Ipahayag an Nakaoogmang Mensahe sa Kapahayagan

¹ An librong Revelation nakatabang sato na masabotan an nakaoogmang mensahe na nakasurat sa libro nin Kapahayagan. Tabangan an iba na masabotan an mensaheng iyan paagi sa pagtampok kan librong ini sa ministeryo ngonyan na Marso. Tibaad makatabang saindo an minasunod na suhestion sa pag-andam kan saindong pag-atubang.

² Pakatapos nin angay na pataratara, puwede nindong sabihon ini:

◼ “Nadangog na daw nindo an manongod sa apat na parakabayo kan Apocalipsis? [Pasimbagon.] Aram daw nindo na an simbolikong mga parakabayo na ini kabtang kan sarong hula sa Biblia na naghuhula kan mga pangyayari sa satong panahon? [Pasimbagon.] Magigin interesado daw kamo sa pagsabot sa hulang ini asin kun ano an kahulogan kaiyan sa sato?” Kun ipinaheheling an interes, puwede nindong itokdo an mga ilustrasyon sa kapitulo 16 kan librong Revelation asin ipaliwanag an pira sa mga bersikulo na nasa maitom na letra. O puwede kamong magkomento sa pirang kabtang kan bisyon paagi sa paggamit kan tract na An Kinaban daw na Ini Magdadanay? Ialok an libro asin iareglo na bumalik tanganing ipakipag-olay pa an dapit sa bisyon asin an kahulogan kaiyan.

³ O tibaad boot nindong probaran an pag-atubang na arog kaini:

◼ “Nadangog na daw nindo an terminong ‘Armagedon’? [Pasimbagon.] Dakol an naghohona na iyan nuklear na guerra sa pag-oltanan kan pankinaban na mga kapangyarihan. Sa aktuwal, an Armagedon bagay na laen nanggad. Sono sa Biblia, mangangahulogan iyan nin darakulang pagliliwat, na magreresulta sa sarong kinaban nin nagdadanay na katoninongan.” Depende sa reaksion kan tawo, puwede nindong itokdo an sarong teksto siring baga kan Kapahayagan 16:16 o Salmo 37:​10, 11 dangan buksan an kapitulo 39 kan librong Revelation. Kun ipinaheheling an interes, ialok an libro. Kun dai, ipakipag-olay an angay na mga punto sa tract na An Kinaban daw na Ini Magdadanay?

⁴ Tibaad mapukaw nindo an interes paagi sa paggamit kan suhestion na ini:

◼ “Sa bulan na ini, dakol na tawo an naghohorophorop dapit sa kagadanan asin pagkabuhay liwat ni Jesu-Cristo. Napaghorophorop na daw nindo kun ano an ginigibo nia magpoon kan saiyang pagkabuhay liwat? Dakol na pangyayari sa satong aldaw an konektado sa presenteng kabtang ni Jesus sa katuyohan nin Dios. An iba kan mga iyan sinasabi sa libro nin Kapahayagan. Boot daw nindong makanood pa dapit sa katuyohan nin Dios sa pagsugo sa saiyang Aki digdi sa daga asin kun ano an kahulogan kaiyan para sa saindo asin sa saindong mga namomotan sa buhay?” Tibaad puwede nindong darahon an atension sa parapo 1 asin 2 kan kapitulo 41 kan librong Revelation o itampok an angay na mga punto gikan sa bagong mga luwas kan An Torrengbantayan o Awake! O tibaad boot nindong gamiton an tract na Life in a Peaceful New World tanganing pukawon an orog pang interes.

⁵ Siertohon na imbitaran an siisay man na nagpapaheling nin interes na umatender sa Memorial. Paagi sa bendisyon ni Jehova, tibaad matabangan nindo an saro na ‘magdangog sa mga tataramon kan hulang ini asin magkuyog sa mga bagay na nasusurat dian.’​—Kap. 1:3.

