Mga Reperensiya Para sa Workbook sa Pagtiripon na Pamumuhay Asin Ministeryo
DISYEMBRE 3-9
KAYAMANAN NA YAON SA TATARAMON NIN DIYOS | GIBO 9-11
“Maringis na Parapersegir na Nagin Sarong Maigot na Saksi”
(Gibo 9:1, 2) Alagad si Saulo, huling grabe pa man giraray an pagkaanggot sa mga disipulo kan Kagurangnan asin nagmamawot na garadanon an mga ini, nagduman sa halangkaw na saserdote 2 asin naghagad sa saiya nin mga surat na ipapahiling sa mga sinagoga sa Damasco, tanganing madara niya sa Jerusalem na nakagapos an siisay man na madiskubre niyang kabilang sa Dalan, mga lalaki man o babayi.
bt 60 ¶1-2
“Nagkaigwa nin Panahon nin Katuninungan” an Kongregasyon
GRABE an kaanggutan kan mga lalaking nagbabaklay mantang parani sinda sa Damasco, na diyan igwa sinda nin maraot na plano. Guguyudon ninda an mga disipulo ni Jesus paluwas sa mga harong kaini. Gagapuson, ipapasupog, asin dadarahon ninda an mga ini sa Jerusalem tanganing atubangon an kaanggutan kan Sanhedrin.
2 An lider kan mga parapersegir, si Saulo, naimbuwelto na sa paggadan nin sarong tawo. Dai pa sana nahahaloy, may pag-uyon niyang pighiling mantang ginagapo kan kapwa niya mga panatiko si Esteban na sarong maimbod na disipulo ni Jesus, sagkod na magadan ini. (Gibo 7:57–8:1) Dai pa nakontento si Saulo sa pagpersegir sa mga parasunod ni Jesus na nasa Jerusalem, pinanginutan niya an pagpalakop kan garo kalayong naglalaad na persekusyon. Gusto niyang paraon an nakakauyam na sektang midbid sa apod na “Dalan.”—Gibo 9:1, 2; hilingon an kahon na “An Awtoridad ni Saulo sa Damasco,” sa pahina 61.
(Gibo 9:15, 16) Alagad sinabi kan Kagurangnan sa saiya: “Magduman ka! huling an tawong ini sarong kasangkapan na pinili ko tanganing darahon an sakuyang ngaran sa mga nasyon siring man sa mga hadi saka sa mga aki nin Israel. 16 Huli ta ipapahiling ko sa saiya nin malinaw kun gurano kadakul na kasakitan an kaipuhan niyang agihan para sa sakuyang ngaran.”
Pagpapahalaga ki Jehova Bilang Satong Paragibo nin Kuron
4 Pag sinisiyasat ni Jehova an mga tawo, dai siya naghihiling sa saindang pangluwas na itsura. Imbes, sinisiyasat niya an puso, an panglaog na pagkatawo ninda. (Basahon an 1 Samuel 16:7b.) Malinaw na nahiling an pagigin totoo kaini kan establisaron nin Diyos an Kristiyanong kongregasyon. Irinani niya sa saiya asin sa saiyang Aki an dakul na tawo na tibaad sa paghiling nin iba, mayong halaga. (Juan 6:44) An saro diyan iyo an Fariseo na an pangaran Saulo—sarong ‘paralanghad, paralamag, asin parapakaraot.’ (1 Tim. 1:13) Pero sa paghiling kan “parasiyasat nin mga puso,” si Saulo bakong siring sa dalipay na daing serbi. (Tal. 17:3, NW) Imbes, sa paghiling nin Diyos puwede siyang moldehon na magin sarong mahalagang lalagan—sa katunayan, “sarong kasangkapan na pinili” tanganing magpatotoo “sa mga nasyon siring man sa mga hadi saka sa mga aki nin Israel.” (Gibo 9:15, NW) Kabali sa iba pang nahiling nin Diyos na may potensiyal na magin lalagan “para sa espesyal na gamit” iyo an mga tawong dating buratsero, imoral, asin parahabon. (Roma 9:21, NW; 1 Cor. 6:9-11) Mantang nagkukua sinda nin tamang kaaraman sa Tataramon nin Diyos, pinapakusog ninda an saindang pagtubod ki Jehova asin tinutugutan nindang moldehon niya sinda.
(Gibo 9:20-22) asin sa mga sinagoga tulos siyang naghulit manungod ki Jesus, na iyo ini an Aki nin Diyos. 21 Alagad an gabos na nakadangog sa saiya napangalas asin nagsarabi: “Bakong iyo ini su tawong nagpasakit nin grabe sa mga yaon duman sa Jerusalem na nag-aapod sa ngaran na ini? Bakong an tuyo niya sa pagdigdi iyo na arestaron sinda asin darahon sa mga panginot na saserdote?” 22 Alagad si Saulo padagos na nagigin mas epektibo sa paghuhulit. Pinatunayan niya paagi sa nakakakumbinsir na mga argumento na iyo ini an Cristo, asin dai nin mairason sa saiya an mga Judio na nakaistar sa Damasco.
bt 64 ¶15
“Nagkaigwa nin Panahon nin Katuninungan” an Kongregasyon
15 Naiimahinar mo daw an pagkabigla, pagkangalas, asin kaanggutan na siguradong namati kan mga tawo kan magpuon nang maghulit si Saulo dapit ki Jesus sa mga sinagoga? “Bakong iyo ini su tawong nagpasakit nin grabe sa mga yaon duman sa Jerusalem na nag-aapod sa ngaran na ini?” an hapot ninda. (Gibo 9:21) Mantang ipinapaliwanag ni Saulo kun taano ta nagbago an sabuot niya dapit ki Jesus, “pinatunayan niya paagi sa nakakakumbinsir na mga argumento na iyo ini an Cristo.” (Gibo 9:22) Pero dai gabos na tawo makukumbinsir nin mga lohikong argumento. Dai kaiyan mababago an lambang isip na nakagapos na sa mga tradisyon o an lambang puso na pano nin kapalangkawan. Pero dai nagsuko si Saulo.
Maghanap nin Espirituwal na Kayamanan
(Gibo 9:4) asin natumba siya sa daga saka may nadangog siyang boses na nagtaram sa saiya: “Saulo, Saulo, taano ta pinepersegir mo ako?”
bt 60-61 ¶5-6
“Nagkaigwa nin Panahon nin Katuninungan” an Kongregasyon
5 Kan papunduhon ni Jesus si Saulo sa dalan pasiring sa Damasco, dai Siya naghapot: “Taano ta pinepersegir mo an sakong mga disipulo?” Imbes, ihinapot niya: “Taano ta pinepersegir mo ako?” (Gibo 9:4) Iyo, namamati mismo ni Jesus an mga pagbalong naeeksperyensiyahan kan saiyang mga parasunod.—Mat. 25:34-40, 45.
6 Kun pinepersegir ka huli kan saimong pagtubod ki Cristo, makakasigurado ka na aram ni Jehova asin ni Jesus an saimong sitwasyon. (Mat. 10:22, 28-31) Posibleng dai mahali an mga pagbalo sa presente. Girumdumon na nahiling ni Jesus na imbuwelto si Saulo sa paggadan ki Esteban, nahiling man Niya na ginuguyod ni Saulo paluwas sa saindang mga harong an saiyang maimbod na mga disipulo sa Jerusalem. (Gibo 8:3) Pero, dai nag-interbenir si Jesus kan panahon na idto. Minsan siring, paagi ki Cristo, tinawan ni Jehova si Esteban asin an iba pang mga disipulo nin kusog na kinakaipuhan ninda para magdanay na maimbod.
