Mga Magurang, Ano an Itinotokdo Kan Saindong Halimbawa?

“Magin kamong mga paraarog sa Dios, bilang mga aki na namomotan na marhay, asin padagos kamong maglakaw sa pagkamoot.”—EFESO 5:1, 2.

1. Anong klaseng mga pagdirehir an itinao ni Jehova sa enot na mag-agom na tawo?

SI Jehova an Kagtugdas kan areglo nin pamilya. Utang sa saiya nin lambang pamilya an pag-eksister kaiyan ta inestablisar nia an enot na pamilya asin tinawan nin kakayahan na mangaki an enot na mag-agom na tawo. (Efeso 3:14, 15) Tinawan nia si Adan asin Eva nin pundamental na mga instruksion kun dapit sa saindang mga paninimbagan asin tinawan man sinda nin bastanteng oportunidad na gamiton an personal na inisyatiba sa paggibo kan mga ini. (Genesis 1:28-30; 2:6, 15-22) Kan magkasala na si Adan asin Eva, nagin mas komplikado an mga situwasyon na kaipuhan na atubangon nin mga pamilya. Pero, si Jehova mamomoton na nagtao nin mga susundan na matabang sa saiyang mga lingkod na maatubang an siring na mga situwasyon.

2. (a) Paagi sa ano na pinasarig ni Jehova an nasusurat na hatol paagi sa berbal na pagtotokdo? (b) Anong hapot an kaipuhan na ihapot nin mga magurang sa saindang sadiri?

² Bilang an satong Kaharohalangkaweng Paratokdo, an ginibo ni Jehova bako sanang magtao nin nasusurat na mga pagdirehir sa kun ano an maninigo niatong gibohon asin kun ano an maninigo niatong likayan. Kan suanoy na mga panahon pinadisan nia nin berbal na pagtotokdo an nasusurat na pagtotokdo paagi sa mga saserdote saka propeta asin paagi sa mga payo nin pamilya. Siisay an ginagamit nia sa pagtao kan berbal na pagtotokdong iyan sa satong kaaldawan? An Kristianong kamagurangan asin mga magurang. Kun kamo magurang, ginigibo daw nindo an saindong kabtang na tokdoan an saindong pamilya sa mga dalan ni Jehova?—Talinhaga 6:20-23.

3. Ano an manonodan nin mga payo nin pamilya ki Jehova kun dapit sa epektibong pagtotokdo?

³ Paano maninigong itao an siring na pagtotokdo sa laog kan pamilya? Si Jehova an nagtatao kan arogan. Sinasabi nia nin malinaw kun ano an marahay asin kun ano an maraot, asin dakol na beses niang ginagamit an pag-otro. (Exodo 20:4, 5; Deuteronomio 4:23, 24; 5:8, 9; 6:14, 15; Josue 24:19, 20) Naggagamit sia nin nakapupukaw nin isip na mga hapot. (Job 38:4, 8, 31) Paagi sa mga ilustrasyon asin aktuwal na halimbawa, pinahihiro nia an satong emosyon asin minomolde an satong puso. (Genesis 15:5; Daniel 3:1-29) Mga magurang, kun tinotokdoan nindo an saindong mga aki, hinihingoa daw nindong arogon an arogan na iyan?

4. Ano an nanonodan niato ki Jehova kun dapit sa pagtao nin disiplina, asin taano ta mahalaga an disiplina?

⁴ Si Jehova marigon para sa tama, alagad nasasabotan nia an mga epekto nin pagkabakong sangkap. Kaya bago sia magpadusa, sia nagtotokdo asin nagtatao nin paorootrong patanid saka pagirumdom sa mga tawong bakong sangkap. (Genesis 19:15, 16; Jeremias 7:23-26) Kun sia nagdidisiplina, ginigibo nia iyan sa tamang sokol, bakong sobra. (Salmo 103:10, 11; Isaias 28:26-29) Kun arog kaiyan an pagtratar niato sa satong mga aki, iyan nagtatao nin ebidensia na midbid niato si Jehova, asin magigin mas pasil para sa sainda na mamidbid man sia.—Jeremias 22:16; 1 Juan 4:8.

5. Ano an manonodan nin mga magurang ki Jehova manongod sa paghinanyog?

⁵ Makangangalas nanggad, si Jehova naghihinanyog bilang mamomoton na langitnon na Ama. Sia dai sana nangongorden. Ineenkaminar nia kita na biyong ipahayag sa saiya an nasa satong puso. (Salmo 62:8) Asin kun bakong tama nin eksakto an mga saboot na satong ipinahahayag, dai sia minasimbag nin nag-uurog-udog na saway hale sa langit. Sia mapasensiang nagtotokdo sa sato. Kun siring, angay nanggad an hatol ni apostol Pablo: “Magin kamong mga paraarog sa Dios, bilang mga aki na namomotan na marhay”! (Efeso 4:31–5:1) Abaa karahay na halimbawa an itinatao ni Jehova para sa mga magurang mantang hinihingoa nindang tokdoan an saindang mga aki! Iyan sarong halimbawa na nakaaabot sa satong puso asin pinapagmamawot kitang maglakaw sa saiyang dalan nin buhay.

An Impluwensia nin Halimbawa

6. Paano an aktitud asin halimbawa nin mga magurang nakaiimpluwensia sa saindang mga aki?

⁶ Apuera sa berbal na pagtotokdo, an halimbawa may hararom na impluwensia sa mga hoben. Sa gusto o dai nin mga magurang, aarogon sinda kan saindang mga aki. Tibaad manigoan an mga magurang—kun beses tibaad mabigla sinda—kun madangog ninda an saindang mga aki na magtaram nin mga bagay na itinaram mismo ninda. Kun an gawe-gawe sagkod aktitud kan mga magurang nagpapabanaag nin hararom na pag-apresyar sa espirituwal na mga bagay, ini nagkakaigwa nin positibong impluwensia sa mga aki.—Talinhaga 20:7.

7. Anong klaseng halimbawa nin magurang an itinao ni Jefte sa saiyang aking babae, asin may anong resulta?

⁷ May marahay na ilustrasyon sa Biblia kan epekto nin halimbawa nin magurang. Si Jefte, na ginamit ni Jehova na mangenot sa Israel sa kapangganahan sa mga Amonita, saro man na ama. An rekord kan simbag nia sa hade nin Amon nagpaparisa na segurado na parateng binabasa ni Jefte an kasaysayan kan mga ginibo ni Jehova sa Israel. Suelto niang nakotar an kasaysayan na iyan, asin nagpaheling sia nin makosog na pagtubod ki Jehova. Daing duwa-duwa, an saiyang halimbawa nakatabang sa saiyang aking babae na mapatalubo an pagtubod asin mapagsakripisyong espiritu na ipinaheling nia sa paglilingkod nin bilog na buhay bilang daraga na deboto ki Jehova.—Hokom 11:14-27, 34-40; ikomparar an Josue 1:8.

8. (a) Anong marahay na aktitud an ipinaheling kan mga magurang ni Samuel? (b) Paano nakinabang dian si Samuel?

⁸ Si Samuel arogan bilang aki asin fiel sa Dios bilang propeta sa bilog niang buhay. Boot daw nindo na magin arog nia an saindong mga aki? Analisara an halimbawa na itinao kan mga magurang ni Samuel, si Elcana asin si Ana. Minsan ngani bakong sangkap an situwasyon sa saindang harong, sinda regular na nagtutukad pa-Silo para sa pagsamba, sa lugar na namumugtakan kan sagradong tabernakulo. (1 Samuel 1:3-8, 21) Mangnoha an rarom nin pagmate ni Ana sa pamimibi. (1 Samuel 1:9-13) Obserbari kun ano an saboot ninda pareho manongod sa halaga nin pag-otob sa ano man na ipinanuga sa Dios. (1 Samuel 1:22-28) An saindang marahay na halimbawa daing duda na nakatabang ki Samuel na mapatalubo an mga kualidad na nagpangyari sa saiya na sundon an tamang dalan—dawa kan an mga tawo sa palibot nia na naglilingkod daa ki Jehova dai nagpaheling nin paggalang sa mga dalan nin Dios. Pag-abot nin panahon, pinagkatiwalaan ni Jehova si Samuel nin paninimbagan bilang Saiyang propeta.—1 Samuel 2:11, 12; 3:1-21.

