Leksion 8

Buhay Pampamilya na Nakapaoogma sa Dios

Ano an katongdan kan agom na lalaki sa laog kan pamilya? (1)

Paano maninigong tratohon nin agom na lalaki an saiyang agom na babae? (2)

Ano an mga paninimbagan nin ama? (3)

Ano an katongdan kan agom na babae sa laog kan pamilya? (4)

Ano an kahagadan nin Dios sa mga magurang asin sa mga aki? (5)

Ano an punto-de-vista kan Biblia sa pagbubulag asin sa diborsio? (6, 7)

1. Sinasabi kan Biblia na an agom na lalaki an payo kan saiyang pamilya. (1 Corinto 11:3) An agom na lalaki dapat na saro sana an agom na babae. Maninigo na sinda kasal sono sa ley.​—1 Timoteo 3:​2; Tito 3:1.

2. Maninigo na kamotan nin agom na lalaki an saiyang agom na babae siring sa pagkamoot nia sa saiyang sadiri. Maninigo na tratohon nia an babae arog kan pagtrato ni Jesus sa saiyang mga parasunod. (Efeso 5:​25, 28, 29) Maninigo na dai nia noarin man kologan an saiyang agom na babae o maltratohon ini sa ano man na paagi. Imbes, maninigo na pahelingan nia an babae nin onra asin paggalang.​—Colosas 3:​19; 1 Pedro 3:7.

3. An ama maninigong magmahigos sa pag-ataman sa saiyang pamilya. Kaipuhan na sia magtao nin kakanon, gubing, asin istaran para sa saiyang agom na babae asin mga aki. Kaipuhan na sustentohan man kan ama an espirituwal na mga pangangaipo kan saiyang pamilya. (1 Timoteo 5:8) Sia an nangengenot sa pagtabang sa saiyang pamilya na makanood manongod sa Dios asin sa Saiyang mga katuyohan.​—Deuteronomio 6:​4-9; Efeso 6:4.

4. An agom na babae maninigo na magin marahay na katabang kan saiyang agom na lalaki. (Genesis 2:18) Maninigo na tabangan nia an saiyang agom sa pagtotokdo asin pagpatood sa saindang mga aki. (Talinhaga 1:8) Hinahagad ni Jehova sa agom na babae na mamomoton na atamanon an saiyang pamilya. (Talinhaga 31:​10, 15, 26, 27; Tito 2:​4, 5) Maninigo na sia may hararom na paggalang sa saiyang agom na lalaki.​—Efeso 5:​22, 23, 33.

5. Hinahagad nin Dios sa mga aki na kumuyog sa saindang mga magurang. (Efeso 6:​1-3) Linalaoman nia an mga magurang na tokdoan asin itanos an saindang mga aki. An mga magurang kaipuhan na magtao nin panahon na makaibaiba an saindang mga aki asin adalan an Biblia kaiba ninda, na inaasikaso an saindang espirituwal asin emosyonal na mga pangangaipo. (Deuteronomio 11:​18, 19; Talinhaga 22:​6, 15) Maninigo na dai noarin man disiplinahon nin mga magurang an saindang mga aki sa daing herak o maisog na paagi.​—Colosas 3:21.

6. Kun an mag-agom dai nagkakaoyon, maninigo na pagmaigotan nindang iaplikar an hatol kan Biblia. Sinasadol kita kan Biblia na magpaheling nin pagkamoot asin magin mapagpatawad. (Colosas 3:​12-14) Dai isinasadol kan Tataramon nin Dios an pagbubulag bilang paagi na resolberan an saradit na problema. Alagad tibaad gustohon kan agom na babae na bayaan an saiyang agom na lalaki kun (1) an lalaki matagas an payong nagsasayuma na sustentohan an saiyang pamilya, (2) an lalaki madahas na marhay kaya namemeligro an salud asin buhay kan babae, o (3) huli sa grabeng pagtumang kan lalaki imposible na para sa babae na sumamba ki Jehova.​—1 Corinto 7:​12, 13.

7. An mga mag-agom dapat na fiel sa lambang saro. An pagsambay kasalan tumang sa Dios asin tumang sa agom. (Hebreo 13:4) An seksuwal na relasyon sa luwas kan pag-agoman iyo an solamenteng Makakasuratan na dahelan nin diborsio na nagtotogot sa pag-agom liwat. (Mateo 19:​6-9; Roma 7:​2, 3) Naoongis si Jehova kun an mga tawo nagdidiborsio na mayo nin Makakasuratan na mga dahelan asin nag-aagom nin iba.​—Malaquias 2:​14-16.

