Mapagpatawad daw Kamo?

SI Bill asin an saiyang 16-anyos na aking babae, si Lisa, nadepisilan na magkasundo. An saradit na dai pagkakasundo sa pag-oltanan ninda sa parate nagin sirilyakan. Sa katapustapusi, naggrabe an tension sagkod sa punto na pinalayas si Lisa sa harong.a

Pakalihis nin panahon, inako ni Lisa na sia an may sala asin hinagad an kapatawadan kan saiyang ama. Alagad imbes na lingawan an nakaaging mga sala ni Lisa, sinayumahan kan nakolgan an boot na ama nia an saiyang mga paghihingoa na makipagkatoninongan. Imahinara! Habo nang magtao nin pagkaherak sa saiya mismong aking babae!

Mga siglo na an nakaagi sarong daing kanawayan na lalaki an kinondenar na magadan huli sa krimen na dai nia ginibo. An mga testigo nagtao nin falsong patotoo, asin an mga opisyal sa politika ibinirik an saindang payo, an saindang mga mata buta sa hustisya. An daing sala na tawong iyan iyo si Jesu-Cristo Kan madali na siang magadan mapagngayongayo niang hinagad sa Dios: “Ama, patawada sinda huli ta dai ninda naaraman an saindang ginigibo.”—Lucas 23:34.

Si Jesus suweltong nagpatawad, gikan sa saiyang puso, asin nadagka an saiyang mga parasunod na arogon sia sa bagay na ini. (Efeso 4:32) Pero, siring ki Bill, dakol an mayong puso na habong magpatawad. Paano kamo nakakapareho sa bagay na ini? Kamo daw andam na magpatawad sa iba kun sinda nagkakasala tumang saindo? Asin kumusta man an magagabat na kasalan? An mga ini daw kaipuhan man na ipatawad?

An Kapatawadan Sarong Angat

An pagtao nin kapatawadan bakong perming pasil. Asin sa masakit na mga panahon na ini, an mga relasyon nin tawo nagin nang orog kaproblemado kisa kasuarin pa man. An buhay pampamilya sa partikular parateng pano-pano nin mga tension asin pangigipit. An Kristianong si apostol Pablo haloy nang nagsabi na an siring na mga kamugtakan malakop sa huring mga aldaw.” Sia nagsabi: “An mga tawo magigin mamomoton sa sainda man sana, mamomoton sa pirak, maabhaw, mapalangkaw, . . . mayong pagkamoot sa karahayan, mga parapasaloib, mga matagas an payo, mga mahambog.”—2 Timoteo 3:1-4.

Kun siring, dai malilikayan na kita gabos napapaatubang sa panluwas na mga pangigipit na nakakabalo sa satang abilidad na magpatawad sa iba. Dugang pa, nakikipaglaban man kita tumang sa panlaog na mga pangigipit. Nanambitan si Pablo: “An marahay na minamawot ko dai ko ginigibo, kundi an marat na hinahaboan ko iyo an ginigibo ko. Ngonyan, kun an hinahaboan ko iyo an sakong ginigibo, an naggigibo kaiyan bako nang ako, kundi an kasalan na nag-eerok sa sako.” (Roma 7:19, 20) Bilang resulta, dakol sa sato an bakong mapagpatawad siring sa minamawot kutana niato. Total, an minanang pagkabakong sangkap asin kasalan may makosogon na impluwensia sa sato gabos, na kun beses hinahalean kita nin pagkaherak para sa mga kapwa.

Kan pakosogon na patawadon an saro huli sa sadit na sala, an sarong misis nagsimbag: “Mayo ni saro na makikinabang sa paghihingoa na magpatawad.” Sa paimbabaw na paagi an siring na komento garo baga indiperente, daing simpatiya, mapagtuya pa ngani. Minsan siring, sa mas hararom na pagmansay, naheheling niato na iyan naghahayag kan pagkauyam na namamatean kan dakol na tawo kun sinda napapaatubang sa sarong kinaban na minamansay nindang paslo, mayong pagmakolog, asin maisog. Nagsabi an sarong lalaki: “Inaaprobetsaran ka kan mga tawo kun pinapatawad mo sinda. Iyan siring sa pagtimaktimak saimo.”

Bakong makangangalas, kun siring, na an pagkultibar nin mapagpatawad na kaisipan masakit sa huring mga aldaw na ini. Minsan siring pinakokosog kita kan Biblia na maboot na magpatawad. (Ikomparar an 2 Corinto 2:7.) Taano ta dapat kitang magin mapagpatawad?

