Kabtang 6—Pagkondukta nin Progresibong mga Pag-adal sa Biblia

Kun Maghapot an Sarong Inaadalan sa Biblia

¹ Oras na establisado nang marhay an pag-adal sa Biblia, sa parate pinakamarahay na pag-olayan an mga katokdoan sa Biblia sa aregladong paagi imbes na magpabarobalyo sa laen-laen na tema. Nakakatabang ini sa inaadalan sa Biblia na makatogdok nin pundasyon nin tamang kaaraman asin umoswag sa espirituwal. (Col. 1:9, 10) Pero, sa parate naghahapot an mga inaadalan sa Biblia manongod sa manlaenlaen na tema durante kan pag-adal. Paano daw ini maninigong simbagon?

² Magin Mapagrisa: An mga hapot na konektado sa pinag-aadalan sa parate puedeng simbagon tolos-tolos. Kun an hapot totokaron sa huring kabtang kan pinag-aadalan na publikasyon, tibaad supisyenteng sabihon sana na totokaron iyan pag-abot sa kabtang na iyan. Minsan siring, kun an hapot bakong konektado sa pinag-aadalan o magkakaipo nin pagsiyasat tangani na masimbag iyan nin tama, tibaad mas marahay na pag-olayan an bagay na iyan pagkatapos kan pag-adal o sa ibang panahon. Nanompongan nin nagkapira na an pagsurat kan hapot nagsisierto sa inaadalan sa Biblia na sineseryoso an hapot nia asin nakakatabang iyan na dai mabago an direksion kan pag-adal.

³ An dakol na katokdoan sa Biblia tinotokar sana nin halipot sa satong pundamental na mga publikasyon na ginagamit sa pag-adal. Paano kun an inaadalan sa Biblia nadedepisilan na akoon an sarong katokdoan o nangangapot na marhay sa falsong paniniwala? Tibaad kapakipakinabang na pag-olayan an dugang pang publikasyon na nagpapaliwanag nin detalyado sa sinasabi kan Biblia manongod sa temang iyan. Kun dai pa giraray kombensido an inaadalan sa Biblia, itagama na sana an temang iyan sa ibang panahon asin ipadagos an regular na pag-adal sa saiya. (Juan 16:12) Mantang naghihiwas an saiyang kaaraman sa Biblia asin nag-ooswag sia sa espirituwal, puedeng masabotan na nia an katokdoan na iyan sa Biblia.

⁴ Magin Hababa an Boot: Kun bako kamong segurado sa simbag sa sarong hapot, labanan an sugot na magtao nin personal na opinyon. (2 Tim. 2:15; 1 Ped. 4:11) Ipaliwanag na sisiyasaton nindo an bagay na iyan asin mabalik kamo para sa simbag. Puede pa ngani nindong gamiton an oportunidad na tokdoan an inaadalan sa Biblia kun paano magsisiyasat. Gradwal na ipaheling sa saiya kun paano gagamiton an manlaenlaen na kasangkapan sa pagsiyasat na itinatao kan organisasyon ni Jehova. Paagi kaini masisimbag nia sa kahurihurihi an sadiri niang mga hapot.—Gibo 17:11.

Tabangan Sinda na Mag-ako nin Dugang Pang Patotoo

¹ Mantang ihinihiras niato an maogmang bareta, sa parate nakakanompong kita nin mga tawo na nag-iistar sa luwas kan teritoryo niato o na iba an lenguahe, kaiba na an pagtaram sa senyas. An iba na nakakaolay na niato nin paborable dapit sa Biblia tibaad maghale sa teritoryo niato. Paano daw niato ikakaareglo na an mga siring mag-ako nin dugang pang patotoo? Paagi sa paggamit kan pormang Please Follow Up (S-43).

² Sa parate an mga tawo naghihinanyog nin mas atento sa maogmang bareta kun iyan iinaatubang sa saindang nagimatan na lenguahe. (Gibo 22:1, 2) Huli kaini, sa kadaklan na kamugtakan, kun may nanonompongan kita na iba an lenguahe, maninigo niatong llenaran an porma dawa kun an saro dai nagpapaheling nin interes sa mensahe kan Kahadean. Minsan siring, kun igwa nin medyo dakulang teritoryo na iba an lenguahe na regular na napapatotoohan sa sadiri nindang lenguahe, tibaad dai na kaipuhan na llenaran an porma apuera kun nagpaheling nin interes.

³ Pagllenar kan Porma: Mataktikang hingoahon na kuanon an ngaran kan tawo, an saiyang adres, asin an saiyang numero nin telepono. Isurat kun gurano kainteresado an tawo, kun noarin sia puedeng maabotan, an ikinapasakamot o hinagad na babasahon, asin an lenguahe na nasasabotan niang marhay. Pakatapos na mallenaran an porma, itao tolos-tolos iyan sa sekretaryo kan kongregasyon, na mapadara man kaiyan sa angay na kongregasyon o grupo.

⁴ Pagpadara kan Porma: Kun dai aram kan sekretaryo kun arin na kongregasyon o grupo an maninigong padarahan kan porma o mayo sia nin adres sa koreo, puede nia iyan na ipadara paagi sa koreo sa sangang opisina tanganing ikapadara iyan sa angay na kongregasyon o grupo.

⁵ Kun an sarong kongregasyon o grupo makaresibi nin nallenaran na pormang Please Follow Up, maninigong gumibo nin mga areglo na songkoon tolos-tolos an tawong iyan. Mantang mahigos niatong ginigibo an satong kabtang, makakakompiar kita na bubuksan ni Jehova an puso kan mga “may tamang tendensia sa buhay na daing katapusan.”—Gibo 13:48.