Dai Kamo Umontok sa Paggibo nin Karahayan

“Dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.”​—GALACIA 6:9.

1. Ano an isinugo ni Jesus sa saiyang mga parasunod?

KANIGOAN karahay na aktibidad an ginigibo nin mga Kristiano bilang kabtang kan saindang pagsamba! Iyan yaon sa malinaw na pagboot: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda. . . , na tokdoan nindo sinda na otobon an gabos na bagay na ipinagboot ko sa saindo. Asin uya! ako danay na nasa saindo sagkod sa pagtatapos kan palakaw nin mga bagay.” (Mateo 28:19, 20) Si Jesu-Cristo mismo an nagsugo sa saiyang mga disipulo na gibohon an pagtotokdong iyan sa bilog na kinaban.

2. (a) Taano ta masasabi niato na an paggibo nin disipulo importanteng gibohon asin marahay? (b) Anong mga katuyohan an naootob kan paggibo nin disipulo?

² Mantang an sugong gumibo nin mga disipulo saro sa ultimong mga isinabi ni Jesus sa saiyang enot na mga disipulo bago sia sumakat sa langit, bako daw na idto napakahalaga nanggad na asignasyon? Iyo, huli ta an pag-otob dian magliligtas nin mga buhay. (1 Timoteo 4:16) Huli kaini iyan marahay na gibohon. Iyan nagtatao nin tamang edukasyon sa Biblia para sa mga nagkukuyog sa mensahe kan Kahadean, asin an paghuhulit nagpapaisi sa siisay man na matagas an puso. (Lucas 10:10, 11) Kun siring, an paggibo ninda sa gibohon na ini nagpapamidbid sa tunay na mga Kristiano kapareho kan saindang pag-otob sa arin pa man na ibang katokdoan ni Jesus.—Juan 8:31.

3. (a) Ano an reaksion kan mga disipulo ni Jesus sa saiyang personal na halimbawa asin pagboot? (b) Anong kaisipan an kinultibar ni Jesus sa saiyang mga disipulo?

³ Bilang an Dakulang Paratokdo. si Jesus nagtao nin pambihirang halimbawa sa saiyang mga parasunod. Sia nagtokdo sa publiko asin naggibo nin mga disipulo paagi sa ‘paghuhulit kan maogmang bareta kan kahadean.’ (Mateo 9:35) Sa pag-arog sa saiya, an bagong mga parasunod nagin man mga paragibo nin disipulo, huli ta an tunay na disipulo “saro na nag-aako asin nagtatabang sa pagpalakop kan mga doktrina nin iba.” Kan primero, an saindang paggibo nin disipulo duman sana sa mga Judio asin proselito. Alagad sa ibong nin maraot na reaksion sa langtad na iyan, inootob daw kan mga parasunod ni Jesus an saiyang pagboot na “padagos kamong magduman” na “dai nin ontok”? Iyo nanggad, sinda nagduman “sa lagalag na mga karnero kan harong ni Israel” sagkod na an enot na mga Hentil magturubod kan 36 C.E. (Mateo 10:5, 6; Gibo 5:42) Sinasabi na an mga disipulo ‘pinano an Jerusalem kan saindang katokdoan.’ (Gibo 5:28) Dai sinda nag-ontok sa saindang marahay na gibo. Imbes, iyan maimbod nindang tinapos.

“An Oma Iyo an Kinaban”

4. May anong kaisipan na hinaman kan mga parasunod ni Jesus an saindang pinahiwas na asignasyon?

⁴ Ipinarisa ni Jesus na an oma iyo an “mga tawo kan gabos na nasyon.” (Mateo 28:19) Sa parabola manongod sa pagsabwag kan banhi kan Kahadean, sia nagsabi: “An oma iyo an kinaban.” (Mateo 13:38) Kaya, an mga Kristiano magigin “mga saksi” nia manongod sa Kahadean sa gabos na lugar. Sinda sa liwat ‘padagos na maduman,’ ngonyan “sa kaporoporohi nin daga.” (Gibo 1:8) Si apostol Pablo ‘nasibot na gayo sa tataramon,’ asin makasisierto kita na iyo man an ibang Kristiano.—Gibo 18:5.

5. Paano ipinaheling ni Jesus na linalaoman nia na an saiyang mga disipulo masibot nanggad sa paghuhulit sagkod sa katapusan kan presenteng palakaw?

⁵ Si Jesus naglaom na an paghuhulit kasisibotan na gayo nin mga Kristiano sagkod na matapos an presenteng palakaw nin mga bagay. Ini ipinaheheling kan saiyang ihinula manongod sa Kristianong ministeryo asin sa teritoryo na malalakopan kaiyan. Si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:14

6. Gurano kahaloy gigibohon an paghuhulit kan Kahadean, asin paano ini maninigong makaapektar sa satong kaisipan dian?

⁶ Kan ipagboot ni Jesus an paghuhulit kan Kahadean asin paggibo nin mga disipulo sa bilog na daga, aram nia an marahay na gibohon na iyan maabot sa kulminasyon pag-abot nin aldaw, kun paanong iyan nangyari para sa Judiong langtad. Alagad ta maootob kaiyan an katuyohan kaiyan. “Dangan,” arog kan sabi nia,” madatong an katapusan.” Kaya sagkod sa katapusan, an mga Saksi ni Jehova kompiado asin maogmang nagpapadagos sa itinaong gibo. Iyan nakatatabang sainda na magpadagos sa gibohon sa satong aldaw sagkod na iyan matapos.

Kun Paano Gigibohon an Gibohon

7. Ano an tema kan ministeryo ni Jesus asin kan saiyang mga disipulo?

⁷ Tinokdoan ni Jesus an enot niang mga disipulo kun paano gigibohon an saindang ministeryo sa publiko. Sinda maigot na nagkuyog sa pagboot nia na “paduman.“ Kan tinotokdoan sinda para sa saindang paghuhulit, si Jesus nagsabi: “Sa pagduman nindo, maghulit kamo, na nagsasabi, ‘An kahadean kan kalangitan naghaharani na.’” (Mateo 10:7) Iyan nagtao sa saindang mensahe kan iyo man sanang tema nin Kahadean na nagin tanda kan saiyang ministeryo. Iyan magigin maogmang bareta para sa mga may sadiosan na puso. Kan pumoon na an mga parasunod ni Jesus sa saindang gibohon, nagpondo na daw sia? Dai nanggad, ta “kan matapos si Jesus sa pagtao nin instruksion sa saiyang doseng disipulo, nagpoon na sia duman na magtokdo asin maghulit sa saindang mga siudad.”—Mateo 11:1.

