Kapahayagan—An Mamuraway na Kulminasyon Kaiyan Harani Na

Kapitulo 7: Palaadon Liwat an Enot na Pagkamoot!

1. Para sa anong kongregasyon an enot na mensahe ni Jesus, asin ano an ipinagigirumdom nia sa mga paraataman?

¹ An enot na mensahe ni Jesus para sa kongregasyon sa Efeso, na kaidto progresibong siudad sa gilid nin dagat sa Asia Minor harani sa isla nin Patmos. Saiyang pinagbotan si Juan: “Suratan mo an anghel kan kongregasyon nin Efeso: Ini an mga bagay na isinabi kaidtong nagkakapot kan pitong bitoon sa saiyang toong kamot, an naglalakaw sa tahaw kan pitong kandelerong bulawan.” (Kapahayagan 2:​1) Kapareho kan anom pang ibang mensahe, inaapod digdi ni Jesus an atension sa sarong bagay na nagpaparisa kan saiyang may autoridad na katongdan. Ipinagigirumdom nia sa mga paraataman sa Efeso na an gabos na kamagurangan nasa irarom kan saiyang nagpoprotehir na pangataman asin na sinisiyasat nia an gabos na kongregasyon. Sagkod sa satong ika-20 siglo, padagos niang ginigibo an mamomoton na pamamayong ini, na binabantayan an kamagurangan asin maboot na pinapastoran an gabos na kaiba sa kongregasyon. Sa panapanahon, liniliwat nia an mga areglo sa kongregasyon tanganing an ilaw magin mas maliwanag. Iyo, si Jesus an Poon na Pastor sa aripompon nin Dios.​—Mateo 11:​28-30; 1 Pedro 5:​2-4.

2. (a) Para sa anong marahay na mga bagay na inomaw ni Jesus an kongregasyon sa Efeso? (b) Anong hatol ni apostol Pablo an malinaw na kinuyog kan kamagurangan sa Efeso?

² Dangan si Jesus nagbugtak nin arogan para sa gabos apuwera sa duwa sa saiyang pitong mensahe paagi sa pagpopoon sa mainit na mga tataramon nin komendasyon: “Aram ko an saimong mga gibo, asin an saimong pagpapagal patin pakatagal, asin na dai mo natitios an maraot na mga tawo, asin na binabalo mo an mga nagsasabing sinda mga apostol, pero bako man, patin nakua mo sindang mga putikon. Ika nagpapaheling man nin pakatagal, asin ika nagtios huli sa sakong ngaran asin dai napagal.” (Kapahayagan 2:​2, 3) Dakol pang taon bago kaini, pinatanidan na ni apostol Pablo an kamagurangan sa Efeso manongod sa “maringis na mga lobo,” apostatang mga paraparibok sa aripompon, asin sinabihan an kamagurangan na idto na “magpuka,” na inaarog an saiyang daing kapagalan na halimbawa. (Gibo 20:​29, 31) Mantang inoomaw sinda ni Jesus ngonyan huli sa saindang pagpapagal asin pakatagal patin huli sa dai pagkapagal, seguradong iinaplikar ninda an hatol na iyan.

3. (a) Paano prinobaran nin “falsong mga apostol” na dayaon an mga maimbod sa satong mga aldaw? (b) Anong patanid manongod sa mga apostata an itinao ni Pedro?

³ Sa aldaw man kan Kagurangnan, may naglataw na “falsong mga apostol” na ‘nagtataram nin biribid na mga bagay tanganing maguyod ninda sa sainda an mga disipulo.’ (2 Corinto 11:​13; Gibo 20:​30; Kapahayagan 1:10) Marahay para sa sainda an gabos na magkakakontrang sektaryanong mga relihiyon, naghihingako sinda na an Dios mayo nin organisasyon, asin nagdedehar na inako ni Jesus an kapangyarihan sa Kahadean kan 1914. Inootob ninda an hula sa 2 Pedro 3:​3, 4: “Sa huring mga aldaw an mga paraolog-olog madatong na may pag-olog-olog, na maglalakaw sono sa saindang mga horot asin magsasarabi: ‘Haen man ining ipinanugang presensia nia? Tara, poon kan aldaw na an satong mga kag-anak magtorog sa kagadanan, an gabos na bagay pareho man sana kan kapinonan nin paglalang.’”