[Mga ritrato sa pahina 16, 17]

Linalaoman nin Dios an mga magurang na tokdoan an saindang mga aki asin itanos sinda

[Ritrato sa pahina 17]

An mamomoton na ama sinusustentohan an saiyang pamilya sa materyal asin espirituwal

Leksion 9

An mga Lingkod nin Dios Dapat na Magin Malinig

Taano ta dapat na kita magin malinig sa gabos na paagi? (1)

Ano an kahulogan kan pagigin malinig sa espirituwal? (2) malinig sa moral? (3) malinig sa isip? (4) malinig sa pisikal? (5)

Anong mga klase nin maating pananaram an maninigo niatong likayan? (6)

1. Si Jehova Dios malinig asin banal. Linalaoman nia an mga nagsasamba sa saiya na magdanay na malinig​—sa espirituwal, sa moral, sa isip, asin sa pisikal. (1 Pedro 1:16) Kaipuhan an tunay na paghihingoa na makapagdanay na malinig sa pagheling nin Dios. Kita nabubuhay sa maating kinaban. Nakikipaglaban man kita tumang sa sadiri niatong mga tendensia na gumibo nin sala. Alagad dai kita dapat na sumuko.

2. Espirituwal na Kalinigan: Kun gusto niatong maglingkod ki Jehova, dai kita makapagpapadagos na mangapot sa ano man na mga katokdoan o kostumbre nin falsong relihion. Dapat na kita lumuwas sa falsong relihion asin dai magsuportar dian sa ano man na paagi. (2 Corinto 6:​14-18; Kapahayagan 18:4) Oras na nanodan na niato an katotoohan manongod sa Dios, dapat na kita magmaan na dai ikalagalag nin mga tawo na nagtotokdo nin kaputikan.​—2 Juan 10, 11.

3. Moral na Kalinigan: Boot ni Jehova na an mga nagsasamba sa saiya gumawe bilang tunay na mga Kristiano sa gabos na panahon. (1 Pedro 2:12) Naheheling nia an gabos niatong ginigibo, minsan sa hilom. (Hebreo 4:13) Maninigo niatong likayan an seksuwal na inmoralidad asin iba pang maating mga gibo kan kinaban na ini.​—1 Corinto 6:​9-11.

4. Kalinigan sa Isip: Kun papanoon niato an satong isip nin malinig, dalisay na mga kaisipan, magigin malinig man an satong gawe. (Filipos 4:8) Alagad kun pinagpaparaisip-isip niato an maating mga bagay, iyan magbubunga nin maraot na mga gibo. (Mateo 15:​18-20) Maninigo na likayan niato an mga aling-alingan na puedeng makaramog sa satong isip. Mapapano niato nin malinig na mga kaisipan an satong isip paagi sa pag-adal sa Tataramon nin Dios.

5. Pisikal na Kalinigan: Huli ta irinerepresentar ninda an Dios, maninigo na papagdanayon nin mga Kristiano na malinig an saindang hawak asin gubing. Maninigo na hanawan niato an satong mga kamot pakagamit sa kasilyasan, asin maninigo na hanawan niato iyan bago magkakan o magkapot nin kakanon. Kun mayo kamo nin sistema sa tamang pag-apon nin ati sa imburnal, maninigong italbong an ati hale sa kasilyasan. (Deuteronomio 23:​12, 13) An pagdadanay na malinig sa pisikal nakakokontribwir sa marahay na salud. An harong nin Kristiano maninigong areglado asin malinig kapwa sa laog asin sa luwas. Iyan maninigong mapalaen sa komunidad bilang marahay na halimbawa.

6. Malinig na Pananaram: An mga lingkod nin Dios dapat na perming magtaram kan katotoohan. An mga putikon dai makalalaog sa Kahadean nin Dios. (Efeso 4:​25; Kapahayagan 21:8) An mga Kristiano dai naggagamit nin maraot na pananaram. Sinda dai naghihinanyog sa o nagsasaysay nin bastos na mga suba o marigsok na mga estorya. Huli sa saindang malinig na pananaram, sinda napapalaen sa trabaho o sa eskuelahan asin sa pagtaraed.​—Efeso 4:​29, 31; 5:3.

