Iniimbitaran Ka nin Diyos na Magin Katuod Niya

Gusto nin Diyos na ika magin katuod niya. Naisip-isip mo na daw na ika puwedeng magin amigo, o katuod, kan nakakalabi sa gabos na Persona sa uniberso? Si Abraham, na nabuhay kaidtong haloy nang panahon, inapod na katuod nin Diyos. (Santiago 2:23) An ibang nasasambitan sa Bibliya nagin mga katuod man nin Diyos asin binendisyunan na marhay. Ngunyan, an mga tawo hali sa gabos na parte kan daga nagin mga katuod nin Diyos. Ika man puwedeng magin katuod nin Diyos.

An pagigin katuod nin Diyos mas marahay kisa pagigin katuod nin siisay man na tawo. Pirming uutubon nin Diyos an inaasahan sa saiya kan maimbod na mga katuod niya. (Salmo 18:25) An pagigin katuod nin Diyos mas marahay kisa pagkaigwa nin mga kayamanan. Pag magadan an sarong mayaman, an saiyang kuwarta mapapaduman sa iba. Pero, an mga katuod nin Diyos may kayamanan na dai makukua nin siisay man.​—Mateo 6:19.

An nagkapira tibaad maghinguwa na papunduhon ka sa pag-adal manungod sa Diyos. Tibaad gibuhon ini dawa kan nagkapira sa saimong mga katuod asin kapamilya. (Mateo 10:​36, 37) Kun pagngisihan ka nin iba o patakuton ka, haputa an saimong sadiri, ‘Siisay an gusto kong paugmahon​—an mga tawo o an Diyos?’ Isip-isipa ini: Kun may magsabi saimo na dai ka na magkakan, susunudon mo daw siya? Siyempre dai! Kaipuhan mo an kakanon para mabuhay. Pero kayang gibuhon kan Diyos na mabuhay ka nin daing katapusan! Kaya dai nanggad pagtugutan an siisay man na papunduhon ka sa pag-adal kun paano ka magigin katuod nin Diyos.​—Juan 17:3.