An Pagtubod Niato Nagpapahiro sa Sato sa Marahay na mga Gibo
1 Pagtubod an nagpahiro ki Noe, Moises, asin Rahab. Itinogdok ni Noe an dahong. Binayaan ni Moises an temporaryong mga bentaha sa buhay sa palasyo ni Faraon. Itinago ni Rahab an mga espiya dangan kinuyog an saindang mga instruksion, na nagligtas sa saiyang kasararo sa harong. (Heb. 11:7, 24-26, 31) Pinahihiro kita kan satong pagtubod na magpaluwas ngonyan nin anong marahay na mga gibo?
2 Paghuhulit: An pagtubod nagpapahiro sa sato na magtaram manongod sa satong marahayon na Dios asin sa saiyang mga probisyon para sa daing sagkod na kaogmahan. (2 Cor. 4:13) Kun beses, tibaad mag-alangan kita na magpatotoo. Alagad kun ‘danay niatong ibinubugtak si Jehova sa atubangan niato,’ napakokosog kita asin nahahale an takot. (Sal. 16:8) Dangan an satong pagtubod nagpapahiro sa sato na ihiras an maogmang bareta sa mga paryente, kataed, katrabaho, kaeskuela, asin iba pa sa gabos na angay na okasyon.—Roma 1:14-16.
3 Pagtiripon: An regular na pag-atender sa pagtiripon saro pang marahay na gibo na bunga nin pagtubod. Taano man? Ipinaheheling kaiyan an satong kombiksion na si Jesus kaiba niato paagi sa banal na espiritu nin Dios kun kita nagtitiripon sa Kristianong mga pagtiripon. (Mat. 18:20) Ipinaheheling kaiyan an satong pagmawot na “magdangog sa isinasabi kan espiritu sa mga kongregasyon.” (Kap. 3:6) Hinihimate niato an instruksion na inaako niato huli ta namamansayan kan satong mga mata nin pagtubod na an nagtotokdo sa sato iyo an satong Kaharohalangkaweng Paratokdo, si Jehova.—Isa. 30:20.
4 An mga Pagpili na Ginigibo Niato: An makosog na kombiksion sa mga katunayan na dai naheheling nagpapahiro sa sato na tawan nin prioridad sa satong buhay an espirituwal na mga bagay. (Heb. 11:1) Parateng kalabot digdi an pagsakripisyo nin materyal na mga bagay. Halimbawa, an sarong magurang sa kongregasyon sinayumahan an sarong halangkaw an sueldong oportunidad sa sekular na trabaho huli ta iyan mangangahulogan nin pagpalta sa mga pagtiripon, pagigin harayo sa saiyang pamilya, asin pagpondo sa saiyang ministeryo bilang payunir. Kaagid kaiyan ibugtak logod niato an satong lubos na kompiansa sa garantiya kan Biblia na sususteniran ni Jehova an mga ‘padagos na naghahanap nguna kan kahadean asin kan saiyang katanosan.’—Mat. 6:33.
5 An mapuersang impluwensia nin pagtubod sa satong buhay naririparo nin iba. Tunay nanggad na an satong pagtubod aram sa bilog na daga. (Roma 1:8) Kun siring, ipaheling logod niato gabos paagi sa satong marahay na mga gibo na buhay an satong pagtubod.—Sant. 2:26.