• Mga Mata ni Jairo—An Ginagamit Niya sa Paglilingkod sa Diyos
    An Torrengbantayan—2015 | Mayo 1

    • ISTORYA NIN BUHAY

      Mga Mata ni Jairo—An Ginagamit Niya sa Paglilingkod sa Diyos

      Isinaysay kan saiyang tugang na si Samuel Ruiz-Leon Arroyo

      Naiimahinar mo daw na mayo kang kontrol sa sadiri mong hawak apuwera sa saimong mga mata? Arog kaiyan an kamugtakan kan tugang kong si Jairo. Pero para sa saiya may kahulugan an buhay niya. Bago ko sabihon kun taano ta para sa saiya maugma pa man giraray an mabuhay, iistorya ko nguna an saiyang buhay.

      Ipinangaki si Jairo na may spastic quadriplegia, sarong klase nin cerebral palsy.a Huli kaini, haros mayo siyang kontrol sa saiyang hawak. An saiyang hutok dai nakakatao nin malinaw na signal sa saiyang mga kalamnan, kaya dai niya makontrol an pagbiribid kan saiyang mga kalamias. Kun minsan, an biglang mga pag-igtad nagigin dahilan na makulgan niya mismo an saiyang sadiri. Puwede man makulgan an mga tawong nasa harani kun bako sindang alisto. Makamumundo na sa parati kaipuhan na igapos an saiyang mga takyag asin tabay sa wheelchair niya tanganing malikayan an arog kaiyan na mga aksidente.

      INAGIHAN NA SAKIT MANTANG NAGDADAKULA

      Grabeng kulog an namatian ni Jairo mantang nagdadakula siya. Tulong bulan siya kan magpuon siyang atakehon nin pangingisay asin nawawaran siya nin malay huli kaiyan. Sa parati, higot siyang kukuguson ni Nanay asin tulos na idadalagan sa ospital, sa paghunang gadan na siya.

      Huli sa parating paghirigot asin pananaragas kan kalamnan, naraot an porma kan mga tulang ni Jairo. Kan siya 16 anyos, nalapuan siya sa may piad asin kinaipuhan an mayor na operasyon sa saiyang lapi sagkod piad. Nagigirumduman ko pa an burubangging paghibi ni Jairo huli sa kulog kan siya nagpaparahay.

      Huli sa grabeng diperensiya sa hawak ni Jairo, nag-aasa siya sa iba para sa gabos na kaipuhan niya sa aroaldaw arog kan pagkakan, pagsangli nin bado, asin paghigda. Si Nanay saka si Tatay an parating naggigibo kaini. Dawa ngani pirming kaipuhan ni Jairo an tabang, parating ipinapagirumdom sa saiya kan samong mga magurang na an buhay niya dai sana nakadepende sa mga tawo kundi sa Diyos man.

      SARONG PAAGI NIN KOMUNIKASYON

      Mga Saksi ni Jehova an samong mga magurang, asin puon pa sa pagkaumboy binabasahan na ninda si Jairo kan mga istorya sa Bibliya. Haloy na nindang aram na mas makahulugan an buhay kun an saro may marahay na relasyon sa Diyos. Si Jairo garo baga nakapreso sa sarong hawak na maluya asin pirming nangingisay, pero igwa siya nin maugma saka masarig na paglaom sa maabot. Minsan siring, parati nindang iniisip-isip kun nasasabutan ni Jairo an kaaraman hali sa Bibliya.

      Sarong aldaw kan aki pa si Jairo, hinapot siya ni Tatay, “Jairo, puwede tabing kaulayon mo ako?” Sinabi niya pa, “Kun talagang padaba mo ako, gigibuhon mo iyan!” Mantang nakikimahirak sa saiya si Tatay na magtaram dawa saro sanang tataramon, napahibi si Jairo.