Mga Paisi

◼ Alok sa Mayo: Indibiduwal na mga kopya kan An Torrengbantayan asin Awake! Kun nagdadalaw liwat sa mga interesado, iayon an mga nag-atender sa Memorial o iba pang teokratikong okasyon alagad bakong aktibong asosyado sa kongregasyon. Magkonsentrar sa pagpasakamot kan librong Nagkakasararo sa Pagsamba o Worship God (Tagalog) asin hingoahon na makapoon nin pag-adal sa Biblia, nangorogna sa mga indibiduwal na nakapag-adal na kan librong Kaaraman asin kan brosyur na Kahagadan. Hunyo: An bagong librong Makanood sa Dakulang Paratokdo. Kun may mga indibiduwal na magsabi na mayo sinda nin aki, ialok an brosyur na Kahagadan. Hulyo asin Agosto: Puedeng ialok an arin man sa mga brosyur.

◼ An nangengenot na paraataman o saro na inasignaran nia maninigong siyasaton an kuenta kan kongregasyon sa Hunyo 1 o sa pinakamadaling panahon pakalihis kaiyan. Kun nagibo na ini, ianunsiar sa kongregasyon pakatapos na basahon an masunod na report sa kuenta.

◼ Sa masunod na pirang bulan ipapadara niamo saindo an mga porma na kakaipuhanon nindo sa kongregasyon durante kan madatong na taon nin paglilingkod. Kun igwa nin iba pang porma na kakaipuhanon nindo, puedeng pedidohon ini sa dating paagi, na ginagamit an pormang Literature Request (S-14). Ipapadara an mga pormang ini na daing hinahagad na depinidong kantidad, alagad mayong duwa-duwa na gugustohon kan mga kongregasyon na magtao nin rasonableng kontribusyon sa pambilog na kinaban na gibohon tangani na makatabang sa mga gastos sa pag-imprenta asin pagpadara. Mangnohon tabi na an mga lapel card para sa 2004 Pandistritong mga Kombension iiiba sa mga porma na ipapadara, kaya dai na kaipuhan na pedidohon ini apuera sana kun maheling nindo na bakong supisyente an kabilangan na ipinadara saindo. Minsan siring, kaipuhan nindong pedidohon an mga celluloid badge holder sa dating pormang Literature Request.

◼ May bastante kitang suplay sa sangang opisina kan Kingdom Melodies No. 9 na nasa audiocassette. An mga parahayag na interesadong magkaigwa kaini puedeng humagad sa naglilingkod sa literatura na isusumitir sa sangang opisina kaiba kan saindang masunod na Literature Request.

Pag-alok kan Makanood sa Dakulang Paratokdo

◼ “Sa paghona daw nindo an kinaban magigin mas marahay na lugar kun an mga tawo mamumuhay oyon sa kasabihan na ini? [Basahon an Mateo 7:​12a. Dangan pasimbagon.] An librong ini igwa nin dakol na leksion hale sa pinakadakulang paratokdo na nabuhay kasuarin pa man.” Itampok an mga retrato asin kapsion sa kapitulo 17.

◼ “An kadaklan na magurang ngonyan nagmamaigot na itadom an kapakipakinabang na mga pamantayan sa saindang mga aki. Sa paghona daw nindo mahalaga ini? [Pasimbagon. Dangan basahon an Talinhaga 22:6.] Mangnoha na pinaririgon an mga magurang na patuodon an saindang mga aki poon sa amay na edad. Dinisenyo an librong ini tangani na tabangan sinda na gibohon iyan.” Itampok an mga retrato asin kapsion sa kapitulo 15, 18, o 32.

◼ “Sa parate nagngangalas an mga magurang sa mga hapot kan saindang mga aki. An nagkapira sa mga hapot na iyan puedeng masakit na simbagon, bako daw? [Pasimbagon. Dangan basahon an 2 Timoteo 3:​14, 15.] Poon sa pagkaomboy tinokdoan si Timoteo kan saiyang ina asin lola kun ano an sinasabi kan Kasuratan. An librong ini makakatabang sa mga magurang na gibohon man iyan para sa saindang mga aki ngonyan.” Itampok an pira sa mga retrato asin kapsion sa kapitulo 11 asin 12 o 34 sagkod 36.

Hapot

■ Kaipuhan daw niatong sambiton an areglong donasyon sa sarong kagharong kada pagdalaw niato sa saiya?

Dai. Kaipuhan na gumamit nin marahay na paghusgar mapadapit digdi. Boot niatong magin malinaw sa isip nin mga tawo na an satong ginigibo talagang pagtotokdo sa Biblia asin bakong komersial na gibohon. Dai kita naghahagad nin donasyon.

Sa pankagabsan marahay na ipaliwanag nin malinaw kun paano sinusuportaran an satong gibohon paagi sa boluntad na mga donasyon kun nagwawalat kita sa kaenot-enote nin mga babasahon sa mga interesado. Mantang nagwawalat sana kita nin babasahon sa mga nagpapaheling nin interes o sa nagpapahayag nin pagmawot na basahon an satong literatura, sa parate an siring na mga indibiduwal naoogmang magdonar.

An dakol sa siring na mga interesado sadiring boot na nagtatao nin boluntad na donasyon sa sunod na mga pagdalaw. Puedeng maghapot an iba kun gurano an babasahon. Puede niatong sabihon sa halipot na bakong komersial an satong gibohon, na ipinapaliwanag na iinaalok niato an satong mga babasahon na daing hinahagad na depinidong kantidad, alagad an siisay man na nagmamawot na sumuportar sa pambilog na kinaban na gibohon puedeng magtao nin kadikit na boluntad na donasyon. Sa panapanahon, kun angay, puede niatong sambiton an manongod sa pagsuportar sa pambilog na kinaban na gibohon kun an tawong dinadalaw niato dai naggigibo kaiyan.

Maninigo niatong girumdomon na dawa ngani iinaalok niato an satong mga babasahon na daing hinahagad na depinidong kantidad, dakulang kuarta an kalabot sa pagpublikar asin pagdistribwir kan satong mga babasahon. Baga man an mga kagharong nagdodonar para digdi o dai, an gabos na parahayag asin payunir maninigong makamate nin paninimbagan na suportaran an pambilog na kinaban na gibohon sagkod sa makakaya ninda. An nagkapira tibaad gustong gibohon ini sa oras na kumua nin mga babasahon o tibaad magtao sinda nin espesipikong donasyon kada semana o kada bulan. Noarin man iyan ginigibo, an siring na donasyon maninigong gibohon nin areglado asin regular sono sa nakukua kan nagtatao.​​—1 Cor. 16:2.

May kompiansa kita na pahihiroon kan espiritu nin Dios an saiyang mga lingkod asin interesado sa langtad na boluntad na magdonar tanganing mabayadan an gastos kan gabos na aspekto kan pambilog na kinaban na gibohon.