Pagpapatotoo sa mga Paryente—Paano?

1. Taano ta kaipuhan an pagigin mapagrisa kun nagpapatotoo sa mga paryente?

¹ Mayo nang maorog pa sa satong kagayagayahan na makalaog sa bagong kinaban kaiba kan satong mga mahal sa buhay, na kasaro ninda sa pagsamba ki Jehova! Paagi sa satong pagpapatotoo sa mga paryente, puedeng magkatotoo an magayagayang paglaom na ini. Minsan siring, nagkakaipo nin pagigin mapagrisa tanganing magibo iyan sa nakakarepreskong paagi. Nagkomento an sarong paraataman sa sirkito: “An pinakamarahay na mga resulta nakakamtan kan mga pinupukaw an interes kan saindang mga paryente paagi sa pagpapatotoo sa panapanahon.” Paano daw niato ini magigibo?

2. Paano an sinserong interes sa satong mga paryente makakatabang sa sato na mapukaw an saindang interes?

² Pukawon an Interes Ninda: Maingat na planohon antes pa kun paano nindo mapupukaw an interes kan saindong mga paryente. (Tal. 15:28) Ano an saindang mga pinaghahaditan? Anong mga problema an inaatubang ninda? Tibaad puede nindong ipaheling sa sainda an sarong artikulo o sambiton an sarong magayon na teksto manongod sa sarong tema na espesyalmenteng interesante para sa sainda. Kun harayo an istaran kan saindong mga paryente, tibaad magigibo nindo ini paagi sa pagsurat o paagi sa telepono. Sa paaging dai man nasosobrahan sinda, magsabwag kamo nin mga banhi nin katotoohan, asin umasa ki Jehova na pataluboon an mga banhing iyan.​​—1 Cor. 3:6.

3. Paano an interes sa sato kan satong mga paryente puedeng magbukas nin dalan tanganing makapagpatotoo?

³ Pinagbotan ni Jesus an sarong lalaki na napahalean nia nin dakol na demonyo: “Pumuli ka sa saimong mga paryente, asin ibareta mo sa sainda an gabos na bagay na ginibo sa saimo ni Jehova asin an pagkaherak nia sa saimo.” (Mar. 5:19) Imahinara an siertong nagin epekto kaini sa saiyang mga paryente! Minsan ngani tibaad dai kamo makaeksperyensia nin ano man na bagay na medyo pambihira nanggad, posibleng marhay na interesado an saindong mga paryente sa saindong mga aktibidad o sa mga aktibidad kan saindong mga aki. An pagsambit nin sarong pahayag nindo sa Teokratikong Paadalan sa Pagmiministro, sarong kombension na inatenderan nindo, pagpasyar sa Bethel, o sarong makahulogan na nangyari nin personal sa saindo tibaad magbukas nin dalan tanganing may ikasabi pa kamo sa sainda manongod ki Jehova asin sa saiyang organisasyon.

4. Anong natatagong mga peligro an maninigo niatong likayan kun nagpapatotoo sa mga paryente?

⁴ Magin Mapagrisa: Kun nagpapatotoo sa mga paryente, likayan an pagsabi sa sainda nin kadakol na bagay sa sarong panahon. Nagigirumdoman an panahon kan sia magpoon na mag-adal sa Biblia, inadmitir nin sarong tugang na lalaki: “Pinaoranan ko kaidto an sakong ina nin mga paliwanag manongod sa haros gabos na bagay na nanodan ko hale sa Biblia, asin ini sa parate nagresulta sa mga pakikiargumento, nangorogna sa sakong ama.” Dawa kun an sarong paryente nagpapahayag nin interes sa mensahe kan Biblia, sumimbag kamo sa paagi na gugustohon niang makaaram nin orog pa. (Tal. 25:7) Pirmeng magpaheling nin paggalang, kabootan, asin pasensia, kun paanong ipinapaheling man nindo iyan kun nakikipag-olay sa mga dai kamidbid sa ministeryo.​​—Col. 4:6.

5. Ano an maninigo niatong gibohon kun an satong mga paryente habong maghimate kun kita nagpapatotoo sa sainda?

⁵ May panahon kaidto na an paghona kan mga paryente ni Jesus sia nararaotan nin isip. (Mar. 3:21) Minsan siring, sa huri an nagkapira nagin mga nagtutubod. (Gibo 1:14) Kun habong akoon kan saindong mga paryente an enot na mga paghihingoa nindo na ihiras an katotoohan sa sainda, dai umontok. Puedeng magbago an mga kamugtakan asin aktitud. Padagos na humanap nin ibang oportunidad na isabi sa sainda an sarong punto na puedeng makapukaw kan saindang interes. Puedeng mapasaindo an kagayagayahan nin pagtabang sa sainda na makapoon sa dalan pasiring sa buhay na daing katapusan.​​—Mat. 7:​13, 14.

Kun Ano an Sasabihon Manongod sa mga Magasin

An Torrengbantayan Dis. 15

“Sa panahon na ini kan taon, an mga tawo sa bilog na kinaban ginigirumdom sa dakol na laen-laen na paagi an pagkamundag ni Jesus. Aram daw nindo na an pagkamundag ni Jesus ikinokonektar kan hula sa Biblia sa nagdadanay na katoninongan? [Pasimbagon. Dangan basahon an Isaias 9:​6, 7.] Ipinapaliwanag kan magasin na ini kun paano maootob an katoninongan na iyan.”

Awake! Dis. 22

“Nariparo daw nindo na an sosyedad garo baga paorog nang paorog na tinatawan nin pagdodoon kun ano an itsura nin mga tawo? [Pasimbagon.] Tinotokar kan magasin na ini an nagkapira sa mga peligro nin pagigin pirmeng nasa isip an kagayonan. Idinodoon man kaiyan an kahalagahan kan klase nin kagayonan na iyong pinakaimportante.” Basahon an 1 Pedro 3:​3, 4.

An Torrengbantayan Ene. 1

“An kadaklan na relihion nagtotokdo na maninigong kamotan nin mga tawo an saindang kapwa. [Basahon an Mateo 22:39.] Kun siring, taano daw ta sa paghona nindo kalabot an relihion sa kadakol na guerra asin iriwal sa kinaban? [Pasimbagon.] Sinisiyasat kan isyung ini kan An Torrengbantayan an hapot na, Puede daw na pagsararoon nin relihion an katawohan?”

Awake! Ene. 8

“Paano daw nindo sisimbagon an hapot na ini? [Basahon an hapot na nasa tutob. Dangan pasimbagon.] Nakakahandal an rikas kan pagkadikit kan mga rekurso kan daga. Pero, mangnohon nindo an nakakapakosog liwat sa boot na panugang ini. [Basahon an Salmo 104:5.] Ipinapaliwanag kan isyung ini kan Awake! kun paanong sa dai na mahahaloy lubos nang makakabalik sa dati an satong planeta.”