(Gibo 10:6) Nagdadagos ini duman ki Simon, sarong paragibo nin balát na may harong sa gilid kan dagat.”
nwtsty study note sa Gi 10:6
Simon, sarong paragibo nin balát: An sarong paragibo nin balát naggagamit nin anit nin mga hayop; hinahali niya an mga barahibo o mga nakadukot pang karne asin taba gamit an sarong likido na may apug. Dangan, linalagan niya an anit nin sarong maisog na likido tanganing magamit iyan sa paggibo nin balát. Mabata an proseso kan paggibo nin balát asin nangangaipo nin dakul na tubig, kaya puwedeng iyan an rason kun taano ta nakaistar si Simon sa gilid kan dagat, posibleng sa luwas kan Jope. Sigun sa Katugunan ni Moises, an sarong tawong nagkakapot nin bangkay nin mga hayop maati sa seremonyal na paagi. (Le 5:2; 11:39) Kaya, minemenos kan dakul na Judio an mga paragibo nin balát asin siguradong magduduwa-duwa sindang makidagos sa harong kan mga ini. An totoo, ibinilang kan Talmud an trabaho nin sarong paragibo nin balát na mas hababa pa kisa sa parakolekta nin udo nin hayop. Pero, dai tinugutan ni Pedro na maulang siya kan diskriminasyon na makidagos sa harong ni Simon. An pagigin bukas kan isip ni Pedro sa pagkakataon na ini magigin magayon na kapinunan kan sunod niyang asignasyon—an pagbisita sa harong nin sarong Hentil. Sinasabi kan ibang iskolar na an Griegong termino para sa “paragibo nin balát” (byr·seusʹ) iyo an apelyido ni Simon.
Pagbasa sa Bibliya
(Gibo 9:10-22) May disipulo sa Damasco na an pangaran Ananias, asin sa sarong bisyon sinabi kan Kagurangnan sa saiya: “Ananias!” Sinabi niya: “Uni tabi ako, Kagurangnan.” 11 Sinabi kan Kagurangnan sa saiya: “Tumindog ka, dumuman ka sa kalye na inaapod Tanos, asin hanapon mo an sarong lalaking taga Tarso na an pangaran Saulo na yaon sa harong ni Judas. Sa mismong oras na ini, namimibi siya, 12 asin sa sarong bisyon nahiling niyang nag-abot an sarong lalaki na an pangaran Ananias asin ipinatong kaini an mga kamot kaini sa saiya tanganing makabalik an saiyang paghiling.” 13 Alagad nagsimbag si Ananias: “Kagurangnan, nadangog ko an sinasabi kan dakul na tawo manungod sa lalaking ini—an gabos na maraot na bagay na ginibo niya sa saimong banal na mga lingkod sa Jerusalem. 14 Asin nagdigdi siya na may awtoridad hali sa mga panginot na saserdote tanganing arestaron an gabos na nag-aapod sa ngaran mo.” 15 Alagad sinabi kan Kagurangnan sa saiya: “Magduman ka! huling an tawong ini sarong kasangkapan na pinili ko tanganing darahon an sakuyang ngaran sa mga nasyon siring man sa mga hadi saka sa mga aki nin Israel. 16 Huli ta ipapahiling ko sa saiya nin malinaw kun gurano kadakul na kasakitan an kaipuhan niyang agihan para sa sakuyang ngaran.” 17 Kaya nagduman si Ananias asin naglaog sa harong, asin ipinatong niya an saiyang mga kamot ki Saulo saka sinabi: “Tugang kong Saulo, an Kagurangnan na Jesus, na nagpahiling sa saimo sa tinampong inagihan mo pasiring digdi, siya an nagsugo sa sako tanganing makabalik an saimong paghiling asin tanganing mapano ka nin banal na espiritu.” 18 Asin tulos-tulos, nahulog hali sa saiyang mga mata an garo mga kiskis, asin nakabalik an saiyang paghiling. Dangan tuminindog siya asin binawtismuhan, 19 saka nagkakan siya asin kuminusog. Nagdanay siya nin pirang aldaw kaiba kan mga disipulo sa Damasco, 20 asin sa mga sinagoga tulos siyang naghulit manungod ki Jesus, na iyo ini an Aki nin Diyos. 21 Alagad an gabos na nakadangog sa saiya napangalas asin nagsarabi: “Bakong iyo ini su tawong nagpasakit nin grabe sa mga yaon duman sa Jerusalem na nag-aapod sa ngaran na ini? Bakong an tuyo niya sa pagdigdi iyo na arestaron sinda asin darahon sa mga panginot na saserdote?” 22 Alagad si Saulo padagos na nagigin mas epektibo sa paghuhulit. Pinatunayan niya paagi sa nakakakumbinsir na mga argumento na iyo ini an Cristo, asin dai nin mairason sa saiya an mga Judio na nakaistar sa Damasco.
DISYEMBRE 10-16
KAYAMANAN NA YAON SA TATARAMON NIN DIYOS | GIBO 12-14
“Si Bernabe Asin Pablo Naggibo nin mga Disipulo sa Hararayong Lugar”
(Gibo 13:2, 3) Mantang naglilingkod sinda ki Jehova asin nag-aayuno, nagsabi an banal na espiritu: “Pilion nindo para sa sako si Bernabe saka si Saulo; may gibuhon akong itinagama sa sainda.” 3 Dangan pagkatapos nindang mag-ayuno asin mamibi, ipinatong ninda sa duwa an saindang mga kamot asin isinubol an mga ini.
bt 86 ¶4
“Napano nin Kaugmahan Asin Banal na Espiritu”
4 Alagad taano ta espesipikong pinili kan banal na espiritu si Bernabe asin Saulo para itagama sa “gibuhon”? (Gibo 13:2) Mayong sinasabi an Bibliya. An aram ta, an banal na espiritu an naggiya sa pagpili sa mga lalaking ini. Mayong sinambit na kinontra kan mga propeta asin paratukdo sa Antioquia an desisyon na iyan. Imbes, lubos nindang sinuportaran an pagnombrang iyan. Isip-isipon an namati ni Bernabe asin Pablo mantang an saindang mga tugang sa espirituwal, mayong kaimutan na ‘nag-ayuno asin namibi, ipinatong sa sainda an mga kamot kaini asin isinubol sinda.’ (Gibo 13:3) Dapat ta man na suportaran an mga natatawan nin teokratikong asignasyon, pati an mga lalaking ninombrahan para manginot sa kongregasyon. Imbes na mauri sa mga nakaresibi nin mga pribilehiyo, dapat tang “tawan sinda nin mas urog na pagpapahalaga na may pagkamuot huli kan saindang trabaho.”—1 Tes. 5:13.
(Gibo 13:12) Kan mahiling kan gobernador an nangyari, nagpuon siyang magtubod, huli ta napangalas siyang marhay sa mga bagay na nanudan niya manungod ki Jehova.
(Gibo 13:48) Kan madangog ini kan mga tawo kan mga nasyon, nag-urugma sinda saka nagpuon sindang magsarabi na kahanga-hanga nanggad an tataramon ni Jehova, asin nagturubod an gabos na igwang pusong nasa tamang kamugtakan para sa buhay na daing katapusan.
(Gibo 14:1) Ngunyan sa Iconio magkaibanan sindang naglaog sa sinagoga kan mga Judio asin dahil sa magayunon nindang pagpahayag, kadakul na Judio saka Griego an nagturubod.
bt 95 ¶5
‘Daing Takot na Pagpahayag Paagi sa Awtoridad Hali ki Jehova’
5 Inot na dinumanan ni Pablo asin Bernabe an Iconio, sarong lugar na impluwensiyadong marhay kan kulturang Griego asin saro sa mga mayor na siyudad kan probinsiya nin Roma sa Galacia. Nakaistar sa siyudad na iyan an mga maimpluwensiyang Judio saka an dakul na mga bakong Judiong proselita. Sigun sa kinatudan ninda, naglaog si Pablo asin Bernabe sa sinagoga dangan nagpuon na magtukdo. (Gibo 13:5, 14) “Dahil sa magayunon nindang pagpahayag, kadakul na Judio saka Griego an nagturubod.”—Gibo 14:1.