Taano ta Dapat na Magin Mapagpatawad?

AN Judiong iskolar asin parasurat na si Joseph Jacobs nagsabi kaidto na an kapatawadan “an pinakahalangkaw asin pinakadepisil sa gabos na leksion.” Tunay nanggad, dakol an nakakanompong na masakit na gayong sabihon an mga tataramon na “Pinapatawad taka.”

An kapatawadan, garo baga, parehong gayo nin kuwarta. Iyan puwedeng suwelto asin maheherakon na gamiton sa iba o puwedeng maimot na itimos para sa sadiri mismo. An enot iyo an diosnon na paagi. Maninigo tang pataluboon an matinaong ugale kun manongod sa kapatawadan. Taano? Huli ta idinadagka ini nin Dios asin huli ta an bakong mapagpatawad benggatibong espiritu puwede sanang orog na raoton an mga bagay.

Parateng nadadangog an mga tataramon na: “Dai ako naaanggot; minabalos sana ako!“ Makamomondo, an mga tataramon na ini sarong naggigiyang prinsipyo sa dakol na buhay ngonyan. An sarong misis halimbawa, nagsayumang tinohon an saiyang kunyada sa laog nin pitong taon huli ta, siring kan sabi kan miss, “ginibohan nia ako nin grabeng sala asin nungka ko siang napatawad,” Pero an sirin na dai pagtino kun ginagamit bilang paagi tanganing ipirit an dispensasyon hale sa nagkasala o bilang armas sa pagpadusa, bihirang makapanigo sa pagmawot na bumalos. Imbes, puwede sana iyan na makapalawig sa pag-iiwal, na tinotogotan na tumalubo an grabe nang hinanakit. Kun dai puputolon an siklong ini nin labi-labing kasakitan, an mapuwersang mga Pakakapot nin benggansa puwedeng makalaglag sa mga relasyon pati sa saud nin Saro

An Danyos nin Bakong Mapagpatawad na Espiritu

Kun an saro bakong mapagpatawad, an ibinungang pag-iriwal nakakatension. Bilang resulta, an tension puwedeng sumagkod sa grabeng mga helang. Si Dr. William S. Sadler nagsurat: “Mayo ni saro na siring sa doktor an puwedeng lubos no makasabot kan dakulaon na porsiento nin helang asin kasakitan nin tawo na direktang masususog sa paghadit, pagkatakot, pag-iriwal, bakong marahay na kaisipan asin marigsok na pamumuhay.“ Alagad, gurano daw talaga kadakulang danyos an ibinubunga nin ribok sa emosyon? An sarong medikal na publikasyon minasimbag: “An estadistika . . . nagpaheling na dos tersio kan mga pasyente na nagpadoktor igwa nin mga sintomas na causa o pinagrabe nin tension sa isip.”

Iyo, an kolog nin boot, paghihinakit, asin pagsudosudo bako nanggad na dai nakadadanyar. An nakakakolog na mga emosyon na ini siring sa takla na luway-luway na rinaraot an hawak nin sarong kotse. An luwas kan kotse puwedeng magayon helingon, pero sa irarom kan pinta nangyayari an mapanraot na proseso,

Mas importante pa ngani, an satong pagsayuma na magpatawad kun igwa nin basihan para sa pagkaherak puwede man na makadanyar sa sato sa espirituwal. Sa mga mata ni Jehova Dios, kita tibaad magin siring kan oripon sa ilustrasyon ni Jesus. An oripon pinatawad kan saiyang kagurangnan sa dakulaon na utang. Alagad, kan an saiyang kapwa oripon makimaherak sa saiya na patawadon sa saditon na utang, naanggot sia asin dai nagpatawad. Liniwanag ni Jesus na kun kita dai man andam na magpatawad, masayuma si Jehova na patawadon kita sa satong mga kasalan. (Mateo 18:21-35) Kaya, kun kita bakong mapagpatawad, tibaad mawara niato an satong malinig na konsensia sa atubangan nin Dios asin an sato pa nganing paglaom para sa ngapit! (Ikomparar an 2 Timoteo 1:3.) Kun siring, ano an puwedeng gibohon niato?