8. (a) Saen asin paano gigibohon kan mga parabalangibog kan Kahadean an saindang pagdolok? (b) Taano ta maninigo na darahon an maogmang bareta sa harong nin tawo? (c) Ano an mga bentaha sa tamang pataratara sa kagharong?

⁸ Saen asin paano an gigibohon na pagdolok kan mga parabalangibog na ini kan Kahadean? Sinabihan sinda ni Jesus: “Sa paglaog nindo sa harong, magtaong galang kamo sa pamilya.” (Mateo 10:12) An pagduman sa harong kan tawo na dara an maogmang bareta nagtatao nin dignidad sa kagharong, na tinatawan sia kan oportunidad na atubangon an mensahe kan Kahadean sa sadiri niang harong. Bako sana na an pinagkatodan asin akseptadong mga paagi nin pataratara an magalang asin makonsiderasyon na mga paagi na ponan an orolay kundi may bentaha man kun huli sa makikatood asin magayagayang pataratara an pagsongkong dai imbitado magin istimado. (Ikomparar an Mateo 28:9; Lucas 1:28.) An tono nin boses asin simbag kan tawo sa tata dakol man an ipinaririsa manongod sa saiyang kaisipan. Kaipuhan na risahon nindo iyan bago kamo magpadagos ta paagi sa kaaraman na iyan mas pasil na iangay an saindong komento sa mga pangangaipo kan kagharong.—Ikomparar an Gibo 22:1, 2; 23:6.

9. Ano an nagpaparisa na bakong gabos magdadanay sa mensahe kan Kahadean na may pag-apresyar, asin ano an dapat na magin reaksion sa mga dai nagpapaheling nin interes dian?

⁹ Ipinaaram ni Jesus sa saiyang mga disipulo na bakong gabos na tawo sa teritoryo magdadangog. Sia nagsabi: “Sa ano man na siudad o baryo kamo lumaog, hanapon nindo kun siisay dian an maninigo.” Kun gabos maako sa mensahe kan Kahadean, dai nang dahelan na gamiton an mga tataramon ma “hanapon nindo.” Ano an dapat na magin reaksion sa mga dai nagpaheling nin interes sa mensahe? “Saen man an siisay man dai umako sa saindo o maghinanyog sa saindong mga tataramon, sa pagluwas nindo sa harong na iyan o sa siudad na iyan pagpagon nindo an kabokabo sa saindong mga bitis,” na minahale nin matoninong asin iwinawalat sa paghusgar ni Jehova an mga ibubunga.—Mateo 10:11, 14.

An Situwasyon Ngonyan

10. Ano an isinabi manongod sa paghuhulit kan Kahadean kan mga Saksi ni Jehova?

¹⁰ Sa maimbod ma pag-otob sa sugo sa Kristiano, linalakopan nin mga Saksi ni Jehova an daga kan mensahe kan Kahadean. Kaya, si A. P. Wisse, sarong peryodista sa Netherlands, nagkomento: “Napapalaen sinda sa ibang tawo. An iba sa pagkakalaen na ini bunga kan saindang maigot na pag-ebanghelyo. An punto-de-vista ninda sa Kristianismo bakong relihiyon na may mga katedral, may mga miembro na an kada saro may sadiring lugar asin an relihiyon daing ibang hinahagad saiya kundi magdangog. Sinda nakikipag-olay na igwa kan pagkaprangka ni Pablo sa siisay man na maghihinanyog.” An siring na kaigotan para sa ministeryo tunay na binendisyonan ni Jehova Dios.

11, 12. (a) Anong mga resulta an ibinunga sa ministeryo sa nakaaagi pa sanang mga taon? (b) Mantang kita nagdadakol, ano an nangyayari sa teritoryong huhulitan? (c) Anong mga hapot an pinalalataw?

¹¹ Labing 3,000,000 na parahayag kan Kahadean an naggigibong may kaigotan ngonyan sa 210 na kadagaan. Naheheling niato an marahay na pagdakol nin bagong mga disipulo—1,246,204 an nabautismohan sa nakaaging pitong taon. Risa an bendisyon ni Jehova sa maigot na paghihingoa. (Isaias 60:8-10, 22) Tara, sa kisuerra 40 nasyon asin isla, may sarong Saksi sa kada 300 na habitante o mas kadikit pa, o saro sa kada 100 na pamilya! Dugang pa, sa pirang lugar sa mga nasyon na arog kan Canada asin Guadeloupe, an proporsion sarong Saksi sa kada 45 o 50 katawo sa teritoryo kan kongregasyon—mga 15 sanang harong o mayo pa na sosongkoon para sa kada parahayag! An dakol sa mga teritoryong ini natatapos kada bulan. Minsan sa kadagaan na mas halangkaw an proporsion, an pirang siudad parate nanggad na natatapos sa satong paghuhulit. Sa Seoul, Republika nin Korea, an ibang teritoryo sa siudad natatapos kada limang aldaw! Mantang kita nagdadakol sa bilang, asin mantang padakol nang padakol na Saksi an minalaog sa pagpapayunir asin pag-auxiliary payunir, mas parate kitang masongko sa tata kan satong pagtaraed. Problema daw iyan?

¹² Dapat na admitiron na may mga problema sa nagkapirang bagay, pareho para sa mga Saksi ni Jehova asin sa mga sinosongko niato. Nakadudugang sa problema an nag-oorog na pagkaindiperente nin mga tawo sa dakol na nasyon. Bueno, mantang kita nagdadakol, kita daw luway-luway na minaontok sa paggibo kan satong marahay na gibo? Iniisip daw niato na haros tapos na an satong gibohon asin ‘nahanap’ na niato an gabos na makuyog asin magigin disipulo? Kamo daw mismo napapagal na asin tibaad nanluluya an boot sa pagsongko sa iyo man sanang mga tawo na magabat an boot? Ano daw an magigibo tanganing mapagdanay an satong ekselenteng grado nin aktibidad?

Pagpapadanay sa Tamang Kaisipan

13, 14. (a) Ano an maninigong magin punto-de-vista niato manongod sa nagigin situwasyon sa teritoryong parateng gibohon? (b) Taano ta dai kita naoolang kan mga “magabat an boot“? (c) Paano niato maaarog an mga apostol sa pag-atubang sa mga naaanggot sa satong pagsongko?

