Maogma Kamong Inaako sa Teokratikong Paadalan sa Pagmiministro

SA BILOG na daga, sa labing 200 na kadagaan, minilyon na estudyante an nakikinabang serosemana sa edukasyon sa Teokratikong Paadalan sa Pagmiministro. An nagkapira bagohan. An iba dakol nang taon na nag-aatender sa paadalan. Ginigibo an paadalan sa manampulong ribong lugar. Saen man kamo nag-iistar digdi sa daga, makukua nindo an iyo man sanang programa nin edukasyon. An mga tawo na hale sa gabos na edad, grupong etniko, asin inadalan nag-aako kan teokratikong pagtotokdong ini, na mayo nin bayad.

Kan inaguraron an paadalan sa mga kongregasyon nin Mga Saksi ni Jehova kan 1943, sinabi an katuyohan kaiyan sa mga tataramon na ini: “Tanganing andamon an gabos na ‘fiel,’ an mga nakadangog kan Tataramon nin Dios asin pinatunayan an saindang pagtubod dian, na ‘makapagtokdo sa iba’ . . . sa solamenteng katuyohan na an balang saro . . . mani orog na nasangkapan na ipahayag sa publiko an paglaom na nasa saiya.” (Course in Theocratic Ministry, p. 4) An obheto kan paadalan dai nabago sagkod ngonyan.

An totoo, sa ano pinakamarahay na magagamit kan siisay man sa sato an satong talento sa pagtaram na tao nin Dios? Minasimbag an Biblia: “An lambang bagay na naghahangos—mag-omaw iyan ki Jah.” (Sal. 150:6) Kun iyan ginigibo niato, pinagagayagaya niato an puso kan satong langitnon na Ama. Tinatawan niato sia nin ebidensia na an sato mismong puso minahirong may pagpasalamat sa saiyang karahayan asin pagkamoot. Bakong makangangalas na an mga Kristiano pirmeng ineenkaminar na “danay [na] magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran”! (Heb. 13:15) Sa katuyohan na matabangan kamo na umoswag sa saindong abilidad na gamiton an tao nin Dios na mga talento nindo sa pag-omaw ki Jehova, kamo maogma niamong inaako bilang estudyante sa Teokratikong Paadalan sa Pagmiministro.

Minsan ngani dakulang atension an itinatao sa pampublikong pagbasa asin sa mga teknika sa pagtaram saka pagtotokdo sa paadalan, bako sana dian an mga pakinabang sa edukasyon sa Teokratikong Paadalan sa Pagmiministro. Mantang kamo nagpapartisipar, matatabangan kamo na makultibar an mahahalagang abilidad na arog kan personal na pagbasa, paghinanyog asin paggirumdom, pag-adal, pagsiyasat, pag-analisar asin pag-organisar, pakikipag-olay, pagsimbag sa mga hapot, asin pagsurat kan nasa isip. An Biblia mismo asin mga publikasyon na basado sa Biblia an magigin basehan kan pag-adal asin kan mga komento saka pag-atubang na itatao sa paadalan. Mantang pinapano nindo an saindong isip kan mahahalagang marhay na katotoohan na yaon sa Tataramon nin Dios, makakanood kamong isipon an mga kaisipan nin Dios. Abaa kapakipakinabang kaiyan sa lambang aspekto nin buhay! Manongod sa halaga kan Tataramon nin Dios, isinurat kan edukador sa unibersidad kan ika-20 siglo na si William Lyon Phelps: “An gabos na may kompletong kaaraman sa Biblia talagang masasabing edukado. . . . Sa paniniwala ko an kaaraman sa Biblia na mayo nin kurso sa kolehio mas mahalaga kisa kurso sa kolehio na mayo nin Biblia.”

