Magkultibar nin Interes Paagi sa Ruta sa Magasin

1. Paano niato magagamit an ruta sa magasin sa pagkultibar nin interes?

¹ Dakol na tawo na nanonompongan niato sa ministeryo an maogmang nag-aako kan satong mga pagdalaw asin maogmang nag-aako nin mga babasahon niato alagad nag-aalangan na umoyon sa regular na pag-adal sa Biblia. An sarong paagi na makultibar an interes ninda iyo an ruta sa magasin. Kun makapasakamot kamo nin mga magasin, isurat an ngaran asin adres kan tawo, an petsa kan pagdalaw, an mga isyu na inako, asin an teksto na pinag-olayan, kaiba an ano man na nariparo nindo na puedeng magparisa kan mga pinagkakainteresan nia. Pag-abot kan kada bagong isyu kan mga magasin, hanapon an mga punto na makakaakit sa saindong mga ruta sa magasin, asin itampok iyan pagdalaw nindo. (1 Cor. 9:19-23) Pag-abot nin panahon, an nabasa ninda sa satong mga magasin tibaad makapukaw kan interes ninda asin magin dahelan na booton ninda na makanood nin orog pa.

2. Taano ta apurado na ngonyan na hanapon nin mga tawo si Jehova, asin ano pa an magigibo niato tangani na matabangan sinda?

² Pero minimidbid niato na an kadaklan na tawo dai magigin mga lingkod ni Jehova paagi sana sa sadiri nindang pagbasa kan mga magasin. Mantang apurado na ngonyan na hanapon nin mga tawo si Jehova, ano pa an magigibo niato tangani na matabangan sinda? (Sof. 2:2, 3; Kap. 14:6, 7) Makukultibar niato an interes ninda paagi sa paghiras nin sarong maingat na piniling teksto kada paghatod niato kan mga magasin.

3. (a) Paano kita makakapag-andam nin sunod-sunod na mga pakikipag-olay na saro sanang teksto an ginagamit? (b) Anong mga tema an ikinakahadit nin labi-labi nin mga tawo sa saindong teritoryo?

³ Mga Pakikipag-olay na Saro Sanang Teksto an Ginagamit: Isip-isipa an saindong mga ruta sa magasin, asin mag-andam nin sunod-sunod na mga pakikipag-olay na saro sanang teksto an ginagamit para sa espesipikong mga pangangaipo nin lambang saro. (Fil. 2:4) Halimbawa, kun igwa nin nagadanan nin namomotan kasuarin pa sana, puede kamong dumalaw liwat nin nagkapirang beses tangani na ipakipag-olay an sinasabi kan Biblia manongod sa kamugtakan kan mga gadan asin sa paglaom na pagkabuhay liwat. An materyales na nasa librong Reasoning sa irarom kan mayor na mga temang “Death” asin “Resurrection” puedeng gamiton sa pag-andam nin mga pakikipag-olay na ini na saro sanang teksto an ginagamit. An dugang pang pakikipag-olay manongod sa konektadong mga tema, arog kan kun paano lubos nang hahaleon an helang, paggurang, asin kagadanan, tibaad natural na sanang sumunod. An pinakaliabe iyo an paghanap nin sarong tema na pagkakainteresan kan tawong iyan asin progresibong ipaheling sa saiya kun ano an sinasabi kan Biblia manongod dian.

4. Taano ta importante na magtao nin pakasabot kun ginagamit niato an Kasuratan, asin paano niato iyan magigibo?

⁴ Magtao nin Pakasabot: Minsan ngani sa parate pinakamarahay na papagdanayon na simple asin halipot an siring na mga pakikipag-olay, orog pa an kaipuhan kisa pagbasa sana kan piniling teksto. Binuta ni Satanas an isip nin mga tawo sa maogmang bareta. (2 Cor. 4:3, 4) Minsan an mga pamilyar sa Biblia nangangaipo nin tabang tangani na masabotan iyan. (Gibo 8:30, 31) Huli kaini, magtao nin panahon na ipaliwanag asin iilustrar an teksto, arog man sana kun mapahayag kamo sa Teokratikong Paadalan sa Pagmiministro. (Gibo 17:3) Seguradohon na nasasabotan kan tawo an praktikal na halaga kan Tataramon nin Dios sa saiya mismong buhay.

5. Paano puedeng magin pag-adal sa Biblia an pagdalaw sa ruta sa magasin?

⁵ Kun ikinakaogma nin saro an saiyang nanonodan, luway-luway na palawigon an pakikipag-olay tangani na ikaiba an duwa o tolong teksto sa Biblia kada pagdalaw. Humanap nin oportunidad na iintrodusir an brosyur na Kahagadan o an librong Kaaraman. Paagi kaini, an pagdalaw sa ruta sa magasin puedeng magin pag-adal sa Biblia pag-abot nin panahon.

Kun Ano an Sasabihon Manongod sa mga Magasin

An Torrengbantayan Mayo 15

“Sa paghona daw nindo maheheling pa niato an sarong kinaban na mayo na nin kadukhaan? [Pasimbagon.] Mangnoha an ipinanuga nin Dios. [Basahon an Isaias 65:21.] Tinotokar kan isyung ini kan An Torrengbantayan kun paano magkakatotoo an panugang ini.” Iareglo na madalaw liwat tangani na ipakipag-olay an hapot na: Noarin mangyayari an ipinanuga na pagbabagong ini?

Awake! Mayo 22

“Napag-araman nin kadaklan na tawo na an ehersisyo importante para sa marahay na salud, pero inaadmitir nin dakol na dai sinda nag-eehersisyo nin igo. Totoo daw iyan? [Pasimbagon.] Sinisiyasat kan magasin na ini an mga pakinabang sa regular na ehersisyo asin isinusuherir kaini an nagkapirang paagi na iyan matatawan niato nin lugar sa satong sibot na buhay.”

An Torrengbantayan Hun. 1

“Minsan ngani haros gabos nagtataram manongod sa katoninongan, dai nakakamtan nin katawohan an pankinaban na pagkasararo. Sa paghona daw nindo saro sanang pangatorogan an pagkamit kaiyan? [Pasimbagon.] Dinadara kan magasin na ini an atension sa sarong gobyerno na may kakayahan na pagsararoon an kinaban.” Basahon an Salmo 72:7, 8, asin iareglo na madalaw tangani na ipakipag-olay kun paano ini mangyayari.

Awake! Hun. 8

“Nariparo daw nindo na dakol na tawo an nahahadit manongod sa paorog nang paorog na paglakop nin kanser sa kublit? [Pasimbagon.] Sinisiyasat kan isyung ini kan Awake! kun taano ta tibaad mas dakula an peligro sa sato ngonyan asin kun ano an magigibo niato tangani na protehiran an satong sadiri.” Taposon paagi sa paghiras nin nakakarangang panuga na yaon sa Job 33:25.