Nagkabirigla nanggad an mga babayi kan mahiling nindang dai nang laog an lulubngan! Duminalagan si Maria Magdalena pasiring duman “ki Simon Pedro saka sa disipulong namumutan ni Jesus”—si apostol Juan. (Juan 20:2) Pero, an ibang mga babayi na yaon sa lulubngan nakahiling nin sarong anghel. Asin sa laog kan lulubngan may saro pang anghel na “nakasulot nin halabang badong puti.”—Marcos 16:5.

An saro sa mga anghel nagsabi sa sainda: “Dai kamo matakot, huli ta aram kong hinahanap nindo si Jesus na pinadusahan nin kagadanan sa harigi. Mayo siya digdi, huli ta ibinangon siya, arog kan sinabi niya. Madya, hilinga an pinagbugtakan sa saiya. Asin maghali tulos kamo saka sabihon nindo sa mga disipulo niya na ibinangon siya hali sa mga gadan, huli ta uya! nag-inot na siya pasiring sa Galilea.” (Mateo 28:5-7) Kaya an mga babayi na “nagtatakig asin dai maipaliwanag an namamatian” nagdaralagan para baretaan an mga disipulo.—Marcos 16:8.

Sa oras na ini, nanumpungan na ni Maria si Pedro asin Juan. Naghahangos-hangos pa siya kan ibareta niya: “Kinua ninda sa lulubngan an Kagurangnan, asin dai mi aram kun sain ninda siya ibinugtak.” (Juan 20:2) Sabay na duminalagan si Pedro asin Juan pasiring sa lulubngan. Mas marikas si Juan kaya nainot ining nakaabot. Nagsirip siya duman asin nahiling niya an mga telang lino, pero dai siya naglaog.

Pag-abot ni Pedro, nagdiretso ini sa laog. Nahiling niya an mga telang lino asin an telang ipinampatos sa payo ni Jesus. Naglaog na ngunyan si Juan, asin naniwala siya sa sinabi ni Maria. Apisar kan nainot nang sinabi sa sainda ni Jesus, pareho nindang dai nasabutan na ibinangon na siya hali sa mga gadan. (Mateo 16:21) Nagpuli sinda, na dai naiintindihan an nangyari. Pero si Maria, na nagbalik sa lulubngan, nagpawalat.

Miyentras tanto, nagdadaralagan an ibang mga babayi para baretaan an mga disipulo na nabuhay na liwat si Jesus. Mantang nagdadaralagan sinda, sinabat sinda ni Jesus asin sinabihan: “Marahay na aldaw!” Sinda “nagsubsob sa atubangan niya” sa may pamitisan niya. Dangan sinabi ni Jesus: “Dai kamo matakot! Sige, baretaan nindo an mga tugang ko tanganing magpasiring sinda sa Galilea, asin mahihiling ninda ako duman.”—Mateo 28:9, 10.

Kasubago, kan naglinog asin nagpahiling an mga anghel, an mga suldados na yaon sa lulubngan “tinarakigan asin dai nakahiro.” Kan maulian sinda, nagpasiring sinda sa siyudad asin “ibinareta ninda sa mga panginot na saserdote an gabos na nangyari.” Dangan nakipag-ulay an mga saserdote sa kamagurangan kan mga Judio. Napagdesisyunan ninda na suhulan an mga suldados para itago an nangyari asin sabihon: “An saiyang mga disipulo nag-arabot na banggi asin hinabon siya mantang tururog kami.”—Mateo 28:4, 11, 13.

An mga Romanong suldados puwedeng mapadusahan nin kagadanan kun mapaturog mantang nagbabantay, kaya nangako an mga saserdote: “Kun makaabot ini [an pagputik ninda na nakaturog sinda] sa gobernador, ipapaliwanag mi ini sa saiya asin dai nindo kaipuhan na mahadit.” (Mateo 28:14) Kinua kan mga suldados an suhol asin sinunod an ipinapagibo kan mga saserdote. Kaya an bakong totoong istorya na hinabon daa an bangkay ni Jesus nakalakop sa mga Judio.

Si Maria Magdalena naghihibi pa man giraray sa may lulubngan. Kan magduko siya para magsirip duman, nakahiling siya nin duwang anghel na nakaputi! Nakatukaw sinda sa dating namumugtakan kan hawak ni Jesus, an saro sa may pamayuhan asin an saro sa may pamitisan. “Babayi, taano ta naghihibi ka?” an hapot ninda. Nagsimbag si Maria: “Kinua ninda an sakuyang Kagurangnan, asin dai ko aram kun sain ninda siya ibinugtak.” Nagsalingoy si Maria asin may nahiling siyang sarong persona. Inutro kaini an hapot kan mga anghel asin nagsabi: “Siisay an pighahanap mo?” Huling iniisip ni Maria na iyo idto an hardinero, nagsabi siya: “Ginoo, kun kinua mo siya, sabihon mo sa sako kun sain mo siya ibinugtak, asin kukuanon ko siya.”—Juan 20:13-15.

