Hirasan an Iba Sono sa Saindang mga Pangangaipo
1 Naggigibo si Jehova nin abundang probisyon para sa satong espirituwal na mga pangangaipo paagi sa fiel na “oripon.” (Mat. 24:45-47) Huling nag-ako kita nin abunda, linalaoman kita ni Jehova na maghirirasan bilang sarong pambilog na kinaban na pamilya, na sinisierto na gabos nakikinabang nin parareho. (Mat. 10:8) Paano daw niato magigibo ini? Konsideraron niato an tolong paagi.
2 Pagbayad sa Literatura: An kadaklan sa literatura na inaako niato idinidistribwir sa hababang kantidad tangani na matabangan an mga may limitado sanang materyal na mga kakayahan. Ipinadadara man iyan sa mga kongregasyon sa primero bilang pautang. Sa siring, kun tolos-tolos niatong binabayadan an literaturang inaako niato asin bilog na ibinubuelta ini kan mga kongregasyon sa Sosyedad, ibinabalik niato an mga pondo na gagamiton sa pagprodusir nin dakol pang literatura. Kinokonsiderar niato an mga pangangaipo nin iba, bako sanang kan satong sadiri, asin ini nagtatao nin mas dakulang kaogmahan. (Gibo 20:35) Alagad kun an mga parahayag o payunir nagkukua nin literatura na utang asin dai ninda nababayadan, kun siring pinopogolan ninda an mga pondo na makatatabang sa pagprodusir nin dakol pang literatura.
3 Kingdom Hall Loans: Nagkua na daw an saindong kongregasyon nin pautang tangani na makatogdok nin Kingdom Hall? Kun iyo, daing duwa-duwa na naoogma kamo sa mararahay na pasilidad na nagibo. Itinao an mga pondong ini paagi sa mga donasyon kan satong mga tugang sa bilog na kinaban. Kan panahon na hagadon an pautang, daing duwa-duwa na personal kamong nanuga na makontribwir nin sarong kantidad kada bulan tangani na tumabang na mabayadan an pautang. Kun fiel nindong inootob ini, kun siring hinihirasan nindo an gabos nindong tugang sa bilog na kinaban. Kun an kongregasyon sa kabilogan fiel na ibinubuelta sa Sosyedad kada bulan an mga pondong inutang sono sa saindang panuga, nagtatabang sinda sa pagtogdok nin dakol pang Kingdom Hall.
4 Digdi sa Pilipinas, an mga pondong makukua bilang pautang para sa bagong mga Kingdom Hall limitado sana sa mga kantidad na nareresibi bulan-bulan gikan sa mga nangutang na o gikan sa mga donasyon para sa Kingdom Hall Fund. Kun siring, kun dai ikaintrega kan mga kongregasyon an bilog na kantidad kada bulan, talagang pinag-iimotan ninda an ibang kongregasyon nin mga pondo para sa pagtogdok kan saindang mga Kingdom Hall. Sierto nanggad na habo niatong gibohon iyan, bako daw? Kaya an gabos na igwa nin mga utang maghimate sa sadol ni Pablo na hirasan an iba “sono sa saindang mga pangangaipo,” na paagi kaini “nagririsa, bakong sa personal na interes sa sadiri sana nindong mga bagay-bagay, kundi siring man sa personal na interes sa kaidto man na iba.”—Roma 12:13; Fil. 2:4.
5 Boluntad na mga Donasyon: Sa sinusundan na mga parapo pinag-olayan niato enot sa gabos an pagbuelta sa Sosyedad kan mga pondo bilang bayad para sa mga probisyon na inako. Minsan siring, an mga talagang nagpapahalaga sa gabos na ginigibo ni Jehova paagi sa saiyang organisasyon dai sana nakokontento na gibohon ini. Imbes, mawot nindang maghiras sa iba paagi sa pagtao nin boluntad na mga donasyon sa Sosyedad. An dakol, dawa ngani igwa nin mga obligasyon sa lokal na kongregasyon, gikan sa boot na nagdodonar kada bulan sa pambilog na kinaban na gibohon kan Sosyedad o sa Kingdom Hall Fund.—Helingon an Disyembre 1, 1995 Torrengbantayan, pahina 30 asin 31.
6 Nagsabi si Jesus na mamimidbid an saiyang mga disipulo paagi sa saindang pagkaminorootmootan. (Juan 13:34, 35) An satong pagkabuka an palad sa pagtao nin materyal asin an satong pagkadaing kapasloan sa paghiras sa iba sono sa saindang mga pangangaipo siertong mararahay na paagi na patunayan an satong sadiri na tunay na mga Kristiano.