4. (a) Paano nahahayag an kapalangkawan asin pagigin rebelde nin mga paraolog-olog? (b) An mga Kristiano ngonyan nagpapaheling na sinda kapareho kan mga taga-Efeso paagi sa paggibo nin anong aksion tumang sa putikon na mga paratumang?

⁴ An mga para-olog-olog na ini habong ipahayag sa publiko an saindang pagtubod. (Roma 10:10) Naghagad sinda kan pagsuportar kan klero nin Kakristianohan asin kan tabang nin mga peryodiko saka istasyon nin TV sa pagpalakop nin putik na mga bareta manongod sa dati nindang kairiba. Dai mahaloy nadidiskobre nin mga maimbod na an pananaram asin gawe kan mga paradayang ini bakong totoo. Kapareho kan mga taga-Efeso, an mga Kristiano ngonyan ‘dai natitios an maraot na mga tawo,’ kaya itinitiwalag ninda sinda sa saindang kongregasyon.a

5. (a) Ano an sinabi ni Jesus na kaluyahan kan mga taga-Efeso? (b) Anong mga tataramon an maninigo kutanang nagirumdoman kan mga taga-Efeso?

⁵ Alagad ngonyan, arog kan ginigibo nia sa lima sa pitong kongregasyon, sinasabi ni Jesus an sarong seryosong problema. Sia nagsasabi sa mga taga-Efeso: “Alagad ibinibilang ko ining tumang sa saimo, na binayaan mo an saimong pagkamoot kan enot.” (Kapahayagan 2:​4) Dai kutana sinda maninigong magkulang sa bagay na ini, huli ta si Pablo nagsurat sa sainda kan 35 taon na an nakaagi manongod sa ‘dakulang pagkamoot na ikinamoot sa sato’ nin Dios, asin sinadol nia sinda: “Magin kamong mga paraarog sa Dios, bilang namomotan na mga aki, asin padagos kamong maglakaw sa pagkamoot, kun paanong si Cristo man namoot sa saindo.” (Efeso 2:​4; 5:​1, 2) Dugang pa, an mga tataramon ni Jesus maninigo kutanang natanom sa saindang puso: “Si Jehova na satong Dios sarong Jehova, asin mamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:​29-31) Nawara na sa mga taga-Efeso an enot na pagkamoot na iyan.

6. (a) Baga man kita mga gurangan o bagong makiasosyar sa kongregasyon, dapat kitang magbantay tumang sa anong peligro asin mga tendensia? (b) An pagkamoot niato sa Dios maninigong magpahiro sato na gibohon an ano?

⁶ Baga man kita mga gurangan o bagong makiasosyar sa kongregasyon, kaipuhan kitang magbantay tumang sa pagkawara kan enot niatong pagkamoot ki Jehova. Paano puwedeng mangyari an pagkawarang ini? Puwede niatong togotan na an pagkadayupot sa satong sekular na trabaho, an pagmawot na makakua nin dakol na kuwarta, o an paghanap nin kasingawan magin an importante sa satong buhay. Sa siring puwede kitang magin makalaman an isip imbes na espirituwal an isip. (Roma 8:​5-8; 1 Timoteo 4:​8; 6:​9, 10) An pagkamoot niato ki Jehova maninigong magpahiro sato na itanos an ano man na siring na tendensia asin “padagos na hanapon nguna an kahadean asin an saiyang katanosan,’ tanganing ‘makatipon kita nin kayamanan sa langit.’​—Mateo 6:​19-21, 31-33.

7. (a) An satong paglilingkod ki Jehova maninigong pahiroon nin ano? (b) Ano an isinabi ni Juan manongod sa pagkamoot?

⁷ An paglilingkod logod niato ki Jehova danay na pinahihiro nin odok na pagkamoot sa saiya. Magkaigwa kita nin odok na pag-apresyar sa gabos na ginibo para sa sato ni Jehova asin ni Cristo. Arog kan isinurat mismo ni Juan kan huri: “An pagkamoot sa bagay na ini, bakong huli ta kita namoot sa Dios, kundi na sia namoot sato asin isinugo an saiyang Aki bilang pantubos na atang para sa satong mga kasalan.” Padagos na sinasabi sato ni Juan: “An Dios pagkamoot, asin an nagdadanay sa pagkamoot nagdadanay na kasaro nin Dios asin an Dios nagdadanay na kasaro nia.” Noarin man dai logod niato togotan na mapara an satong pagkamoot ki Jehova, sa Kagurangnan na Jesu-Cristo, asin sa nabubuhay na Tataramon nin Dios! An pagkamoot na ini ikapahahayag niato bako sanang sa maigot na paglilingkod sa Dios kundi pati sa pagkuyog sa “togon na ini hale sa saiya, na an namomoot sa Dios maninigo man na mamoot sa saiyang tugang.”​—1 Juan 4:​10, 16, 21; Hebreo 4:​12; helingon man an 1 Pedro 4:​8; Colosas 3:​10-14; Efeso 4:15.