(Gibo 14:21, 22) Pagkatapos nindang maipahayag an maugmang bareta sa siyudad na iyan asin matabangan an nagkapira na magin disipulo, nagbalik sinda sa Listra, Iconio, asin Antioquia. 22 Duman pinakusog ninda an mga disipulo, na pinaparigon an buot kan mga ini na magdanay sa pagtubod asin sinasabi: “Sa paglaog niyato sa Kahadian nin Diyos, kaipuhan kitang umagi nin dakul na kasakitan.”
Maimbod na Paglingkudan an Diyos sa Ibong nin “Dakul na Kasakitan”
4 Pagkatapos magdalaw sa Derbe, si Pablo asin Bernabe ‘nagbalik sa Listra, saka nagdagos sa Iconio sagkod sa Antioquia. Pinakusog ninda an buot kan mga [disipulo] asin sinadol na magdanay sa pagtubod. Sinabihan pa ninda an mga parasunod: “Kaipuhan mag-agi kita nin dakul na kasakitan bago makalaog sa Kahadian nin Diyos.”’ (Gibo 14:21, 22, BPV) Sa primero, tibaad ikangalas ta an mga tataramon na iyan. Ta kun iisipon, dai man nakakapakusog sa buot an pagkaigwa nin “dakul na kasakitan,” kundi nakakapurisaw. Kaya, paano ‘pinakusog’ ni Pablo asin Bernabe an mga disipulo paagi sa sinabi nindang mapapaatubang sinda sa dakul na kasakitan?
5 Makukua ta an simbag kun sisiyasaton tang marhay an sinabi ni Pablo. Dai niya sana sinabi: “Kaipuhan kitang magtagal nin dakul na kasakitan.” Imbes, sinabi niya: ‘Kaipuhan mag-agi kita nin dakul na kasakitan bago makalaog sa Kahadian nin Diyos.’ Kaya pinakusog ni Pablo an mga disipulo paagi sa pagduduon kan positibong resulta kan pagdanay na maimbod. Bako sanang imahinasyon an premyong iyan. Sa katunayan, sinabi ni Jesus: ‘An makatagal sagkod sa katapusan iyo an makakaligtas.’—Mat. 10:22.
Maghanap nin Espirituwal na Kayamanan
(Gibo 12:21-23) Sarong aldaw kan magtiripon an mga tawo, nagsulot si Herodes nin badong panghadi asin nagtukaw sa tukawan nin paghukom saka nagpuon na magdiskurso sa sainda. 22 Dangan an mga tawong nagkatiripon nagpuon na magkurahaw: “Boses nin diyos, bako nin tawo!” 23 Tulos-tulos, pinadusahan siya kan anghel ni Jehova huli ta dai niya itinao sa Diyos an kamurawayan, asin kinakan siya nin mga ulod dangan nagadan.
Tampok na mga Kabtang sa Libro nin Gibo
12:21-23; 14:14-18. Tolos na inako ni Herodes an kamurawayan na maninigong itao sana sa Dios. Laen nanggad iyan sa ensegida asin may pagdodoon na paghabo ni Pablo saka Bernabe sa dai maninigong kaomawan patin onra! Dai niato maninigong mawoton an kamurawayan huli sa ano man na tibaad nagibo niato sa paglilingkod ki Jehova.
(Gibo 13:9) Dangan si Saulo, na inaapod man na Pablo, napano nin banal na espiritu, kaya hiniling niya nin diretso sa mata an espiritista
nwtsty study notes sa Gi 13:9
Saulo, na inaapod man na Pablo: Sa puntong ini, si Saulo inaapod nang Pablo. An apostol na ini namundag na sarong Hebreo na igwa nin pagkasiyudadanong Romano. (Gi 22:27, 28; Flp 3:5) Kaya posibleng marhay na puon pa sa pagkaaki, igwa na siya nin Hebreong pangaran na Saulo asin Romanong pangaran na Pablo. Ordinaryo na sana sa mga Judio kan panahon na idto, lalo na idtong mga nakaistar sa luwas kan Israel, na magkaigwa nin duwang pangaran. (Gi 12:12; 13:1) Siring man, an pira sa mga kapamilya ni Pablo igwa nin Romano asin Griegong pangaran. (Ro 16:7, 21) Bilang “sarong apostol sa mga nasyon,” isinugo si Pablo para ipahayag an maugmang bareta sa mga bakong Judio. (Ro 11:13) Minalataw na an Romanong pangaran an pinili niyang gamiton; tibaad inisip niya na mas angay ining gamiton. (Gi 9:15; Ga 2:7, 8) Sinasabi kan iba na ginamit niya an Romanong pangaran para tawan nin onra si Sergio Paulo, pero maririsa na bako iyan an dahilan huling padagos niyang ginamit an pangaran na Pablo maski naghali na siya sa Ciprus. Sinasabi man kan iba na linikayan ni Pablo na gamiton an saiyang Hebreong pangaran huling an paagi nin pagpronunsiyar kaiyan sa Griego kaagid sa sarong Griegong termino na nanunungod sa sarong tawo (o hayop) na hambugon maglakaw.—Hilingon an study note sa Gi 7:58.
Pablo: Sa Bicol na traduksiyon kan Kristiyanong Griegong Kasuratan, an pangaran na Pauʹlos, na gikan sa Latin na Paulus, na an buot sabihon “Sadit; Sadang,” ginamit nin 179 beses pag ipinapanungod ki apostol Pablo asin sarong beses pag ipinapanungod sa gobernador kan Ciprus na si Sergio Paulo.—Gi 13:7.