¹³ An solusyon sa pangenot may labot sa satong kaisipan bilang mga Saksi ni Jehova. Primero, permi niatong helingon an maogmang lado. An mas parateng pagkatapos sa teritoryo huli sa halangkaw na proporsion nin mga parahayag sa populasyon seguradong mangyayari sa dakol na lugar mantang nakaaabot sa kulminasyon an satong gibohon. Alagad bako daw na inarang niato ini? (2 Tesalonica 3:1) An naheheling niato ngonyan maninigong ikaogma niato asin maninigong makakombensir sato na kita yaon na sa ultimong mga tangga kan paggibo nin mga disipulo! An Kahadean talagang ihinuhulit, arog kan ihinula ni Jesus. Asin minsan sa mga lugar na an mga tawo ‘habong maghinanyog sa satong mga tataramon,’ sinda pinaiisi paagi sa satong paghuhulit kan Kahadean. Girumdoma, apuwera sa paggibo nin mga disipulo, ibinabalangibog niato an maogmang bareta “para sa pagpatotoo.”—Mateo 10:14: 24:14.

¹⁴ Dugang pa, maninigong laoman na mas dakol an mahabo sa mensahe kan Kahadean mantang nagrarani an katapusan. Malinaw an mga hula, asin an eksperyensia pareho ni Jesus asin Pablo naggagarantiya sato na may mga “magabat an boot“ asin an puso magigin “matagas.“ Kaya, sa panahon na ini dapat kitang magmaan na kita bakong magabat an boot sa isinugo sa sato. Minsan sa mga magabat an boot, kaipuhan kitang paduman nin “paorootro.” (Isaias 6:9-11; Mateo 13:14, 15; Talinhaga 10:21) Totoo, kaipuhan an kapusoan sa pagduman nin parate sa mga tawo na naaanggot sa satong pagsongko. Minsan siring, mayo nin situwasyon sa teritoryo saen man na maninigong magsabi sato, ‘Pondo na sa pagtaram. Imbes kapareho kan mga apostol, maninigo kitang mamibi para sa kapusoan na ’padagos na magtaram”—sa ibong nin pagkauyam o pagkaanggot—sagkod na matapos an gibohon.—Gibo 4:18-20, 24-31.

15. Anong pagpakosog an itinatao sa Galacia 6:9, asin paano iyan maninigong makaapektar sa satong punto-de-vista manongod sa pagsongko sa satong pagtaraed na dara an maogmang bareta?

¹⁵ Sa pundamental, duwa sanang klase an mga tawo sa gabos niatong teritoryo—an mga sa ngonyan interesado asin an mga bako. Kun siring, kaipuhan na ipagpadagos niato an gibong ‘paghanap sa mga maninigo.’ An paggibo kaini kabilang sa dakol na ekselenteng mga gibo na kaipuhan niatong ibunga bilang Kristiano tanganing ipaheling an satong pagkamoot ki Jehova asin an satong kaimbodan sa saiya. Kun siring, “dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.” (Galacia 6:9) Mantang haranihon na kita sa katapusan kan palakaw na ini, bako ini an panahon na umontok o mapagal sa pagsongko sa satong pagtaraed na dara an maogmang bareta kan Kahadean. Dai pa sinasabi ni Jehova na tapos na an gibohon.

Kun Taano ta Kaipuhan Kitang “Padagos na Magtaram“

16. Ano an pira sa mga kamugtakan na puwedeng makaliwat sa reaksion nin mga tawo sa teritoryo? (b) Anong lokal na mga halimbawa nin pagliwat sa reaksion an ikatatao nindo?

¹⁶ Matatabangan man kitang mapagdanay an marahay na kaisipan kun gigirumdomon niato na an kaimbodan ki Jehova ipinaheheling nin maigot na paghuhulit kan Kahadean. Dugang pa, an mga teritoryo daing pondo sa pagliliwat sa laen-laen na paagi. An mga tawo minabalyo, o puwedeng maliwat an saindang kamugtakan. Tibaad dai sinda interesado kan ultimo niatong pagsongko, pero an pagkawara nin trabaho, pagkagadan nin sarong namomotan, dakulang pagkaliwat sa paglalaban kan pinakamakapangyarihan na mga nasyon, magabat na helang—an mga ini asin iba pang pagkaliwat tibaad mangahulogan na sinda maghihinanyog sa sunod niatong pagsongko. An iba, kan maaraman na an sarong katood o namomotan nagin saro sa mga Saksi ni Jehova, tibaad gusto na ngonyan na makipag-olay sato tanganing maaraman kun ano an tinutubod niato na nagbunga kan pagliliwat na ini.

17. Ano ngonyan an reaksion nin iba sa mensahe kan Kahadean? Tumao nin lokal na mga halimbawa.

¹⁷ Girumdomon man na an mga nagdakula sa nakaaagi pa sanang mga taon may mga pamilya na ngonyan, seryoso na sa buhay, asin may mga ihinahapot na solamente an Tataramon nin Dios an makasisimbag. Halimbawa, an sarong hoben na ina pinadagos sa harong nia an duwang Saksi asin nagsabi: ‘Kan aki pa ako, dai ko noarin man masabotan kun taano ta pinahahale kan sakong ina an mga Saksi asin sinasabihan sinda na dai sia interesado, mantang an gusto sana nindong gibohon makipag-olay manongod sa Biblia. Nagdesisyon ako kaidto na kun ako dumakula na, maagom, asin may sadiri nang harong, padadaguson ko an mga Saksi ni Jehova asin mapaesplikar ako sa Biblia.’

18. Paano an nagliliwat na kamugtakan nin relihiyon nakaapektar sa teritoryo na satong hinuhulitan asin tinotokdoan?

¹⁸ Narisa daw nindo na an iba na habong makipag-olay sato sa dakol na taon asin naghona na sinda “ligtas na” ngonyan naghahapot sato nin sinsero? Taano? Naliwat an saindang relihiyosong kaisipan. Sinasabi ninda na sinda disganado asin dai makapaniwala sa mga pagkabuyagyag kan inmoral na gawe, politikal na mga gibo, asin pagrawraw sa pondo kan iglesya nin pirang prominenteng ebanghelista sa telebisyon na dati sinasarigan ninda. Posible na dumakol pa an mga ini mantang padagos na nagraraot an mga kamugtakan sa laog kan Dakulang Babilonya sagkod sa panahon na sia malaglag.—Kapahayagan 18:1-8.

19, 20. Ano an nagpapaheling kun taano ta dai maninigong manluya an satong boot manongod sa pagpabalikbalik sa mga tawo na habo man sa mensahe?

