Kabtang 4—Pagkondukta nin Progresibong mga Pag-adal sa Biblia

Pagsasanay sa mga Inaadalan sa Biblia na Mag-andam

¹ An inaadalan sa Biblia na binabasa an leksion antes pa, kinukuritan an mga simbag, asin iniisip kun paano iyan ipapahayag sa saiyang sadiring mga tataramon sa parate marikas an pag-oswag sa espirituwal. Kun siring, oras na maestablisar an sarong regular na pag-adal, andamon nindo nin magkaibanan an sarong leksion tangani na ipaheling sa inaadalan sa Biblia kun paano maandam. Sa kadaklan na inaadalan sa Biblia, makakatabang na andamon nindo nin magkaibanan an sarong bilog na kapitulo o leksion.

² Pagkurit kan mga Simbag Asin Pagsurat nin mga Nota sa Gilid: Ipaliwanag kun paano hahanapon an direktang mga simbag sa imprentadong mga hapot. Ipaheling sa inaadalan sa Biblia an saindong kopya kan publikasyon na pinag-aadalan na an kinuritan nindo iyo sana an importanteng marhay na mga termino o frase. Mantang ineestudyaran nindo an pag-aadalan, tibaad gusto niang arogon an halimbawa nindo, na an kinukuritan sa saiyang kopya iyo sana an kaipuhan na matabang sa saiya na magirumdoman an simbag. (Luc. 6:40) Dangan ipasimbag iyan sa saiya sa saiyang sadiring mga tataramon. Totogotan kamo kaini na maheling kun gurano kalinaw na nasasabotan nia an pinag-aadalan.

³ An sarong importanteng kabtang kan pag-andam kan inaadalan sa Biblia para sa pag-adal iyo an maingat na pagsiyasat sa dai kinotar na mga teksto. (Gibo 17:11) Tabangan siang masabotan na an kada sitadong teksto nagsusuportar sa sarong punto na nasa parapo. Ipaheling sa saiya kun paano magibo nin haralipot na nota sa gilid kan saiyang publikasyon na pinag-aadalan. Idoon sa saiya an punto na an Biblia an basehan kan saiyang nanonodan. Enganyaron sia na gumamit nin dakol na sitadong teksto sa saiyang mga komento durante kan pag-adal.

⁴ Helingon Nguna an Kabilogan kan Pag-aadalan Asin Magrepaso: Bago ponan kan inaadalan sa Biblia an saiyang detalyadong pag-andam kan pag-aadalan, makakatabang sa saiya na helingon nguna an kabilogan kan leksion. Sabihon na puede niang helingon nguna an kabilogan kan pag-aadalan paagi sa madali sanang pagheling kan titulo kan kapitulo, mga subtema, asin mga ilustrasyon. Ipaliwanag na bago taposon an saiyang sesyon sa pag-andam, madonong na gumamit sia nin pirang minuto tangani na repasohon an prinsipal na mga punto na iinatubang sa leksion, na tibaad ginagamit an kahon sa repaso kun igwa. An siring na pag-otro makakatabang sa saiya na magirumdoman an impormasyon.

⁵ An pagsasanay sa inaadalan sa Biblia na mag-andam nin marhay para sa saiyang pag-adal makakatabang sa saiya na makatao nin makahulogan na mga komento sa mga pagtiripon kan kongregasyon. Makakatabang man iyan sa saiya na makapatalubo nin ugale sa pag-adal na mapapakinabangan nia dawa haloy na siang natapos na adalan sa Biblia.

Bagong Probisyon na Matabang sa Sato na Lumikay sa Dugo

Inaprobaran kan Namamahalang Grupo an sarong bagong dokumento na may titulong Durable Power of Attorney for Health Care (DPA) na masalida sa dating Advance Medical Directive/Release card.

Kaipuhan nindong llenaran an DPA card, na balido sa panahon na daing talaan asin maserbing kapahayagan kan saindong mga kahagadan dawa kun kamo nagbibiahe sa ibang nasyon. Sa ngapit, maninigo kamong magllenar nin bagong DPA card kun (1) kaipuhan nindong gumibo nin ano man na pagliliwat sa saindong DPA card, arog baga nin pagliwat kan saindong mga kahagadan, mga representante sa pagpabolong, mga adres, asin mga numero nin telepono, o (2) nawara o naraot an saindong DPA card.

An DPA card maninigo na mapagngayongayong estudyaran asin maingat na llenaran sa harong. Minsan siring, bago pirmahan an card, seguradohon na an duwang testigo na pinili nindo presente sa pagpirma nindo kaiyan. Sa panapanahon puedeng hapoton kan mga paraataman sa pag-adal sa libro an mga dai pa nagllenar nin bagong card tangani na aramon kun kaipuhan an tabang.

Bago tiklopon an DPA card, magpaseroks nin malinaw para sa saindong representante sa pagpabolong, kasalihid na representante sa pagpabolong, asin doktor saka para sa saindong sadiring rekord. Tibaad boot man nindong tawan nin kopya an ibang miembro kan pamilya asin an sekretaryo kan kongregasyon. An mga kopya maninigo na bakong man-ibong-ibong sa papel na 8 1/2ʺ x 11ʺ, na nakasentro sa pahina an DPA card. An orihinal na DPA card, bakong an seroks, an maninigo na pirme nindong dara-dara.

Dai nagbago an Identity Card para sa dai pa bautisadong mga aki nin mga magurang na Saksi. Maninigo na seguradohon nin mga magurang na an card para sa lambang menor de edad na aki nallenaran nin tama asin pirmado saka dara-dara iyan kan aki sa angay na mga panahon.

Puedeng kopyahon kan dai pa bautisadong mga parahayag an lenguahe kan DPA card asin Identity Card tangani na sumurat nin mga instruksion sa pagpabolong para sa saindang sadiri asin sa saindang mga aki. Maninigo na tawan kan sekretaryo nin DPA card an gabos na parahayag na bagong mabautismohan sa laog kan taon.