Madonong na Gamiton an Saindong Panahon

¹ An satong pagmawot na paogmahon si Jehova nagpapahiro sa sato na isentro an satong buhay sa espirituwal na mga aktibidad. Tinotokdoan kita kan saiyang Tataramon na “padagos na hanapon nguna an kahadean” asin ‘siertohon an orog na mahalagang mga bagay.’ (Mat. 6:33; Fil. 1:10) Paano niato matutubos an panahon para sa intereses kan Kahadean asin gibohon na sekondaryo an bakong gayong mahalagang mga aktibidad?—Efe. 5:15-17.

² Enoton an mga Aktibidad na Pan-Kahadean: Iiskedyul an saindong panahon tanganing dai iyan maubos na magamit sa dai kaipuhan na mga bagay. An iba pinoponan an kada bulan paagi sa pag-iskedyul sa saindang kalendaryo nin espesipikong mga panahon para sa ministeryo sa langtad. Dangan sinisierto ninda na dai togotan an ibang bagay na makaolang sa mga planong iyan. Puede man niatong gibohon iyan tanganing tuboson an panahon para sa mga pagtiripon, personal na pag-adal, asin mga kombension. Dakol an may pan-aroaldaw na iskedyul nin pagbasa sa Biblia magsalang sa pagpoon o pagtatapos kan aldaw. Magtagama nin espesipikong panahon sa kada mahalagang aktibidad, asin dai pagtogotan an ibang bagay na makaolang na dai man kaipuhan.—Ecl. 3:1; 1 Cor. 14:40.

³ Limitaran an Paggamit kan Kinaban: Sa nagkapirang kadagaan, pasil sanang makikabtang sa mga isport, aling-alingan, dibersion, mga apisyon, asin iba pang mga okupasyon. Dakol an naggagamit nin ngana-nganang panahon sa pagdalan nin telebisyon o sa paggamit nin komputer. Minsan siring, an pagigin sibot sa paglilibang asin bagong mekanikal o elektronikong gamit na iinaalok kan kinaban na ini seguradong maresulta sa pagkadesganar. (1 Juan 2:15-17) Huli kaini, sinasadol kita kan Kasuratan na dai paggamiton nin lubos an kinaban. (1 Cor. 7:31) Paagi sa paghimate sa madonong na sadol na iyan, ikakapaheling nindo ki Jehova na ineenot nindo sa saindong buhay an pagsamba sa saiya.—Mat. 6:19-21.

⁴ Mauubos na an natatadang panahon para sa presenteng sistemang ini. An mga ineenot an intereses kan Kahadean magigin maogma asin magkakamit kan pabor nin Dios. (Tal. 8:32-35; Sant. 1:25) Kun siring, magin madonong logod kita sa paggamit kan mahalagang kayamanan na ini, an satong panahon.

Kabtang 12—Pagkondukta nin Progresibong mga Pag-adal sa Biblia

Pagtabang sa mga Inaadalan sa Biblia na Makapoon Asin Makapagkondukta nin mga Pag-adal sa Biblia

¹ Kun an satong mga inaadalan sa Biblia magpoon nang makikabtang sa ministeryo sa langtad, tibaad ikatakot ninda an posibilidad nin pagpoon asin pagkondukta nin sadiri nindang mga pag-adal sa Biblia. Paano niato sinda matatabangan na pataluboon an positibong aktitud sa mahalagang marhay na kabtang na ini kan satong ministeryo?—Mat. 24:14; 28:19, 20.

² Oras na an sarong inaadalan sa Biblia makualipikar na magin dai pa bautisadong parahayag, posibleng marhay na natatawan na sia nin kabtang sa Teokratikong Paadalan sa Pagmiministro. An pagsasanay na saiyang inaako sa pag-andam asin pag-atubang nin mga asignasyon makakatabang sa saiya na pataluboon an mga abilidad sa pagtotokdo na kaipuhan nin “sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.”—2 Tim. 2:15.

³ Magtokdo Paagi sa Saindong Halimbawa: Sinanay ni Jesus an saiyang mga disipulo paagi sa pagtao nin malinaw na instruksion asin marahay na halimbawa. Sia nagsabi: “An gabos na natokdoan sa sangkap na paagi makakaarog sa saiyang paratokdo.” (Luc. 6:40) Mahalagang marhay na arogon nindo si Jesus paagi sa pagtao nin tamang halimbawa sa saindo mismong ministeryo. Mantang naoobserbaran kan saindong inaadalan sa Biblia an saindong halimbawa sa ministeryo, masasabotan nia na an katuyohan kan mga pagdalaw liwat iyo an makapoon nin mga pag-adal sa Biblia.

⁴ Ipaliwanag sa inaadalan sa Biblia na kun nag-aalok kita nin pag-adal, sa parate dai man kinakaipuhan na sabihon nin detalyado kun paano an areglo sa pag-adal. Sa parate pinakamarahay na idemonstrar sana an pag-adal paagi sa paggamit nin saro o duwa gayod na parapo sa sarong publikasyon na pag-aadalan. An nakakatabang na mga suhestion sa paggibo kaini manonompongan sa pahina 4 kan An Satong Ministeryo sa Kahadean na Agosto 2005 asin sa pahina 6 kan An Satong Ministeryo sa Kahadean na Mayo 2002.

⁵ Kun angay, imbitaran an inaadalan sa Biblia na ibanan kamo o an saro pang eksperyensiadong parahayag sa iba pang pag-adal sa Biblia. Tibaad makikabtang sia sa pagkomento sa parapo o sa mayor na teksto. Sa siring, paagi sa pag-obserbar, dakol an manonodan kan inaadalan sa Biblia manongod sa pagkondukta nin progresibong mga pag-adal sa Biblia. (Tal. 27:17; 2 Tim. 2:2) Komendaran sia, asin ipaliwanag kun paano sia puedeng umoswag.

⁶ An pagsasanay sa bagong mga parahayag na magin mga paratokdo kan Tataramon nin Dios aandamon sinda para sa “marahay na gibo” nin pagpoon asin pagkondukta nin sadiri nindang mga pag-adal sa Biblia. (2 Tim. 3:17) Nakakakontento nanggad na makaibahan sinda sa pagpaabot kan mamomoton na pangagda: “An siisay man na boot, kumua kan tubig nin buhay na daing bayad”!—Kap. 22:17.