Libro kan Biblia Numero 47—2 Corinto
Kagsurat: Pablo
Kun Saen Isinurat: Macedonia
Natapos an Pagsurat: Mga 55 C.E.
POSIBLE na huring kabtang na kan tig-init o amay na tigrakdag na kaidto kan 55 C.E. Igwa pa man giraray nin nagkapirang bagay sa Kristianong kongregasyon sa Corinto na ikinakahadit ni apostol Pablo. Pira pa sanang bulan an nakaagi poon kan ginibo nia an saiyang enot na surat sa mga taga Corinto. Poon kaidto isinugo na si Tito sa Corinto tanganing tumabang sa pangongolekta nin donasyon duman para sa mga banal sa Judea asin posible man na tanganing obserbaran an reaksion kan mga taga Corinto sa enot na surat. (2 Cor. 8:1-6; 2:13) Paano ninda inako iyan? Naranga nanggad si Pablo kan maaraman nia na nagpahiro iyan sa sainda na magmondo asin magsolsol! Nagbuelta si Tito ki Pablo sa Macedonia na dara an marahay na baretang ini, asin ngonyan an puso kan apostol napano sagkod na magsopay nin pagkamoot para sa saiyang namomotan na mga kapagtubod sa Corinto.—7:5-7; 6:11.
2 Kaya nagsurat liwat si Pablo sa mga taga Corinto. An nakakaogma asin mapuersang ikaduwang surat na ini ginibo nia sa Macedonia asin minalataw na ihinatod ni Tito. (9:2, 4; 8:16-18, 22-24) Saro sa nakakahadit na mga bagay na nagpahiro ki Pablo tanganing magsurat iyo an presensia sa tahaw kan mga taga Corinto nin “labi-labi karahay na mga apostol,” na ilinadawan man nia bilang “falsong mga apostol, madayang mga trabahador.” (11:5, 13, 14) Namemeligro an espirituwal na kapakanan kan medyo hoben pang kongregasyon, asin inaatake an autoridad ni Pablo bilang apostol. Sa siring, an saiyang ikaduwang surat sa Corinto nakatabang na matawan nin solusyon an sarong dakulang pangangaipo.
3 Puedeng mangnohon na sinabi ni Pablo: “Ini an ikatolong beses na ako andam na magdian sa saindo.” (2 Cor. 12:14; 13:1) Nagplano siang sumongko sa sainda sa ikaduwang beses kan ginibo nia an saiyang enot na surat, alagad minsan ngani andam na sia, dai nangyari ining “ikaduwang okasyon para sa kagayagayahan.” (1 Cor. 16:5; 2 Cor. 1:15) Kun siring, sa katunayan, sarong beses pa sanang nakaduman si Pablo kaidto, sa laog nin 18 bulan kan 50-52 C.E., kan maestablisar an Kristianong kongregasyon sa Corinto. (Gibo 18:1-18) Minsan siring, paghaloyhaloy nagibo ni Pablo an saiyang pagmawot na magsongko giraray sa Corinto. Mientras na nasa Grecia sa laog nin tolong bulan, na posible kan 56 C.E., ginamit nia sa Corinto an kisuerra kabtang kan panahon na ini, asin duman nia ginibo an saiyang surat sa mga taga Roma.—Roma 16:1, 23; 1 Cor. 1:14.
4 An Ikaduwang Corinto saka an Enot na Corinto asin iba pang surat ni Pablo pirmeng ibinibilang na totoong kabtang kan Biblia. Sa giraray puede niatong helingon an kamugtakan sa laog kan kongregasyon sa Corinto asin makikinabang kita gikan sa ipinasabong na mga tataramon ni Pablo na itinao tanganing sadolon sinda saka kita man.
