Si Aod—Sarong Tawong may Pagtubod Asin Kapusoan

DAKOL na taon na an nakaagi poon kan kaenot-enoteng makaabot an mga Israelita sa Dagang Panuga. Si Moises asin an kasalihid nia, si Josue, haloy nang nagadan. Sa pagkawara nin siring na mga tawong may pagtubod, biglang luminuya an pagpahalaga sa dalisay na pagsamba. Nagpoon pa nganing paglingkodan kan mga Israelita an mga Baal asin an sagradong mga palo.a Bilang resulta, itinao ni Jehova an saiyang banwaan sa kamot kan mga Sirio sa laog nin walong taon. Dangan nag-agrangay an mga Israelita sa Dios para sa tabang. May pagkaherak na sia naghinanyog. Puminatindog si Jehova nin sarong hokom, si Otniel, tangani na iligtas an Saiyang banwaan.​—Josue 3:​7-11.

An mga pangyayaring ini nakatokdo kutana sa mga Israelita nin sarong pundamental na katotoohan​—an pagkuyog ki Jehova nagtatao nin mga bendisyon, mantang an dai pagkuyog nagbubunga nin mga maldisyon. (Deuteronomio 11:​26-28) Minsan siring, dai naleksionan kaini an banwaan nin Israel. Pakalihis nin 40 taon na panahon nin katoninongan, binayaan liwat ninda an dalisay na pagsamba.​—Hokom 3:12.

Dinaog kan Moab

Sa panahon na ini itinogot ni Jehova na an saiyang banwaan maholog sa kamot ni Hadeng Eglon kan Moab. An Biblia nagsasabi na sia “lalaking matabaon.” Sa tabang ni Amon asin Amalec, sinalakay ni Eglon an Israel asin pinatindog an saiyang palasyo sa Jerico, “an siudad nin mga poon nin palma.” Kabaliktaran nanggad sa linalaoman na sa kaenot-enoteng siudad sa Canaan na sinakop kan Israel yaon ngonyan an kuartel heneral kan saro na nagsasamba sa falsong dios na si Kemos!b​—Hokom 3:​12, 13, 17.

Inapi ni Eglon an mga Israelita sa laog kan suminunod na 18 taon, na minalataw na naghagad sa sainda nin magabat na buhis. Paagi sa paghagad nin tributo sa panapanahon, pinakosog kan Moab an sadiri kaiyan na posisyon sa ekonomiya mientras na inuubos an natural na kayamanan kan Israel. Siempre, nag-agrangay an banwaan nin Dios para sa kaginhawahan, asin sa giraray naghinanyog si Jehova. Puminatindog sia para sa sainda nin saro pang paraligtas​—sa panahon na ini sarong Benjamita na an ngaran Aod. Tangani na taposon an mapan-aping kapangyarihan ni Eglon sa Israel, plinano ni Aod na humiro sa aldaw kan masunod na pagbayad nin tributo.​—Hokom 3:​14, 15.

Sa pag-andam para sa saiyang mapusong paghiro, guminibo si Aod nin duwa an tarom na espada na sarong sokol sa siko an laba. Kun ini sarong halipot na sokol sa siko, an armas mga 38 sentimetro an laba. May mga ibibilang iyan na sarong punyal. Minalataw na mayong balagbag sa pag-oltanan kan tarom asin kan polo. Kun siring, puedeng itago ni Aod an saiyang sadit na espada sa pileges kan saiyang gubing. Apuera kaini, huling walahon si Aod, puede niang ihagkos an saiyang espada sa may too nia​—na bakong an parateng lugar para sa sarong armas.​—Hokom 3:​15, 16.

Peligroso an estratehiya ni Aod. Halimbawa, ano kun si Aod rekisahon kan mga katabang kan hade para sa mga armas? Dawa pa dai ninda iyan gibohon, seguradong dai ninda babayaan an saindang hade na nagsosolo kaiba nin sarong Israelita! Alagad kun sia bayaan ninda asin puedeng gadanon si Eglon, paano makadudulag si Aod? Gurano kaharayo siang makadadalagan bago maaraman kan mga katabang ni Eglon an nangyari?

