matabangan nin sarong eksperyensiadong tugang na babae. An sarong hoben tibaad mapahiro nin sarong hoben pang ministeryal na lingkod o payunir.

⁴ Naheling nin pirang kamagurangan na kapakipakinabang na repasohon sa enot na pagsongko an artikulong “Return to the Shepherd of Your Souls” sa Mayo 1, 1982 Watchtower (Nobyembre 1, 1982 sa Tagalog). Sa kaso nin sarong hoben, an artikulong “Bring Your Heart Back to Jehovah” sa Oktubre 1, 1982 Watchtower (Abril 1, 1983 sa Tagalog) tibaad makatabang. Dangan, puwedeng iareglo an regular na pag-adal sa Biblia.

⁵ An mga parahayag na nangengenot sa siring na mga pag-adal maninigong magpaheling nin personal na interes sa mga tawong ini. Amigohon sinda. Idoon an halaga nin pagbawi sa saindang espirituwal na kosog.

⁶ Minsan ngani an nagkapirang parahayag pinakikiolayan na tumabang sa mga inaktibo, dai ini nangangahulogan na an iba dai man puwedeng tumabang. An gabos puwedeng mangumusta sa mga tawong ini kun sinda minaatender sa Kingdom Hall asin kaolayon sinda nin nakapagpapakosog. Ipaheling na ikinaoogma niatong makaibanan sinda asin na linalaoman niato na padagos sindang maoswag. An mamomoton na interes na ini maninigong padagos na ipaheling mantang sinda nag-ooswag sa espirituwal. Nakakamtan an positibong mga resulta sa siring na sararong paghihingoa.—Efe. 4:16.

⁷ Iyo, tunay na ikinaoogma niatong maheling na an dating mga inaktibo nakikiasosyar giraray sa sato. Ipinamimibi niato na bendisyonan logod ni Jehova an satong mga paghihingoa na ‘gumibo nin marahay’ sa mga inaktibo na “may relasyon sa sato sa pagtubod.”—Gal. 6:10.

Pagtao nin Atension sa mga Gurang na Nasa Tahaw Niato

¹ An sarong Kristianong paninimbagan na dian kita gabos puwedeng makikabtang iyo an pagpaheling nin konsiderasyon sa satong gurang nang mga tugang na lalaki asin babae. Sa pag-agi nin mga taon, sinda nagkakaigwa nin pisikal na mga problema asin dai na kayang gibohon an arog kan dati sa paglilingkod ki Jehova.—Ecl. 12:1-6.

² Ipinaheheling kan Tataramon nin Dios na an pangenot na paninimbagan sa pag-ataman sa mga gurang nasa mga miembro nin pamilya. (1 Tim. 5:8) Alagad kita, bilang indibiduwal asin bilang kongregasyon, kaipuhan man na “magpaheling nin konsiderasyon sa persona nin gurang.”—Lev. 19:32.

KUN ANO AN MAGIGIBO NIATO

³ Sa pakaaram kan paghihingoang ginigibo nin mga gurang tanganing makaatender, kinukumusta daw niato sinda asin pinoponan an pakikipag-olay? Sinongko daw niato sinda sa saindang harong? O nakikikomunikar daw kita paagi sa telepono kun ini angay? Nagkakaipo daw sinda nin malulunadan o nin saro na ikakasugo ninda? Marahayon nanggad na an iba sa mga kongregasyon ginigibo an mga bagay na ini, alagad igwa pa daw nin iba sa sato na tibaad puwedeng makapaheling nin siring na mamomoton na pagmakolog? (Ikomparar an Lucas 10:36, 37.) An pagpaheling nin konsiderasyon sa mga gurang sarong pribilehiyo na puwedeng pakikabtangan nin gabos.

⁴ Puwedeng paaramon kan kamagurangan an kongregasyon kun may espesyal na mga pangangaipo. Alagad bilang indibiduwal puwede kitang magpresentar na tumabang sa mga gurang sa mga bagay na nadedepisilan sindang asikasohon. Kaipuhan daw na basahan sinda o ibanan sa paglilingkod? Sinosongko daw niato an mga dai na nakaluluwas sa saindang harong o nasa ospital?—Tal. 3:27.

⁵ Arog kan ihinula sa Biblia, an dakol ngonyan mayo nin ‘pagkamoot.’ (2 Tim. 3:2, 3) Alagad bilang mga Kristiano, boot niatong likayan an espiritung ini kan kinaban. Habo niato na magin sobra kasibot na dai na logod nakakaibaiba an mga gurang na marahay na mga halimbawa sa debosyon ki Jehova.