Pagbasa sa Bibliya
(Gibo 12:1-17) Kan panahon na iyan, an nagkapira na kabilang sa kongregasyon pinunan na persegiron ni Herodes na hadi. 2 Ipinagadan niya paagi sa espada si Santiago na tugang ni Juan. 3 Kan mahiling niyang ikinaugma ini kan mga Judio, ipinaarestar man niya si Pedro. (Nangyari ini kan Kapiyestahan kan Tinapay na Daing Lebadura.) 4 Iprineso niya ini saka pinabantayan sa apat na relyebo nin tig-arapat na suldados, asin plano niyang iatubang siya sa mga tawo pagkatapos kan Paskuwa. 5 Mantang nakapreso si Pedro, an kongregasyon maigot na namimibi sa Diyos para sa saiya. 6 Kan banggi bago siya iatubang ni Herodes sa mga tawo, nagtuturog si Pedro na an mga kamot nakakadena sa duwang suldados na nasa mag-ibong niya, asin may mga guwardiyang nagbabantay sa pinto kan selda. 7 Alagad uya! nagtunga an anghel ni Jehova, asin nagliwanag sa selda. Tinalpi niya si Pedro sa may tagiliran asin pinukaw ini, na sinasabi: “Dali, tindog na!” Dangan natangkas an mga kadena sa mga kamot niya. 8 Sinabi kan anghel sa saiya: “Pakarhaya an bado mo asin magsandalyas ka.” Ginibo niya iyan. Tapos, sinabi kaini sa saiya: “Suluta an saimong pang-ibabaw na bado, asin magsunod ka sa sako.” 9 Nagluwas siya sa selda asin nagsunod sa anghel, alagad dai niya aram kun baga totoong nangyayari an ginigibo kan anghel. Sa katunayan, an paghuna niya sarong bisyon an saiyang nahihiling. 10 Linihisan ninda an inot na grupo nin mga guwardiya saka an ikaduwang grupo, asin nakaabot sinda sa lansang na trangkahan na inaagihan paluwas sa presuhan pasiring sa mismong siyudad, asin basta na lang ini buminukas. Kan makaluwas sinda, nag-agi sinda sa sarong kalye, asin tulos siyang binayaan kan anghel. 11 Asin kan marealisar ni Pedro kun ano an nangyayari, sinabi niya: “Sigurado na ako ngunyan na isinugo ni Jehova an saiyang anghel asin na ilinigtas Niya ako sa kamot ni Herodes saka sa gabos na inaasahan kan mga Judio na mangyayari sa sako.” 12 Pagkatapos niyang isip-isipon an nangyari, nagduman siya sa harong ni Maria na ina ni Juan na inaapod man na Marcos, kun sain medyo dakul an nagtitiripon asin namimibi. 13 Kan magtuktok siya sa pinto kan trangkahan, sarong suruguon na babayi na an pangaran Roda an nagrani tanganing hilingon kun siisay an nagtutuktok. 14 Namidbidan niya an boses ni Pedro, pero sa sobrang kaugmahan niya dai niya binuksan an trangkahan, kundi nagdalagan siya palaog asin sinabi niyang nakatindog si Pedro sa may trangkahan. 15 Sinabi ninda sa saiya: “Nabubua ka na.” Alagad sige siyang insistir na si Pedro talaga idto. Nagpuon sindang magsabi: “Anghel niya idto.” 16 Alagad nagpadagos si Pedro sa pagtuktok. Kan buksan ninda an pinto, nahiling ninda siya asin nagngaralas sinda. 17 Pero sinenyasan niya sinda na magsilensiyo dangan detalyado niyang inistorya sa sainda kun paano siya ilinuwas ni Jehova sa presuhan, tapos sinabi niya: “Ibareta nindo ini ki Santiago asin sa mga tugang.” Dangan naghali siya asin nagpasiring sa ibang lugar.
DISYEMBRE 17-23
KAYAMANAN NA YAON SA TATARAMON NIN DIYOS | GIBO 15-16
“Nagkakasararong Desisyon Basado sa Tataramon nin Diyos”
(Gibo 15:1, 2) Ngunyan igwang mga lalaking nag-arabot hali sa Judea asin nagpuon na magtukdo sa mga tugang: “Sagkod na dai kamo tinuturi sigun sa pagbuot ni Moises, dai kamo maliligtas.” 2 Alagad pagkatapos na magkaigwa nin dai pagkauruyon asin nin pakipagdiskusyunan sa sainda si Pablo saka Bernabe, napagdesisyunan na si Pablo, Bernabe, asin an nagkapirang iba pa magduman sa mga apostol asin kamagurangan sa Jerusalem tanganing iatubang an manungod sa isyung ini.
bt 102-103 ¶8
‘Nagkaigwa nin Dai Pagkauruyon’
8 Nagpadagos si Lucas: “Pagkatapos na magkaigwa nin dai pagkauruyon asin nin pakipagdiskusyunan sa sainda [sa “pirang lalaki”] si Pablo saka Bernabe, napagdesisyunan [kan kamagurangan] na si Pablo, Bernabe, asin an nagkapirang iba pa magduman sa mga apostol asin kamagurangan sa Jerusalem tanganing iatubang an manungod sa isyung ini.” (Gibo 15:2) An mga tataramon na ‘dai pagkauruyon asin pakipagdiskusyunan’ nagpaparisa na an duwang lado may makusog na paninindugan saka kumbiksiyon, asin dai iyan masolusyunan kan kongregasyon sa Antioquia. Para maingatan an katuninungan asin pagkasararo, may kadunungan na inareglo kan kongregasyon na iatubang an isyung ini “sa mga apostol asin kamagurangan sa Jerusalem,” na iyo an namamahalang grupo kaidto. Ano an manunudan niyato sa mga magurang sa kongregasyon sa Antioquia?
(Gibo 15:13-20) Pagkatapos nindang magtaram, suminimbag si Santiago: “Mga tugang, danguga nindo ako. 14 Detalyadong isinaysay ni Simeon kun paanong sa inot na pagkakataon itinao nin Diyos an saiyang atensiyon sa mga nasyon tanganing kumua hali sa sainda nin sarong banwaan para sa saiyang ngaran. 15 Asin minauyon diyan an mga tataramon kan Mga Propeta, siring kan nasusurat: 16 ‘Pagkatapos kan mga bagay na ini mabalik ako asin ititindog ko liwat an buminagsak na tolda ni David; hihirahayon ko an mga nagabang parte asin itutugdok ko liwat iyan, 17 tanganing an nagkataradang mga tawo maigot na maghanap ki Jehova, kaiba an mga tawo kan gabos na nasyon, sarong banwaan na inaapod uyon sa sakuyang ngaran, an sabi ni Jehova, na iyo an naggigibo kan mga bagay na ini, 18 na itinalaga niya kaidto pa.’ 19 Kaya an opinyon ko digdi, dai na pagpasakitan an mga tawo kan mga nasyon na nagmamawot maglingkod sa Diyos, 20 kundi na suratan sinda na maglikay sa mga bagay na konektado sa pagsamba sa mga idolo, sa seksuwal na imoralidad, sa pagkakan nin mga hayop na tinilok, asin sa dugo.
Iginagalang kan Tunay na mga Kristiano an Tataramon nin Dios
6 An nakatabang na maresolberan an isyu iyo an mga tataramon sa Amos 9:11, 12. Arog kan pagkakotar na nasa Gibo 15:16, 17, mababasa niato: “Ako mabalik asin itotogdok liwat an payag-payag ni David na gaba; asin itotogdok ko liwat an mga kagabaan kaiyan asin papatindogon iyan liwat, tangani na an mga natatada sa mga tawo odok na maghanap ki Jehova, kaiba an mga tawo hale sa gabos na nasyon, mga tawo na inaapod sa sakuyang ngaran, sabi ni Jehova.” (NW)
7 Pero tibaad may magkontra, ‘Dai man sinasabi kan tekstong iyan na dai na kaipuhan kan mga nagtutubod na Gentil na magpaturi.’ Totoo iyan; minsan siring, nasabotan kan Judiong mga Kristiano an punto. Dai ninda ibinilang an tinuring mga Gentil na ‘mga tawo hale sa mga nasyon’ kundi ibinilang nindang mga tugang. (Ex. 12:48, 49) Halimbawa, segun sa bersion ni Bagster kan Septuagint, mababasa niato sa Ester 8:17: “Dakol sa mga Gentil an tinuri, asin nagin mga Judio.” Kaya, malinaw an mensahe kan ihula kan Kasuratan na an mga natatada sa harong ni Israel (mga Judio asin tinuring mga Judiong proselito) kaiba an “mga tawo hale sa gabos na nasyon” (bakong turing mga Gentil) magigin sarong banwaan para sa ngaran nin Dios. An pagturi bakong kahagadan sa mga Gentil na gustong magin Kristiano.
(Gibo 15:28, 29) Huli ta pinagmarhay kan banal na espiritu asin niyamo mismo na dai na magdagdag pa nin pagabat sa saindo apuwera kan mga bagay na ini na kaipuhan nanggad: 29 na padagos na maglikay sa mga bagay na inatang sa mga idolo, sa dugo, sa pagkakan nin mga hayop na tinilok, asin sa seksuwal na imoralidad. Kun pagmamaigutan nindong rayuan an mga bagay na ini, mapapakarhay kamo. Ingatan tabi nindo an saindong sadiri.”