Kun Paano Lubos na Makikinabang

Siempre, tangani na lubos na makinabang sa edukasyon na itinatao sa Teokratikong Paadalan sa Pagmiministro, kamo, an estudyante, dapat na gumibo nin personal na paghihingoa. Sinadol ni apostol Pablo an saiyang Kristianong kaibaiba na si Timoteo: “Pensaron mo an mga bagay na ini; ipanongod mo dian an bilog mong buhay, tanganing an saimong pag-oswag mahayag sa gabos.” (1 Tim. 4:15) Sa anong praktikal na mga paagi na kamo makapagmamaigot?

Sagkod sa mapupuede, umatender sa Teokratikong Paadalan sa Pagmiministro kada semana. Gamiton nin madonong an pag-aadalan na librong ini, Makinabang sa Edukasyon sa Teokratikong Paadalan sa Pagmiministro. Isurat an saindong ngaran sa itinaong espasyo sa pahina para sa titulo. Pirmeng darahon an libro sa pag-atender nindo sa paadalan. An librong pag-aadalan na ini saro man na librong may masusuratan nin mga nota. Kun may mabasa kamo dian na importanteng mga punto na sa pagmate nindo makatatabang sa saindo, kuritan iyan sa irarom. Gamiton an haralakbang na pagirilid sa pagsurat kan praktikal na mga punto na nanonodan nindo durante kan orolay sa paadalan.

Itatao nin separado an inimprentang kopya kan programang susundon sa Teokratikong Paadalan sa Pagmiministro. An iskedyul may kaiba man na mga detalye sa kun paano gigibohon an paadalan. Tibaad magin praktikal para sa saindo na ipaipit sa librong ini an iskedyul, na dian iyan magigin pasil gamiton.

Sa pag-andam para sa semanal na sesyon kan paadalan, girumdomon na an Biblia iyo an mayor na librong pag-aadalan. Enoton an pagbasa sa ano man na kabtang kan Biblia na tibaad nakaiskedyul para sa semanang iyan. Kun kaya man nindong basahon antes pa an materyales para sa laen-laen na kabtang kan programa, ini magigin man kapakipakinabang.

Durante kan paadalan, tibaad may mga oportunidad na magpartisipar an mga nagdadangog. Biyo ining aprobetsaran. An pakikiayon sa siring na orolay mahalagang dahelan na magirumdoman nindo an saindong nadadangog asin magamit iyan sa saindong personal na buhay.

Siempre, an gabos na estudyante magkakaoportunidad na tumao nin mga pahayag o demonstrasyon sa atubangan kan kongregasyon. Gamiton sa marahay an balang saro sa mga oportunidad na iyan. Talagang magmaigot kamong paoswagon an ano man na kualidad sa pagtaram na iinasignar sa saindo. Tatawan kamo nin konseho sa katuyohan na padagos kamong umoswag. Maogmang akoon an personal na tabang na iyan. Sa libro nindo, inotar an espesipikong mga suhestion sa personal nindong magigibo na umoswag. Mantang depisil para sa saro na mamasdan an sadiri arog kan pagkamasid nin iba, an itinataong mamomoton, basado sa Biblia na mga suhestion asin hatol makakokontribwir na marhay sa saindong pag-oswag. Totoo iyan dawa kun dakol na taon na kamong nagpalista sa paadalan.—Tal. 1:5.

Gusto daw nindong mas marikas na umoswag? Kun mapaheling kamo nin personal na inisyatiba, magigibo iyan. Adalan antes pa an materyales na pag-oolayan sa kada pahayag nin estudyante. Kun kaipuhan an kasangling magpahayag, makapagboboluntaryo kamo, asin iyan matao sa saindo nin orog na eksperyensia. Kun nagpapahayag an iba, maingat na hinanyogon kun paano an ginibo ninda sa materyales. Nakakanood kita sa lambang saro.

