Magmaan sa Pag-atribwir nin Salang mga Motibo

AN SARONG prominenteng ebanghelista sa telebisyon nagpaluwas nin makolog na pagdenunsiar sa sarong kapwa parahulit huli sa pagsambay. Minsan siring, bago matapos an taon, an ebanghelistang nag-aakusar nadakop sa akto na kaibanan nin sarong pampam.

Sa saro pang kaso, an sarong pangenot na pankinaban na kapangyarihan nagpadara nin mga sugo tanganing makipagnegosyar para sa katoninongan sa nagraralaban na grupo. Mientras tanto, an iyo man sanang nasyon isinugo sa hilom an mga parabariwas nin armas kaiyan sa ibang mga nasyon tanganing magpabakal nin mga armas na binilyon na dolyar an kantidad.

Mantang an hayag na pagsaginsagin nagin nang komun na marhay, makangangalas daw na sa kadaklan an pagkamapagduda suminalida na sa pagtitiwala? Para sa dakol, an pagkustion sa mga motibo nin iba nagin nang ugale.

Bilang mga Kristiano, dapat kitang magin maingat na dai togotan an siring na mga aktitud na makaapektar sa satong relasyon sa fiel na mga kapagtubod. Minsan ngani sinadol kita ni Jesu-Cristo na magin “maingat siring sa mga halas” mantang nasa tahaw nin satong mga enemigo, dai nia sinabi na kita maninigong magin suspetsoso sa saiyang tunay na mga parasunod. (Mateo 10:16) Kun siring, ano an mga peligro sa pag-atribwir nin salang mga motibo sa iba? Sa anong mga bagay kita dapat na magin nangorognang maingat na likayan an siring na inklinasyon? Asin paano niato mapoprotehiran an satong mahal na marhay na relasyon sa mga kapwa Kristiano?

Sarong Leksion sa Nakaagi

An pag-atribwir nin salang mga motibo sa iba na daing makatanosan na dahelan kapareho man sana nin paghusgar sa sainda. Iyan garo man sana basang na pagkonklusyon na an saindang mga tataramon o gibo saro sanang pagsaginsagin na nagtatago nin sarong bagay na tuso asin may maraot na intension. Sa parate an causa kan problema iyo an salang pagmansay sa mga bagay, siring kan maheheling sa pagkasaysay sa Biblia na makukua sa Josue kapitulo 22.

Natapos kan mga Israelita an saindang pagsakop sa Dagang Panuga asin inako pa sana an saindang mga teritoryo nin tribo. An mga tribo ni Ruben asin ni Gad asin an kabanga kan tribo ni Manases nagpatindog nin sarong altar na “dakula sa pagigin risang-risa” sa pangpang kan Salog nin Jordan. An ibang tribo salang ipinamugtak na ini pag-apostasiya. Pinaghona na gagamiton kan tolong tribo an dakulang estrukturang ini para sa pag-atang imbes na magduman sa tolda nin katiriponan sa Silo, an piniling lugar sa pagsamba. Tolos-tolos, an mga tribong nag-aakusar nag-andam para sa militar na pagsalakay.​—Josue 22:​10-12.

Marahay na sana ta nakikomunikar sinda sa saindang mga tugang na Israelita paagi sa pagsugo nin opisyal na delegasyon na pinangenotan ni Fineas. Kan madangog an mga akusasyon nin pagkabakong fiel, rebelyon, asin apostasiya tumang ki Jehova, an mga tribo na pinaghonang may kasalan nagpaliwanag kan saindang dahelan para sa dakulang altar na ini. Imbes na altar para sa pag-atang, idto “magigin patotoo” sa pagkasararo kan mga tribo nin Israel sa pagsamba ki Jehova. (Josue 22:​26, 27) An delegasyon nagpuli na kontento na dai man nin sala sa saindang mga tugang. Sa siring nalikayan an sarong guerra sibil asin grabeng pagpabolos nin dugo.

Kanigoan na leksion para sa sato na nungkang magin marikas na mag-atribwir nin salang mga motibo sa iba! Sa parate an garo baga totoo sa madalian na obserbasyon nanonompongan na laen na marhay sa mas maingat na pagsiyasat. Totoo ini sa dakol na aspekto kan buhay nin sarong Kristiano.

An Satong Punto de Vista sa Kamagurangan

Sa paggibo kan saindang paninimbagan “na pastoran an kongregasyon nin Dios,” kun beses kinakaipuhan kan kamagurangan na hatolan an manlaenlaen na indibiduwal sa kongregasyon. (Gibo 20:28) Halimbawa, ano an satong reaksion kun an sarong magurang sa kongregasyon ipakipag-olay sa sato an manongod sa satong mga aki sa mga bagay na siring baga sa maraot na pag-iriba o salang gawe-gawe kaiba nin saro na bakong kasekso? Ipinamumugtak daw niato na igwa sia nin nakatagong motibo asin sinasabi sa boot-boot sana niato, ‘Talagang nungka niang nagustohan an samong pamilya’? Kun totogotan niato an siring na mga saboot na makaimpluwensia sa sato, puede kitang magbasol sa huri. An espirituwal na ikararahay kan satong mga aki tibaad namemeligro, asin maninigo niatong apresyaron an nakatatabang na hatol sa Kasuratan.​—Talinhaga 12:15.