9. (a) Anong mga impluwensia sa harong an nagkaigwa nin marahay na epekto ki Timoteo? (b) Nagin anong klaseng tawo si Timoteo?

⁹ Boot daw nindo na an saindong aking lalaki magin arog ni Timoteo, na bilang hoben na lalaki nagin kaibaiba ni apostol Pablo? An ama ni Timoteo daing pagtubod, alagad an saiyang ina asin an saiyang lola nagtao nin marahay na halimbawa nin pag-apresyar sa espirituwal na mga bagay. Ini daing duwa-duwa na nakatabang na magbugtak nin marahay na pundasyon para sa buhay ni Timoteo bilang sarong Kristiano. Sinasabi sa sato na an saiyang ina, si Eunice, asin an saiyang lolang si Loida may “pagtubod . . . na dai nin ano man na pagsaginsagin.” An buhay ninda bilang mga Kristiano bakong pasale sana; sinda talagang namuhay kaoyon kan sinasabi nindang tinutubod ninda, asin tinokdoan ninda an hoben na si Timoteo na iyo man an gibohon. Pinatunayan ni Timoteo na sia masasarigan asin na sia tunay na may pagmakolog sa ikararahay nin iba.—2 Timoteo 1:5; Filipos 2:20-22.

10. (a) Anong mga halimbawa sa luwas kan harong an tibaad makaapektar sa satong mga aki? (b) Ano an maninigong magin reaksion niato kun lumuwas an mga impluwensiang ini sa pagtaram o aktitud kan satong mga aki?

¹⁰ An mga halimbawang nakaaapektar sa satong mga aki bako gabos na nasa laog kan harong. Yaon an mga aki na kaeskuela ninda, mga maestro na an trabaho magmolde sa hoben na mga isip, mga tawo na may makosog na saboot na an gabos maninigong sumunod sa mga kostumbre nin tribo o komunidad na masakit nang mabago, mga idolo sa isport na inoomaw nin dakol an mga nagibo, asin opisyales sa publiko na nababareta an mga gawe-gawe. Minilyon na aki an napairarom man sa impluwensia kan kabangisan nin guerra. Maninigo daw niatong ipagngalas kun an mga impluwensiang ini lumuwas sa pagtaram o aktitud kan satong mga aki? Ano an reaksion niato kun iyan nangyayari? Nareresolberan daw an problema nin estriktong saway o anggot na lektura? Imbes na magin marikas an reaksion sa satong mga aki, bako daw na mas marahay na hapoton an satong sadiri, ‘Igwa daw sa paagi nin pagtratar ni Jehova sa sato na tibaad makatabang sa pakamansay kun ano an gigibohon sa situwasyon na ini?’—Ikomparar an Roma 2:4.

11. Kun nasasala an mga magurang, paano ini puedeng makaapektar sa aktitud kan saindang mga aki?

¹¹ Siempre, bakong pirmeng pinakamarahay an magigin pag-atubang nin bakong sangkap na mga magurang sa mga situwasyon. Masasala sinda. Kun narerealisar iyan nin mga aki, luway-luway daw na raraoton kaiyan an saindang paggalang sa saindang mga magurang? Tibaad, nangorogna kun poprobaran nin mga magurang na disimularon an saindang mga sala paagi sa daing herak na pag-insistir sa saindang autoridad. Alagad tibaad magin laen na marhay an resulta kun an mga magurang mapakumbaba asin sueltong inaadmitir an saindang mga sala. Digdi, makatatao sinda nin mahalagang halimbawa sa saindang mga aki, na kaipuhan na makanood na gumibo man nin siring.—Santiago 4:6.

An Ikatotokdo kan Satong Halimbawa

12, 13. (a) Ano an kaipuhan na manodan nin mga aki manongod sa pagkamoot, asin paano ini pinakaepektibong ikatotokdo? (b) Taano ta mahalaga na an mga aki makanood manongod sa pagkamoot?

¹² Kadakol kan mahalagang leksion na ikatotokdo nin pinakaepektibo kun an berbal na pagtotokdo pinapadisan nin marahay na halimbawa. Estudyare an pira sana.

¹³ Pagpahayag nin pagkamoot na bakong maimot: An saro sa pinakamahalagang leksion na dapat na pasarigon nin halimbawa iyo an kahulogan nin pagkamoot. “Kita namomoot, huli ta [an Dios] enot na namoot sa sato.” (1 Juan 4:19) Sia an Burabod asin kaharohalangkaweng halimbawa nin pagkamoot. An may prinsipyong pagkamoot na ini, an a·gaʹpe, labing 100 na beses na nasasambitan sa Biblia. Iyan kualidad na nagpapamidbid sa tunay na mga Kristiano. (Juan 13:35) An siring na pagkamoot dapat na ipaheling sa Dios asin ki Jesu-Cristo asin siring man nin mga tawo sa lambang saro—dawa sa mga tawo na tibaad dai kita nakamamate nin maboot na kapadangatan. (Mateo 5:44, 45; 1 Juan 5:3) An pagkamoot na ini dapat na nasa satong puso asin risang-risa sa satong pamumuhay bago niato iyan epektibong ikatotokdo sa satong mga aki. An mga gawe-gawe mas mahalaga kisa sinasabi. Sa laog kan pamilya, kaipuhan na maheling saka maeksperyensiahan nin mga aki an pagkamoot asin konektadong mga kualidad, arog baga kan kapadangatan. Kun mayo kan mga ini, an sarong aki napupurog sa pisikal, mental, asin emosyonal. Kaipuhan na maheling man nin mga aki kun paano an pagkamoot asin kapadangatan ipinaheheling nin tama sa mga kapwa Kristiano sa luwas kan pamilya.—Roma 12:10; 1 Pedro 3:8.

14. (a) Paano matotokdoan an mga aki na gumibo nin trabahong nagtatao nin pagkakontento? (b) Paano ini magigibo sa situwasyon kan saindong pamilya?

¹⁴ Pakanood kun paano magtrabaho: An trabaho pundamental na aspekto nin buhay. Tanganing makamate nin pagpahalaga sa sadiri, an tawo kaipuhan na makanood kun paano magtrabaho nin marahay. (Eclesiastes 2:24; 2 Tesalonica 3:10) Kun an aki tinatawan nin mga trabaho na kakadikit kan itinaong instruksion sa saiya dangan inaanggotan huli sa bakong marahay na pagkatrabaho kaiyan, harayo an posibilidad na sia makanood na magtrabaho nin marahay. Alagad kun an mga aki nakakanood paagi sa aktuwal na pagtrabaho kaiba kan saindang mga magurang asin tinatawan nin angay na komendasyon, mas posibleng marhay na sinda makanood na gumibo nin trabaho na nagtatao nin pagkakontento. Kun an halimbawa kan mga magurang pinapadisan nin esplikasyon, tibaad makanood an mga aki bako sanang kun paano tataposon an sarong trabaho kundi kun paano man mapanggaganahan an mga problema, kun paano magdadanay sa sarong trabaho sagkod na iyan matapos, asin kun paano mangangatanosan saka magdedesisyon. Sa kamugtakan na ini matatabangan sindang masabotan na si Jehova nagtatrabaho man, na marahay siang magtrabaho, asin na inaarog ni Jesus an saiyang Ama. (Genesis 1:31; Talinhaga 8:27-31; Juan 5:17) Kun an sarong pamilya nag-ooma o may negosyo, an nagkapirang miembro kan pamilya tibaad magtrabaho nin iriba. O tibaad matotokdoan kan ina an saiyang aking lalaki o aking babae na magluto asin maghugas pagkakakan. An ama na an trabaho mayo sa harong puedeng magplano na magtrabaho sa mga proyekto sa harong kaiba an saiyang mga aki. Kapakipakinabang nanggad kun an nasa isip nin mga magurang bako sanang mahaman an yaon na mga trabaho kundi andamon an mga aki para sa bilog nindang buhay!

