An Paghuhulit Nakakatabang sa Sato na Magtagal

¹ Sinasadol kita kan Tataramon nin Dios na ‘dumalagan na may pakatagal sa paorumbasan na ibinugtak sa atubangan ta.’ (Heb. 12:1) Kun paanong an sarong paradalagan nangangaipo nin pakatagal tanganing manggana, kaipuhan man niato an pakatagal tanganing kamtan an premyong buhay na daing katapusan. (Heb. 10:36) Paano makakatabang sa sato an Kristianong ministeryo na makatagal nin maimbod sagkod sa katapusan?—Mat. 24:13.

² Napapakosog sa Espirituwal: An pagbalangibog niato kan makangangalas na panuga kan Biblia na sarong matanos na bagong kinaban nakakatabang sa sato na mapagdanay na malinaw an sato mismong paglaom. (1 Tes. 5:8) Kun kita regular na nakikikabtang sa ministeryo sa langtad, may oportunidad kitang ipaaram an mga katotoohan na nanodan niato sa Biblia. May oportunidad kitang idepensa an satong pagtubod, na bilang resulta nakakatabang na pakosogon kita sa espirituwal.

³ Tanganing makapagtokdo nin epektibo sa iba, dapat na masabotan niato mismo nin malinaw an mga katotoohan sa Biblia. Kaipuhan kitang magsiyasat asin maghorophorop sa pinag-aadalan. An ginigibo niatong odok na paghihingoa nagpapararom kan satong kaaraman, nagpapakosog kan satong pagtubod, asin nagpaparepresko sa sato sa espirituwal. (Tal. 2:3-5) Sa siring, mantang hinihingoa niato na tabangan an iba, napapakosog niato an satong sadiri.—1 Tim. 4:15, 16.

⁴ An maigot na pakikikabtang sa ministeryo sarong mahalagang marhay na kabtang kan “bilog na pangalasag hale sa Dios,” na kaipuhan niato tanganing makatindog nin marigon tumang sa Diablo asin sa mga demonyo. (Efe. 6:10-13, 15) An pagigin sibot niato sa sagradong paglilingkod nakakatabang sa sato na mapagdanay an satong isip na nakapokus sa mga bagay na nakakapakosog asin makalikay na maimpluwensiahan kan kinaban ni Satanas. (Col. 3:2) Mantang itinotokdo niato sa iba an mga dalan ni Jehova, padagos kitang napapagirumdoman kan sato mismong pangangaipo na papagdanayon an banal na paggawe.—1 Ped. 2:12.

⁵ Tinatawan nin Kosog nin Dios: Ultimo, an pakikikabtang niato sa pag-ebanghelyo nagtotokdo sa sato na manarig ki Jehova. (2 Cor. 4:1, 7) Kanigoan na bendisyon iyan! An pakapatalubo niato nin siring na pagtitiwala bako sanang sinasangkapan kita na otobon an satong ministeryo kundi makaya man an ano man na mga kamugtakan na tibaad atubangon niato sa buhay. (Fil. 4:11-13) Tunay nanggad, an pakanood na biyong manarig ki Jehova iyo an liabe sa pakatagal. (Sal. 55:22) Sa dakol na paagi, an paghuhulit nakakatabang sa sato na magtagal.

Kabtang 9—Pagkondukta nin Progresibong mga Pag-adal sa Biblia

Pag-andam sa mga Inaadalan sa Biblia na Magpatotoo nin Impormal

¹ Kan marealisar ni Andres asin Felipe na si Jesus iyo an ipinanugang Mesiyas, dai ninda mapogolan na sabihon sa iba an nakakaogmang bareta. (Juan 1:40-45) Siring man ngonyan, mantang an mga inaadalan sa Biblia nagpopoon na magtubod sa saindang nanonodan, itinutulod sinda na magtaram manongod dian. (2 Cor. 4:13) Paano daw niato sinda madadagka na magpatotoo nin impormal asin andamon sinda na gibohon iyan nin epektibo?

² Puedeng hapoton sana nindo an inaadalan sa Biblia kun baga nasasabi na nia sa iba an manongod sa saiyang nanonodan sa Biblia. Tibaad may mga katood asin kapamilya na puede niang agdahon na umiba kun kamo nag-aadal. Hapoton sia kun igwa sa saiyang mga katrabaho, kaeskuela, o iba pang kamidbid na nagpahayag nin interes. Sa paaging ini puede na siang magpoon na magpatotoo. Tabangan siang masabotan an pangangaipo na magin mapagrisa asin magin magalang patin maboot kun nakikipag-olay sa iba manongod ki Jehova Dios asin sa saiyang mga katuyohan.—Col. 4:6; 2 Tim. 2:24, 25.

³ Pagsabi sa Iba kan Saindang mga Tinutubod: Mahalagang marhay na sanayon an mga inaadalan sa Biblia na gamiton an Tataramon nin Dios kun sinasabi sa iba an saindang mga tinutubod. Sa piniling mga kabtang durante kan pag-adal, hapoton an inaadalan sa Biblia: “Paano mo gagamiton an Biblia tanganing ipaliwanag an katotoohan na ini sa saimong pamilya?” o “Anong teksto sa Biblia an gagamiton mo tanganing patunayan ini sa sarong katood?” Obserbaran kun paano sia sumimbag, asin ipaheling sa saiya kun paano ibabasar sa Kasuratan an saiyang itinotokdo. (2 Tim. 2:15) Sa paggibo kaiyan, inaandam nindo an inaadalan sa Biblia na magpatotoo nin impormal asin, kun kualipikado na sia, sa organisadong paghuhulit kaiba kan kongregasyon.

⁴ Madonong na andamon an mga inaadalan sa Biblia na atubangon an pagtumang. (Mat. 10:36; Luc. 8:13; 2 Tim. 3:12) Kun an iba naghahapot o may sinasabi manongod sa mga Saksi ni Jehova, puede ining magbukas nin dalan tanganing makapagpatotoo an mga inaadalan sa Biblia. An brosyur na Jehovah’s Witnesses—Who Are They? What Do They Believe? puedeng makatabang sa sainda na magin “andam na gumibo nin pagdepensa.” (1 Ped. 3:15) Igwa iyan nin eksaktong impormasyon na magagamit kan mga bagohan tanganing tabangan an may marahay na intension na mga katood asin kapamilya na masabotan an satong mga tinutubod asin aktibidad na basado sa Biblia.