AN KAISIPAN NIN MGA GURANG

⁶ An mga gurang noarin man dai maninigong pamateon na sinda pagabat sa kongregasyon o na dai na sinda pinahahalagahan. Sa ibong na kampi, marahayon na maheling an mapagpahalagang espiritu kan mga gurang. Marahayon nanggad kun sinda dai nagigin mapagtatsar o depisil panigoan. An positibong kaisipan minatabang sainda na malikayan an pagkaigwa nin mapagreklamong espiritu, sa pakaaram na matatabangan sinda ni Jehova na matagalan an mga pagbalo na kaiba nin paggurang. Bilang kongregasyon asin bilang mga indibiduwal, boot niatong padagos na magpaheling nin mamomoton na konsiderasyon sa maimbod na mga gurang sa tahaw niato.—Ikomparar an Hebreo 10:32-34.

Mga Paisi

● Alok sa Disyembre: My Book of Bible Stories sa kontribusyon na ₱35.00 o an pulyetong “Look!” sa kontribusyon na ₱4.20. Enero asin Pebrero: Daan na mga libro sa maputing papel sa kontribusyon na ₱7.00; mga libro sa newsprint sa kontribusyon na ₱2.50; daan na mga pulyeto sa kontribusyon na 75¢ o ₱2.25 an 3. (Tabi helingon an Mga Paisi sa Nobyembreng An Satong Ministeryo sa Kahadean para sa mga detalye kun arin na mga libro asin pulyeto an kaiba sa alok na ini asin kun arin an mapepedido.) Marso: Worldwide Security Under the “Prince of Peace” sa kontribusyon na ₱14.00.

● Kun an mga kongregasyon dai pa nakapedido nin daan na mga libro o pulyeto na gagamiton sa kampanya sa Enero asin Pebrero siertohon ninda na gibohon tolos iyan pagkaresibi kan An Satong Ministeryo sa Kahadean na ini.

● Isinusuherir na basahon nin gabos an Josue 1:1–10:15 bilang pag-andam para sa saro sa mga drama sa “Manarig ki Jehova” na Pandistritong Kombension.

● Sa kadaklan na kaso dai kaipuhan na kanselaron an Pag-adal sa Libro kan Kongregasyon sa semana kan kombension sa taon na ini. Minsan siring, kun huli sa lokal na kamugtakan kaipuhan na kanselaron iyan, puwedeng pag-adalan an dugang na materyales sa mga semana bago asin pakalihis kan kombension tanganing mayo nin malipasan.

● Sa gabos na kombension na Cebuano, Iloko asin Tagalog, an gabos na awit kakantahon sa mga tataramon na iyan asin bakong sa Ingles. Kaya maninigong darahon kan mga tugang an saindang songbook sa dialekto. Boot niato na an gabos gumamit sana nin sarong tataramon kun nagkakanta sa mga kombension.

● Poon sa semana nin Enero 4-10, 1988, an gabos na iskedyul para sa pag-adal sa libro, pagtiripon sa paglilingkod asin Teokratikong Paadalan sa Pagmiministro magigin poon Lunes sagkod Domingo imbes na poon Domingo sagkod Sabado. Kaya an mga igwa kan arin man sa mga pagtiripon na ini sa Domingo mayo nin iskedyul para sa Enero 3. Puwedeng gibohon an lokal na mga pagliliwat kaoyon kan kombension kan mga kongregasyon na apektado.

● Para sa mga mayo nin kombension, an Disyembre 25 asin 30 saka Enero 1 puwedeng gamiton para sa espesyal na pagwaras nin magasin, ta iyan mga piyesta opisyal.

● An teksto kan taon nin 1988 kinua sa Salmo 37:34: “Maglaom ki Jehova asin otobon an saiyang dalan.” Maninigo na iareglo nin gabos na kongregasyon na ibugtak an bagong teksto kan taon sa saindang Kingdom Hall sa Enero 1, 1988.

● May nakaiskedyul na 30 minutos na pagrepaso kan mga tampok sa programa kan pandistritong kombension para sa semana nin Enero 4-10. An repasong ini ikakaasignar bago pa sa tolong kuwalipikadong tugang na an kada saro puwedeng gumamit nin dies minutos sa pagrepaso sa pangenot na mga punto sa sarong aldaw kan kombension. An inandam na gayong repasong ini makatatabang sa mga tugang na magirumdoman an pangenot na mga punto para sa personal na pag-aplikar asin paggamit sa langtad.