Bagong Programa sa Pansirkitong Asamblea
1 An bagong programa sa pansirkitong asamblea na mapoon sa Pebrero ipaliliwanag an temang “Namitan an Orog na Kaogmahan sa Pagtao.” (Gibo 20:35) Ilinaladawan an kaogmahan na “sarong kamugtakan nin pagigin marahay asin kontento.” An kadaklan na tawo ngonyan nakanonompong sana nin temporaryong kaalingan sa buhay. Pero, tinotokdoan kita ni Jehova kun paano kita mismo makikinabang sagkod lamang. (Isa. 48:17; 1 Juan 2:17) Idodoon kan bagong programa sa pansirkitong asamblea kun paano kita magkakamit nin orog na kaogmahan paagi sa pagtao sa espirituwal na paagi.
2 Manonodan niato an praktikal na mga paagi na dian ikadudusay niato an satong sadiri sa ministeryo. An nagkapira sa mga pahayag na itatao kan nagbibiaheng mga paraataman may temang: “Pakikikatood Paagi sa Maraot na mga Kayamanan,” “Igalang an Probisyon nin Dios na ‘Balaog na mga Lalaki,’” asin “Namitan an Dakol na Kabtang nin Tunay na Kaogmahan.” An mga nagmamawot na magpabautismo sa asamblea maninigong kaolayon an nangengenot na paraataman tangani na ikaareglo nia an kamagurangan na marepaso sa sainda kan mga hapot sa bautismo. An paglilingkod ki Jehova na may malinig na relasyon magtatao nin dakulang kaogmahan sa mga bagong mabautismohan.
3 An tamang pagmidbid sa autoridad ni Jehova nagtatao man nin tunay na kaogmahan asin katiwasayan. An gabos na tawo kaipuhan na makaaram kaini. Huli kaini, an pahayag-publiko sa pansirkitong asamblea ipaliliwanag an temang “Makisaro sa Maogmang Banwaan nin Dios.” Siertohon na imbitaran an gabos na nagpaheling nin interes sa katotoohan na umatender sa pahayag na ini. Dai pa sinda nakanonompong nin tunay na katiwasayan asin nagdadanay na kaogmahan sa pamamahala nin tawo. (Ecl. 8:9) Alagad kanigoan na kagayagayahan an manonompongan ninda sa pagigin asosyado sa maogmang banwaan ni Jehova!—Sal. 144:15b.
4 Sa ibong nin naggagrabeng mga kamugtakan sa palakaw na ini nin mga bagay, an mga nagkakamit kan orog na kaogmahan sa pagtao sa espirituwal na paagi nungkang dedesganaron kan maogmang Dios. (1 Tim. 1:11) Ipaheheling kan bagong programa sa pansirkitong asamblea na totoo ini. Dai pagpaltahan iyan!