An totoo, an kaulay ni Maria iyo an binuhay liwat na si Jesus, pero kan oras na ini dai niya siya namidbid. Minsan siring, kan apudon siya kaining, “Maria!” naaraman niya na si Jesus idto, huling namidbidan niya an paagi kan pagtaram kaini sa saiya. “Rabboni!” (na nangangahulugan “Paratukdo!”), an ugmahon na kurahaw ni Maria. Alagad, huling nahahadit siya na mapalangit na si Jesus, pinugol niya ini. Huli kaini, sinabihan siya ni Jesus: “Dai mo ako pagpugulon, huli ta dai pa ako nakakasakat sa Ama. Alagad magduman ka sa sakuyang mga tugang asin sabihon mo sa sainda, ‘Masakat ako sa sakuyang Ama asin saindong Ama, sa sakuyang Diyos asin saindong Diyos.’”—Juan 20:16, 17.

Nagdalagan si Maria pasiring sa pinagtitiripunan kan mga apostol asin iba pang mga disipulo. Sinabi niya sa sainda: “Nahiling ko an Kagurangnan!” arog kan sinabi na sa sainda kan iba pang mga babayi. (Juan 20:18) Pero, “para sa sainda garo baga kalokohan” an baretang iyan.—Lucas 24:11.

Kan Domingo, Nisan 16, pinangluluyahan nin buot an mga disipulo. Dai ninda nasasabutan an kahulugan kan daing laog na lulubngan. (Mateo 28:9, 10; Lucas 24:11) Paghaloy-haloy kan aldaw na iyan, si Cleopas asin an saro pang disipulo naghali sa Jerusalem para magpa-Emaus, na mga 11 kilometros an rayo.

Kan naglalakaw sinda, pinag-uulayan ninda an mga nangyari. Dangan may estrangherong nagsabay sa sainda. Naghapot ini: “Ano ining mga bagay na pinagdidiskusyunan nindo mantang naglalakaw?” Nagsimbag si Cleopas: “Ano dayo kang nag-iistar nin solo sa Jerusalem kaya dai ka nakakaisi kan mga bagay na nangyari duman kaining nag-aging mga aldaw?” Naghapot an estranghero: “Anong mga bagay?”—Lucas 24:17-19.

“An mga bagay mapadapit ki Jesus na Nazareno,” an sabi ninda. “Naglalaom kami na an tawong ini an magliligtas sa Israel.”—Lucas 24:19-21.

Dangan isinaysay man ni Cleopas asin kan kaibanan niya an mga bagay na nangyari kan mismong aldaw na ini. Sinabi ninda na nahiling kan nagkapirang babayi na nagduman sa lulubngan ni Jesus na dai na idtong laog asin na an mga babaying ini may nahiling na pambihira—mga anghel na nagsabing buhay si Jesus. Sinabi ninda na may iba pang nagduman sa lulubngan asin “naabutan ninda iyan nin siring sa sinabi kan mga babayi.”—Lucas 24:24.

Malinaw nanggad na dai masabutan kan duwang disipulo kun ano an kahulugan kan mga nangyari. Nagsimbag na may awtoridad an estranghero para itanos an saindang salang kaisipan, na nakakaapektar sa saindang puso: “Kamong mga dai naggagamit nin isip asin may mga pusong atrasadong marhay sa pag-ako kan gabos na bagay na itinaram kan mga propeta! Bako daw na kaipuhan na agihan kan Cristo an mga bagay na ini asin na maglaog siya sa saiyang kamurawayan?” (Lucas 24:25, 26) Dangan ipinaliwanag niya sa sainda an kahulugan kan dakul na bagay na sinambit sa Kasuratan dapit sa Cristo.

Sa katapos-tapusi, uminabot an tulo harani sa may Emaus. Gusto kan duwang disipulo na magdangog pa, kaya inagda ninda an estranghero: “Mag-iba ka na lang sa samo, ta pabanggi na asin nagdidiklom na.” Nag-uyon siyang mag-iba sa sainda, asin dai nahaloy mapamanggi na sinda. Pakapamibi kan estranghero, binaranga niya an tinapay asin itinao iyan sa sainda, dangan namidbidan ninda siya, alagad nawara siya sa paghiling ninda. (Lucas 24:29-31) Ngunyan sigurado na sindang buhay si Jesus!