¹⁹ Ano man an mangyari, dai kita maninigong panluyahan nin boot kun an kadaklan matagas an puso. Pakabayai niato sa sainda posible na kita nasa isip pa ninda. Sa Canada, an sarong kagharong na sinongko nin duwang Saksi nagsabi nin malinaw na dai sia interesado. Dangan, hinorophorop nia an saindang sinabi asin boot niang makua sinda tanganing simbagon ninda an mga hapot na naglataw sa saiyang isip. Nagsakay sia sa kotse asin hinanap sinda pabalikbalik sa mga tinampo kan saindang lugar alagad dai nia sinda nanompongan. Nagpondo na daw sia? Dai, nagpondo sia sa harong nin sarong katood tanganing ihapot kun nagduman sinda. Dai, pero sinabi kan katood na may Saksi sa pinagtatrabawohan nia asin ipamimidbid nia sa Saksi an babaeng interesado. An resulta nagkapirang pagsongko sa harong kan interesado, na dian nangimbitar sia nin mga katood, pagtaraed, paryentes, asin katrabaho. Kun beses sagkod sa 15 katawo an presente, asin mga 430 libro asin Biblia saka 2,015 magasin an ikinawaras.

²⁰ Dakol an inaapresyar an satong mga pagsongko. Sa surat sa sarong sangang opisina kan Watch Tower Society, an sarong babae nagsabi: “Salamat sa pagtanom nin makosog na dedikasyon sa puso kan mga karelihiyon nindo. Salamat sa pagsongko asin paghiras sa iba kan pagkamoot kan Kagurangnan. Dakula an nagigibo kan simpleng aktong iyan para sa iba. . . . Minsan an iba tibaad maringis, an iba indiperente, asin an iba nag-aako, tunay na dakulang karahayan an nagigibo kan pagsongko nin saro tanganing magpagirumdom saimo nin espirituwal na mga bagay. Para sa sako marahay ini, an pag-oolay manongod sa Kagurangnan.” Sa saro pang surat, pinakiolayan kita nin sarong kagharong na ‘dai pabayaan an mga tawo,’ minsan pa ano an tratamiento ninda sa sato. “Kaya dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal.” (Galacia 6:9) An gibohon na ini may pag-oyon asin bendisyon ni Jehova, asin an pakikikabtang niato dian nagpapatunay sa satong pagkamoot sa saiya asin sa satong kapwa. (Mateo 22:37-39) Kaya tapuson niato an gibohon.—Ikomparar an Filipos 1:6.

21. (a) Posible na saen an minsan paano kabtang kan angat na pagbuwelta sa teritoryong parateng gibohon? (b) Ano an pag-oolayan niato sa masunod na artikulo?

²¹ Dapat na atubangon niato an bagay na tibaad bako man na perming an mga tawo an garo baga nagpapadepisil sa parateng pagtrabaho sa teritoryo. Kun beses kita mismo. Minapoon daw kita na may negatibong isip, na naghohona na midbid na niato an gabos asin aram na niato kun ano an magigin reaksion ninda? Iyan puwedeng makaapektar sa satong kaisipan asin posibleng sa tono kan satong boses asin sa panlauog niato. Ginagamit daw niato sagkod ngonyan an iyo man sanang paagi asin pananaram na dakol na taon na niatong ginagamit? Ngonyan na nagliliwat teritoryo, an dating may kapangganahan tibaad dai na makataros ngonyan sa ibang “maninigo.” Tibaad kaipuhan niato nin bagong pagdolok asin bagong punto-de-vista sa satong gibohon. Sa sunod, helingon niato kun ano an magigibo niato tanganing ‘dai kita mag-ontok kundi mag-ani kita sa kapanahonan.

Ikapaliliwanag daw Nindo?

◻ Taano ta dai kita maninigong “mag-ontok“ sa pagduman sa satong mga pagtaraed na dara an maogmang bareta?

◻ Siisay an nagsabi sato na gumibo nin mga disipulo sa paagi na ginigibo niato, asin ano an pundamental na mga kabtang kan paaging iyan?

◻ Ano an nagin situwasyon sa dakol na teritoryo, asin ano an makatatabang sato na papagdanayon an tamang kaisipan manongod sa situwasyon na iyan?

◻ Taano ta maninigo kitang “padagos na magtaram“ kan maogmang bareta na “dai nin ontok“?

Pirme Mong Atenderan an Saimong Pagtotokdo

“Pirme mong atenderan an saimo man sana asin an saimong pagtotokdo. Magdanay ka sa mga bagay na ini, huli ta sa paggibo mo kaini ililigtas mo an saimo man sana asin idtong naghihinanyog sa saimo.”​—1 TIMOTEO 4:16.

1. Taano ta bako ini an panahon na kita magluyaluya sa satong paghuhulit kan Kahadean?

PINARIRIKAS ngonyan ni Jehova an pagtipon sa mga arog-karnero. Kaya, bako ining panahon na an saiyang banwaan magluyaluya sa saindang paghuhulit kan Kahadean asin paggibo nin disipulo. (Isaias 60:8, 22; Mateo 24:14; 28:19, 20) Kaipuhan kitang gumawe oyon sa espiritu kan ginigibo nin Dios sa satong panahon. Mantang orog na nagrarani an katapusan, mas parate kitang mabuwelta sa satong pagtaraed. An totoo, an orog na paghuhulit nin mas dakol pang parahayag asin payunir nakapupukaw ngonyan sa langtad kan kinaban. Asin maorog pa an puwersa kan magayagayang pagtipon na ini.—Isaias 60:11; ikomparar an Salmo 126:5, 6.

2. (a) Sono sa Isaias 40:28-31, anong gikanan nin kosog an makukuanan niato kan kinakaipuhan na kosog na matapos an paghuhulit kan Kahadean? (b) Ano an marahay na dahelan sa pagtao nin dugang na atension sa kuwalidad kan satong ministeryo sa panahon na ini?

² Imbes na padaog sa ano man na pakamate nin ‘pagkapagal’ huli ta an ibang teritoryo parateng nagigibo, maninigo niatong midbidon na ini an panahon na kita mamibi ki Jehova para sa kinakaipuhan na “dinamikong kosog” na matapos an gibohon. (Isaias 40:28-31; 1 Juan 5:14) Totoo, minilyon sa “dakulang kadaklan” kan “ibang karnero” an natipon na. Alagad an dating mapanggana sa pagtabang sa nagkapira tibaad bako nang epektibo sa pagtabang sa iba na yaon pa sa satong mga teritoryo. (Kapahayagan 7:9, 10; Juan 10:16) Kaya, an kuwalidad kan satong ministeryo nagkakaipo nin dugang na atension.