“Giboha an Enot na mga Gibo”

8. Ano an sinabi ni Jesus na maninigong gibohon kan mga taga-Efeso?

⁸ An mga taga-Efeso kaipuhan na palaadon liwat an dati nindang pagkamoot kun habo nindang mawaran. “Kaya,” sabi sa sainda ni Jesus, “girumdoma kun saen ka naholog, asin magsolsol ka asin giboha an enot na mga gibo. Kun dai, ako madian sa saimo, asin hahaleon ko an saimong kandelero sa namumugtakan kaiyan, kun dai ka magsolsol.” (Kapahayagan 2:​5) Paano inako kan mga Kristiano sa kongregasyon nin Efeso an mga tataramon na idto? Dai niato aram. An paglaom niato sinda nagsolsol asin nahimong pukawon liwat an saindang pagkamoot ki Jehova. Kun dai, kun siring paparongon an saindang ilaw asin hahaleon an saindang kandelero. Mawawaran sinda kan saindang pribilehiyo na pagpasirang kan katotoohan.

9. (a) Anong nakapakokosog na tataramon an sinabi ni Jesus sa mga taga-Efeso? (b) Paano an mga kongregasyon pakalihis kan aldaw ni Juan nasudya sa pagkuyog sa hatol ni Jesus sa mga taga-Efeso?

⁹ Minsan siring, si Jesus igwa kan nakapakokosog na tataramon na ini para sa mga taga-Efeso: “Alagad, igwa ka kaini, na ika naoongis sa mga gibo kan sekta ni Nicolas, na ikinaoongis ko man.” (Kapahayagan 2:​6) Minsan paano ikinaoongis ninda an sektaryanong pagkabaranga, kun paanong iyan ikinaoongis kan Kagurangnan na si Jesu-Cristo. Alagad, sa pag-agi nin mga taon, dakol na kongregasyon an nasudya sa pagkuyog sa mga tataramon na idto ni Jesus. An kadaihan nin pagkamoot ki Jehova, sa katotoohan, asin sa lambang saro nagbunga kan saindang pagkaholog sa espirituwal na kadikloman. Nagkabarangabanga sinda sa dakol na nag-iiriwal na sekta. An “Kristianong” mga parakopya na mayo nin pagkamoot ki Jehova hinale an mismong ngaran nin Dios sa mga manuskritong Griego kan Biblia. An kadaihan nin pagkamoot nagtao man nin lugar sa pagtotokdo nin mga doktrinang Babiloniko asin Griego, arog kan impiernong may kalayo, purgatoryo, asin Trinidad, sa ngaran nin Kristianismo. Huling mayo nin pagkamoot sa Dios asin sa katotoohan, an kadaklan na naghihingakong Kristiano nagpondo sa paghuhulit kan maogmang bareta kan Kahadean nin Dios. Nadominar sinda nin sarong paslong grupo nin klero na guminibo kan sadiri nindang kahadean digdi sa daga.​—Ikomparar an 1 Corinto 4:8.

10. Ano an relihiyosong kamugtakan sa Kakristianohan kan 1918?

¹⁰ Kan pumoon an paghokom sa harong nin Dios kan 1918, an sektaryanong klero nin Kakristianohan nagtatao nin hayag na pagsuportar sa Guerra Mundial I, na sinasadol an mga Katoliko asin Protestante sa man-ibong-ibong na lado na maggaradanan. (1 Pedro 4:17) Bakong arog kan kongregasyon sa Efeso na ikinaongis an ginigibo kan sekta ni Nicolas, an mga relihiyon nin Kakristianohan haloy nang pano nin nagkakaturumang, kontra sa Dios na mga doktrina, asin an saindang klero nakisaro na sa kinaban, na dian sinabi ni Jesus na dai dapat na magin kabtang an saiyang mga disipulo. (Juan 15:​17-19) An saindang mga kongregasyon, na ignorante sa tema kan Biblia, an Kahadean nin Dios, bakong mga kandelero na nagpapasirang kan katotoohan kan Kasuratan, ni kabtang man an saindang mga miembro kan espirituwal na templo ni Jehova. An pangenot nindang mga lalaki (asin babae) bakong mga bitoon kundi nahayag na mga miembro kan “tawo nin katampalasanan.”​—2 Tesalonica 2:​3; Malaquias 3:​1-3.

