Maglakaw Sigun sa Pagtubod, Bakong Sigun sa Nahihiling

Kan madali nang sakupon asin laglagon an Jerusalem, nagsurat si apostol Pablo na bilang marahay na mga suldados ni Cristo dapat asahan kan mga Kristiyano na maagi sinda nin mga kasakitan asin dai ninda dapat na magin priyoridad an saindang sadiring kapakinabangan asin kaugmahan. (2 Tim. 2:3, 4) Madali na man laglagon an maraot na kinaban na ini, kaya kaipuhan na magin makusog an satong pagtubod tanganing magdanay na nakapokus sa espirituwal na mga bagay. (2 Cor. 4:18; 5:7) Hilingon an videong ‘Lumakad sa Pamamagitan ng Pananampalataya, Hindi sa Pamamagitan ng Paningin.’ (Buksan an jw.org/tl, asin hanapon sa PUBLIKASYON > VIDEO.) Mangnuhon kun paanong an pagkamuot sa materyal na mga bagay nagin nakakagadan na siod ki Naham asin Abital. Pagkatapos, repasuhon an minasunod na mga hapot.

(1) Ano an “makababalding bagay . . . na nagtitindog sa banal na lugar” kan inot na siglo, asin anong desisyon an kinaipuhan na gibuhon kan mga Kristiyano sa Jerusalem kaidto? (Mat. 24:15, 16, NW) (2) Taano ta kaipuhan ninda nin pagtubod sa paghali sa siyudad? (3) Anong mga sakripisyo an kaiba diyan? (4) Taano ta dai tulos naghali si Naham asin Abital? (Mat. 24:17, 18) (5) Ano pa an nagin angat sa pagtubod ni Raquel kan pahali na sinda sa Jerusalem? (Mat. 10:34-37; Mar. 10:29, 30) (6) Paano nagin marahay na halimbawa sa pagtubod asin pagtitiwala ki Jehova si Etan? (7) Anong mga kasakitan an inagihan kan mga Kristiyano sa Pella? (8) Paano luway-luway na luminuya an pagtubod ni Naham asin Abital? (9) Paano inataman ni Jehova an mga Kristiyano sa Pella? (Mat. 6:33; 1 Tim. 6:6-8) (10) Paano ta puwedeng arugon si Abraham asin Sara mantang parani na kita sa katapusan kan sistemang ini nin mga bagay? (Heb. 11:8-10) (11) Ano an nakakumbinsir ki Naham asin Abital na bumalik sa Jerusalem, asin taano ta sala an nagin desisyon ninda? (Luc. 21:21) (12) Ano an talagang kamugtakan sa Jerusalem pag-abot ninda duman? (13) Taano ta dapat niyatong pakusugon an satong pagtubod ngunyan—bago mag-abot an katapusan kan sistemang ini nin mga bagay?—Luc. 17:31, 32; 21:34-36.

Naglalakaw kita sigun sa pagtubod kun (1) nagtitiwala kita sa paggiya ni Jehova, (2) nagpapagiya kita sa saiya sa gabos niyatong ginigibo, asin (3) ipinapahiling ta na mas mahalaga sa sato an espirituwal na mga bagay kisa sa materyal na mga bagay. Lugod na magin determinado kitang marhay na maglakaw sigun sa pagtubod, na nagtitiwala na ‘an kinaban naagi sana asin an saiyang mga hurot, alagad an naggigibo kan buot nin Diyos nagdadanay sagkod lamang.’—1 Juan 2:17.