Bagong Programa sa Espesyal na Aldaw nin Asamblea
An programa sa espesyal na aldaw nin asamblea na mapoon sa Pebrero 2000 igwa nin tema na: “Pagsiyasat sa Hararom na mga Bagay nin Dios.” (1 Cor. 2:10) Anong mahalagang mga bagay an satong manonodan?
Sa saindang paghanap nin kaaraman, dakol na tawo an dai nagiginhawahan sa saindang nanonompongan. Pinakokosog kita kan Biblia, na ipaheheling kan paraataman sa sirkito sa saiyang kabtang na may temang “An Pagsiyasat sa Tataramon nin Dios Nagtatao nin Kaginhawahan.” Ipapaheling kan nagdadalaw na espiker an koneksion kan pagsiyasat sa hararom na mga bagay nin Dios asin kan paghuhulit kan maogmang bareta mantang saiyang ipinaliliwanag an hapot na “Paano Nindo Minamansay an Paghuhulit kan Kahadean?”
Paano matatabangan nin mga magurang an saindang mga aki na magsiyasat nin hararom sa Tataramon nin Dios? Itatao an praktikal na mga suhestion sa kabtang na “Itadom an Tataramon nin Dios sa Saindong mga Aki.” An Kristianong mga hoben naiimpluwensiahan sa kapakipakinabang na paagi sa pakikiasosyar sa mga maygurang sa espirituwal sa laog nin kongregasyon. An mga halimbawa kun paano sinda naaapektaran sa marahay na paagi tatawan nin pagdodoon sa kabtang na “Mga Hoben na Nakanonood sa mga May Edad Na.”
Taano ta maninigo niatong hanapon nin maigot an natatagong espirituwal na kayamanan sa panahon na ini? Si Jehova an Parahayag nin mga hilom. Ipaliliwanag kan nagdadalaw na espiker kun ano an ihinayag ni Jehova kan suanoy asin sa presenteng mga panahon sa pahayag na “Progresibong Ihinahayag ni Jehova an Hararom na mga Bagay.” Pakokosogon kaini an satong desisyon na padagos na ‘magsiyasat sa hararom na mga bagay nin Dios.’
Magplano na ngonyan na umatender. An mga nagmamawot na simbolisaran an saindang pagdusay ki Jehova paagi sa bautismo maninigo na impormaran an nangengenot na paraataman sa pinakamadaling panahon na mapupuede. An satong odok na pagmawot na siyasaton an Tataramon nin Dios pasasarigon kan satong madadangog. Kaya dai paglipasan an espesyal na aldaw na ini nin espirituwal na pagtotokdo!