(Gibo 16:4, 5) Asin sa saindang pagbiyahe asin pag-agi sa mga siyudad, ipinapaabot ninda sa mga tugang duman an mga napagdesisyunan kan mga apostol asin kan kamagurangan na yaon sa Jerusalem, tanganing masunod iyan kan mga tugang. 5 Sa siring, padagos nanggad na napapakusog an pagtubod kan mga kongregasyon asin padagos na nagdadakul an bilang kan mga tugang aroaldaw.
bt 123 ¶18
“Pinapakusog an mga Kongregasyon”
18 Magkaibanan sa gibuhon si Pablo asin Timoteo sa laog nin dakul na taon. Bilang mga nagbibiyaheng ministro, nagsagibo sinda nin manlain-lain na misyon sa ngaran kan namamahalang grupo. Sinasabi kan Bibliya: “Asin sa saindang pagbiyahe asin pag-agi sa mga siyudad, ipinapaabot ninda sa mga tugang duman an mga napagdesisyunan kan mga apostol asin kan kamagurangan na yaon sa Jerusalem, tanganing masunod iyan kan mga tugang.” (Gibo 16:4) Minalataw na sinunod kan mga kongregasyon an instruksiyon kan mga apostol saka kamagurangan sa Jerusalem. Bilang resulta kan saindang pagsunod, “padagos nanggad na napapakusog an pagtubod kan mga kongregasyon asin padagos na nagdadakul an bilang kan mga tugang aroaldaw.”—Gibo 16:5.
Maghanap nin Espirituwal na Kayamanan
(Gibo 16:6-9) Siring man, nag-agi sinda sa Frigia asin Galacia, huli ta pinagbawalan sinda kan banal na espiritu na magpahayag kan mensahe sa probinsiya nin Asia. 7 Pagkatapos, kan magpasiring sinda sa Misia, naghinguwa sindang makaduman sa Bitinia, alagad paagi sa espiritu, dai sinda tinugutan ni Jesus. 8 Kaya uminagi sinda sa Misia asin nagpasiring sa Troas. 9 Asin kan banggi nagkaigwa si Pablo nin bisyon—sarong lalaking taga Macedonia an nakatindog sa atubangan niya asin nakikiulay, na nagsasabi: “Bumalyo ka sa Macedonia asin tabangan mo kami.”
Makanood sa Pagigin Mapagbantay kan mga Apostol ni Jesus
8 Ano an manonodan niato digdi? Mangnohon na saka sana nag-interbenir an espiritu nin Dios kan ponan ni Pablo an pagbiahe pasiring sa Asia. Dangan, saka sana giniyahan ni Jesus si Pablo kan harani na ini sa Bitinia. Asin sa katapustapusi, saka sana giniyahan ni Jesus si Pablo na magduman sa Macedonia kan makaabot ini sa Troas. Bilang Payo kan kongregasyon, puede kitang giyahan ni Jesus sa siring man kaiyan na paagi. (Col. 1:18) Halimbawa, tibaad iniisip mong magpayunir o magbalyo sa lugar na mas dakula an pangangaipo. Alagad posibleng pagkagibo mo nin mga lakdang na aboton an saimong pasohan, saka sana ika gigiyahan ni Jesus paagi sa espiritu nin Dios. Sa pag-ilustrar: Mapapasiko sana nin sarong drayber an saiyang auto pawala o patoo kun iyan nagdadalagan. Kaagid kaiyan, puede sana kitang giyahan ni Jesus sa pagpahiwas kan satong ministeryo kun kita naghihiro—kun kita naghihingoa na aboton an satong pasohan.
(Gibo 16:37) Alagad sinabi ni Pablo sa sainda: “Hinampak ninda kami sa publiko na dai pa nasesentensiyahan, dawa ngani mga Romano kami, tapos iprineso pa. Ngunyan gusto ninda kaming paluwason nin sekreto? Dai puwede! Magdigdi sinda asin ibanan ninda kami paluwas.”
nwtsty study note sa Gi 16:37
mga Romano kami: Buot sabihon, mga siyudadano nin Roma. Si Pablo asin minalataw na pati si Silas mga siyudadano nin Roma. Sinasabi sa ley kan Roma na an sarong siyudadano pirming may deretso na tawan nin tamang pagbista asin dai nuarin man padusahan sa publiko na dai pa nasesentensiyahan. An pagigin siyudadano nin Roma nagtatao sa sarong tawo nin nagkapirang deretso asin pribilehiyo sain man siya magduman sa imperyo. An sarong siyudadano nin Roma nasa irarom kan ley nin Roma, bako kan ley kan mga siyudad o probinsiyang sakop kaini. Pag inakusaran, puwede siyang magtugot na bistahon sigun sa lokal na ley; pero may deretso pa man giraray siya na dangugon sa husgado kan Roma. Sa kaso na may padusang kagadanan, may deretso siyang mag-apelar sa emperador. Naghulit si apostol Pablo sa bilog na Imperyo nin Roma. Ginamit niya an saiyang deretso bilang siyudadano nin Roma sa tulong pagkakataon. An inot iyo ining sa Filipos, kan sabihon niya sa mga mahistrado na binalga ninda an saiyang deretso kan kulgan ninda siya.—Para sa duwa pang pagkakataon, hilingon an study notes sa Gi 22:25; 25:11.
Pagbasa sa Bibliya
(Gibo 16:25-40) Alagad kan kamatangaan na nin banggi, namimibi si Pablo asin Silas saka nag-aawit nin pag-umaw sa Diyos, asin nagdadangog sa sainda an mga preso. 26 Bigla na sana, nagkaigwa nin makusog na linog, mala ta nagkayurugyog an mga pundasyon kan presuhan. Bigla man na nagkaburuksan an gabos na pinto, asin nagkatarangkas an mga kadena kan gabos na preso. 27 Kan mapagmata an bantay kan presuhan asin mahiling niyang burukas an mga pinto kaini, hinugkot niya an saiyang espada asin gusto nang maghugot, huling naghuhuna siya na nakadulag an mga preso. 28 Alagad nagkurahaw si Pablo: “Dai mo iyan paggibuhon, ta yaon kami gabos digdi!” 29 Kaya nagpakua siya nin mga ilaw saka duminalagan pasiring ki Pablo asin Silas, asin nagtatakig siyang luminuhod sa atubangan ninda. 30 Ilinuwas niya sinda asin sinabi: “Mga Ginoo, ano an dapat kong gibuhon para maligtas?” 31 Sinabi ninda: “Magtubod ka sa Kagurangnan na Jesus, asin maliligtas ka, ika saka an mga kairiba mo sa harong.” 32 Dangan ipinahayag ninda an tataramon ni Jehova sa saiya asin sa gabos na kairiba niya sa harong. 33 Asin iiniba niya sinda kan mismong oras na iyan kan banggi saka hinugasan an saindang mga lugad. Pagkatapos, siya asin an gabos na kairiba niya sa harong tulos na binawtismuhan. 34 Dinara niya sinda sa saiyang harong saka hinandaan nin kakanon sa lamesa, asin ngunyan na nagtubod na siya sa Diyos, ugmahon siya pati an gabos na kairiba niya sa harong. 35 Kan aga na, nagsugo nin mga guwardiya an mga mahistrado sibil tanganing sabihon sa saiya: “Paluwasa na an mga lalaking idto.” 36 Ipinaisi ini ki Pablo kan bantay sa presuhan, na sinasabi: “An mga mahistrado sibil nagsugo nin mga tawuhan tanganing palibrehon kamong duwa. Kaya puwede na kamong lumuwas, libre na kamo.” 37 Alagad sinabi ni Pablo sa sainda: “Hinampak ninda kami sa publiko na dai pa nasesentensiyahan, dawa ngani mga Romano kami, tapos iprineso pa. Ngunyan gusto ninda kaming paluwason nin sekreto? Dai puwede! Magdigdi sinda asin ibanan ninda kami paluwas.” 38 Sinabi kan mga guwardiya an mga tataramon niyang ini sa mga mahistrado sibil. Nagkatarakot an mga ini kan maisihan nindang mga Romano sinda. 39 Kaya nagduruman an mga opisyal asin naghagad nin dispensa sa sainda, asin pagkatapos sindang ibanan paluwas sa presuhan, pinakiulayan sinda kan mga ini na maghali sa siyudad. 40 Alagad pagkaluwas ninda sa presuhan, nagduman sinda sa harong ni Lydia; asin kan mahiling ninda an mga tugang, pinakusog ninda an mga ini dangan naghali na sinda.
