SA ORIHINAL na mga lenguahe kaiyan, ginagamit kan Biblia an termino sa Hebreo na sheʼohlʹ asin an katimbang kaiyan sa Griego na haiʹdes nin labing 70 beses. An duwang terminong iyan pareho konektado sa kagadanan. An nagkapirang traduksion kan Biblia tinatradusir iyan na “lolobngan,” “impierno,” o “kotkot.” Minsan siring, sa kadaklan na lenguahe mayo nin mga termino na nagpapahayag kan eksaktong kahulogan kan mga terminong ini sa Hebreo asin Griego. Kun siring, ginagamit kan New World Translation an mga terminong “Sheol” asin “Hades.” Ano man nanggad an kahulogan kan mga terminong ini? Mangnohon niato kun paano iyan ginamit sa laen-laen na teksto sa Biblia.

An Eclesiastes 9:10 nagsasabi: “Mayo nin gibohon ni pagplano ni kaaraman ni kadonongan sa Sheol, an lugar na saimong papadumanan.” Nangangahulogan daw ini na an Sheol nanonongod sa sarong espesipikong lolobngan na tibaad pinaglobngan niato kan satong namomotan? Dai. Kun an Biblia nagtataram manongod sa sarong espesipikong lolobngan, iyan naggagamit nin ibang mga termino sa Hebreo asin Griego, bakong sheʼohlʹ asin haiʹdes. (Genesis 23:7-9; Mateo 28:1) Siring man, an Biblia dai naggagamit kan terminong “Sheol” para sa lolobngan na duman iribang ilinolobong an nagkapirang tawo, siring baga sa lolobngan nin pamilya o panlagdoan na lolobngan.​—Genesis 49:30, 31.

Kun siring, sa anong klaseng lugar nanonongod an “Sheol”? Ipinaparisa kan Tataramon nin Dios na an “Sheol,” o “Hades,” nanonongod sa bagay na labi pa ngani kisa sarong dakulang panlagdoan na lolobngan. Halimbawa, sinasabi sa Isaias 5:14 na an Sheol ‘mahiwas asin biyong ibinuka an bunganga kaiyan na daing sagkodan.’ Minsan ngani an Sheol nakahamil na, sabi ngani, nin dai mabilang na mga tawong nagadan, iyan garo baga pirmeng gutom pa. (Talinhaga 30:15, 16) Bakong arog kan arin man na literal na lolobngan, na limitado sana an ikakalaog na mga gadan, ‘an Sheol dai naninigoan.’ (Talinhaga 27:20) An boot sabihon, an Sheol dai noarin man napapano. Mayo iyan nin limite. Sa siring, an Sheol, o Hades, bakong literal na lugar na may espesipikong namumugtakan. Imbes, iyan an pankagabsan na lolobngan nin katawohan, an piguratibong lugar na dian an kadaklan kan katawohan nagtotorog sa kagadanan.

An katokdoan kan Biblia manongod sa pagkabuhay liwat nakakatabang sato na magkaigwa nin orog pang pakarorop sa kahulogan kan “Sheol” asin “Hades.” Ikinokonektar kan Tataramon nin Dios an Sheol asin Hades sa klase nin kagadanan na magkakaigwa nin pagkabuhay liwat.a (Job 14:13; Gibo 2:31; Kapahayagan 20:13) Ipinapaheling man kan Tataramon nin Dios na an mga yaon sa Sheol, o Hades, bako sanang an mga naglingkod ki Jehova kundi siring man an dakol na dai naglingkod sa saiya. (Genesis 37:35; Salmo 55:15) Kun siring, itinotokdo kan Biblia na magkakaigwa nin “pagkabuhay liwat an mga matanos sagkod an mga bakong matanos.”​—Gibo 24:15.

ANO an naiimahinar nindo sa Aldaw nin Paghokom? Dakol an nag-iisip na saro-sarong papaatubangon sa trono nin Dios an binilyon na kalag. Duman, hohokoman an balang indibiduwal. May mga babalosan nin glorya sa langit, asin an iba kokondenaron sa daing sagkod na pasakit. Minsan siring, laen nanggad an paglaladawan kan Biblia sa peryodong ini nin panahon. Ilinaladawan iyan kan Tataramon nin Dios, bakong bilang nakakasindak na panahon, kundi bilang sarong panahon nin paglaom asin pagbabalik sa dati.

Sa Kapahayagan 20:11, 12, mababasa niato an deskripsion ni apostol Juan sa Aldaw nin Paghokom: “Naheling ko an sarong dakulang puting trono asin si nagtutukaw dian. Hale sa saiyang atubangan an daga asin an langit nagdulag, asin mayo na nin nakuang lugar para sa sainda. Asin naheling ko an mga gadan, an darakula asin an saradit, na nagtitindog sa atubangan kan trono, asin an mga balumbon biniriklad. Alagad saro pang balumbon an biniklad; iyan an balumbon nin buhay. Asin hinokoman an mga gadan sono sa mga bagay na nasusurat sa mga balumbon segun sa saindang mga gibo.” Siisay an Hokom na ilinaladawan digdi?