Tabangan Sindang Humiro Oyon sa Mensahe

¹ An satong paghuhulit nagtatao sa mga tawo kan oportunidad na ‘madangog an mga tataramon kan hula nin Kapahayagan.’ (Kap. 1:3) Alagad tanganing makaligtas sinda sa “dakulang kahorasaan,” kaipuhan man sindang humiro oyon sa mga iyan. (Kap. 7:14) Imbuwelto an buhay! Kaya seguradohon na dumalaw liwat sa mga nagpaheling nin interes.

² Kun nawalatan nindo kan librong “Revelation,” puwede kamong magsabi:

◼ “Nakaoogmang maheling kamo giraray. Kan huri kitang mag-olay, napag-olayan niato an dapit sa mga hula sa Kapahayagan, asin winalatan ko kamo nin publikasyon na nagpapaliwanag kaiyan. Tibaad narisa nindo na dawa ngani an libro nin Kapahayagan hararom, puwede iyan na masabotan sa liwanag nin mga pangyayari sa presenteng aldaw. Gusto kong gumamit nin pirang minuto tanganing ipaliwanag an sinasabi kan Biblia manongod sa satong mga panahon.” Dangan buksan an sarong publikasyon na puwede nindong gamiton sa pagpoon nin pag-adal sa Biblia.

³ Kun nawalatan nindo sa enot na pagsongko kan tract na “An Kinaban daw na Ini Magdadanay?”, puwede nindong sabihon ini:

◼ “Maogma akong manompongan kamo ngonyan sa harong. Kan sinongko ko kamo dai pa sana nahaloy, pinag-olayan niato an dapit sa tanda na mangyayari bago an katapusan kan kinaban. [Repasohon an angay na mga kabtang kan tanda sa Mateo 24:​3-14.] Narisa daw nindo an ano man na dai pa sana nahaloy na pangyayari sa kinaban na puwedeng kaotoban kan kabtang kan tandang iyan?” Ginagamit an ilustrasyon sa kapitulo 16 kan librong Revelation, komentohan an kaotoban kan pira sa mga hula na ini sa Biblia.

⁴ Kun inimbitaran nindo an kagharong sa Memorial, magsabing:

◼ “Kan huri ko kamong dalawon, napag-olayan ta an manongod sa kun gurano kaimportante sa katawohan an kagadanan ni Jesus. Inimbitaran ko man kamo na umatender sa Memorial kan saiyang kagadanan, na seselebraron kan mga Kristiano sa bilog na kinaban sa Marso 26. Nagdigdi ako ngonyan tanganing ipagirumdom saindo na imbitado kamo sa importanteng okasyon na iyan. [Sabihon an oras asin lugar nin selebrasyon.] Puwedeng matabangan kamo na pahalagahan an kahulogan kan okasyon kun rerepasohon niato an pira sa mga bendisyon na nakakamtan na niato ngonyan bilang resulta kan ginibo ni Jesus para sa katawohan, siring man an mga bendisyon na maabot pa.” Dangan ipakipag-olay an angay na mga punto sa kapitulo 41 kan librong Revelation. Puwede man nindong idoon an mga ilustrasyon sa pahina 294, 299, asin 308. Kun posible, iareglo na tabangan an interesadong tawo na umatender sa Memorial.

⁵ Kun an tawo marahay sanang parahinanyog, puwedeng magin epektibo ini:

◼ “Naogma akong gayo sa satong dai pa sana nahaloy na pag-orolay dapit sa Biblia. Buminalik ako huli ta boot ko kamo na magkamit kan ipinanuga nin Dios para sa mga gusto pa na makanood dapit saiya.” Basahon an Juan 17:3, dangan buksan an tract na Life in a Peaceful New World.

⁶ An saindo logod na pagpahalaga para sa pantubos pahiroon kamo na gumibo nin mga pagdalaw liwat sa mga interesado. Tabangan sinda na humiro sono sa nakaoogmang mensahe sa Kapahayagan. Girumdomon, “harani na an itinalaan na panahon”!​—Kap. 1:3.