Sarong Utang Niato sa Iba

¹ Nakamate si apostol Pablo nin obligasyon na maghulit sa mga tawo. Aram nia na pinagin posible ni Jehova na maligtas an gabos na klase nin tawo paagi sa mahal na marhay na dugo kan Saiyang Aki. (1 Tim. 2:3-6) Kun siring, nagsabi si Pablo: “Ako may utang sa mga Griego sagkod sa mga Barbaro, sa mga madonong sagkod sa mga daing isip.” Gustong-gusto nia asin daing kapagalan na nagmaigot sia na bayadan an saiyang utang sa saiyang mga kapwa tawo paagi sa paghiras sa sainda kan maogmang bareta.—Roma 1:14, 15.

² Arog ni Pablo, hinihingoa kan mga Kristiano ngonyan na ihiras an maogmang bareta sa saindang mga kataed sa gabos na oportunidad. Apretado an paghanap niato sa mga sadiosan an puso huling marikas nang nagdadangadang an “dakulang kahorasaan.” Tunay na pagkamoot logod sa mga tawo an magpahiro sa sato na magin mahigos sa gibohon na ini na nagliligtas-buhay.—Mat. 24:21; Ezeq. 33:8.

³ Pagbayad kan Satong Utang: An mayor na paagi na nakakaolay niato an mga tawo iyo an paghuhulit sa harong-harong. Sa mga teritoryo na dakol an mayo nin mga tawo sa harong, an pagkaigwa nin tamang rekord asin pagdalaw liwat sa laen-laen na oras pangyayarihon kita na makaolay an mas dakol na tawo. (1 Cor. 10:33) Makakaolay man niato an mga indibiduwal paagi sa pagpapatotoo sa komersial na teritoryo, sa mga tinampo, sa mga parke, sa paradahan, asin paagi sa telepono. Puede niatong hapoton an satong sadiri, ‘Ginigibo ko daw an pinakamakakaya ko na pagmaigotan na magibo an gabos na paagi nin paghuhulit tanganing ikahiras an mensahe nin buhay?’—Mat. 10:11.

⁴ An sarong payunir nakamate nin dakulaon na paninimbagan na makaolay an gabos na tawo sa saiyang teritoryo. Sa sarong harong, pirmeng sirado an mga bintana asin mayo ni saro kasuarin man na nasa harong. Minsan siring, sarong aldaw kan dai naglingkod an payunir, may nariparo siang sarong kotse na nasa atubangan kan harong na ini na pirmeng mayo nin tawo. Huling habong palihison an oportunidad na iyan, nagtimbre sia. Sarong lalaki an nagluwas, asin an enot na pakikipag-olay nagresulta sa nagkapirang pagdalaw liwat kan tugang na babaeng ini asin kan saiyang agom. Pag-abot nin panahon, nag-ako an lalaki nin pag-adal sa Biblia, asin ngonyan sia saro nang bautisadong tugang. Nagpapasalamat sia na an tugang na babaeng ini nakamate nin paninimbagan na maghulit sa iba.

⁵ Huling marikas nang nauubos an panahon, ngonyan na an panahon na bayadan an utang niato sa satong kapwa tawo paagi sa maigot na paghihingoa niato sa gibohon na paghuhulit.—2 Cor. 6:1, 2.

Kabtang 10—Pagkondukta nin Progresibong mga Pag-adal sa Biblia

Pagsasanay sa mga Inaadalan sa Biblia sa Ministeryo sa Harong-Harong

¹ Kun madeterminaran kan kamagurangan na kualipikado na an sarong inaadalan sa Biblia bilang dai pa bautisadong parahayag, puede na siang pumoon na makikabtang kaiba kan kongregasyon sa pampublikong paghuhulit. (Helingon an Organisado sa Paggibo kan Kabotan ni Jehova, p. 79-81.) Paano niato matatabangan an inaadalan sa Biblia na makayang atubangon an angat sa paghuhulit sa harong-harong?

² Pag-andam na Magkaibanan: Kaipuhan na marhay an marahay na pag-andam. Ipaheling sa inaadalan sa Biblia kun saen sia makakakua nin suhestion na mga pag-atubang sa An Satong Ministeryo sa Kahadean asin sa librong Reasoning, asin tabangan sia na pumili nin sarong simpleng pag-atubang na praktikal para sa lokal na teritoryo. Sa kapinonan, enkaminaron sia na itampok an Biblia sa saiyang ministeryo.—2 Tim. 4:2.

³ An mga sesyon sa pag-ensayo kapakipakinabang na marhay para sa sarong bagong parahayag. Mantang nag-eensayo kan pag-atubang an inaadalan sa Biblia, ipaheling sa saiya kun paano mataktikang aatubangon an mga reaksion na parateng nangyayari sa teritoryo. (Col. 4:6) Siertohon sa saiya na dai kaipuhan na aram kan Kristianong mga ministro an simbag sa gabos na puedeng ihapot nin kagharong. Parateng pinakamarahay na simbagon an siring na mga hapot paagi sa pagsabi na sisiyasaton nindo iyan asin madalaw liwat kamo tangani na pag-olayan pa an bagay na iyan.—Tal. 15:28.

⁴ Paghuhulit na Magkaibanan: Sa kaenot-enoteng pakikikabtang kan inaadalan sa Biblia sa ministeryo sa harong-harong, paobserbaron nindo sia mantang itinatao nindo an pag-atubang na magkaibanan nindong inandam. Dangan papartisiparon sia. Sa nagkapirang kamugtakan, tibaad pinakamarahay na kabtang sana kan pag-atubang an itao kan bagong parahayag, arog baga nin pagbasa asin pagkomento sa sarong teksto. Konsideraron an personalidad asin abilidad kan inaadalan sa Biblia. (Fil. 4:5) Magin matinao nin komendasyon mantang sia progresibong sinasanay nindo sa manlaenlaen na aspekto kan paghuhulit.

⁵ Mahalagang tabangan an sarong bagong parahayag na mag-establisar nin regular na iskedyul para sa pakikikabtang sa ministeryo, na ginigibo iyan nin semanal kun posible. (Fil. 3:16) Gumibo nin depinidong mga areglo na mag-ibanan sa paglilingkod, asin enkaminaron sia na makiiba man sa iba pang maigot na mga parahayag. An halimbawa asin pakikiasosyar ninda matabang sa saiya na luway-luway na magkaigwa nin abilidad asin makanompong nin kagayagayahan sa paghuhulit sa harong-harong.