Kun hinahatolan kita nin sarong magurang sa kongregasyon, dai kita maghanap nin nakatagong motibo. Imbes, hapoton niato an satong sadiri kun baga igwa nin paagi na pakinabangan niato an saiyang hatol na basado sa Biblia. Si apostol Pablo nagsurat: “Totoo, mayong disiplina na sa presente garo nakagagayagaya, kundi nakamomondo; pero pagkatapos duman sa mga napatood kaiyan iyan nagbubunga nin matoninong na bunga, arin na baga, an katanosan.” (Hebreo 12:11) Kaya magin mapagpasalamat asin isipon an mga bagay sa makatanosan na paagi. Girumdomon na sa parate an pagtao nin hatol kan kamagurangan siring kasakit kan pag-ako niato kaiyan.

Mga Saboot Manongod sa mga Magurang

Kun napaaatubang sa nagkapirang restriksion nin magurang, an nagkapirang hoben kinukustion an mga motibo kan saindang mga magurang. An nagkapirang hoben tibaad magsabi: ‘Taano an sakong mga magurang ta naggigibo nin kadakol na reglamento? Seguro habo ninda na maogma ako sa buhay.’ Minsan siring, imbes na magkaigwa nin siring na konklusyon, an mga hoben kaipuhan na analisaron an situwasyon sa makatanosan na paagi.

Inataman kan mga magurang an saindang mga aki sa laog nin mga taon. Ginibo ini na may dakulang sakripisyo sa materyal asin iba pa. Igwa daw nin ano man na dahelan na magkonklusyon na sinda ngonyan determinadong gibohon na miserable an buhay kan saindang tin-edyer na mga aki? Bako daw na mas rasonableng isipon na pagkamoot an nagmomotibar sa mga magurang na ini na protehiran an saindang mga aki asin atamanon sinda? Bako daw na an iyo man sanang pagkamoot nagtutulod sa sainda na magtao nin nagkapirang restriksion sa saindang mga aki, na ngonyan napaaatubang sa bagong mga angat sa buhay? Kanigoan kadaing kabootan asin kaingrato na mag-atribwir nin salang mga motibo sa mamomoton na mga magurang!​—Efeso 6:​1-3.

An Satong Aktitud sa mga Kapwa Kristiano

Dakol an may tendensiang patienot na husgaran an iba asin pagparareyohon sinda. Kumusta kun kita mismo nagkaigwa nin siring na aktitud asin nagin medyo suspetsoso sa nagkapirang tawo? Kita daw puedeng maimpluwensiahan kan kinaban sa bagay na ini?

Halimbawa, ipamugtak na an saro sa satong espirituwal na mga tugang igwa nin magayon na harong asin mamahalon na sasakyan. Kita daw maninigong automatikong magkonklusyon na sia sarong materyalista na dai ineenot sa buhay an intereses kan Kahadean? An nagkapirang Kristiano tibaaad kayang makabakal nin de kualidad na mga bagay, alagad dai iyan nangangahulogan na sinda igwa nin maraot na mga motibo o dai ‘hinahanap nguna an kahadean.’ Sinda tibaad sibot-sibot sa espirituwal na mga aktibidad, na buka an palad na ginagamit an saindang materyal na mga kayamanan sa pagsuportar sa intereses kan Kahadean, posible na sa bakong risang paagi.​—Mateo 6:​1-4, 33.

An Kristianong kongregasyon kan enot na siglo binibilog nin gabos na klase nin tawo​—mayaman asin dukha. (Gibo 17:34; 1 Timoteo 2:​3, 4; 6:​17; Santiago 2:5) Dai ineebalwar nin Dios an mga tawo basado sa saindang pinansial na kamugtakan, asin kita maninigo na dai man. Maninigo niatong kamotan an satong probado asin fiel na mga kapagtubod, “na mayo nin ano man na ginigibo sono sa may kinakampihan na tendensia.”​—1 Timoteo 5:21.

Sa kinaban na ini na nasa kapangyarihan ni Satanas, an pagparareho asin pagsuspetsa lataw sa dakol na paagi. Halimbawa, an sarong tawo tibaad mansayon na madahas o materyalistiko huli sana sa saiyang pinaghalean. Minsan siring, bilang mga Kristiano, dai kita dapat na mabiktima kan siring na mga aktitud. Mayo nin lugar an pagkapanatiko asin pagsuspetsa sa organisasyon ni Jehova. An gabos na tunay na Kristiano kaipuhan na arogon si Jehova Dios, na “mayo nin karatan o pagpaorog.”​—2 Cronica 19:7; Gibo 10:​34, 35.