Mayong duwa-duwa na pinensar ni Aod an siring na mga detalye, na tibaad iniimahinar an nagkapirang kapahapahamak na mga resulta. Alagad ta ipinagpadagos nia an saiyang plano, na ipinaheheling an kapusoan asin naggigibo nin pagtubod ki Jehova.

Nakaatubang ni Aod si Eglon

Duminatong an aldaw para sa pagpresentar kan masunod na tributo. Luminaog si Aod asin an saiyang mga tawohan sa palasyo kan hade. Dai nahaloy, nagtitindog na sinda sa atubangan mismo ni Hadeng Eglon. Alagad dai pa nagdatong an panahon para sa pagdaguso ni Aod. Pakatapos kan pagpresentar kan tributo, pinahale na ni Aod an mga paradara kan tributo.​—Hokom 3:​17, 18.

Taano ta nag-atraso si Aod sa paggadan ki Eglon? Napadaog daw sia sa takot? Dai nanggad! Tangani na magibo an saiyang plano, kaipuhan ni Aod an sarong pribadong pakipag-olay sa hade​—bagay na dai ikinatao sa saiya sa enot na pagkainaratubangan na ini. Apuera kaini, kaipuhan ni Aod na makadulag tolos-tolos. Mas madali an pagdulag para sa sarong tawo kisa sa enterong kairiba na mga paradara nin tributo. Kun siring, naghalathalat si Aod. An madali sanang pagsongko ki Eglon pinangyari siang magin pamilyar sa pagkaareglar kan palasyo asin siertohon kun gurano an ginigibong pag-iingat sa pagprotehir sa hade.

Pakaantos sa “mga tipakan nin gapo na yaon sa Gilgal,” iwinalat ni Aod an saiyang mga tawohan asin nagbaklay pabalik sa palasyo ni Eglon. An pagbaklay nin mga duwang kilometro nagtao ki Aod nin dikit na panahon na horophoropon an misyon nia asin mamibi para sa bendisyon ni Jehova.​—Hokom 3:19.

Buminuelta si Aod

Minalataw na pinalaog giraray si Aod sa palasyo. Tibaad an dakol na tributo na mas naenot na iprinesentar nia pinangyari si Eglon na magin marahay an kamugtakan kan isip. Tibaad minsan ngani madali sana an enot na pagsongko, tinawan kaiyan si Aod nin supisyenteng oportunidad na establisaron an marahay na relasyon sa hade. Ano man an kamugtakan, kaatubang na naman ni Aod si Eglon.

“Igwa ako nin sekretong mensahe para sa saindo, O hade,” an sabi ni Aod. An katunayan na nakaabot na sia sa puntong ini nagparisa na ginigiyahan sia ni Jehova. Pero, may problema. An “sekretong mensahe” na dara ni Aod dai puedeng itaram sa presensia kan mga katabang kan hade. Kun mainterbenir si Jehova, kaipuhan na tolos ni Aod an tabang na iyan. “Silensio kamo!” nagboot an hade. Huling habo ni Eglon na sa dai tinutuyo madangog nin iba an “sekretong mensahe” na ini, pinahale nia an saiyang mga katabang. Imahinara an pakaginhawa ni Aod!​—Hokom 3:19.

Nakatukaw si Eglon sa saiyang kuarto sa atop kan dumanan sia ni Aod asin sinabihan: “Igwa ako para sa saindo nin mensahe nin Dios.” Paagi sa pagsambit sa “Dios,” an gusto daw na sabihon ni Aod si Kemos? Tibaad iyan an inisip ni Eglon. Napukaw an interes, buminuhat sia sa saiyang trono asin tuminindog na naghahalat. Duminolok si Aod, na posibleng maingat na nagrarani tangani na dai mapukaw an pagsuspetsa kan hade na tibaad may pagdaguso. Dangan, paagi sa marikas na paghiro, ‘idinukot ni Aod an saiyang walang kamot asin binulnot an espada sa saiyang toong paa patin isinaksak idto sa tulak ni Eglon. Asin an polo luminaog man kasunod kan tarom kaya natahoban kan taba an tarom, ta dai na nia hinulbot an espada sa saiyang tulak, asin nagpoon na lumuwas an odo.’​—Hokom 3:​20-22.

