Paghuhulit kan Kahadean—Sarong Mahalagang Marhay na Pribilehio

¹ Aroaldaw, binilyon na nag-eerok sa daga an nakikinabang sa dakol na probisyon ni Jehova para sa buhay. (Mat. 5:45) Minsan siring, kakadikit sana an igwa kan daing kaagid na pribilehio na ipaheling an pag-apresyar sa saindang Kaglalang paagi sa paghuhulit kan maogmang bareta kan Kahadean nin Dios. (Mat. 24:14) Gurano kahalangkaw an pagheling nindo sa mahalagang marhay na pribilehiong ini?

² An paghuhulit kan Kahadean nagtataong onra sa Dios asin nagtatao nin paglaom asin katoninongan sa mga tawo na napupurisaw huli sa maribok na mga panahon na ini ngonyan. (Heb. 13:15) Para sa mga naghihimate sa mensahe, iyan nangangahulogan nin buhay na daing katapusan. (Juan 17:3) Anong sekular na karera o propesyon an nagtatao nin siring na mga pakinabang? Ipinaheling ni apostol Pablo an pag-apresyar nia sa ministeryo sa paagi kan pag-otob nia kaiyan. Minansay nia iyan bilang sarong kayamanan.—Gibo 20:20, 21, 24; 2 Cor. 4:1, 7.

³ Pakamahalon an Satong Mahalagang Marhay na Pribilehio: An sarong paagi na ipinapaheling niato an pag-apresyar sa pribilehio na maghulit iyo an pagtaong atension sa kualidad kan satong paglilingkod. Tinatawan daw niato nin panahon an pag-andam nin pag-atubang na mataros sa puso kan mga naghihinanyog sa sato? Puede daw niatong paoswagon an satong abilidad sa paggamit kan Kasuratan asin sa pangangatanosan sa mga tawo? Lubos daw niatong nahuhulitan an teritoryo na iinasignar sa sato? Puede daw kitang makapoon asin makapagkondukta nin pag-adal sa Biblia? Siring kan maimbod na mga Kristiano, kan nakaagi asin sa presente, namomotibar kita nin tamang pagmansay sa aktibidad na ini, asin pinakamamahal niato an satong pribilehio.—Mat. 25:14-23.

⁴ Kun napapaatubang kita sa mga epekto nin halangkaw nang edad, maluyang salud, o iba pang depisil na mga kamugtakan, nakakarangang maaraman na tunay nanggad na pinapahalagahan an maigot na mga paghihingoa niato na makikabtang sa ministeryo. Sinisierto sa sato kan Tataramon nin Dios na pinapahalagahan ni Jehova an siring na mga paghihingoa sa paglilingkod sa saiya, pati an mga paghihingoa na tibaad garo baga bakong kahangahanga sa pagheling nin iba.—Luc. 21:1-4.

⁵ Sarong gikanan nin dakulang pagkakontento an paghuhulit kan Kahadean. An sarong 92 anyos na tugang na babae nagsabi: “Kanigoan na pribilehio na girumdomon an labing 80 taon nin dusay na paglilingkod sa Dios—na mayo nin pagbasol! Kun mabubuhay giraray ako, iyan giraray an gigibohon ko huli ta, tunay nanggad, ‘an mamomoton na kabootan nin Dios orog karahay kisa buhay mismo.’ ” (Sal. 63:3) Logod na pakamahalon man niato an mahalagang marhay na pribilehiong ini hale sa Dios—an paghuhulit kan Kahadean.

Kabtang 11—Pagkondukta nin Progresibong mga Pag-adal sa Biblia

Pagtabang sa mga Inaadalan sa Biblia na Gumibo nin mga Pagdalaw Liwat

¹ Kun magpoon nang makikabtang sa paghuhulit an sarong inaadalan sa Biblia, makakanompong sia nin mga tawo na nagpapaheling nin interes sa maogmang bareta. Paano niato matatabangan an bagong parahayag na gumibo nin epektibong mga pagdalaw liwat asin kultibaron an interes na nanompongan nia?

² An pag-andam para sa pagdalaw liwat minapoon sa enot na pagsongko. Enkaminaron an inaadalan sa Biblia na magkaigwa nin sinserong interes sa mga nakakaolay nia. (Fil. 2:4) Progresibong sanayon sia na enganyaron an mga kagharong na magpahayag kan saindang mga ideya, hinanyogon an saindang mga komento, asin tawan nin atension an mga bagay na ikinakapurisaw ninda. Kun may magpaheling nin interes, ipasurat sa bagong parahayag an mahalagang impormasyon manongod sa pagdalaw. Gamiton an impormasyon na iyan tangani na tabangan sia sa pagplano nin dugang pang pakikipag-olay.

³ Pag-andam Para sa Pagdalaw Liwat: Repasohon an enot na pagdalaw, asin ipaheling sa inaadalan sa Biblia kun paano mapili nin sarong aspekto kan mensahe kan Kahadean na magugustohan kan kagharong. (1 Cor. 9:19-23) Magkaibanan na mag-andam nin sarong halipot na pag-atubang na nagtatampok nin sarong teksto sa Biblia kaiba an sarong parapo na nasa sarong pinag-aadalan na publikasyon. Dugang pa, mag-andam nin sarong hapot na puedeng palatawon sa pagtatapos kan pakikipag-olay tangani na ibugtak an pundasyon para sa masunod na pagdalaw. Ipaheling sa bagong parahayag kun paano dudugangan an kaaraman kan kagharong manongod sa Tataramon nin Dios sa kada masunod na pagdalaw.

⁴ Makakatabang man na tokdoan an inaadalan sa Biblia nin sarong simpleng introduksion. Pagkatapos na taratarahon an kagharong, puede niang sabihon: “Naogma ako sa nakaagi niatong pag-oolay, asin nagbalik ako tangani na ihiras an dugang pang impormasyon sa Biblia manongod sa [sambiton an topiko].” Tibaad kaipuhan man nindong ipaheling sa bagong parahayag kun paano masimbag kun ibang tawo an magluwas sa pinto.

⁵ Maigot na Kultibaron an Interes: Enkaminaron an inaadalan sa Biblia na magtao nin marahay na halimbawa sa pagdalaw liwat tolos-tolos sa gabos na nagpapaheling nin interes. An pakanompong sa mga tawo sa saindang harong tibaad nagkakaipo nin pagkadesidido sa pagdalaw liwat. Tokdoan an inaadalan sa Biblia kun paano magibo nin mga areglo sa pagdalaw giraray, asin tabangan sia na masabotan an pangangaipo na dumalaw liwat siring kan ipinanuga. (Mat. 5:37) Sanayon an bagong parahayag na magin maboot, makonsiderasyon, asin magalang mantang hinahanap nia an mga arog-karnero asin kinukultibar an interes ninda.—Tito 3:2.