Huli kaini, ugmahon na nagsabi sa kada saro an duwang disipulo: “Bakong naglalaad an satuyang mga puso kan kaulay niya kita sa dalan, mantang ipinapaliwanag niya sa sato nin malinaw an Kasuratan?” (Lucas 24:32) Nagdali-dali sinda pabalik sa Jerusalem, kun sain naabutan ninda an mga apostol asin an iba pang kairiba kan mga ini. Bago pa masabi ni Cleopas asin kan kaibanan niya an bareta, nadangog nindang nagsarabi an iba: “Talagang ibinangon an Kagurangnan, asin nagpahiling siya ki Simon!” (Lucas 24:34) Dangan isinaysay kan duwa kun paano nagpahiling si Jesus sa sainda. Iyo, sinda man nakahiling mismo sa binuhay liwat na si Jesus.

Ngunyan an gabos nagkabirigla—nagtunga si Jesus sa kuwartong pinagtitiripunan ninda! Garo baga masakit ining paniwalaan huling binaratan na ninda an mga pinto dahil sa takot sa mga Judio. Pero, nakatindog si Jesus sa tahaw mismo ninda. Mabuot siyang nagsabi: “Mapasaindo an katuninungan.” Pero nagkatarakot sinda. Arog kan nangyari sa sainda kaidto, “paghuna ninda sarong espiritu an nahihiling ninda.”—Lucas 24:36, 37; Mateo 14:25-27.

Para patunayan na totoo an nahihiling ninda o na bakong imahinasyon sana ini, kundi, na siya may pisikal na hawak, ipinahiling ni Jesus sa sainda an mga kamot niya saka mga bitis asin nagsabi: “Taano ta nariribaraw kamo, asin taano ta may mga pagduda sa puso nindo? Hilinga an sakuyang mga kamot asin mga bitis, ako mismo ini; dutan nindo ako asin masdan, huli ta an espiritu daing laman asin mga tulang na arog kan nahihiling nindo sa sako.” (Lucas 24:36-39) Grabe an saindang kaugmahan asin pagngalas pero medyo nagduduwa-duwa pa man giraray na maniwala.

Tanganing urog pa sindang tabangan na marealisar na totoo an nahihiling ninda, naghapot siya: “Igwa kamong makakakan diyan?” Tinawan siya nin sarong inasal na sira asin kinakan iyan. Dangan sinabi niya: “Ini an mga tataramon na sinabi ko sa saindo kan kaibanan pa nindo ako [bago ako magadan], na an gabos na bagay manungod sa sako na nasusurat sa Katugunan ni Moises asin sa Mga Propeta saka Mga Salmo kaipuhan na mautob.”—Lucas 24:41-44.

Tinabangan na ni Jesus si Cleopas asin an kaibanan kaini na masabutan an Kasuratan, asin ginibo niya man iyan ngunyan para sa gabos na nagtitiripon duman: “Ini an nasusurat: na an Cristo magsasakit asin sa ikatulong aldaw mabangon hali sa mga gadan, asin base sa saiyang ngaran, an pagsulsol para sa kapatawadan nin mga kasalan ihuhulit sa gabos na nasyon—magpuon sa Jerusalem. Magpapatotoo kamo mapadapit sa mga bagay na ini.”—Lucas 24:46-48.

Nagkataon na mayo kaidto si apostol Tomas. Kan sunod na mga aldaw, ugmahon na nagsabi sa saiya an iba: “Nahiling mi an Kagurangnan!” Nagsimbag si Tomas: “Sagkod na dai ko mahiling an mga pinakuan sa saiyang mga kamot asin mailaog ko diyan an sakuyang muro saka maisuksok ko an kamot ko sa saiyang tagiliran, dai nanggad ako maniniwala.”—Juan 20:25.

Pakalihis nin walong aldaw, nagtiripon giraray an mga disipulo sa laog nin harong na nakabarat an mga pinto, pero sa pagkakataon na ini yaon si Tomas. Nagtunga si Jesus sa tahaw ninda na may pisikal na hawak asin nagsabi: “Mapasaindo an katuninungan.” Dangan sinabi ni Jesus ki Tomas: “Ilaag mo digdi an saimong muro, asin hilingon mo an sakong mga kamot, tapos isuksok mo an saimong kamot sa sakuyang tagiliran, asin dai ka na magparaduda kundi magtubod ka.” Napakurahaw si Tomas: “Kagurangnan ko asin Diyos ko!” (Juan 20:26-28) Iyo, dai na siyang duda ngunyan na buhay si Jesus bilang sarong makapangyarihan na espiritung persona na iyo an representante ni Jehova Diyos.

“Dahil nahiling mo ako kaya ka nagtubod?” an sabi ni Jesus. “Maugma an mga dai nakahiling alagad nagtutubod.”—Juan 20:29.