[Mga ritrato sa pahina 18, 19]

An mga lingkod nin Dios dapat na magin malinig sa gabos na bagay

Leksion 10

Mga Gibo na Ikinaoongis nin Dios

Ano an maninigong magin saboot nindo manongod sa mga bagay na sinasabi nin Dios na maraot? (1)

Anong mga klase nin seksuwal na gawe an sala? (2)

Ano an maninigong magin pagheling nin Kristiano sa pagputik? (3) paghuego? (3) paghabon? (3) kadahasan? (4) espiritismo? (5) pagburat? (6)

Paano makatatalingkas an saro sa maraot na mga gibo?(7)

1. An mga lingkod nin Dios namomoot sa marahay. Alagad dapat na makanood man sindang ikaongis an maraot. (Salmo 97:10) Iyan nangangahulogan nin paglikay sa mga gibo na ikinaoongis nin Dios. Ano an nagkapira sa mga gibong iyan?

2. Pakikisaro: An seksuwal na pagdodorog bago kasalon, pagsambay, pakikidorog sa hayop, incesto, asin homoseksuwalidad gabos magabat na kasalan tumang sa Dios. (Levitico 18:​6; Roma 1:​26, 27; 1 Corinto 6:​9, 10) Kun an duwa bakong kasal alagad nagsasaro, sinda maninigong magbulag o kaya pakasal nin legal.​—Hebreo 13:4.

3. Pagputik, Paghuego, Paghabon: Si Jehova Dios dai makakapagputik. (Tito 1:2) An mga tawo na gusto kan saiyang pag-oyon dapat na lumikay sa pagputik. (Talinhaga 6:​16-19; Colosas 3:​9, 10) An gabos na klase nin paghuego may kahanaban. Kaya an mga Kristiano dai nakikakabtang sa ano man na klase nin paghuego, arog baga nin mga loteriya, karera nin kabayo, asin bingo. (Efeso 5:​3-5) Asin an mga Kristiano dai naghahabon. Sinda dai may pakaaram na nagbabakal nin hinabonan o nagkukua nin mga bagay na daing paaram.​—Exodo 20:​15; Efeso 4:28.

4. Mga Pagputok nin Kaanggotan, Kadahasan: An daing kontrol na kaanggotan puedeng gumiya pasiring sa mga akto nin kadahasan. (Genesis 4:​5-8) An tawong madahas dai puedeng magin katood nin Dios. (Salmo 11:​5; Talinhaga 22:​24, 25) Sala na mambalos o balosan nin maraot an mga maraot na tibaad gibohon sa sato nin iba.​—Talinhaga 24:​29; Roma 12:​17-21.

5. Mga Orasyon nin Mahika Asin Espiritismo: An iba nag-aarang sa kapangyarihan nin mga espiritu sa paghihingoang paomayan an mga helang. An iba inoorasyonan an saindang mga kaiwal tanganing papaghelangon sinda o gadanon pa ngani sinda. An kapangyarihan sa likod kan gabos na gibong ini iyo si Satanas. Kaya an mga Kristiano dapat na dai makikabtang sa arin man digdi. (Deuteronomio 18:​9-13) An pagdadanay na dayupot ki Jehova iyo an pinakamarahay na proteksion sa mga pan-oorasyon na tibaad gibohon sa sato nin iba.​—Talinhaga 18:10.

6. Pagburat: Bakong sala na uminom nin kadikit na arak, serbesa, o iba pang inomon na de alkohol. (Salmo 104:​15; 1 Timoteo 5:23) Alagad an makosog na pag-inom asin pagburat sala sa mga mata nin Dios. (1 Corinto 5:​11-13; 1 Timoteo 3:8) An sobrang pag-inom puedeng makaraot sa saindong salud asin makalaglag sa saindong pamilya. Iyan puede man na magpangyari sa saindo na padara tolos sa iba pang sugot.​—Talinhaga 23:​20, 21, 29-35.

7. An mga tawo na naggigibo nin mga bagay na sinasabi nin Dios na maraot “dai magmamana kan kahadean nin Dios.” (Galacia 5:​19-21) Kun kamo talagang namomoot sa Dios asin gustong paogmahon sia, puede kamong makatalingkas sa mga gibong ini. (1 Juan 5:3) Pag-adalan na ikaongis an sinasabi nin Dios na maraot. (Roma 12:9) Makiasosyar sa mga tawo na may diosnon na mga ugale. (Talinhaga 13:20) An maygurang na Kristianong kairibaiba tibaad makatabang. (Santiago 5:14) Orog sa gabos, manarig sa tabang nin Dios paagi sa pamibi.​—Filipos 4:​6, 7, 13.