DISYEMBRE 24-30
KAYAMANAN NA YAON SA TATARAMON NIN DIYOS | GIBO 17-18
“Arugon si Apostol Pablo sa Paghuhulit Asin Pagtutukdo”
(Gibo 17:2, 3) Kaya uyon sa napagkatudan ni Pablo naglaog siya duman, asin sa tulong magkasurunod na sabbath nakipagrasunan siya sa sainda basado sa Kasuratan, 3 na ipinapaliwanag asin pinapatunayan paagi sa mga nakasurat diyan na an Cristo kaipuhan na magsakit asin bumangon hali sa mga gadan, asin sinasabi niya: “Iyo ini an Cristo, ining Jesus na ibinabalangibog ko sa saindo.”
nwtsty study notes sa Gi 17:2, 3
nakipagrasunan: Dai sana sinabi sa sainda ni Pablo an dapit sa maugmang bareta. Ipinaliwanag niya iyan asin nagtao nin mga ebidensiya na basado sa Kasuratan, buot sabihon, hali sa ipinasabong na Hebreong Kasuratan. Dai sana niya binasa an Kasuratan; nakipagrasunan o nangatanusan siya sa mga tawo, asin ibinagay niya an saiyang pangangatanusan sa nagdadangog. An Griegong pandiwa (verb) na di·a·leʹgo·mai tinawan nin kahulugan na “magrinibayan nin mga tataramon; makipag-ulay; magtukar.” Nagpaparisa iyan nin pakikikomunikar sa mga tawo. Ginamit man an Griegong tataramon na iyan sa Gi 17:17; 18:4, 19; 19:8, 9; 20:7, 9.
pinapatunayan paagi sa mga nakasurat: An Griegong termino literal na nangangahulugan na “ibugtak harani sa (ilaag sa kataid).” Posibleng ipinaparisa kaini na maingat na ikinumparar ni Pablo an mga propesiya dapit sa Mesiyas sa Hebreong Kasuratan asin an mga pangyayari sa buhay ni Jesus, na ipinapahiling kun paano nautob ni Jesus an mga propesiyang idto.
(Gibo 17:17) Kaya nagpuon siyang makipagrasunan duman sa sinagoga sa mga Judio asin sa iba pang mga tawong nagsasamba sa Diyos, asin iyo man an ginibo niya aroaldaw duman sa may saudan sa siisay man na maabutan niya.
nwtsty study note sa Gi 17:17
saudan: Mahihiling sa norteng-sulnupan kan Acropolis, an saudan (sa Griego, a·go·raʹ) sa Atenas may hiwas na mga 5 ektarya. An saudan bako sanang lugar para magbakal asin magpabakal. Iyan man an sentro kan ekonomiya, pulitika, saka kultura kan siyudad. Gustong-gusto kan mga taga Atenas na magtiripon-tipon sa matawong lugar na ini para mag-urulay-ulay.
(Gibo 17:22, 23) Nagtindog ngunyan si Pablo sa tahaw kan Areopago asin nagsabi: “Mga taga Atenas, nahihiling ko sa saindo na an debosyon nindo sa mga diyos mas urog kisa sa iba. 23 Halimbawa, mantang naglalakaw-lakaw ako asin maingat na pinagmamasdan an mga sinasamba nindo, nahiling ko man an sarong altar na may nakaukit, ‘Sa Diyos na Dai Midbid.’ Kun siring, an sinasamba nindo na dai nindo midbid, siya an ipinapamidbid ko sa saindo.
nwtsty study note sa Gi 17:22, 23
Sa Diyos na Dai Midbid: An Griegong mga termino na A·gnoʹstoi the·oiʹ kabtang kan sarong inskripsiyon sa sarong altar sa Atenas. Ipinahiling kan mga taga Atenas an saindang pagkatakot sa mga diyos paagi sa pagtugdok nin dakul na templo asin altar, naggibo pa ngani sinda nin mga altar para sa mga bakong totoong persona, arog kan Kabantugan, Kabinian, Kusog, Pangungumbinsir, asin Pagkahirak. Posibleng natatakot sinda na tibaad may malingawan sindang sarong diyos asin maanggot ini sa sainda, kaya nagbugtak sinda nin altar para “Sa Diyos na Dai Midbid.” Paagi sa altar na iyan, inadmitir kan mga tawo na nag-eeksister an sarong Diyos na dai ninda midbid. May kahusayan na ginamit ni Pablo an altar na ini bilang basehan kan saiyang paghuhulit para iintrodusir sa mga nagdadangog an dapit sa Diyos—an tunay na Diyos—na dai pa ninda midbid kan panahon na idto.
Maghanap nin Espirituwal na Kayamanan
(Gibo 18:18) Alagad nagdanay si Pablo sa Corinto nin pira pang aldaw, tapos nagpaaram na siya sa mga tugang asin naglayag pasiring sa Siria kaiba si Priscila asin Aquila. Pinaputulan niya an saiyang buhok sa Cencrea, huli ta may ginibo siyang promesa.
Tampok na mga Kabtang sa Libro nin Gibo
18:18—Anong kapanugaan an ginibo ni Pablo? Isinusuherir nin nagkapirang iskolar na naggibo si Pablo nin kapanugaan bilang Nazareo. (Bil. 6:1-21) Minsan siring, dai sinasabi kan Biblia kun ano an kapanugaan ni Pablo. Dugang pa, mayong sinasambit an Kasuratan kun baga an kapanugaan ginibo bago o pakatapos na makombertir si Pablo o kun pinoponan o tinatapos nia kaidto an kapanugaan. Ano man an kamugtakan, an paggibo nin siring na kapanugaan bakong kasalan.
(Gibo 18:21) asin nagpaaram siya saka nagsabi sa sainda: “Kun bubuuton ni Jehova, mabalik ako digdi sa saindo.” Dangan hali sa Efeso nagbiyahe siya sa dagat asin
nwtsty study note sa Gi 18:21
Kun bubuuton ni Jehova: Sarong ekspresyon na nagduduon kan pangangaipong isaisip an kabutan nin Diyos pag may ano man na gigibuhon o pinaplanong gibuhon. Pirming isinaisip ni apostol Pablo an prinsipyong ini. (1Co 4:19; 16:7; Heb 6:3) Dinagka man kan disipulong si Santiago an saiyang mga parabasa na sabihon: “Kun bubuuton ni Jehova, mabubuhay kami asin gigibuhon mi ini o iyan.” (San 4:15) An ekspresyon na iyan dapat na bako sanang sagkod sa taram; an siisay man na sinserong nagsasabing “kun bubuuton ni Jehova” dapat na maghinguwang humiro kauyon kan kabutan ni Jehova. Dai man kaipuhan na pirming sambiton iyan nin makusog, kundi sa parati igo nang nasa puso iyan.—Hilingon an study notes sa Gi 21:14; 1Co 4:19; San 4:15 asin an Seksiyon 2 kan buklet na Giya sa Pag-adal sa Tataramon nin Diyos.
