Pagretiro—Saro daw na Bukas na Tata Pasiring sa Teokratikong Aktibidad?
PAGRETIRO—para sa dakol sinisirrahan kaiyan an tata sa halawig na panahon nin tension asin pagkaaburido. Pakatapos malaom sa mapagal o nakatatarantang rutina, an dakol linalaoman an pagretiro na magbubukas nin sarong tata pasiring sa mga taon nin pagpasiramsiram asin personal na katalingkasan. Pero, parateng gayo na an tatang iyan minagiya pasiring sa pagkalangkag asin pagkadaing kabuhaybuhay. An pag-aling-aling asin mga apisyon sana dai nagtatao kan pakamate nin halaga sa sadiri na ikinatatao nin trabaho.
Para sa Mga Saksi ni Jehova, an pagretiro puedeng magbukas nin “sarong dakulang tata na pasiring sa gibohon.” (1 Corinto 16:9) Minsan ngani an paggurang talagang may kadungan na mga problema asin limitasyon, nanonompongan nin nagkapirang gurang na paagi sa tabang ni Jehova puede nindang madugangan an saindang paglilingkod sa saiya. Helinga an mga eksperyensia nin nagkapirang gurang nang Kristiano sa Netherlands. Durante kan 1995 taon nin paglilingkod, an 269 sa labing 1,223 na payunir (pambilog na panahon na mga parabalangibog kan Kahadean) 50 anyos na o mas gurang pa. Sa mga ini, 81 an 65 anyos na o labi pa.
An iba nakakapagpayunir paagi sana sa pagpapadagos kan saindang sibot na iskedyul na naestablisar na ninda mantang nasa sekular na trabaho. (Ikomparar an Filipos 3:16.) An sarong retiradong Kristiano na an ngaran Karel nakagirumdom: “Kan ako nasa sakong sekular na trabaho, minapoon akong magtrabaho sa alas 7:30 n.a. Kan magpoon akong magresibi kan sakong pension, nagdesisyon akong ipadagos an iyo man sanang rutina. Pinoponan ko an aldaw paagi sa pagpapatotoo sa tinampo paagi sa magasin sa atubangan kan istasyon nin tren kada aga nin alas siete.”
An maingat na pagplano saro man na liabe sa kapangganahan. (Talinhaga 21:5) Halimbawa, an nagkapira nakapagtagama nin bastanteng pondo tanganing sustentohan an saindang sadiri sa ministeryo. An iba nagdesisyon na inaan an personal na mga gastos asin kumua nin trabahong por ora. Konsiderara si Theodore asin Ann. Pinonan ninda an buhay may agom bilang mga payunir sagkod na puminondo sinda sa pagpapayunir huli sa pampamilyang mga obligasyon. Alagad nagdanay na buhay an saindang espiritu nin pagpapayunir! Mantang nagdadakula an saindang mga aking babae, dayaday na pinaririgon an saindang boot na magpayunir. Orog na mahalaga, si Theodore asin Ann nagtao nin marahay na halimbawa, na parateng naglilingkod bilang mga auxiliary payunir. Mantang nagkakaedad an mga aki, pinonan ni Theodore asin Ann na inaan an saindang sekular na trabaho tanganing magkaigwa nin mas dakol na panahon sa paglilingkod sa langtad.
Pakatapos na lumaog an saindang mga aking babae sa pambilog na panahon na ministeryo asin humale sa harong, si Ann nagpoon na magpayunir. Sarong aldaw pinarigon nia an boot ni Theodore na humale sa saiyang trabaho. “Kitang duwa puedeng magpayunir,” an suhestion nia. Ipinaaram ni Theodore sa among nia an saiyang mga intension. Sa saiyang pagkabigla, an among nia nag-alok na tumabang paagi sa pagtao sa saiya nin trabahong por ora, na sinasabi: “Seguro boot mong magtrabaho nin bilog na panahon para sa saimong among dian sa itaas [sa langit].” Si Theodore asin Ann ngonyan naoogma sa pagpapayunir na magkaibanan.
An iba nagpoon na magpayunir bilang reaksion sa mga kamugtakan na nangyari sa saindang buhay. An makamomondong pagkagadan kan saindang aking babae asin makoapong babae nagpangyari sa sarong gurang nang mag-agom na seryosong horophoropon an paagi kan paggamit ninda sa saindang natatada pang mga taon. (Eclesiastes 7:2) Imbes na pangibabawan nin kamondoan, luminaog sinda sa pambilog na panahon na paglilingkod, na ngonyan ikinaoogma ninda sa laog nin labi nang walong taon!