15. Sa anong mga paagi ikatotokdo an mga leksion sa pagtubod? Iilustrar.

¹⁵ Pagpadanay sa pagtubod sa ibong nin kasakitan: An pagtubod saro man na mahalagang marhay na aspekto kan satong buhay. Kun pinag-oolayan an pagtubod sa pampamilyang pag-adal, tibaad manodan nin mga aki na ipaliwanag an kahulogan kaiyan. Tibaad magimata man sinda sa ebidensia na nagpapatalubo kan pagtubod sa saindang puso. Alagad kun naheheling ninda an saindang mga magurang na nagpapaheling nin dai nanluluyang pagtubod sa ibong nin grabeng mga pagbalo, tibaad magpadagos an epekto sa bilog na buhay. An sarong nag-aadal kan Biblia sa Panama hinuma kan saiyang agom na lalaki na palalayason sa saindang harong kun sia dai maontok sa paglilingkod ki Jehova. Sa ibong kaiyan, kaiba an apat niang saradit na aki, sia regular na nagbabaklay nin 16 kilometros dangan nag-aauto nin 30 pang kilometro tanganing makaabot sa pinakaharaning Kingdom Hall. Naparigon an boot kan halimbawang iyan, mga 20 miembro kan saiyang pamilya an maogmang nag-ako kan dalan kan katotoohan.

Pagtao nin Halimbawa sa Aroaldaw na Pagbasa kan Biblia

16. Taano ta irinerekomendar an pampamilyang pagbasa kan Biblia aroaldaw?

¹⁶ An saro sa pinakamahalagang kostumbre na ikaeestablisar nin arin man na pamilya—sarong kostumbre na mapakikinabangan nin mga magurang asin magigin halimbawa na maaarog nin mga aki—iyo an regular na pagbasa kan Biblia. Sagkod sa mapupuede, magbasa kan Biblia aroaldaw. An pinakamahalaga bakong an laba kan nabasa. Mas mahalaga nanggad an pagigin regular asin an paagi na iyan ginigibo. Para sa mga aki, puedeng dagdagan an pagbasa kan Biblia paagi sa paghinanyog sa mga audiocassette kan My Book of Bible Stories kun igwa kaiyan sa saindong lenguahe. An pagbasa kan Tataramon nin Dios aroaldaw nakatatabang sato na mapagdanay na lataw an mga kaisipan nin Dios. Asin kun an pagbasang iyan kan Biblia ginigibo bako sanang nin mga indibiduwal kundi nin mga pamilya, ini makatatabang sa bilog na mga pamilya na maglakaw sa mga dalan ni Jehova. An kaugalean na ini an inenkaminar sa dai pa sana nahahaloy na “Sa Dios na Dalan nin Buhay” na mga Kombension sa dramang Families—Make Daily Bible Reading Your Way of Life! (sa Bicol, Mga Pamilya—Giboha na Saindong Dalan nin Buhay an Pagbasa kan Biblia Aroaldaw!).—Salmo 1:1-3.

17. Paano an pampamilyang pagbasa kan Biblia asin pagtuom nin importanteng marhay na mga teksto nakatatabang sa pag-aplikar kan hatol sa Efeso 6:4?

¹⁷ An pagbasa kan Biblia bilang pamilya kaoyon kan isinurat ni apostol Pablo sa saiyang ipinasabong na surat sa mga Kristiano sa Efeso, arin na baga: “Mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” (Efeso 6:4) Ano an boot sabihon kaiyan? An “pagtatanos nin isip” sa literal nangangahulogan “paglaog nin isip”; kaya sinasadol an Kristianong mga ama na ilaog an isip ni Jehova Dios sa saindang mga aki—tabangan an mga aki na maaraman an mga kaisipan nin Dios. An pag-enkaminar sa mga aki na tuomon an importanteng marhay na mga teksto makatatabang na magibo ini. An obheto pagiyahan kan mga kaisipan ni Jehova an kaisipan kan mga aki tangani na an saindang mga mawot asin gawe-gawe gradwal na magpabanaag nin diosnon na mga pamantayan kaiba man kan mga aki an mga magurang o dai. An Biblia an pundasyon kan siring na kaisipan.—Deuteronomio 6:6, 7.

18. Kun binabasa an Biblia, ano an tibaad kaipuhan tangani na (a) masabotan iyan nin malinaw? (b) makinabang sa hatol na yaon dian? (c) maghimate sa ihinahayag kaiyan manongod sa katuyohan ni Jehova? (d) makinabang sa sinasabi kaiyan manongod sa mga aktitud saka hiro-hiro nin mga tawo?

¹⁸ Siempre, tangani na maapektaran kan Biblia an satong buhay, kaipuhan na masabotan niato an sinasabi kaiyan. Para sa dakol, tibaad kaipuhanon kaini an bako sanang sarong beses na pagbasa nin ibang kabtang. Tangani na biyong masabotan an nagkapirang pananaram, tibaad kaipuhan na helingon niato an mga termino sa sarong diksionaryo o sa Insight on the Scriptures. Kun an teksto may hatol o togon, magtao nin panahon sa pag-oolay manongod sa mga situwasyon sa satong kaaldawan na nagpapagin angay kaiyan. Dangan puede nindong ihapot, ‘Paano kita makikinabang sa pag-aplikar kan hatol na ini?’ (Isaias 48:17, 18) Kun an teksto nagsasabi manongod sa sarong aspekto kan katuyohan ni Jehova, ihapot, ‘Paano apektado kaini an satong buhay?’ Tibaad binabasa nindo an pagkasaysay manongod sa mga aktitud saka hiro-hiro nin mga tawo. Anong mga sakit sa buhay an inaagihan ninda? Paano ninda inatubang an mga ini? Paano kita makikinabang sa saindang halimbawa? Pirmeng magtao nin panahon na pag-olayan an kahulogan kan pagkasaysay sa satong buhay ngonyan.—Roma 15:4; 1 Corinto 10:11.

19. Paagi sa pagigin mga paraarog sa Dios, ano an itatao niato para sa satong mga aki?

¹⁹ Abaa karahay na paagi na ikatudok sa satong isip asin puso an mga kaisipan nin Dios! Sa siring kita talagang matatabangan na magin “mga paraarog sa Dios, bilang mga aki na namomotan na marhay.” (Efeso 5:1) Asin kita matao nin halimbawa na talagang maninigong arogon kan satong mga aki.

Nagigirumdoman daw Nindo?

◻Paano makikinabang an mga magurang sa halimbawa ni Jehova?

◻Taano an berbal na pagtotokdo sa mga aki ta dapat na padisan nin marahay na halimbawa nin mga magurang?

◻Ano an nagkapirang leksion na halimbawa nin magurang an pinakamarahay na paagi nin pagtotokdo?

◻Paano kita lubos na makikinabang sa pampamilyang pagbasa kan Biblia?

Regular na Adalan an Tataramon nin Dios Bilang Pamilya

“An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.”—MATEO 4:4.

1. Ano an sinasabi kan Biblia manongod sa paninimbagan nin mga payo nin pamilya na itokdo sa saindang mga aki an mga dalan ni Jehova?

SI Jehova Dios nagtao sa mga payo nin pamilya nin dayaday na mga pagirumdom sa saindang paninimbagan na tokdoan an saindang mga aki. An siring na pagtotokdo aandamon an mga aki para sa presenteng buhay asin makatatabang man na andamon sinda para sa buhay sa ngapit. Sinabi ki Abraham nin sarong anghel na nagrerepresentar sa Dios an saiyang paninimbagan na tokdoan an saiyang kasararo sa harong tangani na sinda “magdanay sa dalan ni Jehova.” (Genesis 18:19) An mga magurang na Israelita sinabihan na ipaliwanag sa saindang mga aki kun paano an Israel ilinigtas nin Dios sa Egipto asin kun paano nia itinao sa sainda an saiyang Ley sa Bukid nin Sinai, sa Horeb. (Exodo 13:8, 9; Deuteronomio 4:9, 10; 11:18-21) An Kristianong mga payo nin pamilya sinasadol na padakulaon an saindang mga aki “sa disiplina asin pagtatanos nin isip ni Jehova.” (Efeso 6:4) Dawa kun saro sanang magurang an naglilingkod ki Jehova, an sarong iyan maninigong maghingoa na itokdo sa mga aki an mga dalan ni Jehova.—2 Timoteo 1:5; 3:14, 15.

2. Kaipuhan daw an pampamilyang pag-adal kun mayo nin mga aki sa harong? Ipaliwanag.

² Ini dai nangangahulogan na an pampamilyang pag-adal sa Tataramon nin Dios para sana sa mga pamilya na may mga aki. Kun an mag-agom may pampamilyang pag-adal dawa kun mayo nin mga aki sa harong, ini nagpapaheling nin marahay na pag-apresyar sa espirituwal na mga bagay.—Efeso 5:25, 26.

