Masusopgon daw Kamo?
1 Dai niato ipinagngangalas kun may naheheling kitang sarong aki na nagsisirip sa sato sa likod kan saiyang ina o ama. An pagkamasusopgon natural sa kapinonan nin pagkaniaki. Dawa sa pagkanasa edad na, dakol an medyo natural na masusopgon. Kun an pagkamasusopgon nakakaapektar sa saindong pakikikabtang sa ministeryo, ano an puede nindong gibohon?
2 Pagpanggana sa Pagkamasusopgon: Importanteng magtao nin atension sa “natatagong persona kan puso.” (1 Ped. 3:4) Pakosogon an saindong pagkamoot ki Jehova asin sa saindong kataed. Magin kombensido nanggad na an pag-otob kan sugong paghuhulit saro sa pinakamarahay na paagi na ikapaheheling an mapagsakripisyong pagkamoot. Sundon an marahay na kaugalean nin personal na pag-adal asin pag-atender sa mga pagtiripon. Mamibi nin regular asin espesipiko para sa tabang ni Jehova. An makosog na pagtubod asin pagtitiwala sa saiya magpapatalubo sa kompiansa asin magtatao “nin orog pang kosog nin boot na itaram an tataramon nin Dios na dai nin takot.”—Fil. 1:14.
3 Labanan an mga pagmate nin kakulangan. Minalataw na kinaipuhan ining gibohon ni Timoteo. Inenkaminar ni Pablo si Timoteo na “dai noarin man pagtogotan na basangbasangon nin siisay man an [saiyang] pagkabarobata,” na pinagigirumdom sia na “an Dios nagtao sato bakong nin espiritu nin pagkamatalaw, kundi nin kapangyarihan.” (1 Tim. 4:12; 2 Tim. 1:7) Si Timoteo biyong ginamit ni Jehova, na gagamiton man kamo kun kamo maghihingoang umoswag na may lubos na kompiansa sa Saiya.—Sal. 56:11.
4 An paghorophorop sa sarong teksto sa Biblia, siring baga kan Mateo 10:37, nakatabang sa sarong tugang na babae na an pagkamasusopgon ginibo siang magin matatakton sa saiyang nagkokontrang agom. Mantang sia nagmamaigot, nagin mas pasil para sa saiya an ministeryo, asin pag-abot nin panahon an saiyang agom, ina, asin mga tugang na lalaki gabos nag-ako kan katotoohan!
5 Kaipuhan an Pag-andam: Madudugangan pa an saindong kompiansa kun lubos kamong mag-aandam para sa ministeryo. Pumili nin simpleng pag-atubang sa librong Reasoning o sa nakaaging mga luwas kan An Satong Ministeryo sa Kahadean, pag-adalan iyan na marhay, asin ensayohon iyan. Imbes na pataluboon an dai kaipuhan na kahaditan, mag-isip nin positibo. Kumua nin kosog nin boot sa dayupot na pakikipagtabangan sa iba. Girumdomon na an kadaklan na tawo na manonompongan nindo sa mga harong masusopgon, arog man nindo. An gabos nangangaipo kan mensahe nin Kahadean.
6 Kun kamo masusopgon, dai madesesperar. Mantang kamo nagmamaigot, tatabangan kamo ni Jehova na magin epektibong parahulit kan maogmang bareta. Kun siring magkakaigwa kamo nin kagayagayahan sa saindong ministeryo.—Tal. 10:22.