3. Paano magkakaigwa nin bagong entusiasmo an satong ministeryo sa langtad­?

³ May bago na naman na determinasyon, puwede kitang magkonsentrar sa pagpaoswag kan satong pagigin epektibo sa ministeryo. Ini makatatao nin bagong entusiasmo sa satong paglilingkod sa langtad. Alagad paano iyan magigibo? Paagi sa ‘pirmeng pag-atender sa satong sadiri asin sa satong pagtotokdo,’ bakong rutina sana an paggibo sa satong ministeryo. (1 Timoteo 4:16) An satong ngabil dapat na magdolot nin labi sa mekanikal na “atang nin pag-omaw.” (Hebreo 13:15) Maninigo kitang magin eksperto sa satong gibohon. (Talinhaga 22:29) Kaya an kaipuhan iyo an ekspertong paggibo sa satong teritoryo. Uya an pirang kabtang kan satong ministeryo na kaipuhan niatong ‘pirmeng atenderan.’

Kun Paano Magkakaigwa nin “Bagong” Teritoryo

4. Sa anong paagi kita makagigibo nin “bagong” teritoryo sa asignasyon kan satong kongregasyon?

⁴ Helingon niato an situwasyon sa praktikal na paagi. Sa dakol na lugar, mayo nin bago o bihirang gibohon na teritoryo. Kaya taano ta dai gumibo nin “bagong” teritoryo sa laog kan asignasyon kan kongregasyon? Paano? Bueno, kun kita parateng minasongko, dai kita puwedeng gumawe na garo baga dai pa kita noarin man nagsongko sa harong na iyan kaidto paagi sa pagsabi sana kan dati niatong sinasabi sa pinto. Posible na mamimidbid kita kan kagharong kun parate na niatong ginibo an teritoryo. An librong Reasoning From the Scriptures nagtatao nin labing 40 introduksion na magagamit niato sa satong ministeryo. Kaipuhan na andamon niato iyan nin marhay bilang bagay na bago asin nakaaagyat paagi sa pagkonektar kaiyan sa mga bagay na may lokal asin presenteng interes. Imbes na garo nasosopog sa parateng pagsongko,kaipuhan kitang magkaigwa nin positibong kaisipan asin gibohon na “bago” an satong teritoryo paagi sa de-kuwalidad na mga pag-atubang. Alagad makatatabang daw ini kun bakong makikatood an mga kagharong?

5. (a) Paano niato magigibong bentaha niato an dating bakong makikatood na kaisipan? (b) Ano an naheling nindong epektibo sa lokal? (c) Taano ta nakatatabang an paghinanyog asin sadiosan na komendasyon?

⁵ An pakaaram sa dating kaisipan kan kagharong puwedeng magbunga nin negatibong saboot manongod sa pagbuwelta. Alagad taano ta dai gamiton an kaaraman na iyan sa bentaha nindo? Paano? Tibaad paagi sa pagsambit dian sa primero dangan pagdagdag sa napag-olayan nindo kan nakaaging pagsongko. Puwede nindong sabihon: “Marahay na aga, Mr. Hernandez!” Kun garo baga maninigo, puwede nindong idagdag: “Kumusta kamo?” Dangan puwede nindong sabihon: “Kan magdigdi ako kan nakaaging semana, sinabi nindo sako na an saindong iglesya inaasikaso an gabos nindong espirituwal na pangangaipo asin na kamo aktibong miembro. Bilang kataed nindo na isinasapuso man an relihiyon, puwede ko daw na ihapot kun ano an sinasabi kan saindong iglesya manongod sa paglaom na makaligtas sa panahon nuklear?” Dangan, togotan siang ipahayag iyan saindo. Komendaran an kagharong kun sadiosan nindong ikatatao iyan. An paghinanyog sa saiya asin pagtao sa saiya nin komendasyon tibaad makaliwat sa saiyang kaisipan. Parate na itinotogot nin mga tawo an saro pang pagsongko kun sinda mismo makapagtataram. Siyempre, bobooton nindong iangay an saindong mensahe sa sinasabi kan kagharong.

6. (a) Paano niato matotokdoan an mga kagharong na laoman na kita regular na masongko? (b) Anong pangenot na mga tataramon an makatatabang sato na magin mapanggana? (c) Ano an epektibo sa lokal na teritoryo?

⁶ Paagi sa saindong sinasabi, puwede nindong tokdoan an mga kagharong na laoman na kita regular na masongko. Probaran nindong sabihon: “Marahay na aldaw, Mrs. Federico! Kumusta kamo ngonyan? Sa pagsongko niamo ngonyan sa samong pagtaraed, ipinakikipag-olay mi an . . .” O puwede nindong sabihon: “Marahay na aga! Yaon kami ngonyan sa samong regular na pagsongko serosemana. Marahayon nanggad na makabuwelta. Nagustohan kan saindong pagtaraed an bagong tema na ipinakikipag-olay mi sa pagsongkong ini.” Dangan magpadagos. Ini nagseserbi man na gibohon na “bago” an teritoryo para sa saindo. Tibaad may kadikit na pagkakalaen an aktuwal na pananaram sa saindong nasyon, alagad ini nagtatao kan pangenot na ideya. Taano ta dai iyan aprobetsaran, sa bentaha nindo?

7. (a) Sa paghale, paano inaandam nin ibang Saksi an kagharong para sa masunod na pagsongko? (b)  Sa bagay na ini, ano an epektibo sa lokal na teritoryo?

⁷ Tanganing andamon an kagharong para sa masunod na pagsongko, may mga Saksi na mapanggana sa konklusyon na arog kaini: “Linalaom mi na masongko giraray kamo sa dai mahaloy.” Sa mga garo baga nag-aalangan na makipag-olay sa saindo sa primero, puwede nindong sabihon: “Naogma ako sa pag-oolay niato. May sinabi kamong marahay na mga punto. Naglawig ini nin pirang minuto, pero minsan paano bakong maraot na bareta, an pinag-olayan niato, na puwede niatong madangog ano man na oras. Tunay na kapakipakinabang iyan.” Daing duwa-duwa na makadidiskobre kamo nin ibang angay na paagi nin pakikipag-olay sa mga kagharong. Minsan paano, paagi sa positibong mga tataramon, de-kuwalidad na mga pag-aatubang, asin pagigin makikatood, pagmaigotan na tabangan an publiko na dai ikaanggot an satong regular na pagsongko.