3. Taano ta mahalaga an pagigin regular kan pampamilyang pag-adal?

³ Tanganing magibo an pinakadakulang karahayan, kaipuhan na itao nin regular an pagtotokdo, kaoyon kan leksion na itinokdo ni Jehova sa Israel duman sa kaawagan: “An tawo bako sanang sa tinapay nabubuhay kundi sa lambang tataramon kan ngoso ni Jehova na an tawo nabubuhay.” (Deuteronomio 8:3) Depende sa kamugtakan kan pamilya, an nagkapirang pamilya puedeng mag-areglo nin semanal na pag-adal; an iba puedeng magkaigwa nin mas halipot na mga pag-adal aroaldaw. Ano man na areglo an pilion nindo, dai pabayaan na magdepende sa pagkanorongod sana an pag-adal. ‘Tuboson an panahon’ para kaiyan. An pagbayad kan kinakaipuhan na karibay kan panahon na iyan madonong na pangangapital. Nakataya an buhay kan mga miembro kan saindong pamilya.—Efeso 5:15-17; Filipos 3:16.

Mga Obhetong Dapat Isaisip

4, 5. (a) Paagi ki Moises, ano an ibinugtak ni Jehova sa atubangan nin mga magurang bilang mahalagang obheto sa pagtotokdo sa saindang mga aki? (b) Ano an kalabot kaiyan ngonyan?

⁴ Kun saindong pinangengenotan an pampamilyang pag-adal, pinakadakulang karahayan an magigibo kaiyan kun nasa isip nindo an klarong mga obheto. Pensara an pira sanang posibilidad.

⁵ Sa balang pag-adal, hingoahon na pakosogon an pagkamoot ki Jehova Dios. Mantang an Israel tiripon sa kaplanodohan nin Moab, bago sinda naglaog sa Dagang Panuga, isinentro ni Moises an saindang atension sa inapod ni Jesu-Cristo sa huri na “nakalalabi sa gabos na togon sa Ley.” Ano idto? “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong kosog.” (Mateo 22:36, 37; Deuteronomio 6:5) Sinadol ni Moises an mga Israelita na itudok ini sa saindang puso asin itokdo iyan sa saindang mga aki. Iyan mangangaipo nin pag-otro, pag-apod kan atension sa mga dahelan na kamotan si Jehova, pagtao nin atension sa mga aktitud saka gawe-gawe na puedeng makaolang sa pagpahayag kan siring na pagkamoot, asin pagdemonstrar nin pagkamoot ki Jehova sa sadiri nindang buhay. Kaipuhan man daw kan satong mga aki an kaparehong pagtotokdo? Iyo! Asin kaipuhan man ninda an tabang na ‘turion an saindang puso,’ an boot sabihon, haleon an ano man na makaoolang sa saindang pagkamoot sa Dios. (Deuteronomio 10:12, 16; Jeremias 4:4) Tibaad kabilang sa mga olang na iyan an pagmawot nin mga bagay kan kinaban asin nin mga oportunidad na mabangkag sa mga aktibidad kaiyan. (1 Juan 2:15, 16) An pagkamoot ki Jehova dapat na magin aktibo, ipinahahayag, nagpapahiro sa sato na gumibo nin mga bagay na nagpapanigo sa satong langitnon na Ama. (1 Juan 5:3) Tanganing magkaigwa nin panhaloyan na mga pakinabang an saindong pampamilyang pag-adal, an lambang pag-adal maninigong pangenotan sa paagi na nagpapakosog sa pagkamoot na ini.

6. (a) Ano an kaipuhan tanganing ikatao an tamang kaaraman? (b) Paano idinodoon kan Kasuratan an halaga nin tamang kaaraman?

⁶ Magtao nin tamang kaaraman sa mga kahagadan nin Dios. Ano an kalabot dian? An kalabot dian bako sanang pakabasa kan simbag sa magasin o libro. Parate na kaipuhan kaiyan an pag-orolay tanganing masierto na an importanteng marhay na mga termino asin mayor na mga ideya malinaw na nasabotan. An tamang kaaraman mahalagang marhay na bagay sa pagsolog kan bagong personalidad, sa pagkonsentrar sa talagang mahahalagang bagay kun napapaatubang sa mga problema sa buhay, asin, sa siring, sa paggibo kan talagang nagpapanigo sa Dios.—Filipos 1:9-11; Colosas 1:9, 10; 3:10.

7. (a) An paggamit nin anong mga hapot tibaad makatabang sa pamilya na ikaaplikar sa praktikal an pinag-aadalan? (b) Paano idinodoon kan Kasuratan an halaga nin siring na obheto?

⁷ Tabangan na ikaaplikar sa praktikal an nanodan. Nasa isip an obhetong ini, durante kan balang pampamilyang pag-adal, ihapot: ‘Paano maninigong makaapektar sa satong buhay an pinag-aadalan na ini? Hinahagad daw kaiyan an ano man na pagbago sa ginigibo niato sa presente? Taano ta maninigo kitang magmawot na gumibo nin mga pagliwat?’ (Talinhaga 2:10-15; 9:10; Isaias 48:17, 18) An pagtao nin supisyenteng atension sa praktikal na aplikasyon nin mga nanodan puedeng magin mahalagang bagay sa espirituwal na pag-oswag kan mga miembro nin pamilya.

Madonong na Gamiton an mga Kasangkapan sa Pagtotokdo

8. Anong mga kasangkapan para sa pag-adal sa Biblia an itinao kan grupong oripon?

⁸ “An fiel asin madonong na oripon” nagtao nin abundang kasangkapan na magagamit sa pag-adal. An magasin na An Torrengbantayan, na magagamit kaiba kan Biblia, makukua sa 131 lenguahe. May mga libro para sa pag-adal sa Biblia sa 153 na lenguahe, mga brosyur sa 284, mga audiocassette sa 61, mga videocassette sa 41, pati programa sa komputer para sa pagsiyasat kan Biblia sa 9 na lenguahe!—Mateo 24:45-47.

9. Paano niato ikaaaplikar an hatol sa mga tekstong sitado sa parapong ini kun nagkakaigwa nin pampamilyang pag-adal sa Torrengbantayan?

⁹ Dakol na pamilya an ginagamit an panahon sa pampamilyang pag-adal sa pag-andam para sa Pag-adal sa Torrengbantayan kan kongregasyon. Abaa kanakatatabang kaiyan! An Torrengbantayan igwa kan mayor na espirituwal na kakanon na itinatao sa pagparigon sa banwaan ni Jehova sa bilog na kinaban. Kun pinag-aadalan nindo An Torrengbantayan bilang pamilya, bako sanang pagbasa kan mga parapo asin pagsimbag sa inimprentang mga hapot an gibohon nindo. Odok na maghingoang kamtan an pakasabot. Magtao nin panahon sa pagbasa sa mga teksto na sitado alagad dai kotado. Pakomentohon an mga miembro nin pamilya sa kun paano an mga ini konektado sa sinasabi sa parapong pinag-oolayan. Ilabot an puso.—Talinhaga 4:7, 23; Gibo 17:11.

10. Ano an magigibo tanganing ilabot an mga aki sa pag-adal asin gibohon iyan na nakagagayagayang panahon para sa sainda?

¹⁰ Kun may mga aki sa saindong pamilya, ano an magigibo nindo tanganing magibo an saindong pag-adal na bako sanang rutina kan pamilya kundi nakapakokosog, interesante, asin maogmang panahon? Hingoahon na papagdanayon na kalabot an balang saro sa angay na paagi tangani na an atension magdanay na konsentrado sa pinag-aadalan. Sagkod sa mapupuede, iareglo na an balang aki may sadiring Biblia asin magasin na pag-aadalan. Bilang pag-arog kan init na ipinaheling ni Jesus, puedeng itaed nin haranihon nin sarong magurang an aking saday, na tibaad kinukugos an aki. (Ikomparar an Marcos 10:13-16.) Puedeng hagadon kan payo nin pamilya sa sarong aki na ipaliwanag an sarong retrato na yaon sa pinag-aadalan. An aking saday puedeng iasignar antes pa na basahon an sarong teksto. An mas matua puedeng iasignar na sabihon an mga oportunidad para sa praktikal na pag-aplikar kan pinag-aadalan.

