Pagpoon nin mga Pag-adal sa Biblia sa May Pinto Asin Paagi sa Telepono

1, 2. Paano niato ikakabagay an satong programa nin pag-adal sa Biblia tangani na matabangan an sibot na mga tawo?

¹ Sibot an mga tawo ngonyan. Pero, dakol an interesado sa espirituwal na mga bagay. Paano niato sinda matatabangan na mapanigoan an saindang espirituwal na pangangaipo? (Mat. 5:3) Dakol na parahayag an nahihimong adalan sa Biblia an mga tawo sa may pinto ninda o paagi sa telepono. Puede daw nindong pahiwason an saindong ministeryo sa paaging ini?

² Tangani na makapoon nin mga pag-adal sa Biblia, kaipuhan na magin andam kita na idemonstrar an sarong pag-adal sa Biblia basta igwang oportunidad. Paano asin saen ini magigibo?

3. Taano ta dapat na idemonstrar an sarong pag-adal sa Biblia sa enot na pagdalaw, asin paano ini magigibo?

³ Sa May Pinto: Kun makanompong kamo nin sarong tawo na gustong makipag-olay manongod sa Biblia, buksan sana an sarong parapo na inandam nindo nin patienot, arog kan enot na parapo kan leksion 1 sa brosyur na Kahagadan, asin pumoon. Basahon an parapo, pag-olayan an hapot, asin tokaron an saro o duwang sitadong teksto. Sa parate magigibo ini sa may pinto mismo sa laog nin lima sagkod sampulong minuto. Kun nagustohan kan tawong iyan an pag-oolay, iareglo na pag-olayan an masunod na saro o duwang parapo sa ibang panahon.—Makukua an dugang pang mga suhestion sa paggamit kan direktang pamamaagi sa pagpoon nin mga pag-adal sa An Satong Ministeryo sa Kahadean na Mayo 2002, p. 6.

4. Paano kita puedeng makapoon nin pag-adal sa Biblia sa may pinto kun nagdadalaw liwat?

⁴ Puede man na gamiton an kaparehong paagi sa pagpoon nin mga pag-adal sa Biblia kun nagdadalaw liwat. Halimbawa, puede nindong iintrodusir an brosyur na Kahagadan asin itampok an ngaran nin Dios, na ginagamit an leksion 2, parapo 1-2. Sa masunod na pagdalaw, puede nindong pag-olayan an ihinahayag kan Biblia manongod sa mga kualidad ni Jehova, na ginagamit an parapo 3-4. Sa masunod na pag-oolay, puede nindong pag-adalan an parapo 5-6 asin an retrato na nasa pahina 5 tangani na itampok kun paano kita matatabangan kan pag-adal sa Biblia na mamidbid si Jehova. Ini gabos puedeng gibohon mientras na nakatindog sa may pinto.

5, 6. (a) Taano an nagkapira ta tibaad mas gusto na mag-adal kan Biblia paagi sa telepono? (b) Anong pamamaagi an puede niatong gamiton kun nag-aalok nin pag-adal paagi sa telepono?

⁵ Paagi sa Telepono: May mga tawo na tibaad mas gustong mag-adal kan Biblia paagi sa telepono kisa personal kamong magduman sa sainda. Estudyare an minasunod na eksperyensia: Mientras na naghuhulit sa harong-harong, nanompongan nin sarong tugang na babae an sarong hoben na babaeng ina asin sibot sa sekular na trabaho. Kan sia dai giraray makaolay kan tugang na babae sa harong, nagdesisyon an tugang na apodan sia sa telepono. Ipinaliwanag kan hoben na babae na mayo talaga sia nin panahon tangani na pag-olayan an Biblia. Nagsabi an tugang: “Sa laog nin 10 o 15 minutos, may bagong bagay ka nang manonodan, dawa paagi sa telepono.” “Bueno, kun iyan paagi sa telepono, oyon ako!” an simbag kan babae. Dai nahaloy, kinokondukta na an sarong regular na pag-adal paagi sa telepono.

⁶ An nagkapira daw sa dinadalaw nindo gustong mag-adal paagi sa telepono? Puede nindong probaran an pamamaagi na nasabi pa sana, o puede sana kamong magsabi: “Kun mas gusto nindo, puede niatong pag-olayan an Biblia paagi sa telepono. Mas marahay daw iyan para sa saindo?” Paagi sa pagbagay kan satong programa nin pag-adal sa Biblia sa mga kamugtakan nin iba, puede niato sindang matabangan na ‘makua an mismong kaaraman nin Dios.’—Tal. 2:5; 1 Cor. 9:23.

Kun Ano an Sasabihon Manongod sa mga Magasin

An Torrengbantayan Ag. 15

“Pagkatapos nin sarong makaturotristeng pagkagadan, dakol an nag-iisip-isip kun ano an nangyayari pagkagadan. Sa paghona daw nindo posibleng masabotan an kagadanan? [Pasimbagon.] Ipinapaliwanag kan magasin na ini an sinasabi kan Biblia manongod sa kamugtakan kan mga gadan. Tinotokar man kaiyan an panuga nin Dios na buhayon liwat an satong gadan nang mga mahal sa buhay.” Basahon an Juan 5:28, 29.

Awake! Ag. 22

“Aram daw nindo na an turismo inaapod na numero unong among sa kinaban? [Pasimbagon.] An paglangkaw nin turismo nagtao nin mga pakinabang sagkod problema. Sinisiyasat kan magasin na ini an bentaha asin disbentaha kan industriya nin turismo sa presenteng panahon. Nagtatao man iyan nin nagkapirang praktikal na hatol para sa mga nagbibiahe sa laen-laen na nasyon.”

An Torrengbantayan Set. 1

“Sa presenteng kinaban, an kaimbodan sarong moral na karahayan na mas parateng inoomaw kisa ginigibo. Bako daw marahayon kun mas dakol na tawo an kapareho kan katood na ilinadawan digdi? [Basahon an Talinhaga 17:17. Dangan pasimbagon.] Tinotokar kan magasin na ini an mga pakinabang na ibinubunga kan pagigin maimbod sa satong pamilya asin mga katood.”

Awake! Set. 8

“Tibaad nagngangalas kamo sa kooperasyon na yaon sa naturalesa. [Sambiton an saro sa sinitar na mga halimbawa na nasa artikulo.] Bako daw makamomondo na dai niato naheheling an orog na kooperasyon sa pag-oltanan nin mga tawo? [Pasimbagon.] Ipinapaliwanag kan magasin na ini kun paano papangyayarihon nin Dios sa dai na mahahaloy an katoninongan asin pagkaoroyon sa satong daga.” Basahon an Isaias 11:9.