Galagang Pinapastoran kan “Balaog na mga Lalaki” an Aripompon nin Dios
1 Kanigoan kamamomoton na probisyon an ginibo ni Jehova paagi sa saiyang Aki sa pagtao nin “balaog na mga lalaki”! (Efe. 4:8, 11, 12) Dakol an saindang mga paninimbagan, kaiba an aktibo asin galagang pagpapastor sa aripompon nin Dios. (1 Ped. 5:2, 3) Kita gabos nakikinabang sa kaipuhan na marhay na probisyon na ini. Baga man an nagkapira napapaatubang sa mga kadepisilan, bago pa sanang nakikiasosyar, may nagkapirang kaluyahan, o nalalagalag, an mga lalaking ini may makosog na personal na interes sa espirituwal na ikararahay kan gabos.—Fil. 2:4; 1 Tes. 5:12-14.
2 Kun an nakapupurisaw na mga pangyayari sa kinaban nagigin dahelan nin pagkahandal, an katabang na mga pastor na ini nagigin “siring sa pailihan sa doros asin tagoan sa bagyo.” Kun kita napapagal o nagagabatan asin nakakamate kan pangangaipo nin karangahan, pinagiginhawa ninda kita, “siring sa mga sapa nin tubig sa sarong desierto” o “siring sa limpoy nin tugdok na kantil sa tagiltil na daga.”—Isa. 32:2.
3 Pagparigon sa Boot kan Inaktibo: An kamagurangan naggigibo nin espesyal na paghihingoa na parigonon an boot kan mga nagin iregular o inaktibo, na tinatabangan sinda na bumalik sa regular na pakikikabtang sa gabos na aktibidad kan kongregasyon. An mamomoton na mga pagsongko sa pagpapastor nakatabang sa dakol na umatender nin regular sa mga pagtiripon kan kongregasyon asin maparigon sa espirituwal sagkod sa punto na sinda nakikikabtang na liwat sa ministeryo sa langtad. An gabos na paghihingoang iyan kan kamagurangan nagpapabanaag kan mamomoton na pangangataman ni Jehova asin kan aktibong pamomoon ni Jesu-Cristo. Itinao nia an arogan nin pagpaheling nin siring na pagmalasakit para sa arin man kan saiyang karnero na tibaad nalagalag o nawara.—Mat. 18:12-14; Juan 10:16, 27-29.
4 An mga katabang na pastor naghahanap nin mga senyal na nagpaparisa kun an nagkapira tibaad may problema sa espirituwal. An siisay man na nagpapaheling nin mga senyal nin pagkadesganar, na nagin iregular sa pag-atender sa mga pagtiripon, o buminaba an paglilingkod sa langtad posibleng marhay na nangangaipo nin espirituwal na tabang. An kamagurangan galagang tabangan an siisay man na nagpopoon na magpaheling nin inklinasyon sa kinabanon na paggubing asin pag-alinyar o nagkakaigwa nin mapagtatsar na aktitud sa kongregasyon. May tunay na interes asin mamomoton na kapadangatan, an may pagmakolog na mga paraataman gikan sa boot na ‘itinatao an saindang kalag’ sa paghihingoang tabangan an mga siring na pukawon liwat an saindang pagkamoot ki Jehova.—1 Tes. 2:8.
5 Kan nakaagi, an nagkapirang nagdusay na Kristiano naputol an pakikiasosyar sa kongregasyon, na naholog sa espirituwal na inaktibidad huli ta sinda nagabatan sa mga problema sa salud, pagkalugi sa pinansial, o kagipitan sa pamilya. Dai nagigin tatsador, an kamagurangan maboot na nagtatao nin pagpasarig sa boot na si Jehova nagmamakolog sa gabos niang karnero asin sususteniran nia sinda sa masakit na mga panahon. (Sal. 55:22; 1 Ped. 5:7) An listong mga pastor kan aripompon puedeng makatabang sa sainda na masabotan na kun sinda ‘rumani sa Dios, sia marani sa sainda,’ na nagtatao nin karangahan asin kaginhawahan.—Sant. 4:8; Sal. 23:3, 4.
6 Pagpapahalaga sa mga Herelangon: An mamomoton na mga katabang na pastor nagmamalasakit man duman sa mga puedeng malipasan. Nakaasosyar sa lambang kongregasyon an nagkapirang herelangon, na nasa mga klinika sa pag-ataman sa mga gurang asin may helang, o kun dai man nawaran nin kosog. An saindang pakikikabtang sa pagbalangibog kan mensahe nin Kahadean natural sanang limitado huli sa saindang kamugtakan. Tibaad nagkakaigwa sana sinda nin oportunidad na makapagpatotoo solamente paagi sa pakikipag-olay sa mga bisita, ibang pasyente, o nag-aataman. Minsan siring, an ano man na kaya nindang gibohon ibinibilang na mahalagang marhay na suporta sa pankagabsan na paghuhulit. (Mat. 25:15) Dawa kun sinda magpatotoo sana nin 15 minutos, ini maninigong ireport, asin sinda padagos na ibibilang na regular na parahayag kan Kahadean.
7 An “balaog na mga lalaki” nangorognang nakakaaram kan espirituwal na mga pangangaipo kan saindang mga tugang sa panahon na ini kan taon—panahon nin Memorial. Angay nanggad ining panahon para sa kamagurangan na gumibo nin espesyal na paghihingoa tanganing tabangan an gabos na nalagalag na maeksperyensiahan giraray an kagayagayahan asin katoninongan nin isip na resulta kan mainit na pakikiasosyar sa kongregasyon! Naggagayagaya kita kun naheheling niato an mga siring na “may relasyon sa sato sa pagtubod” na presente sa mga pagtiripon kan kongregasyon asin sa ministeryo, na pinatutunayan liwat an saindang pagtubod sa atang na pantubos.—Gal. 6:10; Luc. 15:4-7; Juan 10:11, 14.