An Teokratikong Paadalan sa Pagmiministro Para sa 2004

¹ Sinasangkapan ni Jehova an ordinaryong mga tawo tangani na mahaman an gibohon na may pambilog na kinaban na importansia. An sarong paagi na ginigibo nia ini iyo an pagsasanay na itinatao kada semana sa Teokratikong Paadalan sa Pagmiministro. Nakikikabtang daw kamo nin lubos sagkod sa itinotogot kan saindong mga sirkonstansia? Sa Enero magkakaigwa nin nagkapirang pagliliwat sa katuyohan na tabangan an mga estudyante na makinabang na marhay sa mga areglo.

² Pagturnoturno nin Katabang na Parakonseho: Inapresyar kan mga tugang na nagtatao nin mga pahayag na nagtotokdo asin tampok na mga kabtang sa Biblia an mga obserbasyon na itinao kan katabang na parakonseho. Kun igwa nin igong kualipikadong kamagurangan, puedeng gibohon na turnohan taon-taon an asignasyon kan katabang na parakonseho. Paagi kaini, mapagtuturnoturno an pasan na trabaho; alagad mas mahalaga, makikinabang an kamagurangan asin kualipikadong ministeryal na mga lingkod sa pinag-iribang eksperyensia kan manlaenlaen na may kakayahan na mga ispiker asin paratokdo.

³ Pag-iskedyul kan Berbal na Repaso: Kun an kongregasyon nindo may pansirkitong asamblea sa semana kan berbal na repaso, kun siring an repaso (asin an iba pang kabtang kan semanal na iskedyul) maninigong iiskedyul sa semana pagkatapos kan asamblea asin an kasunod na iskedyul an maninigong gamiton sa semana kan asamblea. Minsan siring, dai kaipuhan na pagribayon an duwang bilog na semanal na iskedyul kun an berbal na repaso natangod sa pagsongko kan paraataman sa sirkito. Imbes, maninigong iatubang an nakaiskedyul na awit, an pahayag sa kualidad sa pagtaram, asin an tampok na mga kabtang sa Biblia. An pahayag na nagtotokdo (na itinatao pagkatapos kan pahayag sa kualidad sa pagtaram) maninigong kuanon sa iskedyul kan kasunod na semana. An tampok na mga kabtang sa Biblia susundan nin kabangang oras na Pagtiripon sa Paglilingkod, na puedeng liwaton tanganing magkaigwa nin magsalang tolong tig-10 minutos o duwang tig-15 minutos na kabtang. (Maninigong haleon an pambukas na mga paisi.) An Pagtiripon sa Paglilingkod susundan nin sarong awit asin kabangang oras na programa kan paraataman sa sirkito. An Teokratikong Paadalan sa Pagmiministro para sa masunod na semana gigibohon paagi sa nakaiskedyul na pahayag sa kualidad sa pagtaram asin tampok na mga kabtang sa Biblia, na susundan kan berbal na repaso.

⁴ Aprobetsaran an lambang oportunidad para sa espirituwal na pagtalubo. Mantang kamo nakikinabang sa edukasyon sa saindong Teokratikong Paadalan sa Pagmiministro, pinaririgon nindo an kongregasyon nindo, ginigibo nindo an kabtang nindo sa kaotoban kan hula sa Biblia, asin nagtatao kamo nin kaomawan sa Autor kan marahayon na mensahe na dapat niatong ibalangibog.​​—Isa. 32:​3, 4; Kap. 9:19.

Bagong Programa sa Espesyal na Aldaw nin Asamblea

Dakol an makukuang impormasyon ngonyan na mga aldaw manongod sa pagpapadanay kan satong literal na puso sa marahay na kamugtakan tanganing magkaigwa nin mas nakagagayagaya asin mas halawig na buhay. An orog pa nganing importante iyo an kamugtakan kan satong piguratibong puso. Kun siring, angay nanggad an tema kan programa sa espesyal na aldaw nin asamblea na mapoon sa Pebrero 2004: “Paglilingkod ki Jehova na May Kompletong Puso.” (1 Cron. 28:9) Ano an maaantisipar niato na manodan?

Totokaron kan paraataman sa sirkito an “Pagtabang sa Iba na Maglingkod ki Jehova na May Nakaoogmang Marhay na Kalag.” Itatampok kan mga interbio an kagayagayahan na bunga kan pagkultibar sa mga interesado asin pamamayo nin mga pag-adal sa Biblia. Daing duda na an gabos na maatender mararanga asin mapaparigon an boot sa enot na pahayag kan nagdadalaw na ispiker na, “Pagprotehir sa Satong Puso sa Sarong Maribok na Kinaban.” An sesyon sa aga matatapos paagi sa pahayag sa bautismo.

Sa hapon, totokaron kan kabtang na “Pagtao nin Tabang” kun paano kita makakatabang sa iba. Ano an puedeng gibohon nin mga magurang tangani na protehiran sa salang mga impluwensia an puso kan mga aki ninda asin tabangan sinda na rumani ki Jehova? Itatao kan kabtang na “Tabangan an mga Aki Nindo na Magkaigwa nin Dakulang Kaogmahan ki Jehova” an praktikal na mga suhestion asin ipaheheling kaiyan kun paano ini magigibo.

Inaaprobetsaran daw niato an gabos na probisyon ni Jehova tangani na pagdanayon an satong piguratibong puso na makosog sa espirituwal? Idodoon kan huring pahayag kan nagdadalaw na ispiker na, “Papagdanayon an Kompletong Puso sa Paglilingkod ki Jehova,” an apat na mahalagang marhay na aspekto sa satong programa nin pagpapadanay sa espirituwalidad. Gurano kadakol na oras asin paghihingoa an idinudusay niato sa odok na pamimibi, sa pag-adal sa Tataramon nin Dios, sa maigot na paghuhulit, asin sa pakikiasosyar sa ibang mga Kristiano? Puede daw kitang umoswag sa arin man kan mga aspektong ini?

Ipinaaabot ni Jehova an imbitasyon na: “Irani mo nanggad an puso mo sa disiplina asin an talinga mo sa mga kasabihan nin kaaraman.” (Tal. 23:12) Planohon na ngonyan na umatender sa kapakipakinabang na aldaw na ini nin pagtotokdo sono sa Kasuratan. An paggibo kaiyan pakokosogon kamo na padagos na maglingkod ki Jehova na may kompletong puso.