Kun Paano Gagamiton an Sampol nin mga Pag-atubang

1. Paano niato maninigong mansayon an itinataong sampol nin mga pag-atubang?

¹ Regular na nagluluwas sa An Satong Ministeryo sa Kahadean an sampol nin mga pag-atubang para sa pag-alok kan satong mga magasin asin iba pang publikasyon. Kun nakikikabtang sa ministeryo, dai niato kaipuhan na otrohon nin eksakto segun sa pagkasurat an isinuherir na mga pag-atubang na ini. Itinatao iyan tangani na magkaigwa kita nin ideya kun ano an puede niatong sabihon. Sa parate, magigin mas epektibo kita kun sasabihon niato sa sadiri niatong mga tataramon an mga pag-atubang. An pagpahayag kan satong sadiri sa natural na paagi nakakatabang na magin pamugtak an boot kan kagharong asin nagpapaheling nin sinseridad asin kombiksion.—2 Cor. 2:17; 1 Tes. 1:5.

2. Taano ta kaipuhan niatong konsideraron an lokal na mga kaugalean kun nag-aandam nin mga pag-atubang?

² Ibagay an Saindong Pag-atubang: An satong pag-atubang kan maogmang bareta apektadong marhay kan lokal na mga kaugalean. Puede daw nindong taratarahon an kagharong dangan ilaog sa orolay an saindong pag-atubang, o linalaoman daw kan mga tawo sa teritoryo nindo na sabihon na tolos nindo an tuyo nindo? Iyan nagkakalaenlaen sa lambang lugar asin kun beses dawa sa lambang tawo. Kaipuhan man nin pagigin mapagrisa sa paggamit nin mga hapot. An mga hapot na angay sa nagkapirang lugar tibaad nakakauyam sa mga tawo sa ibang lugar. Huli kaini, dapat kitang gumamit nin marahay na paghusgar asin ibagay an satong mga pag-atubang oyon sa kun ano an puede sa lokal.

3. Taano ta dapat na konsideraron an pinaghalean asin kaisipan kan mga nakakaolay niato?

³ Dugang pa, kaipuhan niatong konsideraron an pinaghalean asin kaisipan kan mga tawo sa satong teritoryo kun nag-aandam para sa paglilingkod sa langtad. Halimbawa, posibleng marhay na magigin laen an pakikipag-olay nindo kan Mateo 6:9, 10 sa sarong debotong Katoliko kisa paagi nin pakikipag-olay nindo sa saro na bakong pamilyar sa pamibi na “Ama Niamo.” Paagi sa dikit na pagplano antes pa, sa parate puede niatong ibagay an satong mga pag-atubang tangani na iyan magin mas nakakaakit sa mga tawo na nanonompongan niato sa ministeryo.—1 Cor. 9:20-23.

4. Taano ta mahalagang marhay an marahay na pag-andam?

⁴ Dawa kun plano niatong gumamit nin sampol nin pag-atubang na haros arog kan nakasurat, mayo pa man giraray nin ikakasalida sa marahay na pag-andam. Maninigo na maingat niatong basahon an artikulo o kapitulo na plano niatong itampok asin hanapon an mga punto na puedeng makapukaw nin interes. Dangan iiba ini sa satong pag-atubang. Paagi sana sa pagigin pamilyar sa marahayon na impormasyon sa satong mga publikasyon na ikakaalok niato iyan na may entusiasmo.

5. Taano ta puede kitang mag-andam nin ibang pag-atubang, asin paano niato iyan magigibo?

⁵ Iba Pang Pamamaagi: An dapat sana daw na gamiton niato iyo an mga pamamaagi na itinatao sa sampol nin mga pag-atubang? Dai. Kun mas komportable kamo sa ibang pamamaagi o ibang teksto, gamiton iyan. Espesyalmente sa mga magasin, magin listo sa mga oportunidad na itampok an sekondaryong mga artikulo na tibaad nangorognang interesante sa saindong teritoryo. Kun idedemonstrar sa Pagtiripon sa Paglilingkod an mga pag-atubang para sa paglilingkod sa langtad, puedeng gumibo nin mga areglo na idemonstrar an ano man na pamamaagi na epektibo sa lokal na teritoryo. Paagi kaini, puedeng matabangan an gabos na epektibong iatubang an maogmang bareta.

Kun Ano an Sasabihon Manongod sa mga Magasin

An Torrengbantayan Ene. 15

“Kita gabos nagmamawot nin mas marahay na buhay para sa satong sadiri asin sa satong mga aki, alagad dakol an may pagmate na sinda daing kakayahan tangani na makamit iyan. Sa paghona daw nindo puede niatong kontrolon an satong ngapit? [Pasimbagon.] Ipinapaheling kan magasin na ini basado sa Biblia na kita bakong daing kakayahan kundi na an satong ngapit nakadepende sa mga pagpili na ginigibo niato ngonyan.” Basahon an Deuteronomio 30:19.

Awake! Ene. 22

“Kun napapaatubang kita sa mga problema sa salud, inaapresyar niato gabos an doktor na kinokonsiderar an satong mga saboot. Alagad sa paghona daw nindo dakol na pasyente an minapondo nguna tangani na konsideraron an mga saboot kan saindang doktor? [Pasimbagon.] Sinisiyasat kan magasin na ini an mga angat na inaatubang nin mga doktor asin kun ano an nakatagama sa ngapit para sa pagdodoktor.” Basahon an Isaias 33:24.

An Torrengbantayan Peb. 1

“Bako daw nakakapurisaw na kadakol na tawo ngonyan an biktima nin pan-aapi asin kadahasan? [Magsambit nin sarong halimbawa sa presente na aram sa lokal, asin pasimbagon.] Tinotokar kan magasin na ini kun paano minamansay nin Dios an buhay nin tawo. Ipinapaliwanag man kaiyan kun paano nia kita kakaldahon sa pagdusa na nangyayari ngonyan.” Basahon an Salmo 72:12-14.

Awake! Peb. 8

“An saro sa pinakadakulang angat sa sato ngonyan iyo an kun paano makakayanan na atubangon an tension. Minaoyon daw kamo? [Pasimbagon.] Ihinula nin eksakto kan Biblia na ini an magigin kamugtakan. [Basahon an 2 Timoteo 3:1.] An magasin na ini nagtatao nin praktikal na mga suhestion na makakatabang sa saindo asin sa saindong pamilya na makayanan na atubangon an tension.”