Kabtang 3—Pagkondukta nin Progresibong mga Pag-adal sa Biblia

Epektibong Paggamit kan Kasuratan

1. Taano ta maninigo niatong idoon an Kasuratan kun nagkokondukta nin mga pag-adal sa Biblia?

¹ An katuyohan niato sa pagkondukta nin mga pag-adal sa Biblia iyo na ‘gumibo nin mga disipulo’ paagi sa pagtabang sa mga tawo na masabotan asin akoon an mga katokdoan kan Tataramon nin Dios patin iaplikar iyan sa saindang buhay. (Mat. 28:​19, 20; 1 Tes. 2:13) Kun siring, maninigong nakasentro sa Kasuratan an pag-adal. Sa primero, tibaad makakatabang na ipaheling sa mga inaadalan kun paano hahanapon an espesipikong mga teksto sa sadiri nindang kopya kan Biblia. Pero, paano niato magagamit an Kasuratan tangani na tabangan an mga siring na umoswag sa espirituwal?

2. Paano kita madesisyon kun arin na mga teksto sa Biblia an babasahon asin totokaron?

² Pumili nin mga Tekstong Babasahon: Sa pag-andam nindo, aramon kun paano aplikado sa puntong pinag-oolayan an lambang sitadong teksto na nasa leksion, asin magdesisyon kun arin an babasahon nindo patin totokaron durante kan pag-adal. Sa pankagabsan, mas marahay na basahon an mga tekstong nagpapaheling kan basehan sa Kasuratan para sa satong mga tinutubod. Puedeng dai na kaipuhan na basahon an mga tekstong nagtatao nin basehan na impormasyon. Konsideraron an mga pangangaipo asin kamugtakan kan lambang inaadalan.

3. Ano an kapakinabangan nin paggamit nin mga hapot, asin paano niato ini magigibo?

³ Gumamit nin mga Hapot: Imbes na ipaliwanag sa inaadalan an mga teksto sa Biblia, hagadon na ipaliwanag nia iyan sa saindo. Mamomotibar nindo siang gibohon ini paagi sa ekspertong paggamit nin mga hapot. Kun risang-risa an aplikasyon kan teksto, puede sana kamong maghapot kun paano sinusuportaran kan teksto an sinasabi sa parapo. Sa ibang kamugtakan, tibaad kaipuhan an mas espesipikong hapot o sunod-sunod na hapot tangani na giyahan an inaadalan pasiring sa tamang konklusyon. Kun kaipuhan nin dugang pang paliwanag, puede ining gibohon pagkatapos na sumimbag an inaadalan.

4. Gurano kadakol na paliwanag an kaipuhan para sa mga tekstong babasahon niato?

⁴ Papagdanayon Iyan na Simple: An sarong ekspertong parapana sa parate nagkakaipo nin saro sanang pana na papatamaon sa target. Kaagid kaiyan, an sarong ekspertong paratokdo dai nagkakaipo nin dakol na tataramon tangani na idoon an sarong punto. Puede niang ipahayag an impormasyon sa simple, malinaw, asin tamang paagi. Kun beses, tibaad kaipuhan nindong magsiyasat sa Kristianong mga publikasyon tangani na masabotan an sarong teksto asin ipaliwanag iyan nin tama. (2 Tim. 2:15) Alagad likayan an pagmamaigot na ipaliwanag an gabos na aspekto kan kada teksto na nasa pinag-aadalan. Iiba sana an kaipuhan tangani na idoon an puntong pinag-oolayan.

5, 6. Paano niato matatabangan an mga inaadalan na iaplikar sa saindang buhay an Tataramon nin Dios, alagad ano an maninigo niatong likayan?

⁵ Gumibo nin Praktikal na Aplikasyon: Kun angay, tabangan an inaadalan na maheling kun paano aplikado sa saiya personalmente an mga teksto sa Biblia. Halimbawa, kun ipinapakipag-olay an Hebreo 10:​24, 25 sa sarong inaadalan na dai pa nag-aatender sa Kristianong mga pagtiripon, puede nindong tokaron an saro sa mga pagtiripon asin imbitaran siang umatender dian. Alagad likayan na piriton sia. Togotan na an Tataramon nin Dios an magmotibar sa saiya na gibohon an kinakaipuhan tangani na paogmahon si Jehova.​—Heb. 4:12.

⁶ Mantang ginigibo niato an sugo na gumibo nin mga disipulo, logod na “palakopon [niato] an pagkuyog paagi sa pagtubod” paagi sa satong epektibong paggamit kan Kasuratan.​​—Roma 16:26.

Kun Ano an Sasabihon Manongod sa mga Magasin

An Torrengbantayan Nob. 15

“An kadaklan na tawo nagmamawot nin marahay na salud asin halawig na buhay. Alagad kun posible iyan, boot daw nindong mabuhay sagkod lamang? [Pasimbagon. Dangan basahon an Juan 17:3.] Tinotokar kan magasin na ini an panuga kan Biblia na buhay na daing katapusan. Sinisiyasat man kaiyan kun ano an klase nin buhay kun magkatotoo na an panugang iyan.”

Awake! Nob. 22

“Kan nakaaging 20 taon, dakol na pag-oswag an nagibo sa pagsabot asin pagbolong sa AIDS. Pero, dakol pa man giraray na tawo an naimpormaran nin sala. [Ipaheling an kahon na “Myths About AIDS,” asin pakomentohon.] Tinotokar kan magasin na ini kun paano mapoprotehiran nin mga magurang an saindang mga aki.” Basahon an Deuteronomio 6:​6, 7.

An Torrengbantayan Dis. 1

“An sarong karakteristiko na namimidbid an kalaenan kan mga tawo sa mga hayop iyo an abilidad na mamidbid an kalaenan kan tama asin sala. Makamomondo na dakol na tawo an naggigibo nin maraot. Taano sa paghona nindo ta siring kaiyan? [Pasimbagon. Dangan basahon an Jeremias 17:9 o Kapahayagan 12:9.] Tinotokar kan magasin na ini kun ano an makakatabang sa sato tangani na maaraman asin magibo kun ano an tama.”

Awake! Dis. 8

“An mga pag-oswag sa teknolohiya dai nakabago sa pundamental na pangangaipo nin tawo na makikatood. Alagad nariparo daw nindo na an mga pagbabago sa sosyedad puedeng magpadepisil ngonyan na mga aldaw sa pagkultibar nin dayupot na mga pakikikatood? [Pasimbagon. Dangan basahon an Talinhaga 18:24.] Tinotokar kan magasin na ini kun paano kita magkakaigwa asin padagos na makakapagpadanay nin tunay na mga katood.”