[Mga ritrato sa pahina 20, 21]

Ikinaoongis nin Dios an pagburat, paghabon, paghuego, asin mga akto nin kadahasan

Leksion 11

Mga Pagtubod Asin Kostumbre na Ikinaaanggot nin Dios

Anong klaseng mga pagtubod asin kostumbre an sala? (1)

Maninigo daw na tumubod an mga Kristiano na an Dios sarong Trinidad? (2)

Taano an tunay na mga Kristiano ta dai nagseselebrar nin Navidad, Pasko, o mga kumpleanyo? (3, 4)

An mga gadan daw may magigibong maraot sa mga nabubuhay? (5)

Nagadan daw si Jesus sa sarong krus? (6)

Gurano kahalaga na mapaogma an Dios? (7)

1. Bakong gabos na pagtubod asin kostumbre maraot. Alagad an mga iyan dai inooyonan nin Dios kun iyan hale sa falsong relihion o tumang sa mga katokdoan kan Biblia.​—Mateo 15:6.

2. Trinidad: Si Jehova daw sarong Trinidad​—tolong persona sa sarong Dios? Bako! Si Jehova, an Ama, an “iyo sanang tunay na Dios.” (Juan 17:​3; Marcos 12:29) Si Jesus Saiyang panganay na Aki, asin sia sakop nin Dios. (1 Corinto 11:3) An Ama orog na dakula kisa sa Aki. (Juan 14:28) An banal na espiritu bakong persona; iyan an puersa aktiba nin Dios.​—Genesis 1:​2; Gibo 2:18.

3. Navidad Asin Pasko: Si Jesus dai namundag nin Disyembre 25. Sia namundag nin mga Oktubre 1, panahon sa laog kan taon na an mga pastor pinapagdadanay sa luwas an saindang mga aripompon kun banggi. (Lucas 2:​8-12) Nungka na pinagbotan ni Jesus an mga Kristiano na selebraron an saiyang pagkamundag. Imbes, sinabihan nia an saiyang mga disipulo na girumdomon an saiyang kagadanan. (Lucas 22:​19, 20) An Navidad asin an mga kostumbre dian hale sa suanoy na falsong mga relihion. Totoo man iyan sa mga kostumbre kun Pasko, arog baga kan paggamit nin mga sogok asin kuneho. An enot na mga Kristiano dai nagselebrar nin Navidad o Pasko, ni nagseselebrar man an tunay na mga Kristiano ngonyan.

4. Mga Kumpleanyo: An duduwang selebrasyon nin kumpleanyo na sinasabi sa Biblia ginibo nin mga tawo na dai nagsasamba ki Jehova. (Genesis 40:​20-22; Marcos 6:​21, 22, 24-27) An enot na mga Kristiano dai nagselebrar nin mga kumpleanyo. An kostumbreng pagselebrar nin mga kumpleanyo hale sa suanoy na falsong mga relihion. An tunay na mga Kristiano nagreregalo asin nag-ooroogma sa ibang mga panahon sa laog kan taon.

5. Takot sa mga Gadan: An mga gadan daing magigibo o pagmate. Dai niato sinda matatabangan, asin dai sinda nin magigibong maraot sa sato. (Salmo 146:​4; Eclesiastes 9:​5, 10) An kalag nagagadan; iyan dai nagdadanay na buhay pagkagadan. (Ezequiel 18:4) Alagad kun beses an maraot na mga anghel, na inaapod na mga demonyo, nagsasagin espiritu kan mga gadan. An ano man na kostumbre na may labot sa takot o pagsamba sa mga gadan sala.​—Isaias 8:19.

6. Krus: Si Jesus dai nagadan sa sarong krus. Sia nagadan sa sarong palo, o harigi. An termino sa Griego na trinadusir na “krus” sa dakol na Biblia nangahulogan nin saro sanang pidaso nin kahoy. An simbolong krus hale sa suanoy na falsong mga relihion. An krus dai ginamit o sinamba kan enot na mga Kristiano. Kun siring, sa paghona daw nindo tama na gumamit nin krus sa pagsamba?​—Deuteronomio 7:​26; 1 Corinto 10:14.

7. Tibaad depisilon na bayaan an iba sa mga pagtubod asin kostumbreng ini. Tibaad pagmaigotan nin mga paryente asin katood na kombensiron kamo na dai magliwat sa saindong mga pagtubod. Alagad an pagpaogma sa Dios mas mahalaga kisa sa pagpaogma sa mga tawo.​—Talinhaga 29:​25; Mateo 10:​36, 37.

