Watchtower ONLINE NA LIBRARYA
Watchtower
ONLINE NA LIBRARYA
Bicol
  • BIBLIYA
  • PUBLIKASYON
  • PAGTIRIPON
  • “Poon sa Pagkaomboy Naaraman Mo Na”
    An Torrengbantayan—1998 | Abril 15
    • “Poon sa Pagkaomboy Naaraman Mo Na”

      OYON sa bagong mga pag-adal sa siensia, an pakikipag-olay sa mga omboy dakula an impluwensia sa pagtalubo kan saindang hotok, na pinakokosog an saindang abilidad sa pag-isip, pagrason, asin pagresolber sa mga problema. Ini partikularmenteng totoo durante kan enot na taon kan buhay nin sarong aki. An International Herald Tribune nagbabareta na an nagkapirang parasiyasat nagtutubod ngonyan na “an bilang nin mga tataramon na nadadangog nin omboy sa kada aldaw iyo an sasarong pinakaimportanteng patienot na magdedeterminar sa intelihensia, kapangganahan sa eskuelahan asin sosyal na pagkatatao sa huri.”

      Minsan siring, an itinataram na mga tataramon dapat na hale sa sarong tawo. An telebisyon o radyo garo dai puedeng ikasangli.

      An sarong neurosientista sa Unibersidad nin Washington sa Seattle, E.U.A. nagsabi: “Aram mi na ngonyan na an mga koneksion sa nerbios napoporma nin amay na marhay sa buhay asin na an hotok nin sarong omboy aktuwal na naghahalat nin mga eksperyensia tanganing madeterminaran kun paano mahahaman an mga koneksion. Kasuarin mi pa sana naaraman kun gurano kaamay na nagpopoon an prosesong ini. Halimbawa, nanonodan nin mga omboy an tanog kan sadiri nindang lenguahe sa edad na anom na bulan.”

      Inaangat nin mga pagsiyasat an lakop na marhay na opinyon na an mga aki maoswag sa intelektuwal kun tatawan sana sinda nin bastanteng pagkamoot. Itinatampok man kaiyan an importansia kan mga magurang sa pagtalubo nin aki.

      Ipinagigirumdom kaini an mga tataramon kan ipinasabong na surat ni apostol Pablo ki Timoteo: “Poon sa pagkaomboy naaraman mo na an banal na mga kasuratan, na nakakapagpadonong sa saimo para sa kaligtasan.” Posible na an banal na mga kasuratan, na itinataram sa omboy na si Timoteo kan saiyang nagtutubod na ina asin lola, nagkaigwa nin pangenot na kabtang sa saiyang pagtalubo bilang sarong marahayon na lingkod nin Dios.​—2 Timoteo 1:5; 3:15.

  • Gusto daw Nindong Songkoon Kamo?
    An Torrengbantayan—1998 | Abril 15
    • Gusto daw Nindong Songkoon Kamo?

      Maski sa maribok na kinaban na ini, puede kamong magkamit nin kaogmahan paagi sa tamang kaaraman sa Biblia manongod sa Dios, sa saiyang Kahadean, asin sa saiyang makangangalas na katuyohan para sa katawohan. Kun gusto nindo nin dugang na impormasyon o gusto nindong songkoon kamo nin saro na makikipag-adal sa saindo sa Biblia nin daing bayad, tabi sumurat sa Watch Tower, P.O. Box 2044, 1060 Manila, o sa angay na direksion na nakalista sa pahina 2.

Bicol Publications (1983-2025)
Mag-log Out
Mag-log In
  • Bicol
  • I-share
  • Settings na Gusto Mo
  • Copyright © 2025 Watch Tower Bible and Tract Society of Pennsylvania
  • Kasunduan sa Paggamit
  • Palisiya sa Privacy
  • Privacy Settings
  • JW.ORG
  • Mag-log In
I-share