11. Anong iba pang kasangkapan sa pagtotokdo an itinao, asin kun an mga ini makukua, paano iyan kapakipakinabang na magagamit may koneksion sa pampamilyang pag-adal?

¹¹ Minsan ngani tibaad ginagamit nindo An Torrengbantayan bilang basehan kan saindong orolay, dai paglingawan an ibang kasangkapan sa pag-adal na makukua sa dakol na lenguahe. Kun kaipuhan an basehan na impormasyon o esplikasyon sa sarong frase sa Biblia, tibaad ikatao iyan kan Insight on the Scriptures. Puedeng masimbag an ibang hapot paagi sa pagkonsulta sa Watch Tower Publications Index o paggamit kan programa sa komputer para sa pagsiyasat na ginibo kan Sosyedad. An pakanood na gamiton an mga kasangkapan na ini, kun iyan makukua sa lenguahe nindo, puedeng magin mahalagang kabtang kan pampamilyang pag-adal. Sa katuyohan na animaron an interes nin mga hoben, puede man nindong itagama an sarong kabtang kan oras nindo sa pag-adal para sa pagdalan nin sarong kabtang kan saro sa nakapagtotokdong mga video kan Sosyedad o paghinanyog sa sarong kabtang nin drama sa audiocassette dangan pag-olayan iyan. An marahay na paggamit kan mga kasangkapan na ini sa pag-adal makatatabang na gibohon na interesante asin kapakipakinabang sa bilog na pamilya an saindong pampamilyang pag-adal.

Makibagay sa mga Pangangaipo kan Saindong Pamilya

12. Paano an pampamilyang pag-adal puedeng magkaigwa nin kabtang sa pag-atubang sa importanteng-importante na mga pangangaipo kan pamilya?

¹² Tibaad parateng pinag-aadalan kan saindong pamilya an leksion sa An Torrengbantayan para sa semanang iyan. Alagad pirme nindong pulsohan an pamilya. Kun an ina daing sekular na trabaho, tibaad makaibaiba nia an mga aki aroaldaw pagretira ninda. An nagkapirang situwasyon puede nang asikasohon sa oras na iyan; an iba tibaad nagkakaipo nin dugang pang atension. Kun may importanteng-importante na mga pangangaipo an pamilya, dai iyan pagpabayaan. (Talinhaga 27:12) Puedeng kalabot digdi bako sanang an mga problema sa eskuelahan kundi pati an ibang situwasyon. Pumili nin angay na pag-aadalan, asin paaramon an pamilya antes pa kun ano an pag-aadalan.

13. Taano ta tibaad kapakipakinabang an orolay kan pamilya sa kun paano maaatubang an kadukhaan?

¹³ Bilang halimbawa, an dakulang kabtang kan daga nasa irarom nin kadukhaan; kaya sa dakol na lugar, tibaad kaipuhan na pag-olayan kun paano iyan maaatubang. Ikararahay daw kan saindong pamilya an pampamilyang pag-adal na nakasentro sa aktuwal na mga situwasyon asin mga prinsipyo sa Biblia?—Talinhaga 21:5; Eclesiastes 9:11; Hebreo 13:5, 6, 18.

14. Anong mga situwasyon an tibaad ginigibong napapanahon an pag-orolay kan pamilya sa punto de vista ni Jehova sa kadahasan, guerra, asin Kristianong neutralidad?

¹⁴ An saro pang tema na kaipuhan na pag-orolayan iyo an kadahasan. Kaipuhan niato gabos na ikatudok na marhay sa satong isip asin puso an punto de vista ni Jehova. (Genesis 6:13; Salmo 11:5) An pampamilyang pag-adal sa temang ini makatatao nin forum para sa pag-orolay kun paano aatubangon an mga paradaogdaog sa eskuelahan, kun baga mag-aadal nin abilidad sa pagdepensa sa sadiri, asin kun paano pipilion an tamang pag-aling-aling. Lakop na an madahas na mga pagkakalaban; haros lambang nasyon pinasasakitan magsalang nin guerra sibil, nin politikal o etnikong iriwal, o nin labanan nin mga gang. Bilang resulta, tibaad kaipuhan na pag-olayan kan saindong pamilya an manongod sa pagpapadanay nin Kristianong gawe-gawe mantang napalilibotan nin mga paksion na naggeguerra.—Isaias 2:2-4; Juan 17:16.

15. Paano maninigong itao sa mga aki an pagtotokdo manongod sa sekso asin pag-agom?

¹⁵ Mantang nagdadakula an mga aki, kaipuhan nindang matokdoan manongod sa sekso asin pag-agom, na angay sa saindang edad. Sa nagkapirang kultura an kadaklan na magurang nungka na ipinakikipag-olay an sekso sa saindang mga aki. An mga aking daing pakaaram tibaad makakua nin biribid na mga opinyon sa ibang hoben, asin puedeng magin kapahapahamak an resulta. Bako daw na mas marahay na arogon si Jehova, na nagtatao nin prangka alagad mataktikang hatol dapit sa bagay na ini sa Biblia? An diosnon na hatol matabang sa satong mga aki na mapagdanay an paggalang sa sadiri asin trataron na may dignidad an mga bakong kasekso. (Talinhaga 5:18-20; Colosas 3:5; 1 Tesalonica 4:3-8) Dawa kun napag-olayan na nindo an mga bagay na ini, dai mag-alangan na gibohon giraray iyan. Mantang minalataw an bagong mga situwasyon, mahalagang marhay an pag-otro.

16. (a) Sa manlaenlaen na pamilya, noarin ginigibo an pampamilyang pag-adal? (b) Paano nindo inatubang an mga olang tangani na magkaigwa nin regular na pampamilyang pag-adal?

¹⁶ Noarin magigibo an pampamilyang pag-adal? Inaarog an mga pamilyang Bethel sa bilog na daga, dakol na pamilya an nag-iiskedyul kan saindang pampamilyang pag-adal sa banggi nin Lunes. Laen man para sa iba. Sa Argentina an sarong pamilya nin 11, kaiba an 9 na aki, regular na nagmamata nin alas singko kada aga tanganing magkaigwa kan saindang pampamilyang pag-adal. Huli sa laen-laen na iskedyul sa trabaho, daing ibang oras na posible. Bako idtong pasil, alagad ikinatudok kaiyan sa isip asin puso kan mga aki an halaga nin pampamilyang pag-adal. Digdi sa Pilipinas an sarong magurang sa kongregasyon may regular na pampamilyang pag-adal kaiba kan saiyang agom asin kan tolo nindang aki mantang sinda nagdadakula. Sa laog kan semana an mga magurang may personal man na pakipag-adal sa balang saro sa mga aki tangani na isapuso kan balang saro an katotoohan. Sa Estados Unidos, an sarong tugang na babae na an agom bakong Saksi ihinahatod an saiyang mga aki sa auto para sa mga eskuela kada aga. Mantang naghahalat kan auto, mga sampulong minuto nindang binabasa asin pinag-oolayan an angay na pag-aadalan sa Kasuratan, dangan namimibi nin halipot an ina bago sumakay sa auto an mga aki. Sa Republika Demokratika nin Congo, an sarong babae na an agom na daing pagtubod binayaan an pamilya kaipuhan na magmahigos sa pag-adal huli sa saiyang limitadong inadalan. An aki niang lalaki na nasa edad na nagtatabang paagi sa pagsongko sa pamilya serosemana tanganing pangenotan an pag-adal kaiba an saiyang ina saka an saiyang nguhod na mga tugang na lalaki. An ina nagtatao nin marahay na halimbawa paagi sa saiyang utitok na pag-andam. May situwasyon daw na nagpapagin depisil kan regular na pampamilyang pag-adal sa saindong pamilya? Dai kamo mawaran nin paglaom. Odok na hagadon an bendisyon ni Jehova sa saindong mga pagmamaigot na magkaigwa nin regular na pag-adal sa Biblia.—Marcos 11:23, 24.

Mga Balos Huli sa Pagmamaigot

17. (a) Tanganing magkaigwa nin regular na pampamilyang pag-adal, ano an hinahagad? (b) Anong eksperyensia an nag-iilustrar kan halaga nin regular na pagtotokdo sa pamilya kan mga dalan ni Jehova?