Nasa harani sana, an mga katabang kan hade dai naghiriro. Alagad namemeligro pa si Aod. Sa ano man na oras puedeng dumalagan palaog an mga oripon ni Eglon asin maheling an bangkay kan saindang nakalukmong hade. Kaipuhan ni Aod na makadulag tolos-tolos! Binaratan an mga pinto, duminulag sia paagi sa labot para sa aire kan kuarto sa atop.​—Hokom 3:​23, 24a.

Pagkaaram Asin Pagkadaog

Dai nahaloy gusto nang maaraman kan mga oripon ni Eglon an nangyayari. Pero, dai sinda nangahas na atubangon an peligrong mapaanggot an hade paagi sa pag-abala sa saiyang pribadong pakipag-olay. Dangan nariparo ninda na barat an mga pinto kan kuarto sa atop. “Nagkakasilyas sana sia sa mahayahay na kuarto sa laog,” an inisip-isip ninda. Minsan siring, mantang nag-aagi an oras, an pagmawot sanang maaraman an nangyayari nasalidahan nin biglang pagkahadit. Dai na makahalat an mga katabang ni Eglon. “Sa puntong ini kinua ninda an liabe asin binurukasan [an pinto kan kuarto sa atop], asin, uya! an saindang kagurangnan lukmo sa daga na gadan!”​—Hokom 3:​24b, 25.

Mientras tanto, nakadulag na si Aod. Inagihan nia an mga tipakan nin gapo na yaon sa Gilgal asin sa katapustapusi nakaabot sia sa Seira, sarong lugar sa mabukid na rehion nin Efraim. Inapod ni Aod na magtiripon an mga lalaking Israelita asin pinangenotan sinda sa sararong pagsakyada sa mga Moabita. Nagsasaysay an tala na “saindang ginadan an Moab, mga sampulong ribong lalaki, an lambang saro pusog asin an lambang saro maisog na lalaki; asin mayo ni saro na nakadulag.” Huli sa pagkadaog sa Moab, mayo nang nanribok sa nasyon nin Israel sa laog nin 80 taon.​—Hokom 3:​26-30.

Pakanood sa Halimbawa ni Aod

Namotibar si Aod kan pagtubod sa Dios. An Hebreo kapitulo 11 dai espesipikong nagsasambit sa saiya na saro “na huli sa pagtubod nakadaog sa mga kahadean sa ralaban, . . . nagin mapuso sa ralaban, nakapadulag kan mga hukbo nin mga tagaibang daga.” (Hebreo 11:​33, 34) Alagad ta sinuportaran ni Jehova si Aod mantang sia minahiro oyon sa pagtubod asin iliniligtas an Israel sa maringis na kapangyarihan ni Hadeng Eglon.

An kapusoan saro sa mga kualidad ni Aod. Kinaipuhan niang magin mapuso tangani na epektibong magamit an literal na espada. Bilang mga lingkod nin Dios sa presenteng aldaw, dai kita minakapot nin siring na espada. (Isaias 2:​4; Mateo 26:52) Pero, ginagamit nanggad niato “an espada kan espiritu,” an Tataramon nin Dios. (Efeso 6:17) Tuodan si Aod sa paggamit kan saiyang armas. Kita man kaipuhan na magin eksperto sa paggamit kan Tataramon nin Dios mantang ihinuhulit niato an maogmang bareta kan Kahadean. (Mateo 24:14) An personal na pag-adal sa Biblia, regular na pag-atender sa Kristianong mga pagtiripon, maigot na pakikikabtang sa ministeryo, asin mapagngayongayong pagsarig sa satong langitnon na Ama matabang sa sato na arogon an mga kualidad na ipinaheling ni Aod, na tunay na sarong tawong may pagtubod asin kapusoan.

[Mga Nota sa Ibaba]

[Retrato sa pahina 31]

Iprinesentar ni Aod asin kan saiyang mga tawohan an tributo ki Hadeng Eglon

[Pasasalamat para sa pinagkuanan]

Rineprodusir hale sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s