An Aldaw ni Jehova Harani Na

¹ Galagang minamawot kan mga Kristiano an pagdatong kan aldaw ni Jehova, na paagi kaiyan lalaglagon nia an presenteng sistema nin mga bagay asin poponan an sarong bagong kinaban na may katanosan. (2 Ped. 3:12, 13, nota sa ibaba) Mantang dai niato aram nin eksakto kun noarin madatong an aldaw na iyan, dapat na papagdanayon niato an satong pagigin mapagbantay asin tabangan an iba na gibohon man iyan. (Ezeq. 33:7-9; Mat. 24:42-44) An paghorophorop sa makahulang Tataramon nin Dios mapakosog sa satong kombiksion na “an dakulang aldaw ni Jehova harani na.”—Sof. 1:14.

² Magkakasunod na mga Kapangyarihan Pankinaban: Arog kan nakasurat sa Kapahayagan 17:9-11, nasambitan ni apostol Juan an “pitong hade,” na nagrerepresentar sa magkakasunod na pitong kapangyarihan pankinaban. Nasambitan man ni Juan an “ikawalong hade,” na ngonyan nagrerepresentar sa Naciones Unidas. May linalaoman daw kitang iba pang kapangyarihan pankinaban na malataw? Mayo, an hula nagsasabi na an ikawalong hadeng ini ‘nagpasiring sa kalaglagan,’ na pakatapos kaiyan mayo nang dugang pang daganon na mga hade an nasambitan. Natatabangan daw kamo kan hulang ini na masabotan kun saen na kita sa sulog nin panahon?

³ Tinatabangan kita kan Daniel 2:31-45 na masabotan an nagdadangadang na aldaw ni Jehova. Sa hulang iyan, an dakulaon na imahen na naheling ni Nabucodonosor sa sarong pangatorogan nagrerepresentar sa magkakasunod na mga kapangyarihan pankinaban. Naglataw na an kada saro sa mga kapangyarihan pankinaban na ini. Saen na kita ngonyan sa dalagan nin kasaysayan? Sa peryodo na isinisimbolisar kan mga bitis kan imahen. Malinaw na marhay na ilinaladawan kan hula an sunod na mangyayari. Biyong lalaglagon an pamamahala nin tawo, na magtataong dalan para sa “sarong kahadean na dai noarin man malalaglag.” Nasasabotan daw nindo kun paano kaini ipinapaheling na an aldaw ni Jehova harani na?

⁴ Dugang Pang Ebidensia: Naheheling niato mismo an dugang pang ebidensia na an aldaw ni Jehova harani na. Naheheling na niato an kaotoban kan ihinula ni apostol Pablo mapadapit sa mga ugale nin mga tawo “sa huring mga aldaw.” (2 Tim. 3:1-5) Asin kita nakikikabtang sa panglobong pagpatotoo na dapat na itao bago dumatong an katapusan. (Mat. 24:14) Logod na an satong pampublikong ministeryo padagos na magpabanaag kan pagkaapurado kan ibinabalangibog kan anghel: “Matakot kamo sa Dios asin pamurawayon sia, huli ta nag-abot na an oras kan saiyang paghokom.”—Kap. 14:6, 7.

Kabtang 8—Pagkondukta nin Progresibong mga Pag-adal sa Biblia

Paggiya sa mga Inaadalan sa Biblia Pasiring sa Organisasyon

¹ An pasohan niato sa pagkondukta nin mga pag-adal sa Biblia bako sanang magtokdo nin doktrinal na impormasyon kundi tabangan man an mga inaadalan sa Biblia na magin kabtang kan Kristianong kongregasyon. (Zac. 8:23) An brosyur na Jehovah’s Witnesses—Who Are They? What Do They Believe? makakatabang sa sato na magibo ini. Magpasakamot nin kopya sa bagong mga inaadalan sa Biblia, asin enkaminaron sinda na basahon iyan. Dugang pa, magtao nin pirang minuto kada semana sa pag-adal tangani na ihiras an sarong punto manongod sa organisasyon ni Jehova.

² Mga Pagtiripon kan Kongregasyon: An mayor na paagi na maaapresyar kan mga inaadalan sa Biblia an organisasyon nin Dios iyo an pakikiasosyar sa sato sa mga pagtiripon kan kongregasyon. (1 Cor. 14:24, 25) Kun siring, puede nindong ponan na gibohon sindang pamilyar paagi sa pagsabi kun ano an limang semanal na pagtiripon, sarong pagtiripon sa kada pag-adal. Sambiton an titulo kan masunod na pampublikong pahayag. Ipaheling sainda an pag-aadalan sa Pag-adal sa Torrengbantayan asin sa Pag-adal sa Libro kan Kongregasyon. Sabihon kun ano an Teokratikong Paadalan sa Pagmiministro asin Pagtiripon sa Paglilingkod. Kun igwa kamo nin asignasyon sa paadalan, tibaad puede nindong ensayohon iyan kaiba ninda. Ihiras an marahayon na mga punto na iinatubang sa mga pagtiripon. Imbitaran sinda na umatender poon sa kaenot-enoteng pag-adal.

³ Kun nagdadangadang an Memorial, mga asamblea, patin pagsongko kan paraataman sa sirkito, magtao nin pirang minuto tangani na ipaliwanag asin pakosogon an entusiasmo para sa mga areglong ini. Gradwal na simbagon an mga hapot na siring kan: Taano ta inaapod kitang Mga Saksi ni Jehova? Taano ta inaapod niato na Kingdom Hall an satong mga lugar nin pagtiripon? Ano an mga katongdan kan kamagurangan asin ministeryal na mga lingkod? Paano inoorganisar an paghuhulit asin teritoryo? Paano pinoprodusir an satong mga babasahon? Paano ginagastosan an organisasyon? Ano an papel kan sangang opisina asin kan Namamahalang Grupo sa pagdirehir kan gibohon?

⁴ Nakakapagtokdong mga Video: An saro pang paagi na maheheling kan mga inaadalan sa Biblia an makangangalas na organisasyon ni Jehova iyo an mga video niato. Puede sindang darahon kaini sagkod sa kaporoporohi kan daga (video na To the Ends of the Earth), gibohon sindang pamilyar sa satong bilog na asosasyon nin magturugang (video na Our Whole Association of Brothers), asin ipaheling sa sainda kun paano kita nagkakasararo paagi sa pagtotokdo nin Dios (video na United by Divine Teaching). An sarong babae na limang taon nang nakakaresibi kan satong mga magasin asin iba pang literatura napaluha kan video na Jehovah’s Witnesses—The Organization Behind the Name. Nagkaigwa sia nin pagtitiwala sa mga Saksi na nagdalaw sa saiya, alagad pakadalan kan video, namatean nia na makakapagtiwala man sia sa organisasyon. Naponan an pormal na pag-adal sa saiya, asin kan sumunod na semana, nag-atender sia sa mga pagtiripon sa Kingdom Hall.

⁵ Paagi sa pagtao nin pirang minuto kada semana sa satong inaadalan sa Biblia, progresibo niatong magigiyahan an mga inaadalan sa Biblia pasiring sa sasarong organisasyon na ginagamit ni Jehova ngonyan.