“Inako Nindong Daing Bayad, Itao Man Nindong Daing Bayad”

“INAKO nindong daing bayad, itao man nindong daing bayad.” (Mateo 10:8) Itinao ni Jesus an instruksion na iyan sa saiyang mga apostol kan isugo nia sinda na maghulit kan maogmang bareta. Sinunod daw kan mga apostol an pagboot na ini? Iyo, asin padagos nindang sinunod iyan dawa pagkatapos na humale si Jesus sa daga.

Halimbawa, kan maheling kan dating pararatak na si Simon an milagrosong kapangyarihan kan mga apostol na si Pedro asin Juan, inalok niang bayadan sinda tanganing itao sa saiya an kapangyarihan na iyan. Alagad ta sinagwe ni Pedro si Simon, na nagsasabi: “Matunaw logod na kaiba mo an saimong pirak, huli ta naghona ka na dahel sa pirak kakamtan mo an daing bayad na balaog nin Dios.”​—Gibo 8:18-20.

Si apostol Pablo nagpaheling man nin aktitud na kapareho kan ki Pedro. Puede kutanang pabayaan ni Pablo na sia magin pagabat sa pinansial sa saiyang Kristianong mga tugang sa Corinto. Minsan siring, ginamit nia an sadiri niang mga kamot tanganing suportaran an saiyang sadiri. (Gibo 18:1-3) Sa siring, may kompiansang masasabi nia na naghulit sia kan maogmang bareta sa mga taga Corinto na “daing bayad.”​—1 Corinto 4:12; 9:18.

Makamomondo, dakol na naghihingakong mga parasunod ni Cristo an dai nagpaheling nin iyo man sanang pagigin andam na “magtao na daing bayad.” Sa katunayan, dakol na namomoon sa relihion nin Kakristianohan an ‘magtotokdo huli sana sa bayad.’ (Miqueas 3:11) May nagkapirang namomoon sa relihion na yuminaman pa ngani hale sa kuarta na kinolekta sa mga aripompon ninda. Kan 1989, sinentensiahan an sarong ebanghelisador sa E.U. na mabilanggo nin 45 taon. An dahelan? “Tinitikas [nia] an mga nagsusuportar sa saiya nin minilyon na dolyares asin ginagamit an ibang kuarta sa pagbakal nin mga harong, kotse, bakasyon asin istaran pa ngani nin ayam na air-conditioned.”​—People’s Daily Graphic, October 7, 1989.

Sa Ghana, segun sa Ghanaian Times kan Marso 31, 1990, kinua nin sarong pading Katoliko Romano an kuarta na nakolekta sa sarong seremonya sa simbahan asin idinaklag iyan pabalik sa kongregasyon. “An dahelan nia,” sabi kan peryodiko, “iyo na, bilang mga nasa edad na, linalaoman na makontribwir sinda nin mas dakulang kantidad.” Bakong makangangalas, pinupukaw pa ngani kan dakol na iglesia an kahanaban sa mga miembro kaiyan, na aktibong sinusuportaran an mga aktibidad sa paghuego asin iba pang pakana tanganing magtipon nin kuarta.

Bilang pagkomparar kan kalaenan, an Mga Saksi ni Jehova naghihingoang arogon si Jesus asin an saiyang enot na mga disipulo. Mayo sinda nin sueldohan na mga klero. An lambang Saksi sarong ministro na tinawan nin paninimbagan na maghulit sa iba kan ‘maogmang bareta kan kahadean.’ (Mateo 24:14) Kun siring, labing anom na milyon sa sainda sa bilog na kinaban an sibot sa pagdara kan “tubig nin buhay” na daing bayad sa mga tawo. (Kapahayagan 22:17) Sa paaging ini, dawa an mga “mayong pirak” puedeng makinabang sa mensahe kan Biblia. (Isaias 55:1) Minsan ngani an pambilog na kinaban na gibohon ninda sinusuportaran nin boluntaryong mga donasyon, sinda dai noarin man naghagad nin kuarta. Bilang tunay na mga ministro nin Dios, bako sindang “paratinda kan tataramon nin Dios,” alagad sinda nagtataram “gikan sa sinseridad, iyo, bilang isinugo nin Dios.”​—2 Corinto 2:17.

Pero, taano ta an Mga Saksi ni Jehova gikan sa boot na nagtatabang sa iba, na ginigibo iyan sa sadiri nindang gastos? Ano an nagmomotibar sa sainda? An pagtatao daw nin daing bayad nangangahulogan na ginigibo ninda iyan na biyong daing balos sa saindang mga paghihingoa?