Si Jehova Dios an supremong Hokom nin katawohan. Minsan siring, idinelegar nia an aktuwal na paghohokom. Segun sa Gibo 17:31, sinabi ni apostol Pablo na an Dios “nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan.” An ninombrahan na Hokom na ini iyo an binuhay liwat na si Jesu-Cristo. (Juan 5:22) Pero, noarin mapoon an Aldaw nin Paghokom? Gurano iyan kalawig?

Ipinapaheling kan librong Kapahayagan na an Aldaw nin Paghokom mapoon pakatapos kan guerra nin Armagedon, kun laglagon na an sistema ni Satanas digdi sa daga.a (Kapahayagan 16:14, 16; 19:19–​20:3) Pagkatapos kan Armagedon, si Satanas asin an saiyang mga demonyo ibibilanggo sa sarong bungaw sa laog nin sangribong taon. Sa panahon na iyan, an 144,000 na langitnon na kairibang paramana magigin mga hokom asin mamamahala “bilang mga hade kaiba kan Cristo sa laog nin sangribong taon.” (Kapahayagan 14:1-3; 20:1-4; Roma 8:17) An Aldaw nin Paghokom bakong sarong inapurang pangyayari na malawig sana nin 24 oras. Iyan malawig nin sangribong taon.

Durante kan peryodong iyan nin sangribong taon, si Jesu-Cristo ‘maghohokom sa mga buhay asin sa mga gadan.’ (2 Timoteo 4:1) An “mga buhay” iyo an “dakulang kadaklan” na makakaligtas sa Armagedon. (Kapahayagan 7:9-17) Naheling man ni apostol Juan “an mga gadan . . . na nagtitindog sa atubangan kan trono” nin paghokom. Siring kan ipinanuga ni Jesus, ‘an gabos na nasa mga lolobngan na girumdoman makakadangog kan tingog ni Cristo asin maruluwas’ paagi sa pagkabuhay liwat. (Juan 5:28, 29; Gibo 24:15) Alagad basado sa ano hohokoman an gabos?

Segun sa bisyon ni apostol Juan, “an mga balumbon biniriklad,” asin “hinokoman an mga gadan sono sa mga bagay na nasusurat sa mga balumbon segun sa saindang mga gibo.” An mga balumbon daw na ini rekord kan nakaaging mga ginibo nin mga tawo? Bako, an paghokom dai ibabasar sa mga ginibo nin mga tawo bago sinda nagadan. Paano niato iyan naaaraman? An Biblia nagsasabi: “An nagadan absuelto na sa saiyang kasalan.” (Roma 6:7) Sa siring an mga binuhay liwat mabubuhay na malinig an rekord, sabi ngani. Kun siring, an mga balumbon siertong nagrerepresentar sa dugang pang mga kahagadan nin Dios. Tanganing mabuhay sagkod lamang, an mga makakaligtas sa Armagedon sagkod an mga binuhay liwat kaipuhan na kumuyog sa mga togon nin Dios, kaiba an ano man na bagong mga kahagadan na tibaad ihayag ni Jehova durante kan sangribong taon. Sa siring, an mga indibiduwal hohokoman basado sa gigibohon ninda durante kan Aldaw nin Paghokom.

An Aldaw nin Paghokom matao sa binilyon na tawo kan primerong oportunidad ninda na makanood manongod sa kabotan nin Dios asin sumunod dian. Nangangahulogan ini na magkakaigwa nin pagtotokdo na mahiwason an sakop. Tunay na “an katanosan iyo nanggad an manonodan kan mga nag-eerok sa mabungang daga.” (Isaias 26:9) Minsan siring, dai gugustohon kan gabos na sumunod sa kabotan nin Dios. An Isaias 26:10 nagsasabi: “Minsan pa pahelingan nin marahay na boot an sarong maraot, dai nanggad sia makakanood nin katanosan. Sa daga nin katanosan sia magibo nin bakong makatanosan asin dai makakaheling kan kalangkawan ni Jehova.” An mga maraot na ini gagadanon nin permanente durante kan Aldaw nin Paghokom.​—Isaias 65:20.

Sa katapusan kan Aldaw nin Paghokom, an mga makakaligtas ‘mabubuhay’ na nin lubos bilang mga tawong sangkap. (Kapahayagan 20:5) Sa siring, sa Aldaw nin Paghokom an katawohan ibabalik sa orihinal na sangkap na kamugtakan kaini. (1 Corinto 15:24-28) Dangan magkakaigwa nin pangultimong pagbalo. Si Satanas bubutasan sa saiyang pagkabilanggo asin totogotan na probaran na dayaon an katawohan nin saro na sanang beses. (Kapahayagan 20:3, 7-10) Makakamtan kan mga makontra sa saiya an lubos na kaotoban kan panuga kan Biblia: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) Iyo, an Aldaw nin Paghokom magigin sarong bendisyon sa gabos na maimbod na katawohan!