Tumao nin Lubos na Patotoo

8, 9. Anong mga suhestion an itinatao para sa lubos na paghanap sa mga maninigo?

⁸ An saro pang bagay na maaatenderan niato na magpapadanay na makosog sa satong entusiasmo iyo an pagigin lubos sa paghanap sa mga maninigo. (Gibo 8:25; 20:24) Halimbawa, puwedeng hanapon nin tugang na lalaki an ama kan pamilya kun babae o aki an lumuwas kun Sabado asin Domingo o sa banggi. Seguro, an agom na babae an nakakaolay niato sa kadaklan na panahon. Kaya puwede kitang gumibo nin bagong kapinonan sa pamilya paagi sa pakikipag-olay sa payo kan pamilya. Dangan puwede niatong iangay sa saiya an mensahe, na sinasabi an arog kan, “Ano sa paghona nindo an magarantiya nin maogmang ngapit para sa saindong pamilya?” o, “Helinga kun paano tinatabangan kan Biblia an pagkasararo kan pamilya.” Omawon an tawo para sa marahay na mga ideya na tibaad ipahayag nia.

⁹ An saro pang paagi na makanompong nin “bagong” teritoryo iyo an paghanap sa ibang miembro kan pamilya na nag-iistar man sa harong na iyan—apoon, sobrino o pinsan na nag-eeskuwela, kunyada na nagtatrabaho sa laog kan semana. Praktikal man na helingon kun pira an kuntador o kahon para sa surat na yaon sa sarong harong. Tibaad iparisa kaini kun hinirahay an sirong, itaas kan kisame, o iba pang lugar tanganing paarkilahan. Pagmaigotan na makaolay an mga nag-aarkila—mga estudyante, mga nagtatrabahong daing agom, balo, asin iba pa. Ini nakatatabang man na humiwas an teritoryo.

10. Ano an saro pang paagi na humiwas an satong teritoryo sa pagharongharong, asin ano an ginibo nin iba tanganing makaolay an mga nagtatrabaho nin banggi?

¹⁰ An saro pang paagi na humiwas an teritoryo sa pagharongharong iyo na pahingaloan iyan kun beses mantang nakikikabtang kita sa ibang kabtang kan satong ministeryo. Tanganing magkaigwa nin pagkalaenlaen, puwede kitang magtrabaho sa teritoryo na may direktang pag-opresir nin libreng pampamilyang pag-adal sa Biblia. An iba na mayo sa harong pagsongko niato puwedeng manompongan sa saindang opisina o pinagtatrabawohan. Asin an paghuhulit sa komersial na mga lugar puwedeng magin mabunga nanggad. An iba sa mga tawong ini tibaad manompongan man kun kita maghuhulit sa tinampo sa angay, mabungang mga oras. Sa Canada an mga payunir nagkamit nin marahay na mga resulta sa medyo banggi nang pagsongko sa mga empleyado sa magdamlag na mga istasyon nin gasolina, tindahan, asin hotel na an mga klerk parateng daing gayo sibot sa oras na iyan asin gustong may mabasa. Siyempre, an mga tugang na babae nangorogna kaipuhan na lumikay sa nagkapirang lugar kun banggi na.

11. (a) Ano an ginigibo nin ibang Saksi sa mga lugar na dakol an mayo sa harong sa enot na pagsongko? (b) Ano an puwedeng magin epekto nin kaimbodan sa pagsongko sa mga harong na daing tawo sa satong teritoryo, na may anong mga resulta sa ministeryo?

¹¹ Kumusta man an mga mayo sa harong pagsongko niato? Digdi kaipuhan giraray na lubuson niato an trabaho. An ibang Saksi ginagamit an saindang kompletong house-to-house record pagkatapos kan saindang pagharongharong asin binabalikan an mga lugar na mayo nin tawo sa kapinonan kan aldaw na iyan. Parate na nagpuli na an mga kagharong, o mata na an mga banggi an trabaho. Sa dakol na lugar, 50 porsiento o labi pa an mayo sa harong kun aldaw. Kaya garo man sana madodoble niato an teritoryong iyan paagi sa pagsongko sa mga harong na mayo nin tawo sa laen-laen na oras sagkod na may matagbuan kitang tawo. An mga payunir asin eksperyensiadong parahayag minaoyon na an kaimbodan sa pagtrabaho sa mga harong na mayo nin tawo parateng mas marahay an resulta kisa enot na pagtrabaho sa teritoryo. Paagi sa pag-atender sa kabtang na ini kan satong ministeryo, posibleng kita mag-ani nin dakol na bendisyon.—Talinhaga 10:22.

An mga Nagrereklamo

12. Ano an maninigong magin reaksion niato kun nagrereklamo an mga tawo na sobra kaparate an satong pagsongko? Taano?

¹² Ano an masasabi sa mga nagrereklamo na sobra kaparate an satong pagsongko? Orog sa gabos, dapat kitang magpaheling nin pagsabot. (Mateo 7:12) Para sa sainda, garo baga madalion kitang nagbuwelta. Alagad marahay na girumdomon na minsan kaidtong dakol nang taon an nakaagi may mga nagsasabi nang, ‘Nagdigdi na kamo kan nakaaging semana,’ mantang aram na gayo niato na anom na bulan na o labi pa poon kan kita sumongko. Apuwera kaiyan, an parateng pagsongko puwedeng pumukaw nin interes. Sa Guadeloupe may lalaki na linapag an sarong Saksi tanganing sabihon: “Dakol na semana ko na kamong pinagmamasdan. Dati, dai ako naghihinanyog sa mga Saksi, pero kaipuhan na maaraman ko kun taano ta parate nanggad kamong dumalaw sa mga tawo!”’ Bagong pag-adal sa Biblia an ibinunga.

13, 14. Ano an ginigibo nin iba niatong kapagtubod kan nagrereklamo an mga kagharong?

¹³ An ibang tugang maboot na sinasabi sa mga nagrereklamo an eksaktong petsa kan nakaaging pagsongko asin iinaalok an pinakabagong mga magasin, na liniliwanag na an mga artikulo iba man sa mga magasin na dara niato kan nakaagi niatong pagsongko. Sa pakikipagrasonan sa mga kagharong na iyan, puwede niatong sabihon na seguro nakaresibi sinda nin dakol na peryodiko asin magasin poon kan huri niatong pagsongko, pero an mga ini bakong perming maogmang bareta an dara. Puwede niatong ipaliwanag na an dara niato maogmang bareta asin na bako man na haloy an satong mga pagsongko. Pero kun sibot-sibot an kagharong, puwede niatong sabihon: “Kun bako ini an pinakamarahay na oras na kaolayon kamo, puwede ko kamong digdihan sa sunod niamong pagsongko sa maabot na semana.”

