Magkondukta nin Progresibong mga Pag-adal sa Biblia sa May Pinto Asin Paagi sa Telepono
1, 2. Paano niato ikakabagay an satong pagkondukta nin pag-adal sa Biblia tanganing matabangan an mga tawong sibot?
1 Sibot an mga tawo ngonyan. Pero, dakol an may interes sa espirituwal na mga bagay. Paano ta sinda matatabangan na mapanigoan an saindang espirituwal na pangangaipo? (Mat. 5:3) Dakol na parahayag an nakakapagkondukta nin pag-adal sa mga tawo sa may pinto ninda o paagi sa telepono. Puede daw nindong pahiwason an saindong ministeryo sa paaging ini?
2 Tangani na makapoon nin pag-adal sa Biblia, kaipuhan na magin andam kitang idemonstrar iyan basta may oportunidad. Paano asin saen ini puedeng gibohon?
3. Paano puedeng idemonstrar sa may pinto an sarong pag-adal sa Biblia?
3 Sa May Pinto: Kun makanompong kamo nin sarong tawo na gustong makipag-olay dapit sa Biblia, buksan sana an publikasyon na patienot nindong pinag-andaman, tibaad an pahina 16 asin 17 sa pinakabagong pampublikong edisyon kan An Torrengbantayan, o an sarong angay na parapo sa librong Itinotokdo kan Biblia, dangan pumoon. Basahon an parapo, pag-olayan an hapot, asin tokaron an saro o duwang sitadong teksto. Sa parate magigibo ini sa may pinto sa laog nin lima o sampulong minuto. Kun nagustohan kan tawo an pag-oolay, iareglo na pag-olayan an masunod na saro o duwang parapo sa ibang panahon.
4. Anong eksperyensia an nagpapaheling na dakol na tawong sibot an tibaad mas gustong mag-adal kan Biblia paagi sa telepono?
4 Paagi sa Telepono: May mga tawo na tibaad mas gustong makipag-adal sa Biblia paagi sa telepono kisa personal kamong magduman sa sainda. Estudyare an minasunod na eksperyensia: Mientras na naghuhulit sa harong-harong, nanompongan nin sarong sister an sarong hoben na babaeng ina na sibot sa saiyang sekular na trabaho. Kan dai na nakaolay liwat kan sister an babae sa harong, nagdesisyon sia na apodan ini sa telepono. Ipinaliwanag kan babae na mayo talaga sia nin panahon tangani na makipag-olay dapit sa Biblia. An sister nagsabi: “Sa laog nin 10 o 15 minutos lang, may manonodan kang bagong bagay, dawa paagi sa telepono.” “Bueno, kun iyan paagi sa telepono, oyon ako!” an simbag kan babae. Dai nahaloy, regular na siang kinokonduktahan nin pag-adal sa Biblia paagi sa telepono.
5. Taano ta maninigo niatong hingoahon na dagdagan an oras na ginagamit sa pag-adal sa may pinto?
5 Mga Pag-adal sa Biblia sa Laog kan Harong: Kun siring, dapat daw na makontento kita na padagos na sanang magkondukta nin pag-adal sa may pinto? Dai. Minsan ngani madonong na dai kita maghaloy na marhay sa enot na pagpoon nin pag-adal sa may pinto, oras na establisado na an pag-adal asin tuminalubo na an interes kan kagharong, puede nang gumamit nin mas halawig na oras sa pag-adal. Mahalagang marhay ini. Sa pag-ilustrar, an aki na nag-agi nin grabeng gutom puedeng pakakanon nin padikitdikit sana sa kapinonan sagkod na makabalik an saiyang gana, alagad dai nanggad niato malalaoman na sia makakabawi kan saiyang bilog na kosog asin matalubo nin normal kun pakakakanon sana sia nin padikitdikit sa laog nin dakol na bulan. Kaagid kaiyan, an sarong tinotokdoan sa Biblia nangangaipo nin mas pormal asin regular na pag-adal tangani na magin maygurang na lingkod nin Dios.—Heb. 5:13, 14.
6. Ano an mga pakinabang kan pagkondukta nin pag-adal sa Biblia sa laog kan harong o sa pribadong lugar?
6 Mas marahay na magkondukta nin pag-adal sa pribadong lugar—sa laog kan harong o sa iba pang angay na lugar. Ini mas makakatabang sa tinotokdoan sa Biblia na makanood asin masabotan an Tataramon nin Dios. (Mat. 13:23) Mas ikakabagay man kan nagtotokdo an impormasyon na pinag-aadalan sa mga pangangaipo kan tinotokdoan. Dugang pa, an mas halawig na oras sa pag-adal mataong lugar tanganing an pag-oolay dapit sa Tataramon nin Dios magin mas detalyado asin nakakapakosog sa pagtubod.—Roma 10:17.
7. Paano niato gigibohon na an pag-adal sa may pinto magin pag-adal sa laog kan harong?
7 Paano nindo gigibohon na an pag-adal sa may pinto magin pag-adal sa laog kan harong? Pagkatapos nin nagkapirang halipot na pag-adal, taano ta dai mag-alok na gibohon an pag-adal nin mas halawig asin sa espesipikong lawig nin oras? O puede kamong gumamit nin bakong direktang pamamaagi paagi sa paghapot sa saiya, “May panahon ka ngonyan na tumukaw asin pag-olayan niato ini?” o “Pirang oras an gusto mong gamiton ngonyan tangani na pag-olayan an temang ini?” Kun bakong mapanggana an saindong paghihingoa, ipadagos an haralipot na pag-adal sa may pinto. Sa angay na panahon, probaran giraray na ibalyo an pag-adal sa laog kan harong.
8. Ano an maninigong katuyohan niato sa paggibo kan satong ministeryo?
8 Mantang padagos kita sa paghanap kan mga maninigo, dai niato paglingawan an satong katuyohan, an pagtabang sa mga sadiosan an puso na magin dusay asin bautisadong lingkod ni Jehova. Logod na bendisyonan nia an satong mga paghihingoa mantang ginigibo niato an satong ministeryo na igwa kan katuyohan na iyan.—2 Tim. 4:5.