay sa mga aki na gumamit nin teokratikong libreriya. “Ipinaheheling na niamo ki Sherezade, na sais anyos na ngonyan, kun paano gagamiton an Index,” an paliwanag nia. “Mantang naaakit sia sa paglaom na daganon na Paraiso, nagpoon kami paagi sa pagpaheling saiya kan terminong ‘paradise’ sa Index dangan hinahanap an nasambitan na mga artikulo sa Torrengbantayan. Sa parate ipinaheheling sana niamo saiya an mga retrato. Minsan siring, sa paaging ini nanodan nia na an Index iyo an liyabe sa paghanap nin impormasyon sa samong libreriya sa harong. Aram mi na nasabotan nia an punto kan sarong aldaw magpuli sia hale sa eskuwelahan na igwa nin hapot manongod sa mga selebrasyon sa Pasko. ‘Taano po ta dai kita maghanap sa Index?’ an hapot nia sa saiyang ina.”

Ano man an satong edad, dinadagka kita kan Biblia na “siertohon an gabos na bagay; mangapot sa marahay.” (1 Tesalonica 5:21) Hinahagad kaini na siyasaton niato an sinasabi kan Kasuratan. (Gibo 17:11) Kun igwa kita nin organisadong marhay na teokratikong libreriya, an siring na pagsiyasat puwedeng magin nakaoogma. Kada bes na mapanggana niatong ginagamit an satong libreriya sa pag-andam nin pahayag, o paghanap nin praktikal na hatol sa pagresolber nin sarong problema, paghanap nin interesanteng impormasyon, itatadom kaiyan sa sato an praktikal na halaga kan satong libreriya.

An mga magurang ni Sherezade malinaw na nagsabi: “Sa sarong Kristianong harong, an sarong teokratikong libreriya bako nanggad na luho!”

[Kahon sa pahina 30]

PAANO NINDO AAREGLARON AN SAINDONG MGA LIBRO?

Mayo nin estriktong mga susundon kun paano oorganisaron an saindong mga libro. Minsan siring, an minasunod na lohikong pagbangabanga nagpapaheling nin sarong paagi na puwede nindong areglaron an saindong mga libro sono sa mga laog.

1. Mga libro na igwa nin bersikulo por bersikulong pag-analisar sa nagkapirang kabtang kan Biblia

(Mga halimbawa: The Greatest Man Who Ever Lived, Revelation​—Its Grand Climax At Hand!, “The Nations Shall Know That I Am Jehovah”​—How?, “Your Will Be Done on Earth”)

2. Mga librong konektado sa buhay pampamilya

(Mga halimbawa: Making Your Family Life Happy, Questions Young People Ask​—Answers That Work, My Book of Bible Stories)

3. Mga Biblia asin reperensia

(Mga halimbawa: New World Translation of the Holy Scriptures​—With References, iba pang Biblia, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, sarong marahay na diksionaryo)

4. Mga libro na presenteng ginagamit sa Pag-adal sa Libro kan Kongregasyon asin sa Teokratikong Paadalan sa Pagmiministro

5. Mga audiocassette asin video

6. Mga bound na tomo kan An Torrengbantayan asin Awake!

7. Kasaysayan kan mga Saksi ni Jehova

(Mga halimbawa: Yearbook of Jehovah’s Witnesses, Jehovah’s Witnesses​—Proclaimers of God’s Kingdom)

8. Mga libro asin brochure na regular niatong ginagamit sa satong ministeryo

(Mga halimbawa: Puwede Kamong Mabuhay Sagkod Lamang sa Paraiso Digdi sa Daga, Reasoning from the Scriptures, Life​—How Did It Get Here? By Evolution or by Creation?, Mankind’s Search for God, United in Worship of the Only True God)

[Ritrato sa pahina 31]

Si Sherezade nagin nang marahay na estudyante sa Biblia

[Ritrato sa pahina 31]

Minsan ngani sadit pa, an aking lalaking ini naggagamit na nin teokratikong libreriya

Dagdag sa Namamahalang Grupo

MANONGOD sa pagdagdag sa mga personahe kan Namamahalang Grupo kan mga Saksi ni Jehova, poon kan Hulyo 1, 1994, saro pang miembro an idinagdag sa 11 magurang na naglilingkod ngonyan. An bagong miembro iyo si Gerrit Lösch.

Si Tugang na Losch naglaog sa pambilog na panahon na paglilingkod kan Nobyembre 1, 1961, asin naggraduwar sa ika-41 klase kan Paadalan sa Biblia kan Watchtower sa Gilead. Naglingkod sia sa pansirkito asin pandistritong gibohon sa Austria poon 1963 sagkod 1976. Nag-agom sia kan 1967, asin sia saka an saiyang agom, si Merete, kan huri naglingkod sa laog nin 14 taon bilang mga miembro kan pamilya nin Bethel sa Austria sa Vienna. Kaidtong nakaaging apat na taon ibinalyo sinda sa opisina prinsipal kan Sosyedad sa Brooklyn, Nueva, York, kun saen si Tugang na Lösch naglingkod sa mga Opisina de Ehekutibo asin bilang katabang sa Komite sa Paglilingkod. Paagi sa saiyang manlaenlaen na kabatidan sa langtad nin Europa asin sa saiyang kaaraman sa Aleman, Ingles, Romaniano, asin Italiano, sia makakagibo nin mahalagang kontribusyon sa gibohon kan Namamahalang Grupo.