Tinukduan Niya si Nicodemo sa Banggi

Kan nasa Jerusalem si Jesus para sa Paskuwa kan 30 C.E., naggibo siya nin pambihirang mga tanda, o mga milagro. Bilang resulta, dakul an nagturubod sa saiya. Napahanga an Fariseong si Nicodemo na miyembro kan Sanhedrin, an korte suprema kan mga Judio. Huling gusto niyang makanuod pa, nagduman siya ki Jesus, pero banggi niya ini ginibo dahil posibleng natatakot siyang maraot an reputasyon niya sa iba pang Judiong lider pag mahiling siya.

“Rabbi,” an sabi ni Nicodemo, “aram ming isinugo ka kan Diyos bilang paratukdo, huli ta dai nin siisay man na makakagibo kan mga tandang ini na ginigibo mo kun mayo sa saiya an Diyos.” Bilang simbag, sinabi ni Jesus na tanganing makalaog sa Kahadian nin Diyos, an sarong tawo dapat na “imundag giraray.”—Juan 3:2, 3.

Pero paano imumundag giraray an sarong tawo? “Dai siya makakalaog nin ikaduwang beses sa tulak kan saiyang ina asin mamundag giraray, bako daw?” an hapot ni Nicodemo.—Juan 3:4.

Dai, bako iyan an buot sabihon kan imundag giraray. Nagpaliwanag si Jesus: “Sagkod na an saro dai imundag sa tubig asin espiritu, dai siya makakalaog sa Kahadian nin Diyos.” (Juan 3:5) Kan bawtismuhan si Jesus asin buminaba an banal na espiritu sa saiya, siya iminundag “sa tubig asin espiritu.” Kan panahon na idto, may nadangog man na kapahayagan hali sa langit: “Ini an sakuyang Aki, an namumutan, na sakong inuuyunan.” (Mateo 3:16, 17) Sa paaging ini, ipinaisi nin Diyos na si Jesus nagin sarong espirituwal na aki na igwa nin paglaom na makalaog sa langitnon na Kahadian. Mga pirang taon pa an malihis, pag-abot nin Pentecostes 33 C.E., ibububo an banal na espiritu sa iba pang binawtismuhan, asin sa siring sinda imumundag giraray bilang mga aki nin Diyos na pinaniaki sa espiritu.—Gibo 2:1-4.

Nasakitan si Nicodemo na masabutan an itinutukdo ni Jesus manungod sa Kahadian. Kaya nagtao si Jesus nin dugang pang impormasyon mapadapit sa saiyang espesyal na papel bilang tawong Aki nin Diyos. Nagsabi si Jesus: “Kun paanong initaas ni Moises an halas duman sa kaawagan, an Aki nin tawo kaipuhan man na iitaas, tanganing an siisay man na nagtutubod sa saiya magkaigwa nin buhay na daing katapusan.”—Juan 3:14, 15.

Kan suanoy na panahon, an mga Israelitang nakagat nin makamandag na halas kaipuhan na humiling sa halas na tanso tanganing maligtas. (Bilang 21:9) Kaagid kaiyan, an gabos na tawo kaipuhan na magpahiling nin pagtubod sa Aki nin Diyos tanganing mailigtas sa kagadanan asin magkaigwa nin buhay na daing katapusan. Tanganing iduon an mamumuton na ginibo ni Jehova mapadapit digdi, ini an sunod na sinabi ni Jesus ki Nicodemo: “Huli ta an Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Kaya, kan nasa Jerusalem si Jesus, mga anom na bulan pagkatapos punan an saiyang ministeryo, lininaw niya na siya an dalan para sa kaligtasan kan katawuhan.

Sinabi pa niya ki Nicodemo: “Dai isinugo nin Diyos sa kinaban an saiyang Aki tanganing hukuman kaini an kinaban.” An buot sabihon, dai siya isinugo tanganing sentensiyahan iyan, na kinokondenar an gabos na tawo pasiring sa kalaglagan. Imbes, sinabi ni Jesus na isinugo siya “tanganing maligtas an kinaban paagi sa saiya.”—Juan 3:17.

Nagduman si Nicodemo ki Jesus sa kadikluman nin banggi huling natatakot siya na may makahiling sa saiya. Kaya interesante na arog kaini an pantapos na sinabi ni Jesus sa saiya: “Ini an basehan sa paghukom: na an ilaw [na iyo si Jesus paagi kan saiyang buhay asin mga katukduan] nagdatong sa kinaban, alagad namutan kan mga tawo an kadikluman imbes na an liwanag, huling an saindang mga gibo maraot. Huli ta an siisay man na naggigibo nin karatan nauungis sa liwanag asin dai minarani sa liwanag, tanganing an saiyang mga gibo dai masaway. Alagad an siisay man na naggigibo kan tama minarani sa liwanag, tanganing an saiyang mga gibo mahayag na kauyon kan kabutan nin Diyos.”—Juan 3:19-21.

Ngunyan, an kaipuhan na sanang gibuhon ni Nicodemo, na sarong Fariseo asin paratukdo sa Israel, iyo na hurop-hurupon an nadangog pa sana niya manungod sa papel ni Jesus sa katuyuhan nin Diyos.