Kun Taano ta Maninigo Nindong Maaraman an Katotoohan Manongod ki Abraham

ABRAHAM—saro daw na eroe sa mitolohiya o sarong tunay na propeta? Gurano kahalaga kan simbag sa hapot na iyan? Sono sa kronolohiya kan Biblia, si Abraham nabuhay kaidtong mga 4,000 na taon na an nakaagi. Kun siring tibaad mangatanosan an iba, ‘Ano man an halaga kun baga sia talagang nabuhay o dai?’

Bueno, an kabanga sa populasyon kan kinaban miembro nin mga relihiyon na naghihingakong nagtutubod ki Abraham. An 1988 Britannica Book of the Year ilinilista an 32.9 porsiento kan kinaban bilang Kristiano, 17.2 porsientong Muslim, asin 0.4 porsientong Judio, asin si Abraham prominenteng tawo sa gabos na tolong relihiyon na ini. Tunay nanggad, an sinserong mga nagtutubod sa mga relihiyon na ini maninigong magmawot na seguradohon na an itinokdo sa sainda manongod ki Abraham iyo an katotoohan. Minsan an mga miembro nin ibang relihiyon o an mga mayo nin relihiyon maninigong magkainteres. Taano?

Huli ta an Biblia nagsasabi na si Abraham sarong propeta. (Genesis 20:7) Iyan termino sa Biblia na ginagamit para sa sarong representante sa pagtaram nin Dios na may mensahe para sa ibang tawo. Kun si Abraham tunay na propeta, an gabos makikinabang. Taano? Huli ta an mensaheng inako nia may maogmang bareta para sa bilog na katawohan. (Galacia 3:8) Sono sa Biblia, pinanugaan nin Dios si Abraham: “An gabos na pamilya kan daga magbebendisyon nanggad kan saindang sadiri paagi sa saimo.”—Genesis 12:3.

Iyan makangangalas na panuga, asin iyan nadangog ni Abraham na isinabi sa kisuerra duwa pang okasyon. (Genesis 18:18; 22:18) Tanganing maotob iyan, bubuhayon ngani liwat nin Dios hale sa mga gadan an mga representante nin mga pamilyang nagadan. An buhay magigin tunay na bendisyon para sa mga binuhay liwat na iyan, huli ta an kadaklan sa sainda mabuwelta sa sarong kamugtakan sa daga na nakaaagid sa Paraiso na iwinara nin tawo kan enot. Dangan, totokdoan sinda kun paano kakamtan an bendisyon na buhay na daing katapusan.—Genesis 2:8, 9, 15-17; 3:17-23.

Sa ibong na lado, kun si Abraham saro sanang tawohan sa mitolohiya, mayo nin pasisikadan na tubudon an makangangalas na panugang saiyang inako. Dugang pa, kun an mga panuga sa Biblia dai masasarigan, an iba tibaad mangatanosan apabor sa lubos na pagdusay kan saindang sadiri sa mga kasingawan sa presenteng buhay. Arog kan isinurat kan saro sa enot na mga Kristiano: “Kun an mga gadan dai bubuhayon liwat, ‘magkarakan asin mag-irinom kita, huli ta sa aga magagadan kita.’ ”—1 Corinto 15:32.

Kun siring, nasa saindo an gabos na dahelan na siyasaton an hapot na, Si Abraham daw saro sanang eroe sa mitolohiya o sia daw sarong tunay na propeta? Tibaad makubhanan kamong maaraman an isinabi nin prominenteng mga klerigo kan ika-19 siglo manongod kaini. Mientras tanto, an mga arkeologo may makangangalas na mga nadiskobre na minaangat sa mga opinyon na iyan kan mga klerigo.