Pagbasa sa Bibliya
(Gibo 17:1-15) Nagbiyahe sinda ngunyan asin nag-agi sa Amfipolis asin Apolonia dangan nag-abot sinda sa Tesalonica, kun sain igwa nin sinagoga kan mga Judio. 2 Kaya uyon sa napagkatudan ni Pablo naglaog siya duman, asin sa tulong magkasurunod na sabbath nakipagrasunan siya sa sainda basado sa Kasuratan, 3 na ipinapaliwanag asin pinapatunayan paagi sa mga nakasurat diyan na an Cristo kaipuhan na magsakit asin bumangon hali sa mga gadan, asin sinasabi niya: “Iyo ini an Cristo, ining Jesus na ibinabalangibog ko sa saindo.” 4 Bilang resulta, may nagkapira sa sainda na nagturubod saka nakiibanan ki Pablo asin Silas, asin nagturubod man an kadakul na Griego na nagsasamba sa Diyos, kaiba an dakul na midbid na babayi. 5 Alagad nauri an mga Judio, asin nagkua sinda nin mga barumbadong lalaki na mga istambay sa saudan tapos nagbilog nin sarong grupo dangan nagpuon na mambulabog sa siyudad. Puwersahan nindang linaog an harong ni Jason asin hinanap si Pablo saka Silas tanganing iluwas an mga ini sa mga tawong nagdaraguso duman. 6 Kan dai ninda sinda nakua, ginuyod ninda si Jason asin an nagkapira sa mga tugang saka dinara an mga ini sa mga tagapamahala kan siyudad, na nagkukururahaw: “Yaon man digdi su mga lalaking nagparibok sa bilog na kinaban, 7 asin pinadagos sinda ni Jason bilang mga bisita niya. Gabos sinda nagkokontra sa mga pagbuot ni Cesar, na sinasabing igwa pa daang sarong hadi, si Jesus.” 8 Kan madangog ini kan mga tawo asin kan mga tagapamahala kan siyudad, naalarma sinda; 9 asin pagkatapos pabayadon nin piyansa si Jason asin an iba pa, pinalibre ninda an mga ini. 10 Kinabanggihan, tulos na pinaduman kan mga tugang si Pablo asin Silas sa Berea. Pag-abot ninda duman, naglaog sinda sa sinagoga kan mga Judio. 11 An mga taga Berea mas marahayan kaisipan kisa sa mga taga Tesalonica, huli ta interesadong marhay sindang nagdangog kan mensahe, na maingat na sinisiyasat an Kasuratan aroaldaw tanganing aramon kun baga totoo an mga bagay na nadangog ninda. 12 Kaya dakul sa sainda an nagturubod, pati na an dakul na iginagalang na Griegong mga babayi asin an nagkapira sa mga lalaki. 13 Alagad kan maaraman kan mga Judio sa Tesalonica na ibinabalangibog man ni Pablo sa Berea an tataramon nin Diyos, nagduruman sinda asin sinutsutan an mga tawo kaya nagkaaranggot an mga ini. 14 Dangan tulos na isinubol kan mga tugang si Pablo asin pinaduman sa may dagat, pero nagpawalat si Silas asin Timoteo. 15 Alagad, an mga nag-iba ki Pablo ihinatod siya sagkod sa Atenas, dangan nagbaralik sinda pagkatapos na tugunon ni Pablo na sabihan si Silas asin Timoteo na kun puwede magduman tulos an mga ini sa saiya.
DISYEMBRE 31–ENERO 6
KAYAMANAN NA YAON SA TATARAMON NIN DIYOS | GIBO 19-20
“Ingatan Nindo an Saindong Sadiri Asin an Bilog na Aripumpon”
(Gibo 20:28) Ingatan nindo an saindong sadiri asin an bilog na aripumpon, huli ta ninombrahan kamo kan banal na espiritu na magin mga paraataman ninda, tanganing pasturan an kongregasyon nin Diyos, na binakal niya kan dugo kan saiyang sadiring Aki.
“Pastoran Nindo an Aripompon nin Dios na Nasa Saindong Pangangataman”
5 An apostol nagsurat na an kamagurangan dapat na ‘magpastor sa aripompon nin Dios na nasa saindang pangangataman.’ Mahalagang marhay nanggad na midbidon ninda na an aripompon sadiri ni Jehova asin Jesu-Cristo. Maninimbag an kamagurangan sa kun paano ninda pinangatamanan an mga karnero nin Dios. Ipamugtak na pinakiolayan ka nin dayupot na katood mo na asikasohon an saiyang mga aki mantang mayo sia. Bako daw na aasikasohon mong marhay sinda asin papakakanon? Kun magkahelang an saro, bako daw na sisiertohon mong ikapabolong sia? Kaagid kaiyan, dapat “na pastoran [kan kamagurangan] an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) Isinasaisip ninda na an kada karnero binakal kan mahalagang marhay na dugo ni Cristo Jesus. Huling maninimbag an kamagurangan, pinapakakan, pinoprotehiran, asin pinangangatamanan ninda an aripompon.
(Gibo 20:31) “Kaya magdanay kamong mata asin girumdumon nindo na aldaw-banggi, sa laog nin tulong taon, dai lamang ako nagpundo sa pagsadol sa lambang saro sa saindo na may kasabay na mga luha.
Mga Elder—‘Mga Kapwa Trabahador Para sa Satong Kagayagayahan’
15 Kalabot sa pagigin pastor an pagpapagal. Kun minsan, an mga elder dai napapaturog kun banggi huling sinda nahahadit asin namimibi para sa aripumpon nin Diyos o nagtatao nin espirituwal na suporta sa mga kapagtubod. (2 Cor. 11:27, 28) Pero, lubos asin maugmang inuutob kan mga elder an responsabilidad ninda, arog ni Pablo. Nagsurat siya sa mga taga Corinto: ‘Sa urog na kaugmahan ako maggagamit [kan] sako man sana asin mapagamit manungod sa saindong mga kalag.’ (2 Cor. 12:15) Iyo, huli sa pagkamuot sa mga tugang, lubos na ginamit ni Pablo an saiyang sadiri tanganing pakusugon sinda. (Basahon an 2 Corinto 2:4; Fil. 2:17; 1 Tes. 2:8) Bako nanggad makangangalas na namutan na marhay kan mga tugang si Pablo!—Gui. 20:31-38.
(Gibo 20:35) Sa gabos na bagay, ipinahiling ko sa saindo na paagi sa arog kaining pagpapagal dapat nindong tabangan an mga maluya asin dapat nindong tandaan an mga tataramon kan Kagurangnan na Jesus, kan siya mismo magsabi: ‘Igwang urog na kaugmahan sa pagtao kisa sa pag-ako.’”
bt 172 ¶20
“Malinig Ako sa Dugo nin Gabos na Tawo”
20 Lain na marhay an nagin buhay ni Pablo kumpara sa mga tawo na sa pag-abot nin panahon aapihon an aripumpon. Nagtrabaho siya para suportaran an sadiri niya tanganing dai makapagabat sa kongregasyon. An mga paghihinguwa niya bako para sa personal na pakinabang kundi para sa mga kapagtubod niya. Dinagka ni Pablo an kamagurangan sa Efeso na magin mapagsakripisyo. “Dapat nindong tabangan an mga maluya,” an sabi niya, “asin dapat nindong tandaan an mga tataramon kan Kagurangnan na Jesus, kan siya mismo magsabi: ‘Igwang urog na kaugmahan sa pagtao kisa sa pag-ako.’”—Gibo 20:35.
