Binabalosan an Pakatagal

¹ “Huli sa saindong pakatagal makakamtan nindo an saindong kalag.” (Luc. 21:19) Linilinaw kan mga tataramon na iyan, na kabtang kan hula ni Jesus may labot sa “pagtatapos kan sistema nin mga bagay,” na sa pagpapadanay kan satong integridad, dapat kitang magin andam na atubangon an dakol na kasakitan. Alagad paagi sa kosog ni Jehova, an lambang saro sa sato ‘makakatagal sagkod sa katapusan’ asin “maliligtas.”​​—Mat. 24:​3, 13; Fil. 4:13.

² An paglamag, mga problema sa salud, mga kadepisilan sa pinansial, asin emosyonal na kapurisawan puedeng magpasakit na gayo sa kada aldaw. Minsan siring, dapat na dai niato noarin man paglingawan na si Satanas nagmamaigot na raoton an satong integridad ki Jehova. Sa kada aldaw na kita nagdadanay na maimbod sa satong Ama, saro na naman na aldaw na kita nakatao nin simbag sa angat kan Paratuya. Nakakakontento nanggad na maaraman na an satong “mga luha” dai nalilingawan kun napapaatubang sa pagbalo! Iyan mahalagang marhay ki Jehova, asin nakakaogma sa saiyang puso an integridad niato!​​—Sal. 56:8; Tal. 27:11.

³ Dinadalisay Paagi sa Kasakitan: Puedeng ihayag nin makuring sakit an sarong kaluyahan sa pagtubod o sarong depekto sa personalidad, arog baga nin kapalangkawan o kawaran nin pasensia. Imbes na hingoahon na likayan o taposon an kasakitan paagi sa bakong sono sa Kasuratan na mga paagi, dapat niatong himateon an hatol kan Tataramon nin Dios na ‘togotan na malubos kan pakatagal an gibo kaiyan.’ Taano? Huli ta an maimbod na pagtagal sa kasakitan nakakatabang sa sato na magin “lubos asin marigon sa gabos na bagay.” (Sant. 1:2-4) An pakatagal makakatabang sa sato na kultibaron an mahalagang mga kualidad, arog nin pagkarasonable, empatiya, asin pagkaherak.​​—Roma 12:15.

⁴ Nabalong Kualidad nin Pagtubod: Kun kita nagtatagal sa kasakitan, nagkakaigwa kita nin nabalong kualidad nin pagtubod na may dakulang halaga sa pagheling nin Dios. (1 Ped. 1:​6, 7) An siring na pagtubod inaandam kita na magdanay na marigon durante kan madatong na kasakitan. Dugang pa, mamamatean niato an pag-oyon nin Dios, asin pinapakosog kaini an satong paglaom, na ginigibo iyan na orog na tunay para sa sato.​​—Roma 5:​3-5.

⁵ An pinakabalos sa pakatagal idinodoon sa Santiago 1:​12, na nagsasabi: “Maogma an tawo na padagos na nagtatagal sa pagbalo, huli ta sa pagigin inooyonan aakoon nia an korona nin buhay.” Huli kaini, magdanay kitang marigon sa satong debosyon ki Jehova, na kompiado na babalosan nia nin igo an “mga padagos na namomoot saiya.”

Kabtang 2—Pagkondukta nin Progresibong mga Pag-adal sa Biblia

Pag-andam Para sa Pagkondukta nin Pag-adal

¹ Kalabot sa epektibong pagtotokdo sa sarong inaadalan sa Biblia bako sanang an pagtokar kan pinag-aadalan asin pagbasa kan sitadong mga teksto. Kaipuhan niatong iatubang an impormasyon sa paagi na nakakamotibar sa puso kan inaadalan. Nagkakaipo ini nin maingat na pag-andam na nasa isip an inaadalan.​​—Tal. 15:28.

² Kun Paano Maandam: Magpoon paagi sa pamimibi ki Jehova manongod sa inaadalan asin sa saiyang mga pangangaipo. Hagadon ki Jehova na logod tabangan kamo na taroson an puso kan inaadalan. (Col. 1:​9, 10) Tangani na masabotan nin malinaw an tema, gumamit nin panahon sa pag-estudyar kan titulo kan kapitulo o leksion, kan mga subtema, asin ano man na bisual na mga pantabang. Hapota an saindong sadiri, ‘Ano an pangenot na katuyohan kan pag-aadalan?’ Tatabangan kamo kaini na magkonsentrar sa prinsipal na mga punto mantang nagkokondukta kamo kan pag-adal.

³ Maingat na repasohon an pag-aadalan nin parapo por parapo. Hanapon an simbag sa imprentadong mga hapot, na an minamarkahan sana mga termino asin fraseng makahulogan. Analisaron kun paano konektado an sitadong mga teksto sa prinsipal na punto kan parapo, asin magdesisyon kun arin na mga teksto an babasahon durante kan pag-adal. Puedeng manompongan nindong nakakatabang an pagkaigwa nin halipot na nota sa pagirilid kan publikasyon. Maninigong masabotan nin malinaw kan inaadalan na an nanonodan nia hale sa Tataramon nin Dios.​​—1 Tes. 2:13.

⁴ Ibagay sa Inaadalan an Leksion: Sunod, estudyaran an leksion na partikularmenteng nasa isip an inaadalan. Pagmaigotan na antisiparon an saiyang mga hapot asin an mga punto na tibaad madepisilan siang saboton o akoon. Hapota an saindong sadiri: ‘Ano daw an kaipuhan niang masabotan o pakarhayon tanganing umoswag sa espirituwal? Paano ko daw matataros an saiyang puso?’ Dangan ibagay dian an pagtotokdo nindo. Kun beses, tibaad maheling nindo an pangangaipo na mag-andam nin ilustrasyon, paliwanag, o sunod-sunod na mga hapot tangani na tabangan an inaadalan na masabotan an kahulogan nin sarong punto o teksto. (Neh. 8:8) Alagad likayan an pagsaliot nin dagdag na impormasyon na daing gayo nakakakontribwir sa tema. An sarong halipot na repaso sa katapusan kan pag-adal makakatabang sa saiya na magirumdoman an prinsipal na mga punto.

⁵ Kanigoan an kagayagayahan niato kun an mga bagohan nagkakaigwa nin matanos na bunga sa kaomawan ni Jehova! (Fil. 1:11) Tangani na matabangan sindang maabot an pasohan na iyan, mag-andam na marhay kada makondukta kamo nin pag-adal sa Biblia.