Makanood Magpatawad

An tunay na kapatawadan minagikan sa puso. Kalabot dian an pagpatawad sa sala nin saro asin pagsuko nin ano man na kamawotan na bumalos. Kun siring, an ultimong hustisya asin posibleng pagbalos, iwinawalat sa mga kamot ni Jehova.—Roma 12:19.

Pero, kaipuhan mangnohon na mantang “madaya an puso nin labi sa ano pa man na bagay asin desesperado,” iyan dai perming nakahilig sa kapatawadan dawa kun maninigo. (Jeremias 17:9) Si Jesus mismo nagsabi: “Gikan sa puso minaluwas an maraot na mga kaisipan, paggadan, pagsambay, pakikisaro, paghabon, pagputik, paglanghad.”—Mateo 15:19.

Salamat nanggad, an satong puso puwedeng sanayon na gibohon an tama. Alagad, an pagsasanay na kaipuhan niato dapat na maghale sa mas halangkaw na gikanan. Dai ta puwedeng gibohon iyan nin solo. (Jeremias 10:23) An pinasabngan nin Dios na salmista namidbid ini asin namibi para sa paggiya nin Dios. Nakimaherak sia ki Jehova sa pamibi: “Itokdo mo sako an saimong mga susundon. Ipasabot mo sa sakuya an dalan kan saimo mismong mga togon.”—Salmo 119:26, 27.

Sono sa saro pang salmo, si Hadeng David sa suanoy na Israel ‘nakasabot kan dalan’ ni Jehova. Naeksperyensiahan nia iyan nin direkta asin nakanood gikan dian. Kaya, nakapagsabi sia: “Si Jehova maheherakon asin maugayon, maluway sa pagkaanggot asin abunda sa mamomoton na kabootan. Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya.”—Salmo 103:8, 13.

Kaipuhan kitang makanood siring ki David. Mapagngayongayong pag-adalan an sangkap na halimbawa nin Dios sa kapatawadan, siring man an sa saiyang aki. Kun siring makakanood kita na magpatawad gikan sa puso.

Alagad an iba tibaad marahay na maghapot: Kumusta man an magabat na kasalan? Kaipuhan daw na ipatawad an gabos na kasalan?

Paghanap nin Pagkatimbang

Kun an saro pinagkasalaan nin magabat, an kolog puwedeng grabe. Partikularmenteng totoo ini kun an saro mayong salang biktima nin magabat na kasalan. An iba puwede pa nganing maghapot, ‘Paano ko mapapatawad an saro na makuring nagtraydor asin nangolog sako?’ Sa kaso nin grabeng kasalan na puwedeng ikatiwalag, an biktima tibaad kaipuhan na iaplikar an sadol sa Mateo 18:15-17.

Sa arin man na kaso, dakol an puwedeng magdepende sa nagkasala. Poon kan pagkakasala nagkaigwa na daw nin ano man na tanda nin sinserong pagsolsol? Nagbakle na daw an nagkasala, tibaad prinobaran pa ngani na gumibo nin tunay na mga pagbabago? Sa mga mata ni Jehova an siring na pagsolsol sarong liyabe sa kapatawadan dawa sa mga kaso nin tunay na makatatakot na mga kasalan. Halimbawa, pinatawad ni Jehova si Manases, saro sa pinakamaraot na mga hade sa kasaysayan kan Israel. Sa anong basihan? Ginibo iyan nin Dios huli ta si Manases sa kahurihurihi nagpakumbaba kan sadiri asin nagsolsol sa saiyang makababaldeng mga dalan.—2 Cronica 33:12, 13.

Sa Biblia kalabot sa tunay na pagsolsol an sinserong pagliwat sa kaisipan, odok sa pusong pagbasol sa ano man na sala na ginibo. Kun saen angay asin posible, kaibanan sa pagsolsol an paghihingoa na gumibo nin pakipagsulit sa biktima kan kasalan. (Lucas 19:7-10; 2 Corinto 7:11) Kun mayo nin siring na pagsolsol, si Jehova dai nagpapatawad.a Saro pa, dai linalaoman nin Dios na patawadon kan mga Kristiano an mga dati nang naliwanagan sa espirituwal pero ngonyan tuyo, daing pagsulsol na naggigibo nin kasalan. (Hebreo 10:26-31) Sa sobrang mga kaso, an kapatawadan tibaad dai nanggad angay.—Salmo 139:21, 22; Ezequiel 18:30-32.