Mamotibar nin Pagkamoot

An Kasuratan malinaw na nagsasabi na “an gabos nagkasala asin nagkulang sa kamurawayan nin Dios.” (Roma 3:23) Kaya kaipuhan niatong mansayon an satong mga kapwa parasamba bilang mga kasaro niato sa pagmamaigot na makatao nin maaakong paglilingkod ki Jehova. Kun tinogotan niato an pagsuspetsa o iba pang negatibong mga saboot na makaapektar sa satong relasyon sa sarong espirituwal na tugang na lalaki o babae, mamibi kita para sa tabang nin Dios na mapaglabanan an siring na aktitud tangani na dai kita mabiktima ni Satanas. (Mateo 6:13) Kinombensir nia si Eva na si Jehova may maraot na mga motibo, daing pagmakolog sa saiyang ikararahay, asin ipinangunguri an mga katalingkasan na mapaogma nanggad sa saiya. (Genesis 3:​1-5) An pag-atribwir niato nin salang mga motibo sa satong mga tugang nagsusuportar sa saiyang mga katuyohan.​—2 Corinto 2:​11; 1 Pedro 5:8.

Kun naheheling niato na igwa kita nin tendensia na mag-atribwir nin salang mga motibo sa iba, estudyaran an halimbawa ni Jesu-Cristo. Minsan ngani sia an sangkap na Aki nin Dios, dai sia naghanap nin maraot na mga motibo sa saiyang mga disipulo. Imbes, hinanap ni Jesus an marahay sa sainda. Kan an saiyang mga disipulo nagdidinaraogan para sa sarong prominenteng posisyon, dai nia pinaghona na sinda may maraot na mga motibo asin sinalidahan sinda nin 12 bagong apostol. (Marcos 9:​34, 35) Mantang bakong sangkap, sinda tibaad naimpluwensiahan kan kultura nin apostatang Judaismo, na idinodoon an pag-orgolyo asin pagpalaenlaen nin klase. Aram ni Jesus na an pundamental na nagmomotibar sa saiyang mga parasunod iyo an pagkamoot ki Jehova. Huli sa pagpaheling kan siring na pagkamoot asin pagdanay na kaiba ni Jesus, sinda binalosan nin dakula.​—Lucas 22:​28-30.

Kun kita magsususpetsa sa satong fiel na mga kapagtubod, ini magigin garo pagheling sa mga bagay paagi sa sarong lente na nakararaot sa itsura. Mayong maheheling na nasa tunay na itsura kaiyan. Kun siring kita logod magheling paagi sa lente nin pagkamoot. Kadakol kan ebidensia na an maimbod na mga kapwa Kristiano namomoot sa sato asin maninigo sa satong maboot na konsiderasyon. (1 Corinto 13:​4-8) Kaya kita logod magpaheling sa sainda nin pagkamoot asin magmaan sa pag-atribwir nin salang mga motibo.

[Retrato sa pahina 26]

Paano nindo minamansay an iba na fiel na nagsasamba sa Dios?

[Retrato sa pahina 27]

An pagtitiwala asin paggalang ginigibong sarong maogmang pamilya an Mga Saksi ni Jehova

“Sinususog Ninda an Relihiosong Pagsasanay sa Sainda”

AN SARONG babae na taga-Miami, Florida, E.U.A., ipinadara an minasunod na surat sa sarong lokal na peryodiko: “Kan Dis. 10 an pitaka kan sakong aking lalaki dinukot sa saiyang bulsa sa sarong saod nin mga segunda mano. Yaon duman an saiyang lisensia sa pagmaneho, kard sa Seguridad Sosyal, asin iba pa, saka an $260.

“Pakatapos na ipaisi sa manedyer an pagkawara, nagpuli na sia. Kan amay na banggi tineleponohan sia nin sarong babae na nagtataram nin Español na, paagi sa sarong teleponista bilang interprete, nagsabi sa saiya na nakua nia an saiyang pitaka.

“Itinao sa saiya kan babae an adres kaini. . . . Itinao kaini sa saiya an pitaka, na kompleto, kabale an $260.

“Naheling kan babae na dinukot kan parahabon an saiyang pitaka asin kinurahawan nia. Binutsan kan parahabon an pitaka asin duminalagan. Kan oras na idto dai na nia naheheling an sakong aki, kaya ipinuli nia an pitaka asin nagtelepono.

“Sia asin an saiyang pamilya mga Saksi ni Jehova. Malinaw na sinususog ninda an relihiosong pagsasanay sa sainda.”

Dai ipinaheheling kan mga Saksi ni Jehova an pagkasadiosan tanganing mag-ako nin pag-omaw gikan sa mga tawo. (Efeso 6:7) Imbes, odok sa boot nindang minamawot na makatao nin pag-omaw sa saindang langitnon na Ama, si Jehova. (1 Corinto 10:31) An saindang pagkamoot sa Dios asin sa kataed pinahihiro sinda na ibalangibog an “maogmang bareta” dapit sa Kahadean nin Dios. (Mateo 24:14) Paagi sa Kahadean, nanunuga an Dios na babagohon an daga na magin sarong magayon na paraiso. Dangan an daga magigin lugar bako sanang nin pisikal na kagayonan kundi nin moral na karahayan kun saen an pagkasadiosan mangingibabaw sagkod lamang.​—Hebreo 13:​18; 2 Pedro 3:13.