¹⁷ Kaipuhan an pagpaplano. Hinahagad an pagmamaigot. Alagad bawi man iyan sa mga pakinabang na gikan sa regular na pampamilyang pag-adal. (Talinhaga 22:6; 3 Juan 4) Si Franz asin Hilda, sa Alemania, nagpadakula nin pamilya na may 11 aki. Pakalihis nin dakol na taon, an aki nindang si Magdalena nagsabi: “An ibinibilang ko ngonyan na pinakamahalaga iyo na mayo ni sarong aldaw na nag-agi na kami dai nag-aako nin espirituwal na pagtotokdo.” Kan magin makosogon an espiritu nin nasyonalismo sa pagsakop ni Adolf Hitler, ginamit kan ama ni Magdalena an Biblia sa pag-andam kan saiyang pamilya para sa mga pagbalo na aram niang maabot. Pag-abot nin panahon, an mas hoben na mga miembro kan pamilya dinakop asin dinara sa repormatoryo; an iba sa pamilya inarestar asin ibinilanggo sa mga karsel asin kampo de konsentrasyon. An nagkapira ginadan. Nagdanay na marigon an pagtubod ninda gabos—bako sanang sa panahon na idto nin maringis na paglamag kundi, para sa mga natadang buhay, pati sa mga taon na suminunod.

18. Paano binalosan an mga paghihingoa nin nagsosolong mga magurang?

¹⁸ Dakol na nagsosolong magurang, saka idtong an agom bako nindang kapagtubod, an nagtao man sa saindang mga aki nin regular na pagtotokdo sa Biblia. An sarong daing agom na ina, sarong balo, sa India nagmaigot na itadom an pagkamoot ki Jehova sa duwa niang aki. Minsan siring, naronot an saiyang puso kan an aki niang lalaki pumondo sa pakikiasosyar sa banwaan ni Jehova. Nakimaherak sia ki Jehova na patawadon sia sa ano man na pagkukulang sa pagpatood nia sa saiyang aki. Alagad dai talaga nalingawan kan aki an saiyang nanodan. Pakalihis nin labing sarong dekada, sia nagbalik, nag-oswag na marhay sa espirituwal, asin nagin magurang sa kongregasyon. Ngonyan sinda mag-agom naglilingkod bilang bilog na panahon na mga ministrong payunir. Kanigoan an pasasalamat kan mga magurang na isinapuso an hatol ni Jehova asin kan saiyang organisasyon na magtao nin regular na pagtotokdo sa Biblia sa laog kan pamilya! Ano iinaaplikar nindo an hatol na iyan sa saindong pamilya?

Ikapaliliwanag daw Nindo?

◻ Taano ta mahalaga an regular na pampamilyang pag-adal?

◻ Ano an maninigong magin mga obheto niato sa balang pampamilyang pag-adal?

◻ Anong mga kasangkapan sa pagtotokdo an inandam na gamiton niato?

◻ Paano ikababagay an pag-adal sa mga pangangaipo kan pamilya?

[Retrato sa pahina 15]

An depinidong mga obheto mapaoswag sa saindong pampamilyang pag-adal

Mga Pamilya, Omawon an Dios Bilang Kabtang kan Saiyang Kongregasyon

“Sa tahaw kan nagkakasararong mga kadaklan oomawon ko si Jehova.”—SALMO 26:12.

1. Ano an mahalagang kabtang nin tunay na pagsamba apuera sa pag-adal asin pamimibi sa harong?

KAIBA sa pagsamba ki Jehova bako sanang an pamimibi asin pag-adal kan Biblia sa harong kundi siring man an aktibidad bilang kabtang kan kongregasyon nin Dios. An suanoy na Israel pinagbotan na “tiponon mo an banwaan, an mga lalaki asin an mga babae asin an saradit,” tanganing makanood kan ley nin Dios tanganing maglakaw sa saiyang dalan. (Deuteronomio 31:12; Josue 8:35) An mga gurang sagkod an ‘hoben na mga lalaki asin mga daraga’ pinarigon an boot na makikabtang sa pag-omaw kan ngaran ni Jehova. (Salmo 148:12, 13) Aplikado man an kaagid na mga areglo sa laog kan Kristianong kongregasyon. Sa mga Kingdom Hall sa bilog na daga, an mga lalaki, babae, asin mga aki sueltong nakikakabtang sa mga sesyon na kalabot an mga nagdadangog, asin dakol an nakamamate nin dakulang kaogmahan sa pagkaigwa nin kabtang.—Hebreo 10:23-25.

2. (a) Taano an pag-andam ta importanteng marhay na bagay sa pagtabang sa mga hoben na maogma sa pagtiripon? (b) Kiisay na halimbawa an mahalaga?

² Totoo, an pagtabang sa mga hoben na magkaigwa nin nakararahay na kaugalean sa aktibidad sa kongregasyon puedeng magin sarong angat. Kun an nagkapirang aki na nag-aatender kaiba kan saindang mga magurang minalataw na dai naoogma sa mga pagtiripon, ano daw an tibaad problema? Siempre, an kadaklan na aki halipot an oras na makakokonsentrar asin madaling malangkag. An pag-andam makatatabang na maatubang an problemang ini. Kun mayo nin pag-andam, an mga aki dai makapakikikabtang sa mga pagtiripon sa paaging makahulogan. (Talinhaga 15:23) Kun mayo nin pag-andam, magigin masakit para sa sainda na makagibo nin espirituwal na pag-oswag na magtatao nin pagkakontento. (1 Timoteo 4:12, 15) Ano daw an magigibo? Enot, kaipuhan na ihapot nin mga magurang kun baga sinda mismo nag-aandam para sa mga pagtiripon. An saindang halimbawa epektibong marhay na impluwensia. (Lucas 6:40) An maingat na pagplano kan pampamilyang pag-adal puede man na magin mahalagang nakakokontribwir na bagay.

Pagparigon sa Puso

3. Sa oras kan pampamilyang pag-adal, taano ta maninigong gibohon an espesyal na paghihingoa na parigonon an mga puso, asin ano an hinahagad kaini?

³ An pampamilyang pag-adal maninigo na magin oras bako sanang para sa paglaog nin kaaraman sa mga payo kundi para man sa pagparigon sa mga puso. Nagkakaipo ini nin pakamansay sa mga problema na napapaatubang sa mga miembro kan pamilya sagkod nin mamomoton na pagmakolog sa balang saro. Si Jehova “parasiyasat kan puso.”—1 Cronica 29:17.

4. (a) Ano an boot sabihon kan pagigin “kulang nin puso”? (b) Ano an kalabot sa ‘pakakua nin puso’?

⁴ Ano an nanonompongan ni Jehova kun sinisiyasat nia an puso kan satong mga aki? An kadaklan sa sainda masabi na namomotan ninda an Dios, asin iyan kaomaw-omaw. Pero, an saro na hoben pa o bago pa sanang nakanonood manongod ki Jehova limitado an eksperyensia sa mga dalan ni Jehova. Huli ta sia daing eksperyensia, tibaad sia “kulang nin puso,” arog kan pagkasabi dian kan Biblia. Tibaad bakong gabos niang motibo maraot, alagad kaipuhan an panahon tanganing an puso nin saro mapasa kamugtakan na talagang magpapanigo sa Dios. Kalabot digdi an pagpangyari na an mga kaisipan, mawot, saboot, emosyon, asin pasohan nin saro sa buhay makaoyon kan aprobado nin Dios, sagkod sa ini posible para sa mga tawong bakong sangkap. Kun ginigibo nin saro an siring na pagmolde kan personang nasa laog sa diosnon na paagi, sia “nakakakua nin puso.”—Talinhaga 9:4; 19:8.

5, 6. Paano matatabangan nin mga magurang an saindang mga aki na ‘makakua nin puso’?

⁵ Matatabangan daw nin mga magurang an saindang mga aki na ‘makakua nin puso’? Totoo, mayong tawo na makabubugtak nin marahay na kamugtakan nin puso sa saro pang tawo. An balang saro sa sato tinawan nin libreng kabotan, asin dakula an depende sa kun ano an itinotogot niato sa satong sadiri na isip-isipon. Minsan siring, parate na may pakamansay na maeenganyar nin mga magurang an saindang aki na magtaram, na inaaram kun ano an nasa puso asin kun saen kaipuhan an tabang. Gamiton an mga hapot na arog kan ‘Ano an saboot mo manongod kaini?’ asin ‘Ano an talagang gusto mong gibohon?’ Dangan, pasensiosong maghinanyog. Dai magsobra sa reaksion. (Talinhaga 20:5) Mahalaga an kamugtakan sa palibot na may kabootan, pakasabot, asin pagkamoot kun boot nindong maabot an puso.