Baga man puwede o dai an kapatawadan, an biktima nin magabat na kasalan puwedeng booton na horophoropon an saro pang hapot: Kaipuhan ko daw magdanay sa grabeng emosyonal na pagkaribok, na nakakamate na makuring nakolgan asin anggot, sagkod na an bagay biyong maresolberan? Horophoropa an halimbawa. Si Hadeng David nakolgan nin labi-labi kan an saiyang heneral, si Joab, gadanon si Abner asin Amasa, “duwang lalaki na orog katanos asin karahay kisa [ki Joab].” (1 Hade 2:32) Berbal asin daing pagduwaduwang ipinahayag ni David ki Jehova paagi sa pamibi an saiyang grabeng kaanggotan. Pero, pag-abot nin panahon, an grabeng gabat kan namamatean ni David posibleng nagkulpa. Dai sia dinominar nin grabeng kaanggotan sagkod sa katapusan kan saiyang mga aldaw. Padagos pa nganing nagtrabaho si David kaiba ni Joab pero dai sana nia pinatawad an nagsolsol na paragadan na ini. Sinigurado ni David na gibohon an hustisya sa katapusan.—2 Samuel 3:28-39; 1 Hade 2:5, 6.

Puwedeng kaipuhan nin pirang panahon asin paghihingoa an mga nakolgan kan magabat na mga kasalan nin iba bago makapanggana sa enot nindang pagkaanggot. An proseso nin pag-omay puwedeng mas pasil kun an nagkasala inaako an saiyang sala asin nagsosolsol. Pero, an mayong salang biktima nin kasalan maninigong makakua nin karangahan asin kaginhawahan sa saiyang pakaaram sa hustisya asin kadonongan ni Jehova asin sa Kristianong kongregasyon, ano man an dalan kan nagkasala.

Midbidon man, na kun talagang pinapatawan nindo an sarong nagkasala, dai ini nangangahulogan na kinokonsinte nindo an kasalan. Para sa Kristiano, an kapatawadan nangangahulogan nin biyong tiwalang pagwalat kan bagay sa mga kamot ni Jehova. Sia an matanos na Hokom sa bilog na uniberso, asin gigibohon nia an hustisya sa tamang panahon. Kaiba dian an paghokom sa madayang “mga parapakisaro asin parasambay.”—Hebreo 1314.

An mga Pakinabang nin Pagpatawad

Nag-awit an salmistang si David: “Huli ta ika, O Jehova, marahay asin andam na magpatawad; asin nagsosopay an mamomoton na kabootan sa gabos na nag-aapod salmo.” (Salmo 86:5) Kamo daw, arog ki Jehova, “andam na magpatawad“? Dakol an pakinabang.

Enot, an pagpatawad sa iba nagpapalakop nin marahay na mga relasyon. Dinadagka kan Biblia an mga Kristiano: “Magin maboot sa lambang saro, na may maboot na pagkaherak, na lubos na nagpapatarawadtawad siring na an Dios man lubos na nagpatawad saindo paagi ki Cristo.”—Efeso 4:32.

Ikaduwa, an kapatawadan nagdadara nin katoninongan. Bako sana ining pakipagkatoninongan sa mga kapwa kundi panlaog man na katoninongan.—Roma 14:19; Colosas 3:13-15.

Ikatolo, an pagpatawad sa iba nakakatabang sato na magirumdoman na kita mismo nangangaipo nin kapatawadan. Iyo, “an gabos nagkasala asin nagkulang sa kamurawayan nin Dios.”—Roma 3:23.

Ultimo, an pagpatawad sa iba nagtatao nin dalan tanganing an satong mga kasalan ipatawad nin Dios. Nagsabi si Jesus: “Kun ipatawad nindo sa mga tawo an saindang mga kasalan, patatawadon man kamo kan saindong langitnon na Ama.”—Mateo 6:14.

Imahinara an dakol na bagay na siertong inisip ni Jesus sa hapon kan saiyang kagadanan. Nahadit sia dapit sa saiyang mga disipulo, sa paghuhulit, asin nangorogna sa saiyang integridad ki Jehova. Alagad, dawa ngani kan sia nagsasakit nin makuri sa hariging pasakitan, dapit sa ano sia nagtaram? Kabilang sa saiyang huring mga tataramon an, “Ama, patawada sinda.” (Lucas 23:34) Puwede niatong arogon an sangkap na halimbawa ni Jesus paagi sa pagpatarawadtawad gikan sa puso.