Simbag sa Angat ni Satanas

An tunay na mga Kristiano ngonyan minomotibar sa pangenot kan saindang pagmawot na paogmahon si Jehova​—bakong magpayaman. Sa siring, makakatao sinda nin simbag sa angat na ibinangon ni Satanas na Diablo kaidtong nakaaging mga siglo. Mapadapit sa sarong matanos na tawo na an ngaran Job, inangat ni Satanas si Jehova sa hapot na: “Natatakot daw si Job sa Dios na mayo nin kabayadan?” Nagsahot si Satanas na si Job naglilingkod sana sa Dios huli ta nagbugtak Sia nin proteksion sa palibot nia. Kun hahaleon ki Job an materyal na mga rogaring nia, an itinaong argumento ni Satanas, susumpaon ni Job an Dios nin atubangan!​—Job 1:7-11.

Tanganing masimbag an angat na ini, tinogotan nin Dios si Satanas na baloon si Job, na nagsasabi: “An gabos niang sadiri nasa saimong kamot.” (Job 1:12) An resulta? Pinatunayan ni Job na putikon si Satanas. Ano man na kasakitan an nangyari saiya, si Job nagdanay na maimbod. “Sagkod na ako magadan dai ko hahaleon sa sakuyang sadiri an sakuyang integridad!” an sabi nia.​—Job 27:​5, 6.

An tunay na mga parasamba ngonyan nagpapaheling nin aktitud na kapareho kan ki Job. An saindang paglilingkod sa Dios dai minomotibar nin materyal na intereses.

An Daing Bayad na Regalo nin Dios na Dai na Kutana Maninigong Kabootan

An saro pang dahelan kaya an tunay na mga Kristiano gikan sa boot na ‘nagtatao nin daing bayad’ iyo na sinda mismo ‘nag-ako nin daing bayad’ hale sa Dios. An katawohan oripon nin kasalan asin kagadanan huli sa kasalan kan satong apoon na si Adan. (Roma 5:12) May pagkamoot na iinareglo ni Jehova na an saiyang Aki magadan bilang atang​—na huli kaiyan dakula an isinakripisyo nin Dios. An katawohan bako nanggad na angay na tawan kaini. Dai, iyan sarong regalo hale sa Dios.​—Roma 4:4; 5:8; 6:23.

Arog kan nakarekord sa Roma 3:​23, 24, sinabihan ni Pablo an linahidan na mga Kristiano: “An gabos nagkasala asin nagkulang sa kamurawayan nin Dios, asin iyan bilang daing bayad na regalo na sinda ipinapahayag na matanos paagi sa saiyang dai na kutana maninigong kabootan huli sa pagkabutas paagi sa pantubos na binayadan ni Cristo Jesus.” An mga may paglaom na mabuhay sagkod lamang sa daga mag-aako man kan “daing bayad na regalo.” Kaiba sa regalong ini an pribilehiong ipahayag na matanos bilang mga katood ni Jehova.​—Santiago 2:23; Kapahayagan 7:14.

An atang na pantubos ni Cristo pinagigin posible man na maglingkod bilang mga ministro nin Dios an gabos na Kristiano. Isinurat ni apostol Pablo: “Ako nagin sarong ministro kaini [sagradong hilom] oyon sa daing bayad na regalo kan dai na kutana maninigong kabootan nin Dios.” (Efeso 3:4-7) Huling inapod sa ministeryong ini paagi sa sarong probisyon na bakong maninigo para sainda o dai ninda maaako bilang bayad, an tunay na mga ministro nin Dios dai nanggad makaaasa na bayadan sinda sa materyal na paagi huli sa paghiras sa iba kan bareta manongod sa probisyon na ini.

Buhay na Daing Katapusan​—Saro daw na Pan-agyat na Magin Maimot?

Kun siring, nangangahulogan daw ini na an Dios naglalaom na an mga Kristiano maglilingkod sa saiya na mayong inaasahan na balos? Dai, huli ta sinabihan ni apostol Pablo an mga kapagtubod nia: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Hebreo 6:10) Ni si Jehova man daing hustisya. (Deuteronomio 32:4) Al kontraryo, si Jehova “nagigin an parabalos sa mga maigot na naghahanap sa saiya.” (Hebreo 11:6) Alagad bako daw na an panuga na buhay na daing katapusan sa Paraiso sarong pagpukaw sa kaimotan?​—Lucas 23:43.