⁶ Tanganing mapasarig an nakararahay na mga inklinasyon, parateng ipakipag-olay an mga bunga kan espiritu—an balang aspekto kaiyan—asin magtarabang bilang pamilya na mapatalubo iyan. (Galacia 5:22, 23) Pataluboon an pagkamoot ki Jehova asin ki Jesu-Cristo, bako sanang sa pagsabi na maninigo niato sindang kamotan kundi paagi sa pag-orolay sa mga dahelan kun taano ta namomotan niato sinda asin kun paano niato ikapahahayag an pagkamoot na iyan. (2 Corinto 5:14, 15) Pakosogon an kamawotan na gumibo kan tama paagi sa pangangatanosan sa mga pakinabang na ibubunga. Pataluboon an kamawotan na rayoan an salang mga kaisipan, pagtaram, asin gawe-gawe paagi sa pag-orolay sa maraot na mga epekto nin siring na mga bagay. (Amos 5:15; 3 Juan 11) Ipaheling kun paano an mga kaisipan, pagtaram, asin gawe-gawe—baga man marahay o maraot—puedeng makaapektar sa relasyon nin saro ki Jehova.

7. Ano an magigibo na matabangan an mga aki na maatubang an mga problema asin makagibo nin mga desisyon sa paagi na papagdadanayon sindang dayupot ki Jehova?

⁷ Kun an aki may problema o kaipuhan na gumibo nin mahalagang desisyon, puede niato siang hapoton: ‘Ano sa paghona mo an punto de vista ni Jehova digdi? Ano an aram mo manongod ki Jehova kaya nasasabi mo iyan? Ano namibi ka na sa saiya manongod dian?’ Nagpopoon sa pinakaamay na mapupuede, tabangan an saindong mga aki na magkaigwa nin ugale sa buhay na dian pirmeng odok na hinihingoa na siertohon an kabotan nin Dios dangan gibohon iyan. Mantang sinda nagkakaigwa nin dayupot, personal na relasyon ki Jehova, sinda maoogma sa paglakaw sa saiyang mga dana. (Salmo 119:34, 35) Patataluboon kaini sa boot ninda an pag-apresyar sa pribilehiong makaasosyar sa kongregasyon kan tunay na Dios.

Pag-andam Para sa mga Pagtiripon kan Kongregasyon

8. (a) Ano an puedeng makatabang sa sato na ikaiba sa satong pampamilyang pag-adal an gabos na nagkakaipo nin atension? (b) Gurano kahalaga kan pag-adal na ini?

⁸ Kadakol kan nagkakaipo nin atension durante kan mga oras nin pampamilyang pag-adal. Paano nindo mapagkakaigo gabos iyan? Imposibleng gibohon an gabos nin durungan. Alagad tibaad matabangan kamo nin paggibo nin listahan. (Talinhaga 21:5) Sa panapanahon, repasohon iyan asin estudyaran kun ano an nagkakaipo nin espesyal na atension. Magkaigwa nin makosog na interes sa progreso kan balang miembro nin pamilya. An areglong ini nin pampamilyang pag-adal mahalagang kabtang kan Kristianong edukasyon, na inaandam kita para sa buhay ngonyan asin sa maabot na buhay na daing sagkod.—1 Timoteo 4:8.

9. Anong mga pasohan mapadapit sa pag-andam para sa pagtiripon an puedeng luway-luway niatong hingoahon na mapaoswag durante kan satong mga pampamilyang pag-adal?

⁹ Kaiba daw sa saindong pampamilyang pag-adal an pag-andam para sa mga pagtiripon kan kongregasyon? Dakol na proyekto an puede nindong hingoahon na mapaoswag nin gradwal mantang kamo iribang nag-aadal. An nagkapira digdi tibaad mangaipo nin mga semana, bulan, o taon pa ngani tanganing matapos. Estudyare an mga pasohan na ini: (1) an balang saro sa pamilya andam na magkomento sa mga pagtiripon kan kongregasyon; (2) an balang saro naghihingoang magkomento sa sadiri niang tataramon; (3) iiniiba an mga teksto sa komento; asin (4) inaanalisar an pag-aadalan sa katuyohan na iaplikar iyan nin personal. Ini gabos makatatabang sa saro na isapuso an katotoohan.—Salmo 25:4, 5.

10. (a) Paano niato matatawan nin atension an balang saro sa satong mga pagtiripon kan kongregasyon? (b) Taano ini ta kapakipakinabang?

¹⁰ Dawa kun an saindong pampamilyang pag-adal parateng basado sa leksion sa An Torrengbantayan para sa semanang iyan, dai paglipasan an halaga nin indibiduwal o pampamilyang pag-andam para sa Pag-adal sa Libro kan Kongregasyon, Teokratikong Paadalan sa Pagmiministro, asin Pagtiripon sa Paglilingkod. An mga ini mahalaga man na mga kabtang kan programa sa pagtokdo sa sato na maglakaw sa dalan ni Jehova. Tibaad mahimo nindong mag-andam sa panapanahon para sa mga pagtiripon bilang sarong pamilya. Paagi sa saindong pagtarabang, mapapakarhay an mga abilidad sa pag-adal. Bilang resulta, mas dakol na karahayan an makukua sa mga pagtiripon mismo. Kabilang sa iba pang bagay, pag-olayan an mga pakinabang sa regular na pag-andam para sa mga pagtiripon na ini asin an halaga nin pagkaigwa nin depinidong oras na itinagama para dian.—Efeso 5:15-17.

11, 12. Paano kita makikinabang sa pag-andam para sa pag-awit kan kongregasyon, asin paano ini magigibo?

¹¹ Sa “Sa Dios na Dalan nin Buhay” na mga Kombension, pinarigon an satong boot na mag-andam para sa saro pang kabtang kan satong mga pagtiripon—an pag-awit. Ano ipinadagos nindo iyan? An paggibo kaiyan makatatabang na ikaukit an mga katotoohan sa Biblia sa satong isip saka puso asin madagdagan man an satong kagayagayahan sa mga pagtiripon kan kongregasyon.

¹² An pag-andam na may kaibang pagbasa saka pag-orolay sa kahulogan kan mga tataramon sa nagkapira sa mga awit na nakaiskedyul makatatabang sa sato na umawit gikan sa puso. Sa suanoy na Israel, an mga instrumento sa pagtogtog prominenteng ginamit sa pagsamba. (1 Cronica 25:1; Salmo 28:7) Tatao daw na tumogtog an saro sa saindong pamilya? Taano ta dai gamiton an instrumentong iyan sa pagpraktis kan saro sa mga awit na pan-Kahadean para sa semanang iyan, dangan awiton iyan bilang sarong pamilya. An saro pang posibilidad gumamit nin rekording kan mga awit. Sa nagkapirang nasyon an satong mga tugang magayonon umawit na mayo nin akompanimentong instrumento sa pagtogtog. Mantang sinda naglalakaw sa dalan o nagtatrabaho sa oma, parate na ikinaoogma nindang awiton an mga awit na nakaiskedyul para sa mga pagtiripon kan kongregasyon sa semanang iyan.—Efeso 5:19.

Pag-andam kan Pamilya Para sa Paglilingkod sa Langtad

13, 14. Taano ta mahalaga an pag-orolay kan pamilya na nag-aandam kan satong puso para sa ministeryo sa langtad?

¹³ An pagpatotoo sa iba manongod ki Jehova asin sa saiyang katuyohan sarong mahalagang kabtang kan satong buhay. (Isaias 43:10-12; Mateo 24:14) Hoben man o gurang, kita mas naoogma sa aktibidad na ini asin mas dakulang karahayan an nagigibo ta kun kita andam. Paano niato magigibo ini sa laog kan pamilya?

