Pagparigon sa Boot kan mga Payunir
1 Kita gabos nangangaipo nin pagparigon sa boot, asin nangorognang pinahahalagahan kan mga payunir kun an kamagurangan nagpapaheling nin interes sa sainda. An sarong payunir na tugang na babae nagsurat: “Boot kong maaraman nindo kun gurano kadakula kan sakong pagpapahalaga sa ‘kamagurangan na lalaki’ kan sakong kongregasyon. . . . Minalataw na kan panahon na kaipuhan kong marhay an saindang suporta asin pagparigon sa boot, itinao ni Jehova sa sainda an mga tataramon nin kadonongan na kaipuhan kong madangog.”
2 Ngonyan na Enero, duwang miembro kan Komite sa Paglilingkod an makikipagmiting sa gabos na payunir, asin may itinaong outline para sa miting na ini. Marahay na helingon durante kan miting na ini kun ano an magigibo tangani na madagdagan an oras kan mga payunir, huling an promedyo para sa nasyon 54.1 sana kan nakaaging taon nin paglilingkod. Pag-abot nin Disyembre 31, maninigong nakareport na an mga regular payunir nin kisuerra 280 oras. An mga dai pa naaabot ini maninigong parigonon an boot na pakarhayon giraray an saindang mga iskedyul durante kan masunod na walong bulan tangani na maabot an saindang taonan na pasohan na 840 oras. Maninigong komendaran an mga marahay an kamugtakan na nakaaabot sa kahagadan na oras.
3 Kun hababa an oras ninda, madali sanang manluya an boot kan mga payunir. Iyan an dahelan kun taano ta isinuherir sa An Satong Ministeryo sa Kahadean na Oktubre 1998, pahina 7, na regular na repasohon kan Sekretaryo an aktibidad kan mga payunir asin impormaran an kamagurangan, nangorogna an Paraataman sa Paglilingkod, tanganing matabangan an mga payunir sa ano man na problema bago iyan magin seryosong marhay na tibaad kaipuhan na nindang umontok sa pagpapayunir.
4 Daing duwa-duwa na an taonan na pakikipagmiting na ini sa mga payunir makaparirigon sa boot asin makaaanimar sa sainda, na ‘nagwawaras nin espirituwal na mga balaog’ sa sainda tangani na sinda “maparigon” sa saindang paglilingkod bilang payunir.—Roma 1:11.