11. (a) Anong Kristianong grupo sa kinaban kan 1918 an ginibo an mga tataramon ni Jesus sa mga taga-Efeso? (b) Ano an ginibo kan grupong Juan magpoon kan 1919?

¹¹ Alagad, an grupong Juan nagluwas sa maribok na mga aldaw kan enot na guerra mundial na may pagkamoot ki Jehova asin sa katotoohan na nagpahiro sainda na maglingkod sa saiya na may naglalaad na kaigotan. Pinaglabanan ninda an mga nagprobar na ilaog an sektaryanismo paagi sa haros paggibong idolo sa enot na presidente kan Watch Tower Society, si Charles T. Russell, pagkagadan nia kan 1916. Dinisiplina nin mga paglamag asin kasakitan, an Kristianong grupong ini malinaw na nag-ako nin paghusgar na “marahay na gibo” sa saindang Kagurangnan asin nin pag-agda na lumaog sa saiyang kagayagayahan. (Mateo 25:​21, 23) Namidbid ninda sa dalagan kan mga pangyayari sa kinaban, asin sa sainda mismong mga eksperyensia, an kaotoban kan tanda na itinao ni Jesus para sa saiyang dai naheheling na presensia sa kapangyarihan kan Kahadean. Magpoon kan 1919, sinda nag-abante tanganing makikabtang sa dugang pang kaotoban kan dakulang hula ni Jesus: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 6:​9, 10; 24:​3-14) Kun kulang sa ano man na paagi an saindang pagkamoot ki Jehova, idto pinalaad magpoon kan panahon na idto.

12. (a) Sa sarong makasaysayan na kombension kan 1922, anong pag-apod an luminuwas? (b) Anong ngaran an inako kan tunay na mga Kristiano kan 1931, asin ano an pinagsolsolan ninda?

¹² Sa sarong makasaysayan na kombension, na inatenderan nin 18,000 sa mga Kristianong ini, sa Cedar Point, Ohio, E.U.A., Setyembre 5-13, 1922, nagluwas an pag-apod: “Balik kamo sa langtad, O kamong mga aki kan kaharohalangkaweng Dios! . . . Kaipuhan na maaraman kan kinaban na si Jehova Dios asin na si Jesu-Cristo Hade nin mga hade asin Kagurangnan nin mga kagurangnan. . . . Kun siring ipaisi, ipaisi, ipaisi, an Hade asin an saiyang kahadean.” An mahalagang ngaran ni Jehova ipinamimidbid nin orog. Kan 1931 an mga Kristianong ini, na tiripon sa kombension sa Columbus, Ohio, E.U.A., nag-ogma na akoon asin gamiton an ngaran na isinabi nin Dios sa hula ni Isaias​—mga Saksi ni Jehova. (Isaias 43:​10, 12) Sa luwas kaiyan na Marso 1, 1939, an ngaran kan pangenot na babasahon kan organisasyon liniwat na magin An Torrengbantayan Nagpapahayag kan Kahadean ni Jehova, sa siring nagtatao nin pangenot na onra sa satong Kaglalang asin sa saiyang makahadeng gobyerno. An mga Saksi ni Jehova, na may nanumbalik na pagkamoot ki Jehova, pinagsolsolan an ano man na posibleng nakaaging pagkukulang sa pagtaong-onra asin pag-omaw sa saiyang bantog na ngaran asin Kahadean.​—Salmo 106:​6, 47, 48.

(Ipagpapadagos sa masunod na luwas.)

[Nota sa Ibaba]

[Tsart sa pahina 30]

An Paagi ni Jesus sa Paghatol

(sinisitar an mga kapitulo asin bersikulo kan Kapahayagan)

Mensahe Autori- Pambukas Malinaw Pagtata- Ibubu-

sa kong- dad sa na komen- na sina- nos asin/o ngang -regasyon pagtao dasyon sabi an pagpa bendisyon nin hatol problema

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodicea 3:14 — 3:15-17 3:18-20 3:21