KUN TAANO TA KAPAKIPAKINABANG
18 Talagang nakakapahiro asin nakakaparigon sa boot an pagpahalaga ni Pablo sa Kristianong ministeryo na ipinahayag sa Ikaduwang Corinto! Arogon man niato an pagmansay nia dian. An Kristianong ministro na pinagin biyong kualipikado nin Dios bakong paratinda kan Tataramon kundi naglilingkod huli sa pagkasinsero. An nagrerekomendar sa saiya bakong sarong nasusurat na dokumento, kundi an saiyang bunga sa ministeryo. Minsan siring, baga man tunay nanggad na mamuraway an ministeryo, bako ining dahelan na sia magin maabhaw. An mga lingkod nin Dios bilang bakong sangkap na mga tawo igwa kan kayamanan na ini nin paglilingkod sa matapong mga lalagan na gibo sa dalipay, tanganing an kapangyarihan maheling nin malinaw na sa Dios. Kaya nangangaipo ini nin mapakumbabang pag-ako sa mamuraway na pribilehio nin pagigin mga ministro nin Dios, asin tunay na dai na kutana maninigong kabootan hale sa Dios an maglingkod bilang “mga embahador na kasalida ni Cristo”! Kun siring, tama nanggad an sadol ni Pablo na ‘dai akoon an dai na kutana maninigong kabootan nin Dios asin lipasan an katuyohan kaiyan’!—2:14-17; 3:1-5; 4:7; 5:18-20; 6:1.
19 Si Pablo tunay nanggad na nagtao nin marahayon na halimbawa tanganing arogon kan Kristianong mga ministro. Sarong bagay, pinahalagahan asin pinag-adalan nia an ipinasabong na Hebreong Kasuratan, na paorootro niang kinotar, sinambit, asin inaplikar iyan. (2 Cor. 6:2, 16-18; 7:1; 8:15; 9:9; 13:1; Isa. 49:8; Lev. 26:12; Isa. 52:11; Ezeq. 20:41; 2 Sam. 7:14; Os. 1:10) Dugang pa, bilang sarong paraataman, nagpaheling sia nin hararom na pagmakolog sa aripompon, na nagsabi: “Sa sakong kabtang ako maogmang gayo na maggagamit kan sakong sadiri asin lubos na mapagamit para sa saindong kalag.” Itinao nia nin biyo an saiyang panahon asin kosog para sa kapakanan kan mga tugang, siring sa malinaw na ipinapaheling kan rekord. (2 Cor. 12:15; 6:3-10) Sia daing kapagalan sa saiyang mga pagmamaigot mantang sia nagtotokdo, nagsasadol, asin nagtatanos kan mga bagay sa kongregasyon sa Corinto. Sia sayod na nagpatanid tumang sa pakikiiba sa kadikloman, na sinabihan an mga taga Corinto: “Dai kamo makipagsakal na bakong timbang sa mga dai nagtutubod.” Huli sa saiyang mamomoton na pagmalasakit sa sainda, habo niang maheling na maparaot an saindang isip, “kun paanong nadaya kan halas si Eva paagi sa katusohan kaiyan,” asin sa siring bilog na puso niang sinadol sinda: “Padagos na baloon kun baga kamo nasa pagtubod, padagos na patunayan kun ano man nanggad kamo.” Pinahiro nia sinda na magin buka an palad bilang mga Kristiano, na ipinaheling sa sainda na “an Dios namomoot sa maogmang paratao,” asin ipinahayag nia mismo an mapag-apresyar na marhay na pasasalamat sa Dios huli sa Saiyang dai ikaladawan na daing bayad na balaog. Tunay nanggad na an saiyang mga tugang sa Corinto isinurat paagi sa pagkamoot sa garo tablang laman kan puso ni Pablo, asin an saiyang daing kaimotan na paglilingkod para sa saindang kapakanan maninigong magin tanda nin sarong maigot saka biyong puka na paraataman. Sarong marahayon nanggad na arogan para sa sato ngonyan!—6:14; 11:3; 13:5; 9:7, 15; 3:2.
20 Ibinubugtak ni apostol Pablo an satong isip sa tamang direksion sa pagsambit sa “Ama nin maboot na mga pagkaherak asin an Dios nin gabos na karangahan” bilang an tunay na ginigikanan nin kosog sa panahon nin pagbalo. Sia an “minaranga sa sato sa gabos niatong kahorasaan” tanganing kita makatagal asin maligtas pasiring sa saiyang bagong kinaban. Sinambit man ni Pablo an mamuraway na paglaom na “sarong edipisyo gikan sa Dios, sarong harong na dai ginibo nin mga kamot, daing katapusan sa kalangitan,” asin nagsabi sia: “Kaya kun an siisay man kasaro ni Cristo, sia bagong linalang; an daan na mga bagay nag-agi na, uya! nagkaigwa nin bagong mga bagay.” An Ikaduwang Corinto igwa nanggad nin makangangalas na mga tataramon nin pagpasarig sa boot para sa mga, arog ni Pablo, magmamana kan langitnon na Kahadean.—1:3, 4; 5:1, 17.