Hapot
◼ Tama daw na magkaigwa nin inaapod na mga “sponsor” o “honorary guest” sa Kristianong mga kasal?
An ideya nin pagkaigwa nin mga “sponsor” gikan sa relihiosong kaugalean na pagkaigwa nin mga “godparent” (“ninong” o “ninang”), na nagseserbing mga “sponsor” sa bunyag nin bagong mamundag na aki. Sa Pilipinas, an ideyang ini haloy na man na iinaplikar sa mga kasal, asin segun sa kinabanon na kaugalean, an mga “sponsor” iyo man an legal na mga testigo. Minsan siring, an banwaan ni Jehova dai ginigiyahan nin kinabanon na kaugalean asin kun siring igwa kita nin duwa sanang legal na testigo sa satong mga kasal. Lininaw ini sa “Hapot” sa An Satong Ministeryo sa Kahadean na Disyembre 1992.
Sa dakol na Kristianong kasal, an kaugalean na pagkaigwa nin inaapod na mga “sponsor” o “honorary guest” sinusunod pa sagkod ngonyan. Mapadapit digdi an “Hapot” kan 1992 na nasa enotan: “Kita daw tibaad nagsusunod sa kinabanon na kaugalean? Yaon daw an peligro na kita nagpapaabaw-abaw sa iba?” Kun tatrataron niato an nagkapira na “special” o “honorary” guest, o aapodon an nagkapira na “primary” o “secondary” sponsor, dai daw kita nag-eenkaminar nin “pagpalaenlaen” sa tahaw niato?—1 Juan 2:15, 16; Sant. 2:1-4.
Sa nagkapirang kamugtakan an inaapod na mga “sponsor” linalaoman na magtao nin materyal na tabang sa ikakasal. Minsan ngani an siring na pagtao personal na bagay, dai nanggad kaipuhan na ipublikar iyan. Girumdomon an mga tataramon ni Jesus sa Mateo 6:3, 4: “Kun nagtatao nin mga balaog nin pagkaherak, dai na makaisi an saimong wala kan ginigibo kan saimong too, tanganing an saimong paglimos mahilom; dangan an saimong Ama na nakakaheling sa hilom mabalos saimo.”
Mapadapit sa kun gurano kadakol kan mga partisipante sa kasal, An Torrengbantayan na Abril 15, 1997, pahina 26, nagsasabi: “An mga partisipante sa kasal (an mga katood kan nobyo asin an mga babaeng kairiba kan nobya) dai kaipuhan na dakol. Dai man ninda bobooton na makaakit nin dai kinakaipuhan na atension sa saindang sadiri paagi sa saindang gubing asin hiro-hiro.” Mapadapit sa pagpili kun sairisay an iiiba sa mga partisipante sa kasal, An Torrengbantayan na Enero 1, 1985, pahina 13, parapo 18, nagsasabi: “Imbes na pilion an mga prominente o tibaad makakatao nin mamahalon na regalo, mas gusto nin dakol na Kristianong ikakasal (asin nin mga nagpapahayag) na iiba sa mga partisipante sa kasal an mga kadayupot ninda sa paglilingkod ki Jehova.”
An Torrengbantayan na Abril 15, 1997, sa pahina 24, nagdodoon: “An Kristianong kasal sarong marahay na oportunidad na ipaheling na kita ‘bakong kabtang kan kinaban.’” Liwanagon logod niato gabos, sa imprentadong imbitasyon sagkod sa mismong kasal, na kita laen sa kinaban huli sa lubos na pagsusog sa mga prinsipyo na itinao sa Tataramon nin Dios.