Bako nanggad. An sarong dahelan iyo na an pagmawot na mabuhay sagkod lamang sa Paraiso sa daga hale mismo sa Dios. Sia an nagpresentar kan esperansang ini sa enot na mag-agom na tawo. (Genesis 1:28; 2:15-17) Pinagin posible man Nia an pagbabalik sa dati kan esperansang ini kan iwinara iyan ni Adan asin Eva para sa saindang mga gikan. Sa siring, nanunuga an Dios sa saiyang Tataramon “na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.” (Roma 8:21) Kun siring, biyong angay para sa mga Kristiano ngonyan, arog ni Moises kan suanoy, na tumuruhok “na gayo sa pagtao kan balos.” (Hebreo 11:26) Dai itinatao nin Dios an balos na ini bilang suhol. Itinatao nia iyan huli sa tunay na pagkamoot para sa mga naglilingkod sa saiya. (2 Tesalonica 2:​16, 17) Bilang simbag, “kita namomoot, huli ta sia an enot na namoot sa sato.”​—1 Juan 4:19.

Tamang Motibo sa Paglilingkod sa Dios

Minsan siring, kaipuhan na daing ontok na siyasaton kan mga Kristiano ngonyan an saindang motibo sa paglilingkod sa Dios. Sa Juan 6:10-13, mababasa niato na milagrosong pinakakan ni Jesus an sarong kadaklan na labing limang ribo. Pagkatapos, an nagkapira nagpoon na sumunod ki Jesus huli sa paslo sanang mga dahelan. Sinabihan sinda ni Jesus: “Kamo naghaharanap sako . . . huli ta kamo nagkarakan kan mga tinapay asin nagkabarasog.” (Juan 6:26) Pakalihis nin dakol na taon may nagkapirang nagdusay na Kristiano na sa kaagid na paagi naglingkod sa Dios alagad “mayo nin dalisay na motibo.” (Filipos 1:17) An nagkapira ‘dai uminoyon sa ikararahay na mga tataramon ni Jesu-Cristo’ na naghanap pa ngani nin mga paagi tanganing personal na makinabang gikan sa pakikiasosyar ninda sa mga Kristiano.​—1 Timoteo 6:3-5.

Ngonyan, an sarong Kristiano na naglilingkod sana huli ta gusto niang mabuhay sagkod lamang sa Paraiso puedeng naglilingkod man na may paslong motibo. Sa katapustapusi, puede ining magresulta sa espirituwal na kapahamakan. Huling an sistema nin mga bagay ni Satanas garo baga naglalawig kisa sa inaantisipar, sia tibaad “mapagal,” na nagsasaboot na an katapusan naaatraso. (Galacia 6:9) Tibaad ngani sia maghinanakit huli sa materyal na mga pagsakripisyo nia. Pinagigirumdom kita ni Jesus: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.” (Mateo 22:37) Iyo, an tawong naglilingkod sa Dios na an pangenot na rason iyo an pagkamoot dai iniisip an lawig nin panahon sa saiyang paglilingkod. Determinado siang maglingkod ki Jehova sagkod lamang! (Miqueas 4:5) Dai sia nanganganugon sa ano man na mga pagsakripisyo nia may koneksion sa paglilingkod nia sa Dios. (Hebreo 13:​15, 16) An pagkamoot sa Dios an nagtutulod sa saiya na enoton an intereses nin Dios sa saiyang buhay.​—Mateo 6:33.

Ngonyan, labing anom na milyon na tunay na mga parasamba an ‘gikan sa boot na nagpepresentar kan saindang sadiri’ sa paglilingkod ki Jehova. (Salmo 110:3) Kamo daw saro sa sainda? Kun dai, kun siring horophoropon an iinaalok nin Dios: dalisay na kaaraman sa katotoohan; (Juan 17:3) katalingkasan sa pagkaoripon sa falsong relihiosong mga katokdoan; (Juan 8:32) an paglaom na mabuhay sagkod lamang. (Kapahayagan 21:​3, 4) An Mga Saksi ni Jehova puedeng makatabang sa saindo na manodan kun paano nindo puedeng makua an gabos na ini hale sa Dios​—na daing bayad.

[Blurb sa pahina 22]

An tunay na mga Kristiano ngonyan minomotibar sa pangenot kan saindang pagmawot na paogmahon si Jehova​—bakong magpayaman

[Ritrato sa pahina 21]

An daing bayad na regalo nin Dios na pantubos nagmomotibar sa mga Kristiano na ihiras an maogmang bareta na daing bayad