Maghanap nin Espirituwal na Kayamanan
(Gibo 19:9) Alagad kan an nagkapira magmatagas asin habong magtubod, na nagtataram nin mararaot na bagay sa atubangan kan mga tawo laban sa Dalan, huminali siya sa sainda asin iiniba niya an mga disipulo, asin duman na siya sa awditoryum kan eskuwelahan ni Tirano nagtatao nin mga diskurso aroaldaw.
bt 161 ¶11
“Padagos na Naglalakop Asin Nagigin Mapuwersa” Dawa Kinokontra
11 Posibleng aroaldaw na nagdiskurso si Pablo sa awditoryum kan eskuwelahan na idto magpuon nin mga alas 11:00 nin aga sagkod mga alas 4:00 nin hapon. (Gibo 19:9) Posibleng iyan an pinakamatuninong pero an pinakamainit na oras kan aldaw kun sain dakul an nagpupundo sa saindang pagtrabaho para magkakan asin magpahingalo. Imahinaron na kun talagang sinunod ni Pablo an iskedyul na iyan sa laog nin duwang taon, posibleng labing 3,000 na oras an nagamit niya sa pagtutukdo. Kaya iyan an sarong rason kun taano ta an tataramon ni Jehova padagos na naglalakop asin nagigin mapuwersa. Mahigos asin madaling makibagay si Pablo. Binago niya an saiyang iskedyul sa ministeryo tanganing maiangay niya iyan sa kamugtakan kan mga tawo sa komunidad. Ano an nagin resulta? “An gabos na nag-iistar sa probinsiya nin Asia nakadangog kan tataramon kan Kagurangnan, mga Judio saka mga Griego.” (Gibo 19:10) Talagang lubos siyang nagpatotoo!
(Gibo 19:19) Sa katunayan, an dakul sa mga nagsasagibo nin mahika tiniripon an saindang mga libro asin sinurulo iyan sa atubangan kan gabos. Kinarkulo ninda an kantidad kaiyan asin uminabot ini sa 50,000 na sinsilyong pirak.
bt 162-163 ¶15
“Padagos na Naglalakop Asin Nagigin Mapuwersa” Dawa Kinokontra
15 Huli sa kasusupgan na inabot kan mga aki ni Seva, dakul an nagkatarakot sa Diyos, mala ta dakul an nagturubod asin binayaan an saindang espiritistikong mga gibo. Grabe an impluwensiya kan pagmamahika sa kultura kan mga taga Efeso. Ordinaryo na sana an pangkukulam saka mga anting-anting, siring man an mga orasyon, na sa parati nakasurat. Dakul na taga Efeso an napahiro ngunyan na iluwas an saindang mga libro sa pagmamahika asin suluon iyan sa atubangan kan publiko—maski ngani minalataw na ribo-ribong dolyar an kantidad kaiyan. Sinabi ni Lucas: “Kaya, sa pambihirang paagi an tataramon ni Jehova padagos na naglalakop asin nagigin mapuwersa.” (Gibo 19:17-20) Saro nanggad na dakulang kapangganahan kan katotoohan laban sa kaputikan saka demonismo! An maimbod na mga tawong idto nagtao nin marahay na arugan para sa sato ngunyan. Nabubuhay man kita sa kinaban na impluwensiyadong marhay nin espiritismo. Kun may mga gamit kita na konektado sa espiritismo, arugon ta an ginibo kan mga taga Efeso—suluon ta tulos iyan! Dapat tang rayuan asin dai panghinayangan an siring na makababalding mga bagay.
Pagbasa sa Bibliya
(Gibo 19:1-20) Mantang nasa Corinto si Apolos, nagbaklay si Pablo pasiring sa Efeso na nag-aagi sa kabubuldan na parte kan rehiyon nin Asia. Pag-abot niya duman nanumpungan niya an nagkapirang disipulo 2 asin hinapot niya sinda: “Nag-ako kamo nin banal na espiritu kan nagturubod kamo?” Nagsimbag sinda sa saiya: “Banal na espiritu? Dai mi lamang nadangog na igwa kaiyan.” 3 Kaya sinabi niya: “Kun siring, sa anong bawtismo kamo binawtismuhan?” Nagsimbag sinda: “Sa bawtismo ni Juan.” 4 Sinabi ni Pablo: “Binawtismuhan ni Juan an mga tawo bilang simbolo kan saindang pagsulsol, na sinasabi sa sainda na magtubod sa saro na maabot kasunod niya, an buot sabihon, ki Jesus.” 5 Pagkadangog kaini, nagpabawtismo sinda sa ngaran kan Kagurangnan na Jesus. 6 Asin kan ipatong ni Pablo an saiyang mga kamot sa sainda, buminaba sa sainda an banal na espiritu, asin nagpuon sindang magtaram sa lain-lain na lengguwahe saka magpropesiya. 7 Bali 12 lalaki sinda gabos. 8 Sa laog nin tulong bulan, naglalaog siya sa sinagoga asin nagtataram nin daing takot, na nagtatao nin mga diskurso manungod sa Kahadian nin Diyos asin naggagamit nin nakakakumbinsir na mga pangangatanusan. 9 Alagad kan an nagkapira magmatagas asin habong magtubod, na nagtataram nin mararaot na bagay sa atubangan kan mga tawo laban sa Dalan, huminali siya sa sainda asin iiniba niya an mga disipulo, asin duman na siya sa awditoryum kan eskuwelahan ni Tirano nagtatao nin mga diskurso aroaldaw. 10 Nagpadagos ini sa laog nin duwang taon, kaya an gabos na nag-iistar sa probinsiya nin Asia nakadangog kan tataramon kan Kagurangnan, mga Judio saka mga Griego. 11 Asin an Diyos padagos na naggigibo nin makangangalas na mga milagro paagi ki Pablo, 12 mala ta pati an mga bandana asin bado na ginamit niya dinadara sa mga may hilang, asin nagkakaharali an mga hilang ninda, saka nagruruluwas an maraot na mga espiritu. 13 Alagad an nagkapirang Judio na naglilibot asin nagpapalayas nin mga demonyo nagpurbar man na gamiton an ngaran kan Kagurangnan na Jesus sa mga sinasaniban nin maraot na mga espiritu; arog kaini an sinasabi ninda: “Sa ngaran ni Jesus na ihinuhulit ni Pablo, pinagbubutan ko kamong lumuwas.” 14 Pitong aking lalaki kan Judiong panginot na saserdote na si Seva an naggigibo kaini. 15 Alagad bilang simbag sinabi sa sainda kan maraot na espiritu: “Midbid ko si Jesus asin pamilyar ako ki Pablo; pero kamo, siisay kamo?” 16 Dangan bigla sindang linuksuhan kan tawong may maraot na espiritu, asin sunod-sunod sindang ginumol saka dinaog kaini, mala ta nagdurulag sinda paluwas sa harong na nagkahurubaan asin rulugad. 17 Naaraman ini kan gabos na Judio saka Griego na nakaistar sa Efeso; nakamati sinda gabos nin takot, asin padagos na nauumaw an ngaran kan Kagurangnan na Jesus. 18 Asin dakul sa mga nagturubod an hayag na nagtutuga kan saindang mga kasalan asin nagsasaysay kan saindang mararaot na gibo. 19 Sa katunayan, an dakul sa mga nagsasagibo nin mahika tiniripon an saindang mga libro asin sinurulo iyan sa atubangan kan gabos. Kinarkulo ninda an kantidad kaiyan asin uminabot ini sa 50,000 na sinsilyong pirak. 20 Kaya, sa pambihirang paagi an tataramon ni Jehova padagos na naglalakop asin nagigin mapuwersa.