[Ritrato sa pahina 22]

An Dios bakong sarong Trinidad

[Ritrato sa pahina 23]

An Navidad asin Pasko hale sa suanoy na falsong mga relihion

[Ritrato sa pahina 23]

Mayo nin dahelan na sambahon an mga gadan o katakotan sinda

Leksion 12

Pagpaheling nin Paggalang sa Buhay Asin Dugo

Ano an maninigong magin pagmansay niato sa buhay? (1) sa aborsion? (1)

Paano ipinaheheling nin mga Kristiano na sinda mapagrisa sa pagigin daing peligro? (2)

Sala daw na gumadan nin mga hayop? (3)

Ano an nagkapirang gibo na dai nagpapaheling nin paggalang sa buhay? (4)

Ano an ley nin Dios manongod sa dugo? (5)

Kabale daw digdi an pag-ineksion nin dugo? (6)

1. Si Jehova an Burabod nin buhay. An gabos na bagay na nabubuhay utang an buhay ninda sa Dios. (Salmo 36:9) An buhay sagrado para sa Dios. Minsan an buhay nin aking dai pa namumundag sa laog kan ina kaiyan mahalagang marhay para ki Jehova. An tuyong paggadan sa nagdadakulang omboy na iyan sala sa mga mata nin Dios.​—Exodo 21:​22, 23; Salmo 127:3.

2. An tunay na mga Kristiano mapagrisa sa pagigin daing peligro. Sinisierto ninda na daing peligro an saindang sasakyan asin an saindang harong. (Deuteronomio 22:8) An mga lingkod nin Dios dai ibinubugtak sa mga peligrong dai kinakaipuhan an saindang buhay para sana sa kaalingan o tanganing ganahan an boot. Kaya dai sinda nakisasali sa madahas na karawat na tuyong nangongolog sa ibang tawo. Linilikayan ninda an aling-alingan na nagdadagka sa kadahasan.​—Salmo 11:​5; Juan 13:35.

3. An buhay nin hayop sagrado man para sa Kaglalang. An Kristiano puedeng gumadan nin mga hayop para sa pagkakan asin gubing o tanganing maprotehiran an saiyang sadiri sa helang asin peligro. (Genesis 3:​21; 9:​3; Exodo 21:28) Alagad sala na maltratohon an mga hayop o gadanon sinda bilang dibersion sana o kaalingan.​—Talinhaga 12:10.

4. An pagsigarilyo, pagmama, asin pagdodroga bakong para sa mga Kristiano. An mga gibong ini sala huli ta (1) inooripon kita kaiyan, (2) dinadanyaran kaiyan an satong hawak, asin (3) iyan maati. (Roma 6:​19; 12:​1; 2 Corinto 7:1) Puedeng magin depisilon na haleon an mga bisyong ini. Alagad dapat na gibohon niato iyan tanganing mapaogma si Jehova.

5. An dugo sagrado man sa mga mata nin Dios. Sinasabi nin Dios na an kalag, o buhay, nasa dugo. Kaya sala na kakanon an dugo. Sala man na kakanon an karne nin hayop na dai napadugo nin tama. Kun an hayop tinilok o nagadan sa sarong siod, iyan dai maninigong kakanon. Kun iyan binudyak o binadil, iyan dapat na padugoon tolos kun iyan kakakanon.​—Genesis 9:​3, 4; Levitico 17:​13, 14; Gibo 15:​28, 29.

6. Sala daw na magpaineksion nin dugo? Girumdoma, kahagadan ni Jehova na kita lumikay sa dugo. Ini nangangahulogan na dai niato ilaog sa satong hawak sa ano man na paagi an dugo nin ibang tawo o minsan an sadiri niatong dugo na inistak na. (Gibo 21:25) Kaya an tunay na mga Kristiano dai mapaineksion nin dugo. Aakoon ninda an ibang klase nin pagbolong, arog baga kan pag-ineksion nin mga produktong daing dugo. Gusto nindang mabuhay, alagad dai ninda pagmamaigotan na iligtas an saindang buhay paagi sa paglapas sa mga ley nin Dios.​—Mateo 16:25.

[Mga ritrato sa pahina 25]

Tanganing mapaogma an Dios, dapat na likayan niato an mga pagpaineksion nin dugo, maating mga bisyo, asin mga peligrong dai kinakaipuhan