Saro pa, kun itinotogot kan saindong kamugtakan, maparirikas nindo an saindong pag-oswag paagi sa pag-enot nang adalan nin personal an librong pag-aadalan na ini. Pakatapos na manodan na nindo nin marhay an nasa minasunod na 15 leksion, pagmaigotan na taposon an “Kurso sa Pagpatalubo kan Abilidad Bilang Nagpapahayag Asin Paratokdo,” poon sa pahina 78. Enot, adalan an kada leksion, asin gibohon an mga praktis na sinasabi may koneksion dian. Iaplikar sa ministeryo an saindong nanonodan. Madadagdagan na marhay kaini an saindong pag-oswag bilang nagpapahayag asin bilang paratokdo kan Tataramon nin Dios.

An saindong edukasyon sa Teokratikong Paadalan sa Pagmiministro makatatabang na andamon kamo para sa pinakamahalaga sa buhay. Mantang kita nabubuhay huli sa kabotan nin Dios, an pag-omaw sa saiya pakaotob sa mismong katuyohan kan satong pagigin buhay. Si Jehova Dios maninigo sa pinakahalangkaw an kualidad na pag-omaw. (Kap. 4:11) An edukasyon na inaako niato sa paadalan sarong paagi na magibo ini tangani na kita magin malinaw an isip, gumawe nin madonong, asin epektibong ikomunikar an makangangalas na mga katotoohan hale sa ipinasabong na Tataramon nin Dios.

SARONG PUNDASYON NA MAGAGAMIT NA BASEHAN

Sarong teknika an abilidad na makakomunikar nin epektibo. Bakong gabos matibay dian. Dakol na librong pag-aadalan an ginibo tanganing matabangan an mga tawo na umoswag sa langtad na ini. Minsan siring, an Kaglalang, an Saro na nagtao sa tawo kan abilidad na magtaram, mas dakol an aram manongod sa pagtaram asin pagtotokdo kisa siisay man na tawong instruktor sa pagtaram. An saiyang bugtong na Aki nakipagtabangan sa saiya bilang Pangenot na Trabahador sa paggibo kan hotok nin tawo asin kan mga organo sa pagtaram saka kan gabos na iba pang makangangalas na linalang.

Mantang linalalang an mga anghel dangan mga tawo, an Aking iyan nagserbing Tataramon nin Dios, an pangenot na Saro na ginamit nin Dios mismo sa pagtao nin instruksion sa sainda. (Tal. 8:30; Juan 1:1-3) An Aking iyan isinugo digdi sa daga bilang an Kagurangnan na Jesu-Cristo. May labot sa saiya, sinasabi kan ipinasabong na rekord: “An mga kadaklan napangalas nin makuri sa saiyang paagi nin pagtotokdo.” Asin an mga nakadangog sa saiya nagpatotoo: “Mayo pa nin ibang tawo na nagtaram nin arog kaini.” (Mat. 7:28; Juan 7:46) Labing 40 beses na si Jesus inaapod na Paratokdo sa mga Ebanghelyo, asin tama sana. Kadakol kan manonodan niato sa saiya manongod sa pagtaram asin pagtotokdo.

May rekord man an Biblia sa kun paano ginamit ni Jehova Dios an mga lalaki saka babae na gikan sa dakol na pinaghalean na maotob an saiyang kabotan. An nagkapira sa sainda nagtao nin halipot alagad epektibong marhay na mga mensahe. An dakol dai nagtaram sa atubangan nin darakulang kadaklan nin nagdadangog, alagad fiel sindang nakikabtang sa pagpatotoo may labot sa tunay na Dios asin sa saiyang katuyohan. Minalataw na an kadaklan bakong matibay magtaram, alagad binendisyonan nin Dios an saindang mga paghihingoa. Makakanood kita sa sinasabi sato kan Biblia manongod sa kun paano ninda inotob an saindang ministeryo.—Sal. 68:11.

Siempre, an Biblia bakong librong pag-aadalan manongod sa pagtaram sa publiko. Alagad para sa mga nagbabasa na may pakamansay, iyan may mapakikinabangan na marhay na pakarorop mapadapit sa epektibong pagtaram asin pagtotokdo. Hinihingoa kan Makinabang sa Edukasyon sa Teokratikong Paadalan sa Pagmiministro na gamiton na basehan an pundasyon na iyan.