¹⁴ Ano pa an ibang masasabi? Depende ini sa kaisipan kan kagharong asin sa usong kortesiya na linalaoman sa satong lugar. An sarong tugang na babae sa Hapon arog kaini an paliwanag sa parate niatong pagsongko: ‘An bareta sa telebisyon paorootrong ibinabareta an dalagan nin bagyo. na parateng inootro an impormasyon sa kapakinabangan kan mga tibaad dai nakadangog sa naenot na mga brodkast. Ginigibo ini ta napapalabot an mga buhay. Nag-oorog an pagkaparate kan bareta mantang nagrarani an bagyo. Kaya, mantang nagrarani an bagyo nin Armagedon, kaipuhan na ipahayag an mensahe nin pagpatanid sa pinakaparateng mahihimo tanganing magligtas nin buhay.’ Siyempre, sasabihon niato an siring na mga tataramon na may kabootan asin sinseridad, na linalaoman na mataros an puso kan nagdadangog.

Pag-atubang sa Angat nin Pagkaindiperente

15. (a) Ano an puwedeng magin nag-oorog na angat kun parate niatong nagigibo an satong teritoryo? (b) Taano ta indiperente an ibang tawo?

¹⁵ Mantang mas parate kitang minasongko, an mag-oorog na angat iyo an pagkaindiperente na manonompongan niato. Alagad an pagsiyasat sa nagkapirang causa nin pagkaindiperente makapakokosog sato na mangnohon na tibaad posible pa na mataros an puso kan iba sa mga tawong ini. An saindang pagkaindiperente tibaad magparisa kan saindang pagkadiskontento asin kadaihan nin paglaom. Tibaad an paghona ninda mayo na nin solusyon an presenteng kamugtakan kan kinaban, na nangangatanosan na tatapuson na sana ninda an saindang buhay sa pinakamarahay na paaging makakaya ninda. An iba nauuyam huli ta an ibang namomoon sa relihiyon nakikilabot sa politika, nagkasala nin inmoral na gawe, o dai nakapaninindogan nin marigon tumang sa seksuwal na inmoralidad. Kaya disganado na an mga kagharong na ini asin nabubuhay na sana para sa presente.

16. Paano daw matataros an puso nin sarong tawong indiperente?

¹⁶ Aram niato na an enot na mga ministrong Kristiano mapangganang naatubang an kaparehong kaisipan, huli ta an iba kaidto nagsarabi: “Magkarakan asin mag-irinom kita, huli ta sa aga magagadan kita.” (1 Corinto 15:32) Kaya, aram niato na yaon sa sato an kaipuhan na madangog kan siring na mga tawo. Pero, paano niato matataros an saindang puso? An sarong paagi sarayon nguna an babasahon sa Biblia, na ipinaheheling iyan sa sainda. Dangan puwede niatong ihapot sainda an inisip na gayong mga hapot na arog kaini: “Sa paghona daw nindo may solusyon an mga problema sa presente? Posible daw na dai pa sana nanonompongan nin kadaklan an mga solusyon? Sa paghona daw nindo maninigo kitang magin positibo asin padagos na maghanap?” Sa iba, puwede niatong sabihon: “Seguradong maoyon kamo na mas marahay an mabuhay na may paglaom kisa mayo man lamang nin paglaom sa mas marahay na mga bagay. Ano an linalaoman nindong maheling?” Puwede niatong ihapot: “Ano sa paghona nindo an pinakadakulang kaolangan sa pagkasararo asin katoninongan kan kinaban?” An iba man puwedeng hapoton: “Sa paghona daw nindo an gabos na relihiyon kapareho kan ilinadawan nindo?” Sa dakol na pangyayari an siring na mga hapot madagka sa mga kagharong na ipahayag an saindang opinyon. Dangan, pagsimbag ninda, seguradohon na magdangog kamo. Iyo, pabayaan nindo na iluwas ninda sa saindo an nasa saindang puso. An dakol sa sainda ‘nag-aaragagha asin nag-aaragrangay huli sa gabos na makababaldeng bagay na ginigibo ngonyan.’—Ezequiel 9:4.

17. Paano daw magagamit an satong mga babasahon tanganing mataros an iba dawa kun sa primero sinda nag-iinsister na dai sinda interesado?

¹⁷ An saro pang pag-atubang sa pagkaindiperente tandaan an sarong punto o pagtumang kan kagharong asin bumuwelta na dara an sarong magasin o iba pang babasahon kan Watch Tower manongod sa bagay na iyan. Sa primero, tibaad iyan tema na bakong sa relihiyon, arog baga kan artikulo manongod sa biglang pagkagadan nin omboy o pagkawara kan mga kadlagan. Ipaliwanag na iniisip-isip nindo an pinagkakainteresan kan kagharong asin nagirumdoman nindo an artikulong ini. Dangan itukdo an pangenot na mga punto sa materyal. An sarong babae na bago pa sanang magsayuma sa satong babasahon nag-ako nin sarong magasin pakalihis sana nin pirang segundo. Taano? Huli ta ihinapot kan Saksi kun aram kan babae na may 55 milyones na aborsion kada taon. Nakubhanan na maaraman ini, hinagad nia an magasin na igwa kan impormasyon na iyan.

Pagtapos Kaiyan

18, 19. (a) Ano pang dugang na mga punto an maninigo niatong “atenderan” sa paggibo niato sa satong ministeryo? (b) Ano an salang ideya nin iba manongod sa sato asin sa satong mga tinutubod, asin paano niato sinda masisimbag?

¹⁸ Orog sa gabos, kaipuhan kitang magin mapasensia sa mga tawo. Magtaram nin luway-luway asin may init. Magpaheling nin pagkamoot asin kabootan. (Galacia 5:22, 23) Bago dumagos sa sunod na harong, isip-isipon an nangyari sa nakaaging harong tanganing aramon kun ano an mapaooswag. Magin mapagsabot, huli ta dakol an may salang ideya manongod sa mga Saksi ni Jehova. Tibaad magsabi sinda: ‘Naglilikay kamo sa politika asin mga obligasyon na sibiko,’ ‘Nagsasayuma kamong magserbisyo sa militar,’ o, ‘Nanlalaglag kamo nin mga pamilya.’ Alagad an kaisipan na ini kapareho kan kaisipan kan kinaban manongod sa mga kapagtubod niato kan enot na siglo. Ipaheling ini sa mga kagharong, na tibaad ginagamit an mga kotasyon sa irarom kan “Neutrality” sa librong Reasoning.

