Gusto nin Dios na kita mabuhay na matoninong asin maogma sagkod lamang sa paraisong daga!

Pero tibaad isipon mo, ‘Mangyayari pa daw iyan?’ Sinasabi kan Biblia na iyan magigin posible paagi sa Kahadean nin Dios, asin kabotan nin Dios na an gabos na tawo makanood dapit sa Kahadean na iyan saka sa katuyohan nia para sa sato.​—Salmo 37:11, 29; Isaias 9:7.

Gusto nin Dios na kita makinabang.

Kun paanong mawot nin marahay na ama an pinakamarahay para sa mga aki nia, mawot man kan Ama niato sa langit na kita magkaigwa nin daing sagkod na kaogmahan. (Isaias 48:17, 18) Nanunuga sia na an saro na ‘naggigibo kan boot nin Dios magdadanay sagkod lamang.’​—1 Juan 2:17.

Gusto nin Dios na kita maglakaw sa mga dalan nia.

Sinasabi kan Biblia na gusto kan Kaglalang niato na ‘tokdoan kita kan saiyang mga dalan’ tanganing kita ‘makalakaw sa saiyang mga dana.’ (Isaias 2:2, 3) Nag-organisar sia nin ‘banwaan [para] sa saiyang ngaran’ tanganing ipaaram an kabotan nia sa bilog na daga.​—Guibo 15:14.

Gusto nin Dios na kita magkasararo sa pagsamba sa saiya.

Imbes na pagsuruwayon an mga tawo, pinagsasararo sinda sa tunay na pagkamoot paagi sa dalisay na pagsamba ki Jehova. (Juan 13:35) Sairisay ngonyan an nagtotokdo sa mga tawo sa gabos na lugar kun paano maglilingkod sa Dios na may pagkasararo? Iniimbitaran mi ika na aramon iyan paagi sa brosyur na ini.

Pira sa Mga Saksi ni Jehova an midbid mo? An nagkapira sa samo tibaad pagtaraed, katrabaho, o kaklase mo. O tibaad nakaolay mi na ika dapit sa Biblia. Siisay man nanggad kami, asin taano ta ipinapakipag-olay mi sa mga tawo an samong mga tinutubod?

Ordinaryong mga tawo. Laen-laen an pinaghalean mi asin kamugtakan sa sosyedad. Dati, an nagkapira sa samo iba an relihion, mantang an iba dai nagtutubod sa Dios. Minsan siring, bago nagin Saksi, gabos kami naggamit nin panahon tanganing maingat na siyasaton an katokdoan sa Biblia. (Guibo 17:11) Uminoyon kami sa nanodan mi, dangan personal kaming nagdesisyon na sambahon si Jehova Dios.

Nakikinabang sa pag-adal sa Biblia. Kapareho nin iba, kaipuhan ming atubangon an mga problema asin kaluyahan mi. Alagad, paagi sa pagmamaigot na iaplikar an mga prinsipyo sa Biblia sa aroaldaw na buhay, naeksperyensiahan mi na nagin marahay nanggad an kalidad kan buhay. (Salmo 128:1, 2) Sarong dahelan iyan kaya ipinapakipag-olay mi sa iba an marahay na mga bagay na nanonodan mi sa Biblia.

Namumuhay kaoyon kan diosnon na mga pamantayan. An mga pamantayan na ini, na itinotokdo kan Biblia, nakakatabang sa samo na mapakarhay an buhay mi asin igalang an iba. Napapatalubo man kaiyan an mga kualidad na arog nin pagkaonesto asin kabootan. Nakakatabang iyan sa pagkaigwa nin marahay asin produktibong mga miembro nin sosyedad, saka pinapaoswag kaiyan an moralidad asin pagkasararo kan pamilya. Huling kombensido na ‘an Dios dai nagpapalaen nin mga tawo,’ kaiba kami sa kasararoan nin magturugang sa espirituwal na tunay na internasyonal na pamilya, na dai nagkakabaranga huli sa rasa asin politika. Minsan ngani kami ordinaryong mga tawo, mayo kaming kaagid bilang grupo.​—Guibo 4:13; 10:34, 35.

• Ano an pagkakapareho kan Mga Saksi ni Jehova asin kan ibang mga tawo?

• Anong mga pamantayan an nanodan kan mga Saksi sa pag-adal sa Biblia?

Dakol an naghohona na an Mga Saksi ni Jehova ngaran nin bagong relihion. Minsan siring, labing 2,700 na taon na an nakaagi, inapod an mga lingkod kan solamenteng tunay na Dios na ‘mga saksi’ nia. (Isaias 43:10-12) Bago 1931, midbid kami bilang Mga Estudyante sa Biblia. Taano ta pinili ming gamiton an ngaran na Mga Saksi ni Jehova?

Ipinapamidbid kaiyan an samong Dios. Segun sa suanoy na mga manuskrito, an ngaran nin Dios na Jehova rinibong beses na naglataw sa Biblia. Sa dakol na traduksion kan Biblia, iyan sinalidahan nin mga titulo, arog baga nin Kagurangnan o Dios. Pero, ihinayag ki Moises kan tunay na Dios an sadiri Nia paagi sa personal na ngaran na Jehova, na nagsasabi: ‘Iyo ini an sakuyang ngaran sagkod pa man.’ (Exodo 3:15) Paagi kaini, ipinahiling nia na laen sia sa gabos na falsong dios. Ipinag-oorgolyo ming darahon an banal na ngaran nin Dios.

Ipinapaliwanag kaiyan an samong misyon. Sunod-sunod na henerasyon kaidtong suanoy na panahon, magpoon sa matanos na si Abel, an nagpatotoo dapit sa pagtubod ninda ki Jehova. Sa laog nin dakol na siglo, si Noe, Abraham, Sara, Moises, David, asin iba pa napabilang sa ‘dakulang panganoron na ini nin mga saksi.’ (Hebreo 11:4–12:1) Kun paanong an sarong indibiduwal puedeng magtestigo sa husgado para sa sarong tawo na mayong sala, determinado kaming ipahayag an katotoohan dapit sa samong Dios.

Inaarog mi si Jesus. Sa Biblia, sia inaapod na “an maimbod asin totoong saksi.” (Kapahayagan 3:14) Sinabi mismo ni Jesus na ‘ipinamidbid nia an ngaran nin Dios’ asin padagos na ‘nagpatotoo sa katotoohan’ dapit sa Dios. (Juan 17:26; 18:37) Kun siring, an tunay na mga parasunod ni Cristo dapat na magdara kan ngaran ni Jehova asin ipahayag iyan. Ini an hinihingoang gibohon kan Mga Saksi ni Jehova.

• Taano ta piniling gamiton kan Mga Estudyante sa Biblia an ngaran na Mga Saksi ni Jehova?

• Gurano na kahaloy na igwa nin mga saksi si Jehova digdi sa daga?

• Siisay an pinakanangongorog na Saksi ni Jehova?