Totoo, nagkakaipo nin tunay na determinasyon na magdanay sa pambilog na panahon na ministeryo. Halimbawa, si Ernst asin an saiyang agom, si Riek, nagpoon na magpayunir paghale tolos kan saindang mga aki sa harong. Dai nahaloy pakalihis kaiyan an sarong dating kaibaiba sa negosyo inalok si Ernst nin trabahong dakula an ganansia. Si Ernst nagsimbag: “Nasa samuya an pinakamarahay na among, asin habo ming bumaya sa saiya!” Huling si Ernst asin an saiyang agom nagdanay sa “pagtrabaho” ki Jehova, nabuksan para sa sainda an iba pang mga pribilehio nin paglilingkod. Sinda naglingkod sa pansirkitong gibohon sa laog nin labing 20 taon asin nagpapadagos bilang mga payunir sagkod ngonyan. Pinagbasolan daw ninda an saindang dalan nin pagsasakripisyo sa sadiri? Paghaloyhaloy an mag-agom nagsurat: “Kun bobooton ni Jehova, tolong bulan pa linalaoman ming selebraron an samuyang 50 taon nin pag-agoman, na sa parate inaapod na bulawan na anibersaryo. Alagad may bilog na kombiksion masasabi mi na an samuyang tunay na bulawan na mga taon nagpoon kan kami pumoon na magpayunir.”
Nanonompongan kan dakol na an tata na pasiring sa nadugangan na aktibidad pasiring man sa nadugangan na kagayagayahan! An sarong tugang na lalaki na nagpoon na magpayunir duwang semana pagkatungtong sa edad na 65 nagsasabi: “Masasabi ko na nungka akong nakaeksperyensia nin panahon sa sakong buhay na mayaman na marhay na pinano nin mga bendisyon na arog kan nakaaging sampulong taon nin pagpapayunir.” An sarong mag-agom na nagpapayunir sa laog nin labi nang pitong taon nagsasabi: “Ano pa daw an maninigong ginigibo nin sarong mag-agom na kapareho mi an edad asin mga kamugtakan? Parate ming naheheling an mga kapareho mi sa teritoryo—komportable na sa harong, nagpapataba sana, naggugurang, asin nanunuog na an hawak. An paglilingkod pinapagdadanay kaming marahay an salud sa isip asin hawak. Permi kaming magkaibanan. Permi kaming nagngingisi asin naoogma sa buhay.”
Siempre, bakong gabos na gurang igwa nin mga kamugtakan na nagtotogot sa sainda na makapayunir. An mga Kristianong ini makasisierto na inaapresyar ni Jehova an ano man na nagigibo ninda sa paglilingkod sa saiya. (Marcos 12:41-44.) Halimbawa, an sarong baldadong tugang na babae nasa sa sarong klinika sa pag-ataman sa mga gurang asin may helang. Minsan siring, bukas pa giraray para sa saiya an sarong tata nin aktibidad! Hinapot sia nin sarong doktor kun paano nia nagagamit an saiyang panahon. Sia nagsasaysay: “Sinabi ko sa saiya na permi akong kinukulang nin panahon. Dai nia masabotan ini. Sinabi ko sa saiya na ini huli ta an sakuyang mga aldaw pano nin nakakokontentong mga aktibidad. Dai ako napupungaw, kundi hinahanap ko an iba na napupungaw asin hinihingoa kong sabihon sa sainda kun ano an itinagama nin Dios para sa katawohan.” Sinusumaryo nia an mga bagay paagi sa pagsabi: “Sa saro na haros 80 anyos na, an saro dai puedeng maglaom nin kadakol. Mamibi kamo para sa sako tanganing magiyahan ko pa an dakol pasiring ki Jehova.”
Kamo daw nasa edad na magreretiro na? An tata pasiring sa pagpasiramsiram tibaad nakatetentar na marhay, alagad ta bako iyan an tata pasiring sa espirituwal na bendisyon. Mapagngayongayong horophoropon an saindong mga kamugtakan. Tibaad puede kamong lumaog sa tata na pasiring sa mas dakulang aktibidad sa paglilingkod ki Jehova.
[Mga retrato sa pahina 25]
An pagretiro puedeng gumiya pasiring sa nadugangan na aktibidad sa ministeryo