¹⁴ Arog kan gabos na bagay na may labot sa satong pagsamba, mahalaga na andamon an satong puso. Kaipuhan na pag-olayan niato bako sanang kun ano an satong gigibohon kundi pati an kun taano ta gigibohon niato iyan. Kan kaaldawan ni Hadeng Josafat, an banwaan tinokdoan sa ley nin Dios, alagad sinasabi sa sato kan Biblia na sinda “dai pa inandam an saindang puso.” Huli kaini sinda nagin madaling maimpluwensiahan nin mga sutsut na makapararayo sa sainda sa tunay na pagsamba. (2 Cronica 20:33; 21:11) An pasohan niato bako sanang makareport nin oras na ginamit sa paglilingkod sa langtad, ni tangani sanang makapasakamot nin mga babasahon. An satong ministeryo maninigo na magin kapahayagan kan satong pagkamoot ki Jehova asin kan satong pagkamoot sa mga tawo na nagkakaipo kan oportunidad na mapili an buhay. (Hebreo 13:15) Iyan aktibidad na dian kita “mga kapwa trabahador nin Dios.” (1 Corinto 3:9) Abaa kadakulang pribilehio! Sa pakikikabtang niato sa ministeryo, ginigibo niato iyan sa pakikikooperar sa banal na mga anghel. (Kapahayagan 14:6, 7) Ano pa an mas marahay na panahon na pakosogon an pag-apresyar digdi kisa mga orolay kan pamilya, baga man sa satong semanal na pag-adal o kun pinag-oolayan an sarong angay na teksto hale sa Pagsiyasat sa Kasuratan Aroaldaw!

15. Noarin kita puedeng mag-andam para sa paglilingkod sa langtad bilang sarong pamilya?

¹⁵ Ginagamit daw nindo kun minsan an oras sa saindong pampamilyang pag-adal na tabangan an mga miembro kan saindong pamilya na mag-andam para sa paglilingkod sa langtad para sa semanang iyan? Puedeng magin kapakipakinabang na marhay an paggibo kaiyan. (2 Timoteo 2:15) Makatatabang iyan na magin makahulogan asin mabunga an saindang paglilingkod. Kun minsan, puede nindong itagama an bilog na pag-adal para sa siring na pag-andam. Mas parate, puede nindong tawan nin atension an mga aspekto kan ministeryo sa langtad sa mas haralipot na orolay sa katapusan kan pampamilyang pag-adal o sa ibang panahon sa laog kan semana.

16. Idetalye an halaga kan balang saro sa mga tangga na nalilista sa parapo.

¹⁶ An pag-orolay kan pamilya puedeng magkonsentrar sa sunod-sunod na tangga, arog baga kan minasunod: (1) Mag-andam nin naensayong marhay na pag-atubang kaiba an sarong tekstong babasahon sa Biblia kun may oportunidad. (2) Seguradohon na an balang saro, kun mapupuede, may sadiring bag sa paglilingkod sa langtad, Biblia, kuaderno, bolpen o lapis, mga pulyeto, asin ibang babasahon na nasa marahay na kamugtakan. An bag sa paglilingkod dai kaipuhan na mamahalon, alagad iyan maninigong malinig asin areglado. (3) Pag-olayan kun saen asin kun paano gigibohon an impormal na paghuhulit. Pasundan an balang tangga kan pagtotokdong ini nin mga panahon na kamo mag-ibanan sa paglilingkod sa langtad. Tumao nin nakatatabang na mga suhestion, alagad dai magtao nin konseho sa kadakol na punto.

17, 18. (a) Anong klaseng pag-andam bilang pamilya an makatatabang na magin mas mabunga an satong ministeryo sa langtad? (b) Anong aspekto kan pag-andam na ini an magigibo kada semana?

¹⁷ An dakulang kabtang kan gibohon na itinao ni Jesu-Cristo sa saiyang mga parasunod iyo an paggibo nin mga disipulo. (Mateo 28:19, 20) An kalabot sa paggibo nin mga disipulo bako sanang paghuhulit. Iyan nagkakaipo nin pagtotokdo. Paano an saindong pampamilyang pag-adal makatatabang sa saindo na magin epektibo sa paggibo kaini?

¹⁸ Bilang pamilya, pag-olayan kun siisay an marahay na dalawon liwat. An nagkapira sa sainda tibaad nag-ako nin babasahon; an nagkapira tibaad naghinanyog sana. Tibaad sinda nanompongan sa pagharongharong o sa impormal na paghuhulit sa saod o sa eskuelahan. Pagiya kamo sa Tataramon nin Dios. (Salmo 25:9; Ezequiel 9:4) Desisyonan kun siisay an gustong dalawon kan balang saro sa saindo sa semanang iyan. Ano an pag-oolayan? An pag-orolay kan pamilya makatatabang sa balang miembro na makapag-andam. Isurat an espesipikong mga teksto na ipapaabot sa mga interesado saka an angay na mga punto hale sa brosyur na Ano an Kahagadan sa Sato nin Dios? o sa librong Kaaraman na Minagiya Pasiring sa Buhay na Daing Katapusan. Dai pakadakolon an ipakikipag-olay sa sarong pagdalaw. Walatan an kagharong nin hapot na sisimbagon sa sunod na pagdalaw. Taano ta dai gibohon na kabtang kan semanal na kaugalean kan pamilya na iplano kun sairisay an dadalawon liwat kan balang saro, kun noarin sia madalaw, asin kun ano an linalaoman niang magibo. An paggibo kaini makatatabang na magin mas mabunga an ministeryo sa langtad kan bilog na pamilya.

Padagos Sindang Tokdoan kan Dalan ni Jehova

19. Tangani na an mga miembro nin pamilya magpadagos na naglalakaw sa dalan ni Jehova, ano an dapat na maeksperyensiahan ninda, asin ano an nakakokontribwir digdi?

¹⁹ Sarong angat an pagigin payo nin pamilya sa maraot na kinaban na ini. Si Satanas asin an saiyang mga demonyo naghihingoa na raoton an espirituwalidad kan mga lingkod ni Jehova. (1 Pedro 5:8) Dugang pa, kadakol kan sakit ngonyan sa saindo mga magurang, nangorogna sa saindo nagsosolong mga magurang. Depisil na makakua nin oras na gibohon an gabos na gusto nindong gibohon. Alagad bakong sayang an paghihingoa, dawa kun pasarosaro sana an suhestion na ikaaplikar nindo, asin luway-luway na paoswagon an saindong programa sa pampamilyang pag-adal. Sarong nakaoogmang balos an maheling an mga dayupot na marhay sa saindo na maimbod na naglalakaw sa dalan ni Jehova. Tanganing mapangganang makalakaw sa dalan ni Jehova, an mga miembro nin pamilya kaipuhan na makanompong nin kagayagayahan sa pagigin presente sa mga pagtiripon kan kongregasyon asin sa pakikikabtang sa ministeryo sa langtad. Tangani na iyan magin totoo, kaipuhan an pag-andam—pag-andam na nagpaparigon sa puso asin inaandam an balang saro na magkaigwa nin makahulogan na kabtang.

20. Ano an makatatabang sa mas dakol na magurang na maeksperyensiahan an kagayagayahan na sinasabi sa 3 Juan 4?

²⁰ May labot sa mga natabangan nia sa espirituwal, si apostol Juan nagsurat: “Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.” (3 Juan 4) An mga pampamilyang pag-adal na pinangengenotan na nasa isip an malinaw na mga obheto asin an mga payo nin pamilya na tinatawan nin atension sa maboot, nakatatabang na paagi an indibiduwal na mga pangangaipo kan mga miembro nin pamilya dakula an magigibo na an pamilya makapakikabtang sa siring na kagayagayahan. Paagi sa pagpatalubo nin pag-apresyar sa dalan nin Dios sa buhay, tinatabangan nin mga magurang an saindang pamilya na magkamit kan pinakamarahay na dalan sa buhay.—Salmo 19:7-11.

Ikapaliliwanag daw Nindo?

◻ Taano ta mahalagang marhay para sa satong mga aki an pag-andam para sa pagtiripon?

◻ Paano matatabangan nin mga magurang an saindang mga aki na ‘makakua nin puso’?

◻ Paano makatatabang an satong pampamilyang pag-adal sa pag-andam para sa gabos na pagtiripon?

◻ Paano an pag-andam para sa paglilingkod sa langtad bilang sarong pamilya puedeng makatabang sa sato na magin mas epektibo?