¹⁹ Manongod sa enot na mga Kristiano, an historyador na si Will Durant nagsurat: “Para sa sarong Kristiano an saiyang relihiyon siblag asin superyor sa politikal na sosyedad; an kaharohalangkawe niang kaimbodan bakong ki Cesar kundi ki Cristo. . . . An pagrayo kan Kristiano sa mga gibo-gibo sa kinaban sa pagheling kan pagano garo pagdulag sa obligasyon na sibiko, pagluya kan nasyonal na kosog asin determinasyon. Hinatolan ni Tertullian an mga Kristiano na magsayumang magserbisyo sa militar; . . . an mga Kristiano sinadol kan mga namomoon sa sainda na likayan an mga bakong Kristiano, isikwal an saindang karawat sa kapiyestahan bilang barbaro, asin an saindang mga teatro bilang mga lugar nin kalaswaan. . . . An Kristianismo [kun nangongombertir] pinagsahotan na nanlalaglag sa pamilya.”—Caesar and Christ, pahina 647.

20, 21. (a) Ano an boot niatong masierto kun habong maghinanyog an mga tawo? (b) Taano ta ‘dai kita maninigong mag-ontok’ kundi magpadagos sa satong marahay na gibong paghuhulit kan Kahadean?

²⁰ An iba talagang habong maghinanyog, ano man an sabihon niato. Alagad maninigo na iyan dahelan sa pagsikwal ninda sa mensahe kan Kahadean, bakong huli sa dai niato pakatao nin de-kuwalidad na mga pag-aatubang sa satong ministeryo. (Lucas 10:8-11; Gibo 17:32; Ezequiel 3:17-19) Maninigo niatong gibohon an bilog niatong makakaya sa tabang nin Dios, asin tatapuson ni Jehova an gibohon.—Ikomparar an Filipos 1:6.

²¹ Kaya, may bilog na kompiansa, magpadagos kamong “dakol an gigibohon sa gibohon kan Kagurangnan, sa pakaaram na an saindong pagpapagal bakong daing kapakanan dian sa Kagurangnan.” (1 Corinto 15:58) “Pirme mong atenderan an saimo man sana asin an saimong pagtotokdo. Magdanay ka sa mga bagay na ini huli ta sa paggibo mo kaini ililigtas mo an saimo man sana asin idtong naghihinanyog sa saimo.” (1 Timoteo 4:16) Orog sa gabos, “dai kita mag-ontok sa paggibo nin karahayan, huli ta sa kapanahonan kita mag-aani kun kita dai mapagal?”—Galacia 6:9.

Nagigirumdoman daw Nindo?

◻ Ano an pirang paagi na mapagdanay an positibong kaisipan sa teritoryong parateng ginigibo?

◻ Paano niato mas lubos na mahahanap an mga maninigo?

◻ Paano niato puwedeng pagmaigotan na makaolay an mga nagrereklamo na sobra kaparate an satong pagsongko?

◻ Sa anong mga paagi niato maaatubang an angat nin pagkaindeperente?

◻ Ano an mapaoswag sa kuwalidad kan satong ministeryo?

[Kahon sa pahina 17]

MANTANG MAS PARATENG NATATAPOS AN TERITORYO,

“Pirme mong atenderan” an:

◻ Positibong mga pagdolok asin pag-aatubang

◻ Mas lubos na paghanap sa mga maninigo

◻ Mapasensiang pakikipag-olay sa mga nagrereklamo

◻ Pag-atubang sa mga angat nin pagkaindeperente asin salang pakasabot

Mga Magurang—Taruson an Puso kan Saindong Aki Poon sa Pagkaomboy

“Padagos na padakulaon [an saindong mga aki] sa disiplina asin pagtatanos nin isip ni Jehova.”—EFESO 6:4.

1. Ano an nangyari sa panahon na masakit nanggad sa buhay ni Jesus?

SI Jesu-Cristo asin an saiyang mga disipulo pasiring kaidto sa Jerusalem. Dai pa nahahaloy bago kaini, sa duwang magkalaen na okasyon, sinabihan ni Jesus an saiyang mga disipulo na sia maagi sa dakol na kasakitan asin gagadanon sa siudad na iyan. (Marcos 8:31; 9:31) Sa masakit nanggad na panahon na ini para ki Jesus, an tala sa Biblia nagsasabi: “Pinonan man na darahon nin mga tawo an saindang mga omboy tanganing dootan nia an mga ini.”—Lucas 18:15.

2. (a) Taano daw ta hiningoa kan mga disipulo na pahaleon an mga tawo? (b) Ano an reaksion ni Jesus sa situwasyon?

² Ano an maninigong reaksion digdi? Bueno, inanggotan kan mga disipulo an mga tawo asin pinahahale sinda, na daing duwa-duwa na nagtutubod na sa ikararahay ni Jesus an ginigibo ninda paagi sa pagprotehir sa saiya tumang sa dai kinakaipuhan na istorbo asin tension. Alagad ta naanggot si Jesus sa saiyang mga disipulo, na sinasabi: “‘Pabayae nindo na dumolok sa sako an saradit na aki; dai nindo sinda pagpogolan’ . . . Asin kinugos nia an mga aki asin binendisyonan sinda.” (Marcos 10:13-16) Iyo, sa ibong kan gabos na tibaad nasa isip asin puso nia, si Jesus nagtao nin panahon para sa mga omboy.

Ano an Leksion Para sa mga Magurang?

3. Ano an leksion na maninigong manodan nin mga magurang sa pangyayaring ini?

³ An maninigong magin leksion digdi para sa mga magurang iyo ini: Sa ibong nin ano man na ibang obligasyon nindo o problemang inaatubang nindo, an pagtao nin panahon sa saindong mga aki kaipuhan na enoton. An oras na kamo nag-iiba-iba matogot saindo na itanom an espirituwal na mga pamantayan na mag-iingat sa puso kan saindong mga aki asin magbubugtak sa sainda sa tamang dalan. (Deuteronomio 6:4-9; Talinhaga 4:23-27) Si Eunice asin Loida, an ina asin lola ni Timoteo, nagtao nin panahon na matawan sia kan pagtotokdo na nakapahiro sa saiyang sadit na puso asin nakaporma sa saiyang buhay kaya sia nagdakula na magin maimbod na lingkod nin Dios.—2 Timoteo 1:5; 3:15.