Hapot

◼ Maninigo daw na mamibi kun nagkokondukta nin pag-adal sa Biblia sa may pinto?

Mantang nagkakalaenlaen an mga kamugtakan, kaipuhan kan nagkokondukta kan pag-adal na aramon an mga bagay-bagay tangani na makadesisyon kun baga mamimibi sa pag-adal sa Biblia sa may pinto. An sarong bagay na kokonsideraron iyo an pinaghalean kan inaadalan sa Biblia. An Satong Ministeryo sa Kahadean na Abril 2005, pahina 8, nagsasabi: “Tama na ponan asin taposon paagi sa pamibi an establisado nang pag-adal. Sa parate magigibo niato ini sa kaenot-enoteng pakikipag-adal sa mga tawong relihioso. Sa iba, tibaad kaipuhan niatong aramon kun noarin an tamang panahon na iintrodusir an pamibi.”

An saro pang bagay na kokonsideraron iyo an kamugtakan kan pag-adal. Kun nasa pribado, puedeng mapagmansay na mamibi nin halipot tangani na buksan asin taposon an pag-adal. Minsan siring, kun an paggibo kaiyan makakakua nin atension kan mga nagmamasid o makakapamate sa inaadalan sa Biblia na magin bakong komportable, kun siring bago iintrodusir an pamibi tibaad pinakamarahay na maghalat sagkod na an pag-adal puede nang gibohon nin mas pribado.

◼ Maninigo daw na magkolbong an sarong tugang na babae sa pag-adal sa Biblia sa may pinto kun sia may kaiba na sarong lalaking parahayag?

Iyo. Kun an sarong tugang na babae nagkokondukta nin regular asin nakaiskedyul na pag-adal sa Biblia asin presente an sarong lalaki na parahayag kan Kahadean, maninigo na an babae magkolbong. (1 Cor. 11:3-10) Totoo man ini baga man an pag-adal kinokonduktahan sa laog nin harong, sa may pinto, o sa iba pang kamugtakan. An isyu kan The Watchtower na Hulyo 15, 2002, pahina 27, nagpapaliwanag: “Ini dati nang iinareglong sesyon nin pagtotokdo na dian an talagang nangengenot iyo an nagkokondukta kan pag-adal. Sa mga kamugtakan na ini, an pag-adal nagigin ekstension kan kongregasyon. Kun sarong babae na bautisadong Saksi an nagkokondukta nin siring na pag-adal na presente an sarong lalaki na bautisadong Saksi, tama sanang magkolbong an babae.” Aplikado man iyan kun sia may kaiba na sarong lalaki na dai pa bautisadong parahayag kan Kahadean.

Sa ibong na kampi, kun bako pang establisado an pag-adal sa Biblia sa may pinto, dai nia kaipuhan na magkolbong kun presente an sarong lalaki na parahayag kan Kahadean, dawa kun an katuyohan kan pagdalaw liwat iyo na idemonstrar an pag-adal sa Biblia o ipakipag-olay an tema na yaon sa saro kan rekomendadong mga publikasyon sa pag-adal. Mantang sa parate luway-luway na naeestablisar an mga pag-adal sa may pinto, paagi sa sunod-sunod na progresibong mga pagdalaw liwat, kaipuhan na konsideraron kan mga parahayag an mga kamugtakan asin magin rasonable sa pagdeterminar kun noarin maninigong gumamit nin kolbong.