Magin ‘Sibot na Gayo’ sa Saindong Ministeryo
1 Kan mabasa niato na si apostol Pablo nagtrabaho sa paggibo nin tolda mientras na nasa Corinto, tibaad magkonklusyon kita na ini nakalimitar sa saiyang oportunidad na maghulit. Minsan siring, an Gibo 18:5 nagsasaysay: “Si Pablo nagpoon na masibot na gayo sa tataramon, na nagpapatotoo sa mga Judio tanganing patunayan na si Jesus iyo an Cristo.” Taano si Pablo ta nagin sibot na marhay sa aktibidad na paghuhulit? Dawa ngani an dakol sa Corinto nagin nang mga nagtutubod, kinompirmar kan Kagurangnan na dakol pang disipulo an magigibo sa siudad na iyan. (Gibo 18:8-11) Igwa daw kita nin kaparehong dahelan na magin sibot na gayo sa satong ministeryo? Igwa. Dakol pang tawo an manonompongan asin matotokdoan kan katotoohan.
2 Gumamit nin Orog Pang Panahon sa Paglilingkod Ngonyan na Abril: Posibleng marhay na pasohan nindo na magpadagos na sibot sa paghuhulit kan maogmang bareta bulan-bulan. Alagad may nagkapirang bulan na nangorognang nagtatao sa sato nin mas dakol na oportunidad na magin ‘sibot na gayo’ sa aktibidad na ini. Kaiba digdi an bulan nin Abril, nangorogna huli ta an satong espesyal na kampanya sa brosyur na Magdanay Kamong Mapagbantay! magpapadagos sagkod Abril 17. Tinotogotan daw kamo kan mga kamugtakan nindo na mag-auxiliary payunir o dugangan an saindong aktibidad sa ministeryo sa bulan na ini? An dakol na naggigibo kaiyan binendisyonan nin igo. (2 Cor. 9:6) Kun ginigibo nindo an bilog nindong makakaya, girumdomon na si Jehova naoogma sa saindong bilog na kalag na paglilingkod. (Luc. 21:2-4) Ano man an saindong kamugtakan, gibohon na pasohan nindo na magin ‘sibot na gayo’ sa saindong ministeryo ngonyan na Abril asin sa Mayo. Asin dai paglingawan na itao an saindong report nin paglilingkod sa langtad sa katapusan kan bulan.
3 Dalawon an mga Bagohan na Nag-atender sa Memorial: Sa Pilipinas kan nakaaging taon, an kabilangan nin mga nag-atender sa Memorial 438,418. An total na kabilangan nin mga nag-atender sa taon na ini dai pa aram. Pero, ipinapaheling nin mga report na igwa pa nin marahayon na potensial para sa dakol pang “anihon.” (Mat. 9:37, 38) Kun siring, sa pinakamadaling panahon na mapupuede, iareglo nindo na dalawon an mga interesado na nag-atender sa Memorial kan Marso 24 tangani na tabangan sinda sa espirituwal na paagi. An pagdigson kan siring na mga pagdalaw puedeng magtaong lugar sa ‘maraot na agawon an tataramon kan kahadean na nakasabwag sa saindang puso.’ (Mat. 13:19) An listong pagdalaw magpapaheling na kamo tunay na ‘sibot na gayo’ sa saindong ministeryo.
4 Padagos na Tabangan an mga Inaktibo: Maninigo na iareglo kan kamagurangan na dalawon an siisay man na inaktibo bago matapos an Abril tangani na pagmaigotan na enkaminaron sinda na makikabtang sa ministeryo kun itinotogot kan kamugtakan ninda. Hihingoahon kan kamagurangan na aramon an pundamental na dahelan kan problema kan indibiduwal asin kun paano pinakamarahay na matatabangan sia na maglingkod giraray nin aktibo ki Jehova. An mamomoton na tabang na ini nagpapaheling na sineseryoso kan kamagurangan an saindang paninimbagan bilang mga pastor kan “aripompon nin Dios.” (1 Ped. 5:2; Gibo 20:28) Linalaoman niato na an nagkapira kaini puede pang mareaktibar sa ministeryo sa langtad ngonyan na espesyal na bulan nin Abril.
5 Tabangan an Dakol Pa na Magin Dai Pa Bautisadong mga Parahayag: Nakualipikar na daw an saindong mga aki bilang bagohan na mga parahayag kan maogmang bareta? Kumusta man an iba na inaadalan nindo sa Biblia? Kun sinda aprobado kan kamagurangan, dai daw magigin angay na panahon an Abril na sinda magpoon na magin parahayag? Kun an saro nag-ooswag asin napag-adalan na an brosyur na Kahagadan asin an librong Kaaraman, puedeng ipadagos an pag-adal sa Biblia sa librong Nagkakasararo sa Pagsamba. An pasohan nindo iyo na tabangan an inaadalan na magkaigwa nin orog na pakarorop sa katotoohan, makualipikar bilang dai pa bautisadong parahayag, asin magin sarong nagdusay patin bautisadong Saksi ni Jehova.—Efe. 3:17-19; 1 Tim. 1:12; 1 Ped. 3:21.
6 An daing liwat-liwat asin tunay na interes nindo sa mga inaadalan nindo sa Biblia puedeng makatabang sa sainda pag-abot nin panahon na isapuso an katotoohan. An sarong Saksi nakanompong nin sarong may edad nang mag-agom na bilog na pusong uminoyon na mag-adal sa Biblia. Alagad idinigson kan mag-agom an pag-adal sa sunod-sunod na tolong semana. Sa katapustapusi naponan an pag-adal. Dangan, kinakanselar kan mag-agom an pag-adal nin haros kada ikaduwang semana. Pero, sa katapustapusi nag-oswag an agom na babae sagkod sa bautismo. “Pakabautismo sa saiya,” an paggirumdom kan tugang na lalaki, “napano an saiyang mga mata nin luha nin kaogmahan, na nagpaluha man sa samong mag-agom huli sa kaogmahan.” Iyo, an pagigin ‘sibot na gayo’ sa maogmang bareta nagtatao nin dakulang kagayagayahan!
7 An mga hula sa Biblia asin mga pangyayari sa kinaban nagpaparisa na kita nasa poro na kan panahon kan katapusan. Ngonyan na an panahon na magdanay na mapagbantay, na magin ‘sibot na gayo’ sa pagpaaram sa iba kan maogmang bareta. Igwa kita nin marahayon na instrumento na makakatabang sa sato na magibo ini paagi sa espesyal na brosyur na Magdanay Kamong Mapagbantay! Madonong na gamiton iyan sa saindong ministeryo. Si apostol Pablo nagtatao nin garantiya na an siring na pagpapagal talagang “bakong sayang sana dian sa Kagurangnan.”—1 Cor. 15:58.